Biblica® Open Lao Contemporary Version
1 ກະສັດ 19
ເອລີຢາໜີໄປທີ່ພູເຂົາໂຮເຣັບ
ບັດນີ້ ອາຮາບໄດ້ເລົ່າທຸກສິ່ງທີ່ເອລີຢາໄດ້ເຮັດໃຫ້ນາງເຢເຊເບນຟັງ ແລະ ເລົ່າເຖິງເລື່ອງທີ່ເອລີຢາໄດ້ຜູ້ທຳນວາຍຂອງພະບາອານທັງໝົດດ້ວຍດາບ. ດັ່ງນັ້ນ ເຢເຊເບນຈຶ່ງສົ່ງຄົນໄປຫາເອລີຢາ ແລະ ເວົ້າວ່າ, “ຂໍໃຫ້ພະທັງຫລາຍຈັດການກັບເຮົາຢ່າງໜັກ ຖ້າພາຍໃນມື້ອື່ນໃນເວລາດຽວກັນນີ້ ເຮົາຍັງບໍ່ປິດຊີວິດຂອງເຈົ້າເໝືອນດັ່ງທີ່ເຈົ້າເຮັດກັບຄົນຂອງເຮົາ”.
ເອລີຢາຢ້ານ1ຈຶ່ງໜີເອົາຊີວິດຂອງຕົນໃຫ້ລອດ. ເມື່ອເພິ່ນໄປໄດ້ມາທີ່ເບເອນເຊບາໃນຢູດາຍ ແລະ ເພິ່ນໄດ້ປະຄົນຮັບໃຊ້ຂອງເພິ່ນໄວ້ທີ່ນັ້ນ, ສ່ວນເພິ່ນເອງແມ່ນເດີນທາງເຂົ້າໄປໃນຖິ່ນແຫ້ງແລ້ງກັນດານ ພະເນຈອນໄປຕະຫລອດທັງວັນ. ເພິ່ນໄດ້ມາທີ່ຕົ້ນຊາກຕົ້ນໜຶ່ງ ຈຶ່ງນັ່ງລົງຢູ່ກ້ອງຕົ້ນຊາກນັ້ນ ແລະ ອະທິຖານໃຫ້ຕົນເອງຕາຍ. ເພິ່ນໄດ້ເວົ້າວ່າ, “ຂ້າແດ່ພຣະເຈົ້າຢາເວ, ຂ້ານ້ອຍພໍແລ້ວ, ຂໍເອົາຊີວິດຂອງຂ້ານ້ອຍໄປ; ຂ້ານ້ອຍກໍບໍ່ໄດ້ດີໄປກວ່າບັນດາບັນພະບຸລຸດຂອງຂ້ານ້ອຍ”. ແລ້ວເພິ່ນກໍນອນລົງກ້ອງຕົ້ນຊາກ ແລະ ກໍຫລັບໄປ.
ທັນໃດນັ້ນ ກໍມີເທວະດາຕົນໜຶ່ງມາແຕະຕ້ອງໂຕເພິ່ນ ແລະ ເວົ້າວ່າ, “ຈົ່ງລຸກຂຶ້ນ ແລະ ກິນອາຫານ”. ເອລີຢາໄດ້ເບິ່ງໄປອ້ອມຮອບ ແລະ ເຫັນວ່າມີເຂົ້າຈີ່ຮ້ອນໆວາງຢູ່ເທິງກ້ອນຫີນ ແລະ ມີນ້ຳເຢືອກໜຶ່ງຢູ່ຂ້າງຫົວຂອງເພິ່ນ. ເພິ່ນໄດ້ກິນ ແລະ ໄດ້ດື່ມ ແລ້ວລົ້ມກໍນອນລົງອີກ.
ເທວະດາຂອງພຣະເຈົ້າຢາເວໄດ້ກັບມາອີກເທື່ອທີສອງ ແລະ ໄດ້ແຕະຕ້ອງໂຕເພິ່ນ ແລະ ເວົ້າວ່າ, “ຈົ່ງລຸກຂຶ້ນ ແລະ ກິນອາຫານ, ເພາະການເດີນທາງຄັ້ງນີ້ແມ່ນເກີນກຳລັງຂອງທ່ານ”. ດັ່ງນັ້ນ ເອລີຢາຈຶ່ງໄດ້ລຸກຂຶ້ນ ແລ້ວກິນ ແລະ ດື່ມ. ອາຫານນັ້ນໄດ້ເຮັດໃຫ້ເພິ່ນມີກຳລັງຂຶ້ນ, ເພິ່ນໄດ້ເດີນທາງເປັນເວລາສີ່ສິບວັນສີ່ສິບຄືນ ຈົນມາເຖິງໂຮເຣັບ, ພູເຂົາຂອງພຣະເຈົ້າ. ເພິ່ນໄດ້ເຂົ້າໄປພັກຄ້າງຄືນໃນຖ້ຳແຫ່ງໜຶ່ງຢູ່ທີ່ນັ້ນ.
ພຣະເຈົ້າຢາເວໄດ້ປາກົດແກ່ເອລີຢາ
ແລ້ວຖ້ອຍຄຳຂອງພຣະເຈົ້າຢາເວໄດ້ມາເຖິງເພິ່ນວ່າ, “ເອລີຢາ, ເຈົ້າກຳລັງເຮັດຫຍັງຢູ່ບ່ອນນີ້?”
ເອລີຢາໄດ້ຕອບວ່າ, “ຂ້ານ້ອຍໄດ້ກະຕືລືລົ້ນທຸ້ມເທເຮັດວຽກເພື່ອພຣະເຈົ້າຢາເວ ພຣະເຈົ້າຜູ້ມີລິດອຳນາດຍິ່ງໃຫຍ່, ຊົນຊາດອິດສະຣາເອນໄດ້ປະຖິ້ມຄຳໝັ້ນສັນຍາຂອງພຣະອົງ, ຮື້ແທ່ນບູຊາຂອງພຣະອົງ ແລະ ຂ້າຜູ້ທຳນວາຍຂອງພຣະອົງດ້ວຍຄົມດາບ. ເຫລືອຂ້ານ້ອຍພຽງແຕ່ຄົນດຽວເທົ່ານັ້ນ ແລະ ບັດນີ້ ພວກເຂົາແມ່ນກຳລັງພະຍາຍາມຂ້າຂ້ານ້ອຍເໝືອນກັນ”.
ພຣະເຈົ້າຢາເວໄດ້ກ່າວວ່າ, “ຈົ່ງອອກໄປ ແລະ ຢືນຢູ່ຕໍ່ໜ້າພຣະເຈົ້າຢາເວເທິງພູເຂົາ, ເພາະພຣະເຈົ້າຢາເວກຳລັງຈະຍ່າງຜ່ານ”.
ແລ້ວກໍມີລົມພະຍຸກ້າພັດປະທະພູເຂົາຢ່າງຮຸນແຮງ ຈີກພູເຂົາອອກຈາກກັນ ແລະ ເຮັດໃຫ້ຫີນແຕກອອກເປັນກ້ອນຕໍ່ໜ້າພຣະເຈົ້າຢາເວ, ແຕ່ພຣະເຈົ້າຢາເວບໍ່ໄດ້ຢູ່ໃນລົມນັ້ນ. ຫລັງຈາກເກີດພະຍຸແລ້ວ ກໍເກີດແຜ່ນດິນໄຫວ ແຕ່ພຣະເຈົ້າຢາເວບໍ່ໄດ້ຢູ່ໃນແຜ່ນດິນໄຫວນັ້ນ. ຫລັງຈາກເກີດແຜ່ນດິນໄຫວແລ້ວ ກໍເກີດໄຟໄໝ້ ແຕ່ພຣະເຈົ້າຢາເວບໍ່ໄດ້ຢູ່ໃນໄຟນັ້ນ. ຫລັງຈາກໄຟໄໝ້ແລ້ວ ກໍມີສຽງຊື່ມອັນອ່ອນໂຍນ. ເມື່ອເອລີຢາໄດ້ຍິນສິ່ງນັ້ນ, ເພິ່ນກໍດຶງເສື້ອຄຸມຂອງຕົນຂຶ້ນປົກໜ້າຂອງເພິ່ນ ແລະ ອອກໄປຢືນຢູ່ທີ່ປາກຖ້ຳ.
ແລ້ວກໍມີສຽງໜຶ່ງກ່າວກັບເພິ່ນວ່າ, “ເອລີຢາ, ເຈົ້າກຳລັງເຮັດຫຍັງຢູ່ບ່ອນນີ້?”
ເພິ່ນໄດ້ຕອບວ່າ, “ຂ້ານ້ອຍໄດ້ກະຕືລືລົ້ນທຸ້ມເທເຮັດວຽກງານເພື່ອພຣະເຈົ້າຢາເວ ພຣະເຈົ້າຜູ້ມີລິດອຳນາດຍິ່ງໃຫຍ່. ຊົນຊາດອິດສະຣາເອນໄດ້ປະຖິ້ມຄຳໝັ້ນສັນຍາຂອງພຣະອົງ, ຮື້ແທ່ນບູຊາຂອງພຣະອົງ ແລະ ຂ້າຜູ້ທຳນວາຍຂອງພຣະອົງດ້ວຍຄົມດາບ. ເຫລືອຂ້ານ້ອຍພຽງຄົນດຽວເທົ່ານັ້ນ ແລະ ບັດນີ້ ພວກເຂົາແມ່ນກຳລັງພະຍາຍາມຂ້າຂ້ານ້ອຍເໝືອນກັນ”.
ພຣະເຈົ້າຢາເວໄດ້ກ່າວກັບເພິ່ນວ່າ, “ຈົ່ງກັບໄປຕາມທາງທີ່ເຈົ້າມາ, ແລ້ວໄປຍັງຖິ່ນແຫ້ງແລ້ງກັນດານແຫ່ງດາມັສກັດ. ເມື່ອເຈົ້າໄປເຖິງທີ່ນັ້ນ, ຈົ່ງເຈີມຮາຊາເອນໃຫ້ເປັນກະສັດແຫ່ງອາຣາມ. ພ້ອມທັງເຈີມເຢຮູ ລູກຊາຍຂອງນິມຊີ ໃຫ້ເປັນກະສັດແຫ່ງອິດສະຣາເອນ, ແລ້ວເຈີມເອລີຊາ ລູກຊາຍຂອງຊາຟັດຈາກອາເບັນເມໂຮລາ ໃຫ້ເປັນຜູ້ທຳນວາຍສືບຕໍ່ຈາກເຈົ້າ. ຜູ້ໃດໜີລອດຈາກຄົມດາບຂອງຮາຊາເອນ ຈະຖືກເຢຮູຂ້າ ແລະ ຜູ້ໃດໜີລອດຈາກຄົມດາບຂອງເຢຮູ ຈະຖືກເອລີຊາຂ້າ. ແຕ່ເຮົາຈະເກັບຮັກສາຄົນເຈັດພັນຄົນທີ່ບໍ່ໄດ້ຄຸເຂົ່າຂາບໄຫວ້ພະບາອານ ແລະ ຜູ້ທີ່ບໍ່ໄດ້ຈູບພະບາອານໄວ້ໃນອິດສະຣາເອນ”.
ພຣະເຈົ້າເອີ້ນເອົາເອລີຊາ
ດັ່ງນັ້ນ ເອລີຢາຈຶ່ງໄປຈາກທີ່ນັ້ນ ແລະ ພົບເອລີຊາລູກຊາຍຂອງຊາຟັດ. ລາວກຳລັງໄຖນາ ໂດຍມີງົວທຽມໄຖສິບສອງຄູ່ ແລະ ລາວຢູ່ທີ່ປາຍແຖວກັບງົວຄູ່ທີສິບສອງ. ເອລີຢາຈຶ່ງເຂົ້າໄປຫາລາວ ແລະ ໂຍນເສື້ອຄຸມຂອງຕົນຫົ່ມໃຫ້ເອລີຊາ. ແລ້ວເອລີຊາກໍປ່ອຍງົວໄວ້ບ່ອນນັ້ນ ແລະ ແລ່ນຕາມເອລີຢາໄປ ແລ້ວເວົ້າວ່າ, “ຂໍໃຫ້ຂ້ານ້ອຍໄປຈູບລາພໍ່ ແລະ ແມ່ຂອງຂ້ານ້ອຍກ່ອນ ແລ້ວຂ້ານ້ອຍຈະຕິດຕາມທ່ານໄປ”.
ເອລີຢາໄດ້ຕອບວ່າ, “ຈົ່ງກັບໄປ, ແຕ່ຢ່າລືມວ່າເຮົາໄດ້ເຮັດຫຍັງໃຫ້ແກ່ເຈົ້າ?”
ແລ້ວເອລີຊາຈຶ່ງຈາກເພິ່ນໄປ ແລະ ກັບຄືນໄປ. ລາວໄດ້ເອົາແອກງົວອອກຈາກງົວ ແລະ ຂ້າງົວເຫລົ່ານັ້ນ. ລາວໄດ້ເອົາຊີ້ນມາເຮັດອາຫານ ໃຊ້ຄັນໄຖເຮັດເປັນຟືນ ແລະ ແຈກຈ່າຍຊີ້ນໃຫ້ຄົນທັງຫລາຍ ແລະ ພວກເຂົາກໍໄດ້ກິນ. ຫລັງຈາກນັ້ນ ເອລີຊາກໍຕິດຕາມເອລີຢາໄປ ແລະ ກາຍເປັນຜູ້ຮັບໃຊ້ຂອງເພິ່ນ.
Source notes (1)
- Footnote ຫລື ເອລີຢາເຫັນດັ່ງນັ້ນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.