Biblica® Open Lao Contemporary Version
1 ກະສັດ 9
ພຣະເຈົ້າຢາເວປາກົດແກ່ໂຊໂລໂມນ
(2ຂຄ 7:11-22)
ເມື່ອໂຊໂລໂມນໄດ້ສ້າງວິຫານຂອງພຣະເຈົ້າຢາເວ ແລະ ລາຊະວັງກັບສິ່ງອື່ນໆທັງໝົດໝົດຕາມທີ່ເພິ່ນປະສົງສຳເລັດແລ້ວ, ພຣະເຈົ້າຢາເວກໍໄດ້ປາກົດແກ່ໂຊໂລໂມນເປັນຄັ້ງທີສອງ, ເໝືອນທີ່ພຣະອົງໄດ້ປາກົດມາແລ້ວຢູ່ທີ່ກີເບໂອນ. ພຣະເຈົ້າຢາເວໄດ້ກ່າວກັບໂຊໂລໂມນວ່າ:
“ເຮົາໄດ້ຍິນຄຳອະທິຖານ ແລະ ຄຳອ້ອນວອນຂອງເຈົ້າຕໍ່ເຮົາແລ້ວ; ເຮົາໄດ້ຊຳລະວິຫານນີ້ໃຫ້ບໍລິສຸດ, ເຊິ່ງເຈົ້າໄດ້ສ້າງຂຶ້ນ ໂດຍສະຖາປະນານາມຂອງເຮົາໄວ້ຢູ່ທີ່ນັ້ນຕະຫລອດໄປ. ຕາຂອງເຮົາ ແລະ ໃຈຂອງເຮົາຈະຢູ່ທີ່ນັ້ນສະເໝີໄປ.
“ສ່ວນເຈົ້າ, ຖ້າເຈົ້າດຳເນີນຊີວິດຢູ່ຕໍ່ໜ້າເຮົາດ້ວຍໃຈສັດຊື່ສຸດຈະລິດ ແລະ ຊອບທຳເໝືອນຢ່າງດາວິດພໍ່ຂອງເຈົ້າ ແລະ ເຮັດຕາມຄຳສັ່ງທັງໝົດຂອງເຮົາ ແລະ ຮັກສາດຳລັດກັບກົດບັນຍັດຂອງເຮົາ, ເຮົາກໍຈະສະຖາປະນາລາຊະບັນລັງຂອງເຈົ້າເໜືອອິດສະຣາເອນຕະຫລອດໄປຕາມທີ່ເຮົາໄດ້ສັນຍາໄວ້ກັບດາວິດພໍ່ຂອງເຈົ້າວ່າ, ‘ເຈົ້າຈະບໍ່ຂາດຄົນປົກຄອງບັນລັງຂອງອິດສະຣາເອນເລີຍ’.
“ແຕ່ຖ້າເຈົ້າ ຫລື ລູກຫລານຂອງເຈົ້າຫັນໜີໄປຈາກເຮົາ ແລະ ບໍ່ໄດ້ປະຕິບັດຕາມຄຳສັ່ງ ແລະ ດຳລັດທີ່ເຮົາໄດ້ໃຫ້ແກ່ເຈົ້າ1 ແລ້ວຫັນໄປຮັບໃຊ້ພະທັງຫລາຍ ແລະ ກາບໄຫວ້ພະອື່ນ, ເຮົາກໍຈະຕັດອິດສະຣາເອນອອກຈາກດິນແດນທີ່ເຮົາໄດ້ມອບໃຫ້ພວກເຂົາ ແລະ ເຮົາຈະຖິ້ມວິຫານແຫ່ງນີ້ທີ່ເຮົາໄດ້ຊຳລະໃຫ້ບໍລິສຸດເພື່ອນາມຂອງເຮົາ. ອິດສະຣາເອນຈະກາຍເປັນທີ່ຢຽບຢາມ ແລະ ເປັນທີ່ເຢາະເຢີ້ຍໃນທ່າມກາງທຸກຄົນ. ວິຫານນີ້ຈະກາຍເປັນກອງຊາກຫັກພັງ. ທຸກຄົນທີ່ຜ່ານໄປມາກໍຈະຕົກຕະລຶງ ແລະ ຈະເຢາະເຢີ້ຍວ່າ, ‘ດ້ວຍເຫດໃດພຣະເຈົ້າຢາເວຈຶ່ງເຮັດຕໍ່ດິນແດນນີ້ ແລະ ວິຫານນີ້?’ ຄົນທັງຫລາຍຈະຕອບວ່າ, ‘ເພາະພວກເຂົາໄດ້ປະຖິ້ມພຣະເຈົ້າຢາເວ ພຣະເຈົ້າຂອງພວກເຂົາ, ຜູ້ໄດ້ນຳບັນພະບຸລຸດຂອງພວກເຂົາອອກມາຈາກເອຢິບ ແລະ ຫລົງໄຫລພະທັງຫລາຍ, ກາບໄຫວ້ ແລະ ຮັບໃຊ້ພະທັງຫລາຍ ດ້ວຍເຫດນັ້ນພຣະເຈົ້າຢາເວຈຶ່ງນຳໄພພິບັດທັງໝົດນີ້ມາສູ່ພວກເຂົາ’ ”.
ວຽກງານອື່ນໆຂອງໂຊໂລໂມນ
(2ຂຄ 8:1-18)
ໃນໄລຍະສຸດທ້າຍຂອງຊ່ວງເວລາຊາວປີ ເຊິ່ງໂຊໂລໂມນໄດ້ກໍ່ສ້າງອາຄານທັງສອງນີ້ ຄືວິຫານຂອງພຣະເຈົ້າຢາເວ ແລະ ລາຊະວັງ ກະສັດໂຊໂລໂມນໄດ້ມອບເມືອງຊາວແຫ່ງໃນຄາລີເລໃຫ້ກະສັດຮີຣາມແຫ່ງຕີເຣ ເພາະ ຮີຣາມໄດ້ຈັດຫາໄມ້ສີດາ ແລະ ໄມ້ແປກກັບຄຳທັງໝົດໃຫ້ຕາມທີ່ເພິ່ນຕ້ອງການ. ແຕ່ເມື່ອຮີຣາມໄດ້ອອກຈາກຕີເຣໄປເບິ່ງເມືອງເຫລົ່ານີ້ທີ່ໂຊໂລໂມນໄດ້ມອບໃຫ້ຕົນ, ຮີຣາມກໍບໍ່ພໍໃຈກັບເມືອງເຫລົ່ານັ້ນ. ຮີຣາມໄດ້ຖາມວ່າ, “ນ້ອງເອີຍ, ເຈົ້າມອບເມືອງແບບນີ້ໃຫ້ອ້າຍບໍ?” ເມືອງເຫລົ່ານັ້ນຈຶ່ງໄດ້ຊື່ວ່າດິນແດນກາບູນ2 ເຊິ່ງເປັນຊື່ທີ່ພວກເຂົາມີມາຈົນທຸກທຸກວັນນີ້. ຮີຣາມໄດ້ສົ່ງຄຳຈຳນວນ 120 ຕາລັນຕົນ3ໄປໃຫ້ຮີຣາມ.
ໂຊໂລໂມນໄດ້ເກນເອົາແຮງງານປະຊາຊົນມາກໍ່ສ້າງວິຫານຂອງພຣະເຈົ້າຢາເວ, ລາຊະວັງຂອງເພິ່ນເອງ, ເຮັດຄັນຄູ,4 ກຳແພງເຢຣູຊາເລັມ ແລະ ເມືອງຮາໂຊ, ເມກິດໂດ ແລະ ເກເຊ. (ຟາໂຣກະສັດແຫ່ງເອຢິບໄດ້ໂຈມຕີ ແລະ ເຂົ້າຢຶດເກເສ. ເພິ່ນໄດ້ຈູດເມືອງເກເຊຖິ້ມ. ເພິ່ນໄດ້ຂ້າຊາວການາອານທີ່ອາໄສຢູ່ໃນເມືອງ ແລະ ຕໍ່ມາກໍໄດ້ມອບເມືອງນີ້ເປັນຄ່າດອງໃຫ້ແກ່ລູກສາວຂອງເພິ່ນ, ເຊິ່ງເປັນເມຍຂອງໂຊໂລໂມນ. ແລະ ໂຊໂລໂມນກໍໄດ້ສ້າງເມືອງເກເຊຄືນໃໝ່). ເພິ່ນໄດ້ສ້າງເບັດໂຮໂຣນເບື້ອງລຸ່ມ, ບາອາລາດ ແລະ ຕາດໂມ5 ໃນຖິ່ນແຫ້ງແລ້ງກັນດານໃນດິນແດນຢູດາຍ, ທັງຍັງໄດ້ສ້າງເມືອງຕ່າງໆ ເພື່ອເປັນຄັງສະບຽງອາຫານຂອງເພິ່ນ ແລະ ສ້າງເມືອງສຳລັບລົດມ້າຮົບ ແລະ ມ້າ6 ຄືເພິ່ນໄດ້ສ້າງທຸກສິ່ງທີ່ປະສົງທີ່ຈະສ້າງໃນເຢຣູຊາເລັມ, ໃນເລບານອນ ແລະ ບ່ອນຕ່າງໆທົ່ວອານາເຂດທີ່ເພິ່ນປົກຄອງຢູ່.
ສ່ວນບັນດາຄົນທີ່ເຫລືອຢູ່ທີ່ເປັນຊາວຮິດຕີ, ຊາວອາໂມ, ຊາວເປຣີຊີ, ຊາວຮີວີ ແລະ ຊາວເຢບຸດ (ຄົນເຫລົ່ານີ້ບໍ່ແມ່ນຊາວອິດສະຣາເອນ). ຄືລູກຫລານທີ່ເຫລືອຢູ່ຂອງຄົນເຫລົ່ານີ້ ເຊິ່ງຊົນຊາດອິດສະຣາເອນບໍ່ສາມາດທຳລາຍລ້າງ7ໃຫ້ໝົດໄປໄດ້ ໂຊໂລໂມນໄດ້ເກນເອົາຄົນເຫລົ່ານີ້ມາເປັນແຮງງານຂ້າທາດມາຈົນເຖິງທຸກວັນນີ້. ແຕ່ໂຊໂລໂມນບໍ່ໄດ້ເກນໃຫ້ພົນລະເມືອງອິດສະຣາເອນຄົນໃດເປັນຂ້າທາດ ແຕ່ເພິ່ນໄດ້ໃຫ້ພວກເຂົາເປັນນັກຮົບ, ຂ້າລາຊະການຂອງເພິ່ນ, ເຈົ້າໜ້າທີ່ຂອງເພິ່ນ, ຜູ້ບັນຊາການ, ຜູ້ສັ່ງການລົດມ້າຮົບ ແລະ ຄົນຂັບລົດມ້າຮົບ. ພວກເຂົາມີເຈົ້າໜ້າທີ່ຈຳນວນ 550 ຄົນ ເປັນຜູ້ຄວບຄຸມເບິ່ງແຍງແຮງງານໃນວຽກງານຕ່າງໆຂອງໂຊໂລໂມນ.
ຫລັງຈາກລູກສາວຂອງຟາໂຣໄດ້ອອກຈາກເມືອງດາວິດໄປທີ່ວັງທີ່ໂຊໂລໂມນໄດ້ສ້າງໃຫ້ນາງ, ໂຊໂລໂມນກໍໄດ້ສ້າງຄັນຄູຂຶ້ນ.
ໂຊໂລໂມນໄດ້ຖວາຍເຄື່ອງເຜົາບູຊາ ແລະ ເຄື່ອງຖວາຍເພື່ອຄວາມສາມັກຄີທຳປີລະສາມຄັ້ງ ເທິງແທ່ນບູຊາທີ່ສ້າງຂຶ້ນຖວາຍແກ່ພຣະເຈົ້າຢາເວ ແລະ ເຜົາເຄື່ອງຫອມຕໍ່ໜ້າພຣະເຈົ້າຢາເວດ້ວຍ ແລະ ດັ່ງນັ້ນ ພາລະໜ້າທີ່ກ່ຽວກັບວິຫານກໍສຳເລັດແລ້ວ.
ກະສັດໂຊໂລໂມນຍັງໄດ້ສ້າງກອງທັບເຮືອຂຶ້ນຢູ່ທີ່ເອຊີໂອນເກເບ ເຊິ່ງໃກ້ກັບເອລາດໃນເອໂດມ, ເທິງແຄມຝັ່ງທະເລແດງ8ດ້ວຍ. ແລະ ຮີຣາມມອບທະຫານເຮືອຜູ້ຊຳນານໃຫ້ຮ່ວມເຮັດວຽກໃນກອງທັບເຮືອກັບຄົນຂອງໂຊໂລໂມນ. ພວກເຂົາໄດ້ແລ່ນເຮືອໄປທີ່ເມືອງໂອຟີ ແລະ ໄດ້ນຳເອົາຄຳຈຳນວນ 420 ຕາລັນຕົນ9 ກັບມາ ແລ້ວພວກເຂົາກໍໄດ້ມອບໃຫ້ກະສັດໂຊໂລໂມນ.
Source notes (9)
- Footnote ພາສາເຮັບເຣີ ເປັນຈຳນວນຫລາຍ
- Footnote ຄຳວ່າ ກາບູນ ມີສຽງຄືກັບຄຳພາສາເຮັບເຣີທີ່ມີຄວາມຫມາຍວ່າ ບໍ່ມີ ຄ່າ
- Footnote ຫລື ປະມານ 4 ໂຕນເຄິ່ງ
- Footnote ຫລື ແນວເນີນດິນດ້ານຕະເວັນອອກ ເຊັ່ນດຽວກັບຂໍ້ 24
- Footnote ຄຳພາສາເຮັບເຣີອາດອ່ານວ່າ ຕາມາ ກໍໄດ້
- Footnote ຫລື ທະຫານມ້າ
- Footnote ຄຳນີ້ໃນພາສາເຮັບເຣີໝາຍເຖິງ ສິ່ງຂອງ ຫລື ບຸກຄົນທີ່ຖວາຍແກ່ພຣະເຈົ້າຢາເວແລ້ວບໍ່ສາມາດເອີ້ນຄືນໄດ້ ຈະຕ້ອງທຳລາຍໃຫ້ໝົດໄປ
- Footnote ຄື ທະເລຕົ້ນອໍ້
- Footnote ຫລື ປະມານ 16 ໂຕນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.