Biblica® Open Lao Contemporary Version
1 ຂ່າວຄາວ 18
ໄຊຊະນະຂອງດາວິດ
(2ຊມອ 8:1-14)
ຕໍ່ມາ, ດາວິດໄດ້ເອົາຊະນະຊາວຟີລິດສະຕິນຢ່າງຮາບຄາບ ແລະ ເພິ່ນໄດ້ຢຶດເມືອງກາດ ແລະ ໝູ່ບ້ານທີ່ຢູ່ອ້ອມແອ້ມເມືອງນັ້ນຈາກການຄວບຄຸມຂອງຊາວຟີລິດສະຕິນ.
ດາວິດຍັງໄດ້ເອົາຊະນະຊາວໂມອາບດ້ວຍ ແລະ ພວກເຂົາຕົກເປັນເມືອງຂຶ້ນ ແລະ ນຳເອົາເຄື່ອງບັນນາການມາມອບໃຫ້ເພິ່ນ.
ຫລາຍກວ່ານັ້ນ, ດາວິດໄດ້ເອົາຊະນະກະສັດຮາດາເດເຊແຫ່ງໂຊບາ, ໃນບໍລິເວນໃກ້ກັບເມືອງຮາມັດ, ຂະນະທີ່ຮາດາເດເຊກໍຂຶ້ນສະຖາປະນາອຳນາດ1ແຖບແມ່ນໍ້າເອີຟຣັດ. ດາວິດໄດ້ຢຶດລົດມ້າຮົບໜຶ່ງພັນຄັນ, ທະຫານມ້າເຈັດພັນຄົນ2 ແລະ ທະຫານສອງໝື່ນຄົນ. ດາວິດໄດ້ຕັດເອັນຂາມ້າທັງໝົດ ຍົກເວັ້ນມ້າສຳລັບລົດຮົບໜຶ່ງຮ້ອຍໂຕ.
ເມື່ອຊາວອາຣາມແຫ່ງເມືອງດາມັສກັດມາຊ່ວຍກະສັດຮາດາເດເຊແຫ່ງເມືອງໂຊບາ, ດາວິດໄດ້ຂ້າພວກເຂົາ 22.000 ຄົນ. ເພິ່ນໄດ້ວາງກຳລັງທະຫານໄວ້ໃນອານາຈັກຂອງຊາວອາຣາມແຫ່ງດາມັສກັດ ແລະ ຊາວອາຣາມກໍຍອມຢູ່ໃຕ້ອໍານາດຂອງເພິ່ນ ແລະ ຕ້ອງນໍາເຄື່ອງບັນນາການມາໃຫ້ເພິ່ນ. ພຣະເຈົ້າຢາເວໄດ້ໃຫ້ໄຊຊະນະແກ່ດາວິດໃນທຸກບ່ອນທີ່ເພິ່ນໄປ.
ດາວິດໄດ້ນຳເອົາໂລ່ຄຳຂອງບັນດາເຈົ້າໜ້າທີ່ຂອງກະສັດຮາດາເດເຊ ແລະ ໄດ້ນຳໂລ່ເຫລົ່ານັ້ນມາທີ່ເຢຣູຊາເລັມ. ດາວິດໄດ້ນຳເອົາທອງສຳລິດເປັນຈຳນວນມະຫາສານມາຈາກເມືອງຕິບຮາດ3 ແລະ ເມືອງກູນ, ບັນດາເມືອງເຫລົ່ານີ້ຢູ່ພາຍໃຕ້ການປົກຄອງຂອງຮາດາເດເຊ. ເຊິ່ງໂຊໂລໂມນໄດ້ນໍາໃຊ້ທອງສຳຣິດເຫລົ່ານີ້ເຮັດຖັງນໍ້າ, ເສົາ ແລະ ເຄື່ອງໃຊ້ຕ່າງໆ.
ເມື່ອກະສັດໂຕອີແຫ່ງຮາມັດໄດ້ຍິນຂ່າວວ່າ ດາວິດໄດ້ເອົາຊະນະກອງທັບທັງໝົດຂອງກະສັດຮາດາເດເຊແຫ່ງໂຊບາ, ເພິ່ນຈຶ່ງສົ່ງຮາໂດຣາມ ລູກຊາຍຂອງເພິ່ນມາຫາກະສັດດາວິດເພື່ອອວຍພອນເພິ່ນ ແລະ ສະແດງຄວາມດີໃຈນຳໄຊຊະນະຂອງເພິ່ນຕໍ່ກະສັດຮາດາເດເຊ, ຜູ້ທີ່ເຄີຍສູ້ຮົບກັນກັບໂຕອີມາກ່ອນ. ຮາໂດຣາມໄດ້ນຳເຄື່ອງໃຊ້ປະເພດຕ່າງໆທີ່ເຮັດດ້ວຍຄຳ, ເງິນ ແລະ ທອງສໍາລິດມາມອບໃຫ້ກະສັດດາວິດ.
ກະສັດດາວິດໄດ້ຖວາຍສິ່ງເຫລົ່ານີ້ແກ່ພຣະເຈົ້າຢາເວ ເພິ່ນໄດ້ເຮັດແບບດຽວກັນກັບເງິນ ແລະ ຄໍາທີ່ເພິ່ນໄດ້ມາຈາກຊົນຊາດທັງໝົດເຫລົ່ານີ້ຄື ເອໂດມ, ໂມອາບ, ອຳໂມນ, ຟີລິດສະຕິນ ແລະ ອາມາເຫລັກ.
ອາບີໄຊ ລູກຊາຍນາງເຊຣູອີຢາໄດ້ຂ້າຊາວເອໂດມ 18.000 ຄົນ ຢູ່ໃນຮ່ອມພູເກືອ. ດາວິດໄດ້ວາງກຳລັງທະຫານໄວ້ໃນທົ່ວເອໂດມ ແລະ ຊາວເອໂດມທັງໝົດກໍຍອມຢູ່ໃຕ້ອໍານາດຂອງດາວິດ. ພຣະເຈົ້າຢາເວໄດ້ໃຫ້ໄຊຊະນະແກ່ດາວິດທຸກບ່ອນທີ່ເພິ່ນໄປ.
ບັນດາຂ້າລາຊະການຂອງດາວິດ
(2ຊມອ 8:15-18)
ດາວິດໄດ້ປົກຄອງທົ່ວແດນອິດສະຣາເອນ, ເພິ່ນເຮັດສິ່ງທີ່ຍຸຕິທຳ ແລະ ຖືກຕ້ອງເພື່ອປະຊາຊົນຂອງເພິ່ນທັງໝົດ.
ໂຢອາບລູກຊາຍນາງເຊຣູອີຢາເປັນຜູ້ບັນຊາການກອງທັບ;
ເຢໂຮຊາຟັດ ລູກຊາຍຂອງອາຮີລຸດເປັນຜູ້ຮັບຜິດຊອບບັນທຶກ;
ຊາດົກລູກຊາຍຂອງອາຮີຕຸບ ແລະ ແລະ ອາຮີເມເຫລັກ4 ລູກຊາຍຂອງອາບີອາທາເປັນປະໂລຫິດ;
ຊະວາຊາເປັນເລຂາທິການ;
ຊາວເກເຣັດ ແລະ ຊາວເປເລັດເປັນຫົວໜ້າຊາວເກເຣັດ ແລະ ຊາວເປເລັດ;
ແລະ ບັນດາລູກຊາຍຂອງກະສັດດາວິດຫົວໜ້າຂອງບັນດາຂ້າລາຊະການໃນຝ່າຍຂອງກະສັດ.
Source notes (4)
- Footnote ຫລື ໄປຢຶດອຳນາດຄວບຄຸມເໜືອ
- Footnote ສະບັບເຊັບຕູອາຈິນວ່າ ຢຶດພົນລົດຮົບ 1.700 ຄົນ (ເບິ່ງ 1ຂຄ 18:4)
- Footnote ພາສາເຮັບເຣີວ່າ ຕິບຮາດ ເປັນອີກຮູບໜຶ່ງຂອງ ເຕບາ
- Footnote ສຳເນົາຕົ້ນສະບັບພາສາເຮັບເຣີສ່ວນໃຫຍ່ວ່າ ອາບີເມເຫລັກ (ເບິ່ງ 2ຊມອ 8:17)
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.