Biblica® Open Lao Contemporary Version
1 ຂ່າວຄາວ 19
ດາວິດຊະນະຊາວອຳໂມນ
(2ຊມອ 10:1-19)
ຕໍ່ມາ, ກະສັດນາຮາດແຫ່ງອຳໂມນໄດ້ຕາຍໄປ, ແລະ ຮານູນລູກຊາຍຂອງເພິ່ນໄດ້ຂຶ້ນເປັນກະສັດແທນ. ດາວິດເວົ້າວ່າ, “ເຮົາຈະສະແດງຄວາມເມດຕາຕໍ່ຮານູນລູກຊາຍຂອງນາຮາດ, ເພາະພໍ່ຂອງລາວໄດ້ສະແດງຄວາມເມດຕາຕໍ່ເຮົາ”. ດັ່ງນັ້ນ ດາວິດຈຶ່ງສົ່ງຄະນະທູດໄປສະແດງຄວາມໂສກເສົ້າເສຍໃຈຕໍ່ຮານູນກ່ຽວກັບພໍ່ຂອງລາວ.
ເມື່ອຄະນະທູດຂອງດາວິດມາພົບຮານູນທີ່ດິນແດນຊາວອຳໂມນເພື່ອສະແດງຄວາມໂສກເສົ້າເສຍໃຈຕໍ່ລາວ, ພວກຜູ້ບັນຊາການຊາວອຳໂມນເວົ້າກັບຮານູນວ່າ, “ທ່ານຄິດວ່າດາວິດໃຫ້ກຽດພໍ່ຂອງທ່ານໂດຍການສົ່ງພວກທູດມາເພື່ອສະແດງຄວາມໂສກເສົ້າເສຍໃຈຕໍ່ທ່ານຊັ້ນບໍ? ພວກເຂົາໄດ້ບໍ່ມາເພື່ອສໍາຫຼວດເທົ່ານັ້ນ ແລະ ມາເພື່ອສອດແນມເບິ່ງປະເທດ ແລ້ວກໍໂຄ່ນລົ້ມບໍ່ແມ່ນບໍ?” ດັ່ງນັ້ນ ຮານູນຈຶ່ງຈັບຄະນະທູດຂອງດາວິດແຖໜວດ, ແລະ ຕັດເສື້ອຜ້າບ່ອນກະໂພກກົ້ນຂອງພວກເຂົາອອກ, ແລ້ວກໍປ່ອຍພວກເຂົາໄປ.
ເມື່ອມີຄົນມາບອກດາວິດກ່ຽວກັບເລື່ອງທີ່ເກີດຂຶ້ນກັບຄົນເຫລົ່ານັ້ນ, ເມື່ອດາວິດຮູ້ເລື່ອງນີ້, ເພິ່ນກໍສົ່ງຜູ້ສົ່ງຂ່າວໄປພົບຄົນເຫລົ່ານັ້ນ, ເພາະພວກເຂົາຮູ້ສຶກອັບອາຍຂາຍໜ້າຫລາຍ. ກະສັດເວົ້າວ່າ, “ຈົ່ງພັກຢູ່ທີ່ເຢຣິໂກຈົນກວ່າໜວດຂອງພວກເຈົ້າຈະປົ່ງໃໝ່, ແລ້ວຈຶ່ງກັບຄືນມາ”.
ເມື່ອຊາວອຳໂມນຮູ້ວ່າ, ພວກເຂົາໄດ້ເຮັດສິ່ງທີ່ໜ້າລັງກຽດຕໍ່ດາວິດ, ຮານູນ ແລະ ຊາວອຳໂມນຈຶ່ງນຳເອົາເງິນໜຶ່ງພັນຕະລັນຕົນ1ໄປຈ້າງລົດຮົບ ແລະ ທະຫານມ້າຈາກອາຣາມນາຮາຣາອິມ, ອາຣາມ ມາອາກາ ແລະ ໂຊບາ. ພວກເຂົາໄດ້ຈ້າງລົດຮົບ ແລະ ທະຫານມ້າສາມສິບສອງພັນຄັນ, ແລະ ຈ້າງກອງທະຫານຂອງກະສັດມາອາກາ, ທີ່ມາຕັ້ງຄ້າຍຢູ່ໃກ້ເມືອງເມເດບາ. ໃນຂະນະທີ່ຊາວອຳໂມນຍົກທັບອອກມາຈາກເມືອງຕ່າງໆຂອງພວກເຂົາເພື່ອສູ້ຮົບ.
ເມື່ອໄດ້ຍິນເລື່ອງນີ້, ດາວິດກໍສົ່ງໂຢອາບພ້ອມທັງທະຫານໃນກອງທັບທັງໝົດອອກໄປ. ຊາວອຳໂມນອອກມາ ແລະ ຕັ້ງແນວສູ້ຮົບຢູ່ທີ່ທາງເຂົ້າເມືອງຂອງພວກເຂົາ, ໃນຂະນະທີ່ບັນດາກະສັດໄດ້ອອກມາຮ່ວມສູ້ຮົບນໍານັ້ນ ກໍຕັ້ງທີ່ໝັ້ນຂອງພວກຕົນຢູ່ນອກເມືອງ.
ໂຢອາບເຫັນວ່າກອງກຳລັງຂອງສັດຕູຕັ້ງແນວສູ້ຮົບຢູ່ທັງຂ້າງໜ້າ ແລະ ຂ້າງຫລັງຂອງຕົນ; ດັ່ງນັ້ນ ລາວຈຶ່ງເລືອກເອົາກອງທະຫານທີ່ເກັ່ງກ້າທີ່ສຸດສ່ວນໜຶ່ງໃນອິດສະຣາເອນ ແລະ ໃຫ້ພວກເຂົາຕັ້ງທ່າຕໍ່ສູ້ກັບຊາວອາຣາມ. ລາວໄດ້ວາງທະຫານທີ່ເຫລືອນັ້ນຢູ່ພາຍໃຕ້ຄຳສັ່ງຂອງອາບີໄຊນ້ອງຊາຍຂອງລາວ ແລະ ພວກເຂົາໄດ້ອອກໄປຕໍ່ສູ້ກັບຊາວອຳໂມນ. ໂຢອາບເວົ້າກັບທະຫານຂອງຕົນວ່າ, “ຖ້າຊາວອາຣາມແຂງແຮງເກີນໄປສໍາລັບຂ້ອຍ, ເຈົ້າຈົ່ງມາຊ່ວຍຂ້ອຍ; ແຕ່ຖ້າຊາວອຳໂມນແຂງແຮງເກີນໄປສໍາລັບເຈົ້າ, ຂ້ອຍຈະໄປຊ່ວຍເຈົ້າ. ຈົ່ງເຂັ້ມແຂງ ແລະ ໃຫ້ພວກເຮົາຕໍ່ສູ້ຢ່າງກ້າຫານເພື່ອພີ່ນ້ອງຮ່ວມຊາດຂອງພວກເຮົາ ແລະ ເມືອງຕ່າງໆຂອງພຣະເຈົ້າ. ພຣະເຈົ້າຢາເວຈະເຮັດສິ່ງທີ່ດີໃນສາຍຕາຂອງພຣະອົງ”.
ແລ້ວໂຢອາບ ແລະ ກອງທະຫານຂອງຕົນກໍຍົກທັບບຸກເຂົ້າໂຈມຕີຊາວອາຣາມ, ແລ້ວພວກເຂົາກໍປົບໜີໄປຕໍ່ໜ້າເພິ່ນ. ເມື່ອຊາວອຳໂມນເຫັນຊາວອາຣາມກໍາລັງປົບໜີໄປ, ພວກເຂົາກໍແລ່ນປົບໜີໄປເໜືອນກັນຕໍ່ໜ້າອາບີໄຊນ້ອງຊາຍຂອງລາວ ແລະ ພວກເຂົາໄດ້ເຂົ້າໄປໃນເມືອງ. ດັ່ງນັ້ນ ໂຢອາບຈຶ່ງກັບຄືນມາທີ່ເຢຣູຊາເລັມ.
ຫລັງຈາກຊາວອາຣາມເຫັນວ່າ, ພວກເຂົາໄດ້ພ່າຍແພ້ໃຫ້ແກ່ອິດສະຣາເອນແລ້ວ, ພວກເຂົາໄດ້ສົ່ງຜູ້ນໍາຂ່າວໄປ ແລະ ໃຫ້ຊາວອາຣາມນໍາເອົາກອງທະຫານມາຈາກອີກຟາກໜຶ່ງຂອງແມ່ນໍ້າເອີຟຣັດ, ໂດຍມີໂຊບັກ ຜູ້ບັນຊາການກອງທັບຂອງຮາດາເດເຊເປັນຜູ້ນໍາພາ.
ເມື່ອດາວິດໄດ້ຮູ້ເລື່ອງນີ້, ເພິ່ນກໍຮວບຮວມເອົາທະຫານອິດສະຣາເອນທັງໝົດຂ້າມແມ່ນ້ຳຈໍແດນໄປເພິ່ນບຸກໂຈມຕີຕໍ່ສູ້ພວກເຂົາ ແລະ ໄດ້ຕັ້ງແນວຮົບຕ້ານພວກເຂົາ. ດາວິດໄດ້ຕັ້ງແນວຮົບປະເຊີນໜ້າກັບຊາວອາຣາມໃນສະໜາມຮົບ. ພວກເຂົາໄດ້ຕໍ່ສູ້ກັບເພິ່ນ. ແຕ່ພວກເຂົາໄດ້ປົບໜີໄປຕໍ່ໜ້າຊາວອິດສະຣາເອນ ແລະ ດາວິດໄດ້ຂ້າທະຫານມ້າຂອງພວກເຂົາເຈັດພັນຄົນ ແລະ ທະຫານລາບສີ່ສິບພັນຄົນ. ເພິ່ນຍັງໄດ້ຂ້າໂຊບັກຜູ້ບັນຊາການກອງທັບຂອງພວກເຂົາ.
ເມື່ອຄົນຮັບໃຊ້ຂອງຮາດາເດເຊເຫັນວ່າພວກເຂົາໄດ້ພ່າຍແພ້ໃຫ້ອິດສະຣາເອນແລ້ວ, ພວກເຂົາກໍໄດ້ເຮັດສັນຍາສະຫງົບເສິກກັບດາວິດ ແລະ ຍອມຢູ່ໃຕ້ອຳນາດຂອງເພິ່ນ.
ດັ່ງນັ້ນ ຊາວອາຣາມຈຶ່ງບໍ່ກ້າຊ່ວຍຊາວອຳໂມນອີກເລີຍ.
Source notes (1)
- Footnote ພາສາເຮັບເຣີວ່າ 1.000 ຕາລັນຕົນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.