Biblica® Open Lao Contemporary Version
1 ຂ່າວຄາວ 14
ຄອບຄົວຂອງດາວິດ
(2ຊມອ 5:11-16; 1ຂຄ 3:5-8)
ກະສັດຮີຣາມແຫ່ງເມືອງຕີເຣໄດ້ສົ່ງຄະນະທູດມາພົບດາວິດ ພ້ອມທັງຊ່າງກໍ່ຫີນ, ຊ່າງໄມ້ ແລະ ຕົ້ນໄມ້ສີດາມາເພື່ອສ້າງວັງຂອງດາວິດ. ແລະ ດາວິດຮູ້ວ່າ ພຣະເຈົ້າຢາເວໄດ້ຕັ້ງເພິ່ນໃຫ້ເປັນກະສັດປົກຄອງເໜືອອິດສະຣາເອນ ແລະ ອານາຈັກຂອງເພິ່ນຈະໄດ້ຮັບການຍົກຂຶ້ນເປັນຢ່າງສູງ ເພື່ອເຫັນແກ່ອິດສະຣາເອນປະຊາຊົນຂອງພຣະອົງ.
ໃນນະຄອນເຢຣູຊາເລັມດາວິດມີເມຍຕື່ມອີກ ແລະ ມີລູກຊາຍ ແລະ ລູກສາວຫລາຍຄົນ. ລູກຂອງເພິ່ນທີ່ໄດ້ເກີດຢູ່ທີ່ນັ້ນມີຊື່ດັ່ງນີ້: ຊາມມູອາ, ໂຊບັບ, ນາທານ, ໂຊໂລໂມນ, ອິບຮາ, ເອລີຊູອາ, ເອນເປເລັດ, ໂນຄາ, ເນເຟັກ, ຢາເຟຍ, ເອລີຊາມາ, ເບເອລີອາດາ,1 ແລະ ເອລີເຟເລັດ.
ດາວິດເອົາຊະນະຊາວຟີລິດສະຕິນ
(2ຊມອ 5:17-25)
ເມື່ອຊາວຟີລິດສະຕິນໄດ້ຍິນວ່າດາວິດໄດ້ຮັບການຫົດສົງໃຫ້ຂຶ້ນເປັນກະສັດປົກຄອງເໜືອທົ່ວອິດສະຣາເອນທັງໝົດ, ພວກເຂົາຈຶ່ງຍົກທັບມາທັງໝົດເພື່ອຊອກຫາເພິ່ນ, ແຕ່ດາວິດໄດ້ຍິນເລື່ອງນີ້ ແລ້ວຈຶ່ງອອກໄປພົບພວກເຂົາ. ເມື່ອຊາວຟີລິດສະຕິນມາຮອດ ແລະ ໄດ້ບຸກເຂົ້າໄປໃນຮ່ອມພູເຣຟາອິມ; ດາວິດຈຶ່ງຖາມພຣະເຈົ້າວ່າ: “ຈະໃຫ້ຂ້ານ້ອຍອອກໄປໂຈມຕີພວກຟີລິດສະຕິນບໍ່? ພຣະອົງຈະມອບພວກເຂົາໄວ້ໃນມືຂອງຂ້ານ້ອຍບໍ?”
ພຣະເຈົ້າຢາເວໄດ້ຕອບເພິ່ນວ່າ, “ຈົ່ງໄປ, ເຮົາຈະມອບພວກເຂົາໄວ້ໃນມືຂອງເຈົ້າ”.
ດັ່ງນັ້ນ ດາວິດກັບພວກທະຫານຈຶ່ງຂຶ້ນໄປທີ່ບາອານເປຣາຊິມ, ເພິ່ນໄດ້ເອົາຊະນະພວກເຂົາຢູ່ທີ່ນັ້ນ. ເພິ່ນເວົ້າວ່າ “ພຣະເຈົ້າໄດ້ທໍາລາຍສັດຕູຂອງຂ້າພະເຈົ້າດ້ວຍມືຂອງຂ້າພະເຈົ້າເໝືອນດັ່ງກະແສນໍ້າທີ່ໄຫລທະລຸໄປ” ສະນັ້ນ ບ່ອນນັ້ນຈຶ່ງໄດ້ຖືກເອີ້ນວ່າ ບາອານເປຣາຊິມ.2 ພວກຟີລິດສະຕິນໄດ້ຖິ້ມບັນດາພະຂອງພວກເຂົາໄວ້ຢູ່ທີ່ນັ້ນ ແລະ ດາວິດໄດ້ສັ່ງໃຫ້ຈູດພະເຫລົ່ານັ້ນຖິ້ມ.
ບໍ່ດົນຕໍ່ມາ ພວກຟີລິດສະຕິນໄດ້ບຸກເຂົ້າໄປໃນຮ່ອມພູແຫ່ງນັ້ນອີກ; ດັ່ງນັ້ນ ດາວິດຈຶ່ງຖາມພຣະເຈົ້າອີກ ແລະ ພຣະເຈົ້າໄດ້ຕອບເພິ່ນວ່າ, “ຢ່າບຸກໂຈມຕີທາງດ້ານໜ້າ ແຕ່ຈົ່ງອ້ອມໄປ ແລ້ວບຸກເຂົ້າໂຈມຕີທາງຕໍ່ໜ້າຂອງປ່າຕົ້ນໂພ. ເມື່ອເຈົ້າໄດ້ຍິນສຽງຍ່າງເທິງປາຍຕົ້ນໂພ, ຈົ່ງບຸກເຂົ້າໂຈມຕີ ເພາະນັ້ນມີຄວາມໝາຍວ່າພຣະເຈົ້າໄດ້ອອກໄປກ່ອນພວກເຈົ້າແລ້ວ ເພື່ອໂຈມຕີກອງທັບຟີລິດສະຕິນ”. ດັ່ງນັ້ນດາວິດໄດ້ເຮັດຕາມທີ່ພຣະເຈົ້າໄດ້ສັ່ງເພິ່ນ ແລະ ພວກເຂົາໄດ້ທຳລາຍກອງທັບຟີລິດສະຕິນຕະຫລອດທາງຕັ້ງແຕ່ເມືອງກີເບໂອນໄປຈົນຮອດເມືອງເກເຊ.
ຊື່ສຽງຂອງດາວິດຈຶ່ງຊ່າລືໄປທົ່ວທຸກເຂດແດນ ແລະ ພຣະເຈົ້າຢາເວໄດ້ເຮັດໃຫ້ທຸກຊົນຊາດ ເກີດມີຄວາມຢ້ານກົວເພິ່ນ.
Source notes (2)
- Footnote ເບເອລີອາດາ: ໃນ 3:8 ແລະ 2 ຊມອ 5:16 ເອີ້ນວ່າ ເອລີອາດາ.
- Footnote ແປວ່າ ອົງພຣະຜູ້ເປັນເຈົ້າຜູ້ພຸ່ງເຂົ້າໃສ່
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.