Biblica® Open Lao Contemporary Version
1 ກະສັດ 15
ກະສັດອາບີຢາແຫ່ງຢູດາຍ
(2ຂຄ 13:1-2,22–14:1)
ອາບີຢາ1 ໄດ້ຂຶ້ນເປັນກະສັດແຫ່ງຢູດາຍກົງກັບປີທີສິບແປດຂອງຊ່ວງການປົກຄອງຂອງເຢໂຣໂບອາມ ລູກຊາຍຂອງເນບັດ, ແລະ ເພິ່ນປົກຄອງຢູ່ໃນເຢຣູຊາເລັມເປັນເວລາ 3 ປີ. ແມ່ຂອງເພິ່ນມີຊື່ວ່າມາອາກາ ເຊິ່ງເປັນລູກສາວຂອງອັບບີຊາໂລມ.2
ເພິ່ນໄດ້ເຮັດບາບທຸກຢ່າງຄືກັນກັບທີ່ພໍ່ຂອງເພິ່ນໄດ້ເຮັດມາກ່ອນ ແລະ ເພິ່ນບໍ່ໄດ້ຈົ່ງຮັກພັກດີຕໍ່ພຣະເຈົ້າຢາເວ ພຣະເຈົ້າຂອງເພິ່ນຢ່າງສຸດໃຈ ເໝືອນດັ່ງດາວິດບັນພະບຸລຸດຂອງເພິ່ນທີ່ໄດ້ເຮັດ. ແຕ່ເພື່ອເຫັນແກ່ດາວິດ ພຣະເຈົ້າຢາເວ ພຣະເຈົ້າຂອງເພິ່ນໄດ້ໃຫ້ຕະກຽງໜ່ວຍໜຶ່ງໃນເຢຣູຊາເລັມ ໂດຍໃຫ້ລູກຊາຍຄົນໜຶ່ງຂຶ້ນມາປົກຄອງຕໍ່ຈາກເພິ່ນ ແລະ ເຮັດໃຫ້ເຢຣູຊາເລັມເຂັ້ມແຂງ. ເພາະດາວິດໄດ້ເຮັດສິ່ງທີ່ຖືກຕ້ອງໃນສາຍຕາຂອງພຣະເຈົ້າຢາເວ ແລະ ໄດ້ປະຕິບັດຕາມຄຳສັ່ງຂອງພຣະອົງທຸກປະການຕະຫລອດຊີວິດຂອງເພິ່ນ ຍົກເວັ້ນເລື່ອງທີ່ກ່ຽວກັບອູຣິຢາຊາວຮິດຕີ.
ຕະຫລອດຊີວິດຂອງອາບີຢາມີສົງຄາມລະຫວ່າງເຣໂຫໂບອາມ3 ກັບເຢໂຣໂບອາມ. ເຫດການອື່ນໆ ໃນຊ່ວງການປົກຄອງຂອງອາບີຢາ ແລະ ພາລະກິດທັງໝົດທີ່ເພິ່ນໄດ້ເຮັດແມ່ນມີບັນທຶກໄວ້ໃນປຶ້ມປະຫວັດສາດຂອງບັນດາກະສັດແຫ່ງຢູດາຍບໍ່ແມ່ນບໍ? ແລະ ມີສົງຄາມລະຫວ່າງອາບີຢາກັບເຢໂຣໂບອາມ. ແລະ ອາບີຢາໄດ້ລ່ວງລັບໄປຢູ່ກັບບັນພະບຸລຸດຂອງເພິ່ນ ແລະ ຖືກຝັງໄວ້ໃນເມືອງດາວິດ. ແລ້ວອາສາ ລູກຊາຍຂອງເພິ່ນກໍໄດ້ຂຶ້ນປົກຄອງແທນ.
ກະສັດອາສາແຫ່ງຢູດາຍ
(2ຂຄ 14:2-3; 15:16–16:6; 16:11–17:1)
ອາສາໄດ້ຂຶ້ນເປັນກະສັດແຫ່ງຢູດາຍ ກົງກັບປີທີຊາວຂອງການປົກຄອງຂອງເຢໂຣໂບອາມແຫ່ງອິດສະຣາເອນ, ແລະ ເພິ່ນໄດ້ປົກຄອງຢູ່ 41 ປີໃນເຢຣູຊາເລັມ. ຍ່າຂອງເພິ່ນມີຊື່ວ່າມາອາກາ ລູກສາວຂອງອັບບີຊາໂລມ.
ອາສາໄດ້ເຮັດສິ່ງທີ່ຖືກຕ້ອງໃນສາຍຕາຂອງພຣະເຈົ້າຢາເວເໝືອນດັ່ງດາວິດບັນພະບຸລຸດຂອງເພິ່ນໄດ້ເຮັດ. ອາສາໄດ້ຂັບໄລ່ໂສເພນີຊາຍທີ່ປະຈຳຢູ່ສະຖານບູຊາອອກໄປຈາກດິນແດນ ແລະ ໄດ້ກຳຈັດຮູບເຄົາລົບທັງໝົດທີ່ບັນພະບຸລຸດຂອງເພິ່ນໄດ້ສ້າງຂຶ້ນ. ເພິ່ນໄດ້ປົດນາງມາອາກາ ຍ່າຂອງເພິ່ນອອກຈາກຕຳແໜ່ງແມ່ຂອງລາຊີນີ ເພາະນາງໄດ້ສ້າງຮູບເຄົາລົບອັນໜ້າກຽດຊັງເພື່ອກາບໄຫວ້ເຈົ້າແມ່ອາເຊຣາ. ອາສາໄດ້ຕັດຮູບເຄົາລົບນັ້ນລົງ ແລະ ຈູດຖິ້ມຢູ່ທີ່ຮ່ອມພູກິດໂຣນ. ເຖິງແມ່ນວ່າເພິ່ນບໍ່ໄດ້ຮື້ສະຖານບູຊາເທິງທີ່ສູງທັງຫລາຍຖິ້ມ, ແຕ່ໃຈຂອງອາສາກໍຈົ່ງຮັກພັກດີຕໍ່ພຣະເຈົ້າຢາເວ ດ້ວຍສຸດໃຈຂອງເພິ່ນຕະຫລອດຊີວິດຂອງເພິ່ນ. ເພິ່ນໄດ້ນຳເງິນກັບຄຳ ແລະ ເຄື່ອງໃຊ້ທັງຫລາຍທີ່ເພິ່ນກັບພໍ່ຂອງເພິ່ນໄດ້ຖວາຍແກ່ພຣະເຈົ້າມາໄວ້ໃນວິຫານຂອງພຣະເຈົ້າຢາເວ.
ມີສົງຄາມລະຫວ່າງອາສາ ແລະ ກະສັດບາອາຊາແຫ່ງອິດສະຣາເອນຕະຫລອດການປົກຄອງຂອງພວກເພິ່ນ. ກະສັດບາອາຊາແຫ່ງອິດສະຣາເອນໄດ້ຂຶ້ນມາສູ້ຮົບກັບຢູດາຍ ແລະ ບາອາຊາໄດ້ສ້າງປ້ອມປ້ອງກັນຢູ່ທີ່ເມືອງຣາມາ ເພື່ອປິດທາງເຂົ້າອອກສູ່ເຂດແດນຂອງກະສັດອາສາແຫ່ງຢູດາຍ.
ອາສາຈຶ່ງໄດ້ນຳເງິນ ແລະ ຄຳທີ່ເຫລືອທັງໝົດຈາກຄັງວິຫານຂອງພຣະເຈົ້າຢາເວ ແລະ ຈາກຄັງຂອງວັງຂອງເພິ່ນເອງ. ເພິ່ນໄດ້ມອບເງິນ ແລະ ຄຳເຫລົ່ານັ້ນໃຫ້ບັນດາຂ້າລາຊະການຂອງເພິ່ນ ແລະ ໄດ້ສົ່ງເງິນ ແລະ ຄຳເຫລົ່ານັ້ນໄປໃຫ້ກະສັດເບັນຮາດາດແຫ່ງອາຣາມ ເຊິ່ງປົກຄອງຢູ່ທີ່ເມືອງດາມັສກັດ, ເບັນຮາດາດນີ້ເປັນລູກຊາຍຂອງຕາບຣິມໂມນ ເຊິ່ງເປັນລູກຊາຍຂອງເຮຊີໂອນ. ກະສັດອາສາໄດ້ເວົ້າວ່າ, “ຂໍໃຫ້ພວກເຮົາເປັນພັນທະມິດກັນເໝືອນກັບພໍ່ຂອງພວກເຮົາທັງສອງ. ເບິ່ງແມ, ຂ້າພະເຈົ້າໄດ້ສົ່ງເງິນ ແລະ ຄຳນີ້ມາເປັນຂອງຂັວນແກ່ທ່ານ. ບັດນີ້ ຂໍໃຫ້ເຊົາເປັນພັນທະມິດກັບກະສັດບາອາຊາແຫ່ງອິດສະຣາເອນ ເພື່ອເພິ່ນຈະໄດ້ຖອຍທັບໄປຈາກຂ້າພະເຈົ້າ”.
ເບັນຮາດາດໄດ້ເຫັນດີກັບກະສັດອາສາ ແລະ ໄດ້ສົ່ງຜູ້ບັນຊາການກອງທັບຂອງເພິ່ນ ແລະ ກອງກຳລັງໄປໂຈມຕີເມືອງຕ່າງໆຂອງອິດສະຣາເອນ. ເພິ່ນໄດ້ຢຶດຄອງເມືອງອີໂຢນ, ດານ, ອາເບັນເບັດມາອາກາ, ທະເລກິນເນເຣດທັງໝົດ ລວມທັງເນັບທາລີ. ເມື່ອບາອາຊາຮູ້ເລື່ອງນີ້ກໍຢຸດການສ້າງເມືອງຣາມາ ແລ້ວຖອຍທັບກັບໄປຍັງຕີຣະຊາ. ຫລັງຈາກນັ້ນ ກະສັດອາສາກໍໄດ້ເກນເອົາທຸກຄົນໃນຢູດາຍ ບໍ່ເວັ້ນຜູ້ໃດເລີຍ ແລະ ໃຫ້ພວກເຂົາຊ່ວຍກັນຂົນເອົາຫີນ ແລະ ໄມ້ທີ່ບາອາຊາໃຊ້ຢູ່ທີ່ເມືອງຣາມາ ນຳໄປສ້າງເມືອງເກບາໃນແດນເບັນຢາມິນ ແລະ ເມືອງມີຊະປາ.
ເຫດການອື່ນໆໃນຊ່ວງການປົກຄອງຂອງອາສາ, ຄວາມສຳເລັດທັງໝົດຂອງເພິ່ນ, ພາລະກິດທັງໝົດທີ່ເພິ່ນໄດ້ເຮັດ ແລະ ເມືອງຕ່າງໆທີ່ເພິ່ນສ້າງຂຶ້ນແມ່ນມີບັນທຶກໄວ້ໃນປະຫວັດສາດຂອງກະສັດແຫ່ງຢູດາຍບໍ່ແມ່ນບໍ? ເມື່ອອາສາເຖົ້າແກ່ຫລາຍ ຕີນຂອງເພິ່ນກໍເປັນພະຍາດ. ແລ້ວອາສາກໍໄດ້ລ່ວງລັບໄປຢູ່ກັບບັນພະບຸລຸດຂອງເພິ່ນ ແລະ ຖືກຝັງໄວ້ດ້ວຍກັນໃນເມືອງດາວິດບັນພະບຸລຸດຂອງເພິ່ນ ແລະ ເຢໂຮຊາຟັດລູກຊາຍຂອງເພິ່ນກໍໄດ້ຂຶ້ນປົກຄອງແທນ.
ນາດາບແຫ່ງອິດສະຣາເອນ
ນາດາບລູກຊາຍຂອງເຢໂຣໂບອາມໄດ້ຂຶ້ນເປັນກະສັດແຫ່ງອິດສະຣາເອນ ກົງກັບປີທີສອງຂອງການປົກຄອງຂອງກະສັດອາສາແຫ່ງຢູດາຍ ແລະ ເພິ່ນໄດ້ປົກຄອງເໜືອອິດສະຣາເອນຢູ່ 2 ປີ. ເພິ່ນໄດ້ເຮັດສິ່ງທີ່ຊົ່ວຮ້າຍໃນສາຍຕາຂອງພຣະເຈົ້າຢາເວ, ດຳເນີນຊີວິດຕາມວິຖີທາງຂອງພໍ່ຂອງເພິ່ນ ແລະ ໄດ້ເຮັດບາບຄືກັນກັບພໍ່ຂອງເພິ່ນ ເຊິ່ງເຮັດໃຫ້ອິດສະຣາເອນເຮັດຕາມ.
ຝ່າຍບາອາຊາລູກຊາຍຂອງອາຮີຢາເຜົ່າອິດຊາຄາໄດ້ວາງແຜນ ແລະ ລົງມືຂ້ານາດາບ ຂະນະທີ່ນາດາບຮ່ວມກັບກອງທັບອິດສະຣາເອນທັງໝົດລ້ອມເມືອງກິບເບໂທນຂອງຟີລິດສະຕິນ. ບາອາຊາໄດ້ຂ້ານາດາບແລ້ວຂຶ້ນປົກຄອງແທນ ກົງກັບປີທີສາມຂອງການປົກຄອງຂອງກະສັດອາສາແຫ່ງຢູດາຍ.
ທັນທີທີ່ເພິ່ນຂຶ້ນປົກຄອງ ບາອາຊາກໍໄດ້ຂ້າເຊື້ອສາຍທັງໝົດຂອງເຢໂຣໂບອາມ. ເພິ່ນບໍ່ປ່ອຍໃຫ້ຜູ້ໃດລອດຊີວິດເລີຍ, ແຕ່ໄດ້ທຳລາຍລ້າງພວກເຂົາທັງໝົດ, ເປັນໄປຕາມທີ່ພຣະເຈົ້າຢາເວໄດ້ກ່າວໄວ້ຜ່ານທາງອາຮີຢາຊາວຊີໂລຜູ້ຮັບໃຊ້ຂອງພຣະອົງ. ເພາະບາບທີ່ເຢໂຣໂບອາມໄດ້ເຮັດ ແລະ ໄດ້ເຮັດໃຫ້ອິດສະຣາເອນເຮັດຕາມ ແລະ ເພາະເພິ່ນໄດ້ຍົວະໃຫ້ພຣະເຈົ້າຢາເວ ພຣະເຈົ້າແຫ່ງອິດສະຣາເອນໃຈຮ້າຍ.
ເຫດການອື່ນໆໃນຊ່ວງການປົກຄອງຂອງນາດາບ ແລະ ພາລະກິດທັງໝົດທີ່ເພິ່ນໄດ້ເຮັດແມ່ນມີບັນທຶກໄວ້ໃນປະຫວັດສາດຂອງກະສັດແຫ່ງອິດສະຣາເອນບໍ່ແມ່ນບໍ? ມີສົງຄາມລະຫວ່າງອາສາ ແລະ ກະສັດບາອາຊາແຫ່ງອິດສະຣາເອນຕະຫລອດການປົກຄອງຂອງພວກເພິ່ນ.
ບາອາຊາແຫ່ງອິດສະຣາເອນ
ບາອາຊາລູກຊາຍຂອງອາຮີຢາໄດ້ຂຶ້ນເປັນກະສັດເໜືອດິນແດນອິດສະຣາເອນທັງໝົດຢູ່ທີ່ເມືອງຕີຣະຊາ ກົງກັບປີທີສາມຂອງການປົກຄອງຂອງກະສັດອາສາແຫ່ງຢູດາຍ ແລະ ເພິ່ນໄດ້ປົກຄອງຢູ່ 24 ປີ. ບາອາຊາໄດ້ເຮັດສິ່ງທີ່ຊົ່ວຮ້າຍໃນສາຍຕາຂອງພຣະເຈົ້າຢາເວ ດຳເນີນຊີວິດຕາມວິຖີທາງຂອງເຢໂຣໂບອາມ ແລະ ໄດ້ເຮັດບາບຄືກັນກັບເຢໂຣໂບອາມ ເຊິ່ງເຮັດໃຫ້ອິດສະຣາເອນເຮັດຕາມ.
Source notes (3)
- Footnote ສຳເນົາຕົ້ນສະບັບພາສາເຮັບເຣີສ່ວນໃຫຍ່ວ່າ ອາບີຢາມ ເຊັ່ນດຽວກັບຂໍ້ 7 ແລະ 8
- Footnote ເປັນອີກຮູບໜຶ່ງຂອງ ອັບຊາໂລມ ເຊັ່ນດຽວກັບຂໍ້ 10
- Footnote ສຳເນົາຕົ້ນສະບັບພາສາເຮັບເຣີບາງສະບັບວ່າ ອາບີຢາມ (ຄື ອາບີຢາ)
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.