Biblica® Open Lao Contemporary Version
1 ໂກຣິນໂທ 5
ການຈັດການກັບກໍລະນີການຜິດສິນທຳທາງເພດ
ແທ້ຈິງແລ້ວໄດ້ມີລາຍງານມາວ່າ ມີການຜິດສິນທຳທາງເພດໃນທ່າມກາງພວກເຈົ້າ, ເຊິ່ງໃນຮູບແບບທີ່ແມ່ນແຕ່ໃນທ່າມກາງຄົນບໍ່ເຊື່ອພຣະເຈົ້າກໍຍັງບໍ່ອະນຸຍາດໃຫ້ເກີດຂຶ້ນຄື: ຊາຍຄົນໜຶ່ງນອນກັບເມຍພໍ່ຂອງຕົນ. ແລະ ພວກເຈົ້າກໍພູມໃຈ! ແທນທີ່ພວກເຈົ້າຄວນຈະໂສກເສົ້າເສຍໃຈ ແລະ ຂັບໄລ່ຄົນທີ່ເຮັດເຊັ່ນນັ້ນອອກຈາກຄວາມສຳພັນຂອງພວກເຈົ້າບໍ່ແມ່ນບໍ? ສຳລັບເຮົາແລ້ວ, ເຖິງແມ່ນວ່າ ກາຍຂອງເຮົາບໍ່ໄດ້ຢູ່ນຳ, ແຕ່ຈິດໃຈຂອງເຮົາກໍຢູ່ກັບພວກເຈົ້າ. ເຮົາໄດ້ຕັດສິນຄົນທີ່ເຮັດຢ່າງນັ້ນໃນນາມຂອງພຣະເຢຊູເຈົ້າ ອົງພຣະຜູ້ເປັນເຈົ້າຂອງພວກເຮົາ ເໝືອນກັບວ່າເຮົາໄດ້ຢູ່ນໍາພວກເຈົ້າ. ດັ່ງນັ້ນ ເມື່ອພວກເຈົ້າທັງຫລາຍໄດ້ປະຊຸມກັນ ແລະ ຈິດໃຈຂອງເຮົາກໍຢູ່ຮ່ວມກັບພວກເຈົ້າ ແລະ ລິດອຳນາດຂອງພຣະເຢຊູເຈົ້າ ອົງພຣະຜູ້ເປັນເຈົ້າຂອງພວກເຮົາກໍຢູ່ນໍາດ້ວຍ, ຈົ່ງມອບຄົນນັ້ນໄວ້ໃຫ້ມານຊາຕານທຳລາຍເນື້ອໜັງ1,2 ເພື່ອວ່າຈິດວິນຍານຂອງລາວຈະໄດ້ພົ້ນໃນວັນຂອງອົງພຣະຜູ້ເປັນເຈົ້າ.
ການອວດອ້າງຂອງພວກເຈົ້ານັ້ນບໍ່ດີເລີຍ. ພວກເຈົ້າບໍ່ຮູ້ບໍວ່າເຊື້ອແປ້ງພຽງແຕ່ໜ້ອຍດຽວກໍເຮັດໃຫ້ແປ້ງນວດທັງກ້ອນຟູຂຶ້ນ? ຈົ່ງກຳຈັດເຊື້ອເກົ່າອອກ, ເພື່ອວ່າພວກເຈົ້າຈະໄດ້ເປັນແປ້ງນວດກ້ອນໃໝ່ທີ່ບໍ່ມີເຊື້ອ ດັ່ງທີ່ພວກເຈົ້າເປັນຢູ່ແທ້ຈິງ. ເພາະພຣະຄຣິດເຈົ້າຜູ້ເປັນລູກແກະປັດສະຄາຂອງພວກເຮົານັ້ນ ໄດ້ຖືກຖວາຍບູຊາແລ້ວ. ເຫດສະນັ້ນ, ໃຫ້ພວກເຮົາຖືຮັກສາເທດສະການນີ້ບໍ່ແມ່ນດ້ວຍແປ້ງເຂົ້າຈີ່ເກົ່າທີ່ມີຄວາມອາຄາດບາດໝາງ ແລະ ຄວາມຊົ່ວຮ້າຍ, ແຕ່ດ້ວຍເຂົ້າຈີ່ທີ່ບໍ່ມີເຊື້ອ ຄືເຂົ້າຈີ່ແຫ່ງຄວາມຈິງໃຈ ແລະ ຄວາມຈິງ.
ເຮົາໄດ້ຂຽນຈົດໝາຍມາຫາພວກເຈົ້າເພື່ອບໍ່ໃຫ້ຄົບຫາກັບຄົນຜິດສິນທຳທາງເພດ ແຕ່ບໍ່ໄດ້ໝາຍເຖິງປະຊາຊົນຂອງໂລກນີ້ຜູ້ທີ່ຜິດສິນທຳ ຫລື ຜູ້ທີ່ມີຄວາມໂລບ ແລະ ຜູ້ທີ່ສໍ້ໂກງ ຫລື ຜູ້ທີ່ຂາບໄຫວ້ຮູບເຄົາລົບ. ໃນກໍລະນີນີ້ ພວກເຈົ້າຈະຕ້ອງໄດ້ອອກຈາກໂລກນີ້. ແຕ່ບັດນີ້ ເຮົາໄດ້ຂຽນມາເຖິງພວກເຈົ້າວ່າ ພວກເຈົ້າຕ້ອງບໍ່ໄປຄົບຫາກັບຄົນທີ່ອ້າງຕົນເອງວ່າເປັນພີ່ນ້ອງ3 ແຕ່ຍັງເຮັດຜິດສິນທຳທາງເພດ ຫລື ໂລບ, ເປັນຄົນຂາບໄຫວ້ຮູບເຄົາລົບ ຫລື ເປັນຄົນໃສ່ຮ້າຍປ້າຍສີຄົນອື່ນ, ເປັນຄົນຂີ້ເຫລົ້າ ຫລື ເປັນຄົນສໍ້ໂກງ. ຄົນແບບນີ້ບໍ່ສົມຄວນແມ່ນແຕ່ຈະຮ່ວມຮັບປະທານອາຫານນໍາ.
ແມ່ນໜ້າທີ່ຫຍັງຂອງເຮົາທີ່ຈະຕັດສິນຄົນທີ່ຢູ່ພາຍນອກຄຣິສຕະຈັກເຫລົ່ານັ້ນ? ພວກເຈົ້າຈະຕັດສິນຄົນທີ່ຢູ່ພາຍໃນເຫລົ່ານັ້ນບໍ່ແມ່ນບໍ? ພຣະເຈົ້າຈະຕັດສິນຄົນທີ່ຢູ່ພາຍນອກເຫລົ່ານັ້ນ. “ຈົ່ງຂັບໄລ່ຄົນຊົ່ວຮ້າຍອອກໄປຈາກທ່າມກາງພວກເຈົ້າ”.4
Source notes (4)
- Footnote ໃນບໍລິບົດຢ່າງນີ້, ໃນພາສາກຣີກສຳລັບຄຳວ່າ (ສາຣະອິສ) ອ້າງອີງໃສ່ສະພາບທີ່ເຕັມດ້ວຍບາບຂອງມະນຸດ, ມັກຖືກນຳສະເໜີວ່າເປັນອຳນາດໃນການຕໍ່ຕ້ານຕໍ່ພຣະວິນຍານ.
- Footnote ຫລື ກາຍຂອງລາວ ຫລື ເນື້ອໜັງ
- Footnote ໝາຍເຖິງຜູ້ທີ່ເຊື່ອບໍ່ວ່າ ຍິງ ຫລື ຊາຍ ທີ່ຢູ່ໃນຄອບຄົວຂອງພຣະເຈົ້າ
- Footnote ພບຍ 17:7; 19:19; 21:21; 22:21,24; 24:7
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.