Biblica® Open Lao Contemporary Version
1 ກະສັດ 5
ການຕຽມສ້າງວິຫານ
(2ຂຄ 2:1-18)
ກະສັດຮີຣາມແຫ່ງເມືອງຕີເຣໄດ້ມີຄວາມສຳພັນທີ່ດີກັບກະສັດດາວິດຕະຫລອດມາ ດັ່ງນັ້ນເມື່ອເພິ່ນຮູ້ວ່າໂຊໂລໂມນໄດ້ຮັບການເຈີມເພື່ອຂຶ້ນປົກຄອງສືບຕໍ່ຈາກດາວິດຜູ້ເປັນພໍ່, ເພິ່ນກໍໄດ້ສົ່ງທູດມາພົບໂຊໂລໂມນ. ໂຊໂລໂມນໄດ້ສົ່ງຂໍ້ຄວາມກັບໄປຫາຮີຣາມວ່າ:
“ທ່ານຮູ້ຢູ່ວ່າເນື່ອງຈາກສົງຄາມທີ່ເກີດຂຶ້ນກັບດາວິດພໍ່ຂອງຂ້າພະເຈົ້າຈາກທຸກທິດທຸກທາງ, ເພິ່ນຈຶ່ງບໍ່ສາມາດສ້າງວິຫານເພື່ອນາມຂອງພຣະເຈົ້າຢາເວ ພຣະເຈົ້າຂອງເພິ່ນ ຈົນກວ່າພຣະເຈົ້າຢາເວໄດ້ເຮັດໃຫ້ສັດຕູທັງຫລາຍຂອງເພິ່ນໄວ້ໃຕ້ຕີນເພິ່ນ. ບັດນີ້ ພຣະເຈົ້າຢາເວ ພຣະເຈົ້າຂອງຂ້າພະເຈົ້າໄດ້ໃຫ້ການພັກສະຫງົບທຸກດ້ານແກ່ຂ້າພະເຈົ້າ ແລະ ບໍ່ມີສັດຕູ ຫລື ໄພພິບັດປະການໃດ. ຂ້າພະເຈົ້າຈຶ່ງຕັ້ງໃຈຈະສ້າງວິຫານຖວາຍເພື່ອນາມຂອງພຣະເຈົ້າຢາເວ ພຣະເຈົ້າຂອງຂ້າພະເຈົ້າ ຕາມທີ່ພຣະເຈົ້າຢາເວໄດ້ສັ່ງດາວິດພໍ່ຂອງຂ້າພະເຈົ້າໄວ້ວ່າ, ‘ລູກຂອງເຈົ້າທີ່ເຮົາຈະຕັ້ງໃຫ້ປົກຄອງບັນລັງແທນເຈົ້າຈະສ້າງວິຫານເພື່ອນາມຂອງເຮົາ’.
“ດັ່ງນັ້ນ ຂໍທ່ານໂຜດສັ່ງໃຫ້ຄົນຂອງທ່ານຕັດໄມ້ແປກຈາກເລບານອນໃຫ້ຂ້າພະເຈົ້າ. ຂ້າພະເຈົ້າຈະສົ່ງຄົນໄປເຮັດວຽກກັບຄົນຂອງທ່ານ ແລະ ຈະຈ່າຍຄ່າຈ້າງໃຫ້ຄົນງານຂອງທ່ານຕາມທີ່ທ່ານຕັ້ງໄວ້. ທ່ານຮູ້ຢູ່ແລ້ວວ່າທາງຝ່າຍຂ້າພະເຈົ້າບໍ່ມີຊ່າງທີ່ຊຳນານການຕັດໄມ້ເໝືອນຊາວຊີໂດນ”.
ເມື່ອກະສັດຮີຣາມໄດ້ຮັບຈົດໝາຍຈາກໂຊໂລໂມນ ເພິ່ນກໍພໍໃຈຫລາຍ ແລະ ໄດ້ກ່າວວ່າ, “ສັນເສີນພຣະເຈົ້າຢາເວໃນວັນນີ້ ເພາະພຣະອົງມອບລູກຊາຍທີ່ສະຫລາດໃຫ້ແກ່ດາວິດເພື່ອປົກຄອງຊົນຊາດທີ່ຍິ່ງໃຫຍ່ນີ້”.
ຫລັງຈາກນັ້ນ ຮີຣາມກໍໄດ້ສົ່ງຂໍ້ຄວາມໄປຫາໂຊໂລໂມນວ່າ:
“ເຮົາໄດ້ຮັບຈົດໝາຍຈາກທ່ານແລ້ວ ແລະ ຈະຈັດສົ່ງທ່ອນໄມ້ທັງໄມ້ແປກ ແລະ ໄມ້ສົນອື່ນໆ ໄປໃຫ້ຕາມທີ່ທ່ານຕ້ອງການທັງໝົດ. ຄົນຂອງເຮົາຈະນຳທ່ອນໄມ້ເຫລົ່ານັ້ນຈາກເລບານອນໄປທີ່ທະເລເມດິແຕຣາເນ ແລ້ວຂ້າພະເຈົ້າຈະມັດທ່ອນໄມ້ເຫລົ່ານັ້ນເຂົ້າກັນເປັນແພລ່ອງມາຕາມທະເລໄປສູ່ຈຸດໝາຍທີ່ທ່ານກຳນົດ. ຫລັງຈາກນັ້ນ ຂ້າພະເຈົ້າຈະຖອດແພອອກ ແລະ ມອບທ່ອນໄມ້ເຫລົ່ານັ້ນໃຫ້ທ່ານ ແລະ ທ່ານສາມາດຈ່າຍຄ່າຕອບແທນໃຫ້ຂ້າພະເຈົ້າໂດຍສົ່ງອາຫານມາໃຫ້ຜູ້ຮັບໃຊ້ຂອງຂ້າພະເຈົ້າ”.
ຮີຣາມກໍໄດ້ສົ່ງທ່ອນໄມ້ແປກ ແລະ ໄມ້ສີດາອື່ນໆມາໃຫ້ໂຊໂລໂມນຕາມຄວາມຕ້ອງການດ້ວຍວິທີດັ່ງກ່າວ, ແລະ ເພື່ອເປັນການຕອບແທນ ໂຊໂລໂມນຈຶ່ງສົ່ງເຂົ້າຫວີດໄປໃຫ້ຜູ້ຮັບໃຊ້ຂອງຮີຣາມປີລະປະມານ 20.000 ໂຄຣະ1 ແລະ ນ້ຳມັນໝາກກອກບໍລິສຸດປີລະປະມານ 20.000 ບັດ2 ໂຊໂລໂມນໄດ້ເຮັດຢ່າງນີ້ທຸກປີ. ພຣະເຈົ້າຢາເວໄດ້ໃຫ້ສະຕິປັນຍາແກ່ໂຊໂລໂມນຕາມທີ່ພຣະອົງໄດ້ສັນຍາໄວ້ກັບເພິ່ນ. ຄວາມສະຫງົບສຸກໄດ້ເກີດຂຶ້ນລະຫວ່າງ ຮີຣາມກັບໂຊໂລໂມນ ແລະ ພວກເພິ່ນທັງສອງຈຶ່ງເຮັດສົນທິສັນຍາຕໍ່ກັນ.
ກະສັດໂຊໂລໂມນໄດ້ເກນຄົນງານ 30.000 ຄົນຈາກທົ່ວແດນອິດສະຣາເອນ. ເພິ່ນໄດ້ສົ່ງພວກເຂົາໝຸນວຽນໄປເລບານອນເດືອນລະ 10.000 ຄົນ, ຄົນໜຶ່ງຈະໄປຢູ່ເລບານອນໜຶ່ງເດືອນ ແລະ ກັບມາຢູ່ເຮືອນສອງເດືອນ. ອາໂດນີຣາມເປັນຜູ້ຄວບຄຸມຄົນງານເຫລົ່ານີ້. ໂຊໂລໂມນຍັງມີກຳມະກອນແບກຫາມອີກ 70.000 ຄົນ ແລະ ຊ່າງແກະສະຫລັກຫີນ 80.000 ຄົນໃນແຖບພູເຂົາ, ໂດຍມີຫົວໜ້າຄົນງານ 3.300 ຄົນ3 ເຮັດໜ້າທີ່ຄວບຄຸມໂຄງການ ແລະ ເບິ່ງແຍງຄົນງານ. ຕາມຄຳສັ່ງຂອງໂຊໂລໂມນ ພວກເຂົາໄດ້ຂົນຫີນກ້ອນໃຫຍ່ທີ່ສຸດທີ່ຄັດເລືອກແລ້ວເພື່ອສະຫລັກເປັນຫີນຮາກຖານຂອງວິຫານ. ຄົນທັງຫລາຍຈາກເກບານ4ກໍໄດ້ມາຊ່ວຍຊ່າງຂອງໂຊໂລໂມນ ແລະ ຮີຣາມໃນການເລື່ອຍທ່ອນໄມ້, ຖາກໄມ້ ແລະ ຕຽມຫີນສຳລັບການສ້າງວິຫານ.
Source notes (4)
- Footnote ປະມານ 3.600 ໂຕນ
- Footnote ສະບັບ ເຊັບຕູອາຈິນວ່າ 20 ໂຄຣະ ປະມານ 440.000 ລິດ
- Footnote ສຳເນົາ ເຊັບຕູອາຈິນບາງສະບັບວ່າ 3.600 ຄົນ (ເບິ່ງ 2ຂຄ 2:2,18)
- Footnote ຄື ບິບໂລ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.