Biblica® Open Lao Contemporary Version
1 ຂ່າວຄາວ 29
ເຄື່ອງຖວາຍສຳລັບສ້າງວິຫານ
ຈາກນັ້ນ ກະສັດດາວິດກ່າວຕໍ່ທີ່ປະຊຸມທັງໝົດວ່າ: “ໂຊໂລໂມນລູກຊາຍຂອງພໍ່, ຜູ້ທີ່ພຣະເຈົ້າໄດ້ເລືອກໄວ້, ຍັງໜຸ່ມ ແລະ ຂາດປະສົບການ. ວຽກງານກໍໃຫຍ່ຫລາຍ, ເພາະສິ່ງກໍ່ສ້າງທີ່ຍິ່ງໃຫຍ່ນີ້ບໍ່ແມ່ນສ້າງຂຶ້ນເພື່ອມະນຸດ ແຕ່ສຳລັບພຣະເຈົ້າຢາເວ ພຣະເຈົ້າ. ຂ້າພະເຈົ້າໄດ້ຈັດຕຽມຊັບພະຍາກອນຕ່າງໆໄວ້ສຸດຄວາມສາມາດສຳລັບວິຫານຂອງພຣະເຈົ້າຄື: ຄຳ, ເງິນ, ທອງສຳລິດ, ເຫລັກ, ໄມ້, ຫີນມີຄ່າ, ພອຍສີຟ້າ1 ສຳລັບປະດັບປະດາ ແລະ ຫີນລາຍສີຕ່າງໆ ແລະ ຫີນອ່ອນເປັນຈຳນວນຫລວງຫລາຍ. ນອກຈາກສິ່ງທັງໝົດນີ້, ໃນການອຸທິດຕົວຂອງຂ້າພະເຈົ້າເພື່ອວິຫານຂອງພຣະເຈົ້າ. ບັດນີ້ ຂ້າພະເຈົ້າຂໍມອບຄໍາ ແລະ ເງິນ ທີ່ເປັນຊັບສົມບັດສ່ວນຕົວຂອງຂ້າພະເຈົ້າເພື່ອການກໍ່ສ້າງວິຫານຂອງພຣະເຈົ້າ, ນອກຈາກສິ່ງທັງປວງນີ້ແລ້ວ ຂ້າພະເຈົ້າໄດ້ຈັດຕຽມສິ່ງນີ້ໄວ້ສໍາລັບວິຫານອັນສັກສິດນີ້ຄື: ຄຳສາມພັນຕະລັນຕົນ2 (ຄຳຈາກໂອຟີ) ແລະ ເງິນບໍລິສຸດເຈັດພັນຕະລັນຕົນ3 ສຳລັບໃຊ້ຕົບແຕ່ງຝາຂອງວິຫານ, ສຳລັບສິ່ງຂອງຕ່າງທີ່ເຮັດດ້ວຍຄໍາ ແລະ ເງິນແມ່ນພວກຊ່າງສີມືຈະລົງມືເຮັດ. ບັດນີ້ ມີຜູ້ໃດແດ່ທີ່ເຕັມໃຈຈະອຸທິດຕົນເອງແກ່ພຣະເຈົ້າຢາເວໃນມື້ນີ້?”
ບັນດາຜູ້ນຳຂອງຕະກຸນຕ່າງໆ, ບັນດາເຈົ້າໜ້າທີ່ຂອງເຜົ່າຕ່າງໆຂອງອິດສະຣາເອນ, ບັນດາຜູ້ບັນຊາການກອງພັນ ແລະ ບັນດາຜູ້ບັນຊາການກອງຮ້ອຍ, ແລະ ບັນດາຂ້າລາຊະການຮັບຜິດຊອບວຽກງານຂອງກະສັດຈຶ່ງພາກັນໃຫ້ດ້ວຍຄວາມເຕັມໃຈ. ພວກເຂົາໄດ້ມອບຄຳໜັກ 5.000 ຕະລັນຕົນ4 ກັບອີກ 10.000 ດາລິກ,5 ເງິນໜັກ 10.000 ຕະລັນຕົນ6 ແລະ ທອງສຳລິດໜັກ 18.000 ຕະລັນຕົນ7 ແລະ ເຫລັກໜັກ 100.000 ຕະລັນຕົນ.8 ຜູ້ໃດທີ່ມີເພັດນິນຈິນດາກໍນຳມາຖວາຍທີ່ຄັງຂອງວິຫານຂອງພຣະເຈົ້າຢາເວ ທີ່ຢູ່ໃນການດູແລເບິ່ງແຍງຂອງເຢຮີເອນຊາວເກໂຊນ. ປະຊາຊົນພາກັນຊື່ນຊົມຍິນດີກັບການຕອບສະໜອງຂອງບັນດາຜູ້ນຳຂອງຕົນ, ພວກເຂົາໄດ້ຖວາຍດ້ວຍຄວາມເຕັມໃຈ ແລະ ຖວາຍດ້ວຍສຸດໃຈແກ່ພຣະເຈົ້າຢາເວ. ກະສັດດາວິດກໍມີຄວາມຊື່ນຊົມຍິນດີຫລາຍທີ່ສຸດ.
ຄຳອະທິຖານຂອງດາວິດ
ດາວິດໄດ້ສັນລະເສີນພຣະເຈົ້າຢາເວຕໍ່ໜ້າທີ່ປະຊຸມທັງຫລາຍວ່າ,
“ຂ້າແດ່ພຣະເຈົ້າຢາເວ, ຂໍໃຫ້ຄໍາສັນລະເສີນເປັນຂອງພຣະອົງ,
ພຣະເຈົ້າແຫ່ງອິດສະຣາເອນບັນພະບຸລຸດຂອງພວກຂ້ານ້ອຍ
ຂໍໃຫ້ຄໍາສັນລະເສີນເປັນຂອງພຣະອົງຕະຫຼອດໄປ.
ຂ້າແດ່ພຣະເຈົ້າຢາເວ, ຄວາມຍິ່ງໃຫຍ່, ລິດອໍານາດ ແລະ ອໍານາດ
ແລະ ສະຫງ່າລາສີ ບາລະມີ ແລະ ຄວາມງາມສະຫງ່າ ຈົ່ງເປັນຂອງພຣະອົງ,
ທຸກສິ່ງໃນຟ້າສະຫວັນ ແລະ ທີ່ແຜ່ນດິນໂລກຈົ່ງເປັນຂອງພຣະອົງ.
ຂ້າແດ່, ພຣະເຈົ້າຢາເວ, ອານາຈັກເປັນຂອງພຣະອົງ;
ພຣະອົງເປັນທີ່ຍົກຍ້ອງໃນຖານະກະສັດປົກຄອງເໜືອສັບພະທຸກສິ່ງ.
ຄວາມຮັ່ງມີ ແລະ ກຽດຕິຍົດມາຈາກພຣະອົງ;
ພຣະອົງເປັນຜູ້ປົກຄອງເໜືອສັບພະທຸກສິ່ງ.
ພະລັງ ແລະ ລິດອຳນາດຢູ່ໃນມືຂອງພຣະອົງ
ເພື່ອຍົກຍ້ອງ ແລະ ໃຫ້ກຳລັງແກ່ທຸກຄົນ.
ຂ້າແດ່, ພຣະເຈົ້າຂອງພວກຂ້ານ້ອຍ, ພວກຂ້ານ້ອຍຂອບຄຸນພຣະອົງ,
ແລະ ສັນລະເສີນນາມອັນຮຸ່ງເຮືອງຂອງພຣະອົງ.
“ແຕ່ຂ້ານ້ອຍແມ່ນຜູ້ໃດ, ແລະ ປະຊາຊົນຂອງຂ້ານ້ອຍແມ່ນຜູ້ໃດ, ທີ່ຈະສາມາດຖວາຍແກ່ພຣະອົງຢ່າງເຕັມໃຈເຊັ່ນນີ້? ທຸກສິ່ງມາຈາກພຣະອົງ, ແລະ ພວກຂ້ານ້ອຍພຽງແຕ່ຖວາຍສິ່ງທີ່ມາຈາກມືຂອງພຣະອົງ. ພວກຂ້ານ້ອຍເປັນຄົນຕ່າງດ້າວ ແລະ ເປັນຄົນແປກໜ້າເໝືອນບັນພະບຸລຸດຂອງພວກຂ້ານ້ອຍໃນສາຍຕາຂອງພຣະອົງ. ວັນເວລາຂອງພວກຂ້ານ້ອຍໃນໂລກນີ້ກໍເໝືອນເງົາ ທີ່ບໍ່ມີຄວາມຫວັງ. ຂ້າແດ່ພຣະເຈົ້າຢາເວ, ພຣະເຈົ້າຂອງພວກຂ້ານ້ອຍ, ຊັບສົມບັດທັງໝົດນີ້ທີ່ຂ້ານ້ອຍໄດ້ຈັດຕຽມໄວ້ນັ້ນ ເພື່ອສ້າງວິຫານສຳລັບນາມອັນບໍລິສຸດຂອງພຣະອົງກໍມາຈາກມືຂອງພຣະອົງ, ແລະ ທຸກສິ່ງທຸກຢ່າງກໍເປັນຂອງພຣະອົງທັງສິ້ນ. ຂ້າແດ່ພຣະເຈົ້າ, ຂ້ານ້ອຍຮູ້ວ່າພຣະອົງທົດສອບເບິ່ງຈິດໃຈ ແລະ ພໍໃຈໃນຄວາມສັດຊື່. ຂ້ານ້ອຍຖວາຍສິ່ງທັງໝົດເຫລົ່ານີ້ດ້ວຍຄວາມເຕັມໃຈ ແລະ ດ້ວຍໃຈທີ່ບໍລິສຸດ. ບັດນີ້ຂ້ານ້ອຍໄດ້ເຫັນຄວາມຊື່ນຊົມຍິນດີທີ່ປະຊາຊົນຂອງພຣະອົງຢູ່ທີ່ນີ້ຖວາຍດ້ວຍຄວາມເຕັມໃຈ. ຂ້າແດ່ພຣະເຈົ້າຢາເວ, ພຣະເຈົ້າຂອງອັບຣາຮາມ, ອີຊາກ ແລະ ອິດສະຣາເອນ, ບັນພະບຸລຸດຂອງພວກຂ້ານ້ອຍ, ຂໍໂຜດຮັກສາຄວາມປາຖະໜາ ແລະ ຄວາມຄິດເຫລົ່ານີ້ໄວ້ໃນຈິດໃຈຕະຫລອດໄປ, ແລະ ຮັກສາຈິດໃຈທີ່ຈົ່ງຮັກພັກດີຕໍ່ພຣະອົງຕະຫລອດໄປເທີນ. ແລະ ຂໍໂຜດໃຫ້ໂຊໂລໂມນລູກຊາຍຂອງຂ້ານ້ອຍອຸທິດຢ່າງໝົດໃຈທີ່ຈະປະຕິບັດຕາມຂໍ້ຄໍາສັ່ງ, ກົດໝາຍ ແລະ ຂໍ້ກໍານົດຂອງພຣະອົງໃນການເຮັດທຸກສິ່ງສໍາລັບການກໍ່ສ້າງທີ່ຍິ່ງໃຫຍ່ນີ້ ທີ່ຂ້ານ້ອຍໄດ້ຈັດຕຽມໄວ້ແລ້ວ”.
ແລ້ວດາວິດກ່າວກັບປະຊາຊົນທີ່ມາຊຸມນຸມທັງໝົດວ່າ, “ຈົ່ງສັນເສີນພຣະເຈົ້າຢາເວ ພຣະເຈົ້າຂອງພວກເຈົ້າ”. ດັ່ງນັ້ນ ພວກເຂົາທັງໝົດກໍສັນລະເສີນພຣະເຈົ້າຢາເວ, ພຣະເຈົ້າແຫ່ງບັນພະບຸລຸດຂອງພວກເຂົາ; ພວກເຂົາໄດ້ກາບລົງຕໍ່ໜ້າພຣະເຈົ້າຢາເວ ແລະ ກະສັດຂອງພວກຕົນ.
ໂຊໂລໂມນຂຶ້ນເປັນກະສັດ
(1ກສ 1:28-53)
ວັນຕໍ່ມາ ພວກເຂົາໄດ້ຖວາຍເຄື່ອງບູຊາແກ່ພຣະເຈົ້າຢາເວ ແລະ ເຜົາຖວາຍບູຊາແກ່ພຣະອົງມີດັ່ງນີ້: ງົວເຖິກໜຶ່ງພັນໂຕ, ແກະເຖິກໜຶ່ງພັນໂຕ ແລະ ລູກແກະໜຶ່ງພັນໂຕ, ພ້ອມທັງຖວາຍເຫລົ້າອະງຸ່ນ ແລະ ເຄື່ອງບູຊາອື່ນໆຢ່າງຫລວງຫລາຍແກ່ພຣະເຈົ້າຢາເວສຳລັບອິດສະຣາເອນທັງໝົດ. ໃນວັນນັ້ນ, ພວກເຂົາໄດ້ກິນ ແລະ ດື່ມດ້ວຍຄວາມຊື່ນຊົມຍິນດີຕໍ່ໜ້າພຣະເຈົ້າຢາເວ.
ຈາກນັ້ນ ພວກເຂົາໄດ້ຍອມຮັບໂຊໂລໂມນລູກຊາຍຂອງດາວິດຂຶ້ນເປັນກະສັດເປັນຄັ້ງທີສອງ, ພວກເຂົາແຕ່ງຕັ້ງລາວຂຶ້ນເປັນຜູ້ປົກຄອງຕໍ່ໜ້າພຣະເຈົ້າຢາເວ ແລະ ແຕ່ງຕັ້ງຊາດົກເປັນປະໂລຫິດ. ດັ່ງນັ້ນ ໂຊໂລໂມນຈຶ່ງຂຶ້ນນັ່ງເທິງບັນລັງທີ່ພຣະເຈົ້າຢາເວຕັ້ງໄວ້ແທນດາວິດພໍ່ຂອງເພິ່ນ. ເພິ່ນຈະເລີນຮຸ່ງເຮືອງຂຶ້ນ ແລະ ອິດສະຣາເອນທັງໝົດກໍເຊື່ອຟັງເພິ່ນ. ບັນດາຂ້າລາຊະການທັງໝົດ ແລະ ພວກນັກສູ້ຮົບ, ຕະຫລອດຈົນເຖິງລູກຊາຍທັງໝົດຂອງກະສັດດາວິດ, ຕ່າງກໍໄດ້ສັນຍາວ່າຈະຍອມເຊື່ອຟັງຕໍ່ກະສັດໂຊໂລໂມນ.
ພຣະເຈົ້າຢາເວໄດ້ຍົກຊູໂຊໂລໂມນຂຶ້ນສູງໃນສາຍຕາປະຊາຊົນອິດສະຣາເອນທັງໝົດ ແລະ ໄດ້ປະທານກຽດອັນສະຫງ່າງາມໃຫ້ແກ່ເພິ່ນ ທີ່ບໍ່ມີກະສັດອິດສະຣາເອນຄົນໃດເຄີຍມີມາກ່ອນ.
ການຕາຍຂອງດາວິດ
(1ກສ 2:10-12)
ດາວິດລູກຊາຍຂອງເຢຊີໄດ້ປົກຄອງທົ່ວອິດສະຣາເອນ. ເພິ່ນໄດ້ປົກຄອງອິດສະຣາເອນເປັນເວລາ 40 ປີ, ເພິ່ນໄດ້ປົກຄອງໃນເມືອງເຮັບໂຣນ 7 ປີ ແລະ ໃນເຢຣູຊາເລັມ 33 ປີ. ດາວິດໄດ້ຕາຍໄປເມື່ອເຖົ້າແກ່ຊະລາຫລາຍແລ້ວ. ມີຄວາມຊື່ນຊົມຍິນດີກັບຊີວິດຍືນຍາວ, ກຽດຕິຍົດ ແລະ ຄວາມຮັ່ງມີ. ໂຊໂລໂມນລູກຊາຍຂອງເພິ່ນໄດ້ຂຶ້ນເປັນກະສັດແທນ.
ເຫດການຕ່າງໆໃນໄລຍະການປົກຄອງຂອງກະສັດດາວິດຕັ້ງແຕ່ຕົ້ນຈົນຈົບ, ພວກເຂົາໄດ້ບັນທຶກໄວ້ໃນບົດບັນທຶກຂອງຜູ້ທຳນວາຍຊາມູເອນ, ໃນບົດບັນທຶກຂອງຜູ້ທຳນວາຍນາທານ ແລະ ໃນບົດບັນທຶກຂອງຜູ້ທຳນວາຍກາດ, ພ້ອມທັງລາຍລະອຽດກ່ຽວກັບການປົກຄອງ, ອໍານາດຂອງເພິ່ນ ແລະ ເຫດການທັງໝົດທີ່ເກີດຂຶ້ນກັບເພິ່ນ ແລະ ອິດສະຣາເອນ ກັບ ອານາຈັກອື່ນໆທັງໝົດ.
Source notes (8)
- Footnote ໃນພາສາເຮັບເຣີຄຳນີ້ມີຄວາມຫມາຍບໍ່ຊັດເຈນ
- Footnote ພາສາເຮັບເຣີວ່າ 3.000 ຕະລັນຕົນ
- Footnote ພາສາເຮັບເຣີວ່າ 7.000 ຕະລັນຕົນ
- Footnote ປະມານ 190 ໂຕນ
- Footnote ປະມານ 84 ກິໂລກຣາມ
- Footnote ປະມານ 380 ໂຕນ
- Footnote ປະມານ 675 ໂຕນ
- Footnote ປະມານ 3.800 ໂຕນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.