Skip to content
BibleKenya

Lamma Bible Translation Project

Luka 9

Yesɔ sho u jaɗɔyi kopi tu ziti

Akɨnti gbete Yesɔ ɓaa u jaɗɔyi kopi tu ziti nya ɗɔgbete, a ãyi kaka gbete i yɛ shɛshi suru kɔ̃linɛ i gati ko-pi vɔrɔ shɔpiya, Kɛɗɔn a shoyirɛ nɛi yɛrɛ i nwari shɔ ruu Ɗa kpati roonɛ, i gati shɔ vɔrɔyi. Yesɔ geliyi nɛ: <<Ɔkɔɔ tuu viwɔnɛ a naani ɔkɔɔ sa labaanɛ a naani, ko jaduu, ko vishaanɛ, ko saa, ko fãrã wɔɔ ɔkɔɔ tunɛ a naani. wɛrɛ gbete ɔkɛ tonɛ shɔkɛ tɛwɔ naa nɛ aɗɔn ɔ ɔ̃ a ɗɔukɔ anɛ leegbete ɔ yaa komɔuyɛ. Ɗɔgbete shɔji tɛwɔɔ naa ɓa kpai, ɔ yaa koutɔ ɔ kuti zaburu gbete awɔ dɔɔ ɔ yɛrɛ, zaburu sɔ̃nɛ ukɔ ɔ̃kɛ naa shɔ gɔyi yuusho.>> Kɛɗɔn Yesɔ jadɔyi i shɛrɛ i raki jakomɔɔ piti kpai i ɗɔyi nwari shɔ ruu tɔ̃vɨn i gati shɔvɔrɔyi ko-pi ɗɔpiya.

Hiridu yuu rinɛ aru Yesɔ ko ɔ̃rɛ piya

Aɗagbete Hirudu kpati Galili, nta vigbete a ɗɔɔ yɛnɛtɛ, u yuu rikutulu, aru shɔ gãsiyi i shanɛ Yɔhana shɔ Batizima ukɔ yulaparɛ a suruni, shɔwɔyi shanɛ Ɗa jashonɛ Iliya ukɔ shɛrɛ, shɔwɔyi sha sɔ̃njonɛ shɔzɛ gbete a tete Ɗa jashonɛ tɛ̃ɛ̃tɛ̃ɛ̃ ukɔ yurɛ a suruni. Hirudu shanɛ, << Nkɔng pɔ̃rɛ shɔ ko Yɔhana yuutɛttɔ. Shɔ gbete nkɛ nta ruunɛ au yuunimi kɛpiya?>>Hirudu pɛli ɓɛɛjo nyaɓa nɔgbete yɛ zɛ Yesɔ yɛ.

Yesɔ shaari shɔzɛ laa ziti tu kopi ɓa maani

Akɨnti gbete Yesɔ jashonɛyi i sɔtɛ aɗɔgbete i yeuni i geli Yesɔ vigbete i pɛliyɛ piti kpai. A tuyirɛ i yɛ komɔɔ gbete shɔ ɓaanɛ Besaida ji yuu. Naa mɔɔwi ntatɛnɛ Yesɔ a ɗɔwa i gɨurɛ yɛnɛ ɗɔuni. Yesɔ tɛyi naarɛ a nwarii ruu Ɗa kpati roonɛ, gati shɔgbete yi kã gatinɛyɛ kpai.

Naa ɗa yɛtɛ a ɗɔɔ yinɛ, Yesɔ jaɗɔyi kopi tu ziti i au ɗɔbii i shanɛ, Yaa mɔɔyi naa nɛ, aru i yɛrɛ i kãli vishaanɛpɛ a jakomɔɔ a jaa gbete i ɗɔmiyɛ a ɗɔɔ roonɛni, aru shɔ ɓa a ɗɔnni ɓa

Ama Yesɔ geliyinɛ, <<Ɔkɔɔ ãi vishaanɛ jo i shaapɛ.>>

I kasinyanɛ, <<Vigbete u a wuniyɛ borodi maani sheeli a jazɨn ziti,>> a kasinɛ ukɔɔ yɛrɛ u wori bɔrɔ mɔɔmiyi vishaanɛ piti kpai ya? Vɔshɔ gbete isi a ɗɔuyɛ mɛnɛ laa ziti tu kopi ɓa maani.

Yesɔ geli u jadɔyinɛ, <<Ɔ pɔ̃ mɔɔyinɛ i ɔ̃nli a kn kn ko pi kn gbete piya u ɔ̃ shɔzɛ laa ziti tu kopi.>>

Akɨnti gbete Yesɔ jadɔyi i pɛlitɛ nagbete geliyiyɛ, mɔɔyi ɔ̃likɛ tipi. Yesɔ tuu borodi maanirɛ a jazɨng zitini a kɨnnɔɔ lapa, a dɔ̃ri Ɗa a dalirɛ, kɛɗɔn a ã u jaɗɔyi nɛi vɔsi mɔɔyinɛ. Shɔzɛ piti kpai i shaarɛ i tesiyirɛ i yaa gãsi, Yesɔ jaɗɔyi i toli u dalinɛ ɓuti kopi tu ziti.

Bituru ã tɔ̃vɨn nɛ Yesɔ ukɔ ɔ̃rɛ kirisi

Lewɔɔ Yesɔ u si ɗɔɔ Ɗa gakinɛ a yɔbm, u jaɗɔyi i au ɗɔbii, Yesɔ hɨnɛ,<<Mɔɔyi shalinɛ n piya?>>

I kasiunya nɛ,<< Shɔ gãsi i shanɛ mɔkaa Yɔhana shɔ Batizima ãnɛ; shɔwɔyinɛ Ɗa jashɔnɛ Iliya; shɔwɔyi sɔ̃njonɛ, shɔzɛ gbete a tete Ɗa jashonɛ tɛ̃ɛ̃tɛ̃ɛ̃ uku sɔrɛ a suruni.>>

Yesɔ hɨyinɛ, <<Ɔkɔɔ fa ɔ shabɛɛnɛ nkɛ piya?>>

Bituru kasinya nɛ,<<Mɔkaa Kirisi, shɔgbete shɛ a Ɗalapa ɗɔbii.>>

Yesɔ nwanya ayuu u raaɓoonɛ a vɔnɛ

Kɛɗɔn Yesɔ gɔ̃yi yuusho waanɛ nɛ ikɔi geli shɔwɔnɛ. A geliyi sɔ̃nnɛ, <<Ɔ̃tɛ kaka jazɨng a kɔrɔ Shɔzɛja u ɓɔraa waanɛ shɔpẽni ɗɔlaa i bɛ̃u ruubiitɔ, jinankɔ yupɛ̃ni jaa Ɗa a shɔmala nya-ãsinɛ Musa i yɛ bẽu ruubiitɔ, ɔ̃tɛ kaka jazɨng a kɔrɔ shɔ nyou vɔrɔ ama a knti lee taati yɛ yulapa a suruni.>>

Kɛɗɔn Yesɔ geliyinɛ: Shɔgbete kasing gɨnnɛ piti kpai ɔ̃riutɛ kaka jazɨng a kɔrɔ u bẽu yuutɔ,<<U tɛ raaɓoonɛ gbete yɛ ɓoo ang yuu nakaziti ko-pi lee piya u gɨnrɛ>>. Shɔgbete kɛ tɔnɛn kasin suru raanɛ, u suru yɛ raariu naatɔ, ama a surukɛ raananɛ ang yuu a yɛ kpaa sɔ̃ntɔ. Shɔzɛ yɛ kpaa ivi tɔ̃vɨn a kotipim piti kpai u tɛu sururɛ viya? Shɔukɛ nta usẽnɛ ang ruubii dɔdɔrim ang vimatinɛ ni, Nkɔng Shɔzɛja n kanɛ aɗɔ bassinɛ a ɓeye ɗekɨn a Ɗa jashonɛ lapa wɔsɔ-wɔsɔni n yɛn ntau usẽjo. N gelɔɔtɛ nizɛ, shɔ gãsiyi gbete i ɗɔɔ shinɛ aɗɔm i yɛ vɔɓa setɛ i zɛ Ɗa kpatinɛ roonɛtɛ.

Yesɔ bi kɔsinɛ

Si mɛnɛ dii maantaa a Yesɔ sha ruumyɛ, Yesɔ tuu Bituru, Yɔhana a Yakubu a gẽ kɔpɔ ɗɔɔ Ɗa gakinɛ. Aɗagbete Yesɔ u ɗɔɔ Ɗa gakinɛ, kɛɗɔn u nɔkɨn kɔsirɛ, u fãrã rii puru kpɛlɛng-kpɛling. A ɗɔukɔ tɛ̃ɛ̃ti shɔzɛ ziti i shɛrɛ i ɗɔɔ nyanwanɛ awuni, ikɔi si Musa a Iliya, i shɛ a kolapa bassinɛ, i ɗɔgbete i nwanya a Yesɔni aru nya gbete yɛ vɔyɛ u yisi nya Ɗalapa vishonɛ gbete ãuyɛ, gbete yɛ vɔɔ a Urushalimayɛ. Bituru au shɔ dɔɔranɛyi gãsiyini isi a a nɔrɔ gbikiri-gbikiri, ama i yulapa i zɛ Yesɔ basinɛtɔ a shɔzɛ zitiyini gbete i shi a Yesɔni. Naa shɔwi i yaa Yesɔ ɗɔbii yɛ, Bituru geli Yesɔ nɛ,<<Mashɔwɛrɛ, pɛ vitɔ̃vɨng gbete u a ɗɔnkɔ. u yɛ tɔ̃ri taali ɗɔɔ taati--gbete a ɓɛɛ gbete Musa ɓɛɛ gbete wɔsɔ̃n Iliya ɓɛɛ.>>(Bituru ji zɛ vigbete shayɛ ɓa.)

Si Bituru doo a ɗɔɔ nyanwanɛ sabuu kukiyi nyawu, naa sabuu kukiyitɛ Yesɔ jaɗɔyi i nta seti rɛ. Yenya shɛ a yɛti saɓuukɔ gbete shanɛ,<<Shɔnkɔ ɔ̃rɛ majaa, gbete n lɔyɛ; ɔ weshotɔ au nyani.>> Naa yenyau shiitɛ, Yesɔ u jo a yɔbm sheeli a ɗɔuni. Yesɔ jaɗɔyi i ɔ̃ a nyani, iji geli shɔwɔ ruu vigbete i zɛyɛ a ɗauni ɓa.

Yesɔ gati javɔshɔ gbete u suru kɔ̃linɛ a biini

A dii gadi Yesɔ au jaɗɔyi taati i ɗɔgbete i nɔ a kɔpɔ, kɛɗɔn mɔɔ waanɛ i arɛ i kpɛsi Yesɔ rɛ. Jawɔɔ a yɛti mooyi ɓa nya a kakani a shanɛ,<<Shɔmala, n gakaatɔ nta majaa raajɔ, n jaa ji ukɔ sheeli. Zɛpɛ suru-kɔ̃linɛ sãurɛ, lewɔɔ suruu pɔ̃urɛ u kaa nya-vɔɔ lapa-lapa, Suruu zaautɔ a shɛshiu pupuru a nya, yau naa ɓa nɛu yɛrɛ ɓa ntariu nɔrɔ abi waanɛǃ N gaki a jaɗɔyi i shɛshi suru kɔ̃linɛu pɛ, iji zɛnɔɔ ɓa.>>

Yesɔ kasinya nɛ, <<Ɔ jakɨntimiyi gbete ɔ sisɨn anɛ ɓang a shɔ lanɛmiyi, n yɛn ɔ̃kɛ saa nɛkɨn a ɔkɔɔni viya? Ɔ kasinɛn ɔ̃kɛ pikovi a ɔkɔɔni n ɗan yawɔrɛ viya?>> Kɛɗɔn a geli jau nɛ, <<N ti mɛjaunɛ yɛm.>>

Naa javɔshɔu ɗɔɔ anɛ suru kɔ̃linɛ turɛ a lou a tipi, u bi a ɗɔɔ zaanɛ. Ama Yesɔ lasi suru kɔ̃linɛrɛ, a gati jaaurɛ a ãu ɓeyerɛ a naa. Shɔzɛ piti kpai ɔ̃rii vibii zaanɛ aru gbete i zɛ Ɗalapa kaka shɔgbete vitɛu kaka ɓayɛ.

Yesɔ nwanya sɔ̃n au ruu vɔnɛ

Si shɔ doo ɗɔɔ zaanɛ a vigbete Yesɔ pɛliyɛ, Yesɔ geli u jaɗɔyi nɛ, <<Ɔ wesho tɔ̃vɨn, ɔkɔɔ suki vigbete nkɛ gelɔɔ nɛmnɛ! Shɔyɛ mɛli Shɔzɛja kɛtɔ a shɔzɛ naa.>> Ama u jadɔyi iji zɛ vigbete Yesɔ nwanya a yuuni ɓa. Shɔ ɓusu ruumtɔ aru gbete i yɛ zɛrɛ, ikɔ ma i nta seti Yesɔ hɨntɔ ayuu ruumni.

Pi ɔ̃rɛ pẽniɓa piya?

Kɛɗɔn Yesɔ jaɗɔyi i gaa nya masinɛ ai nɔɔ nɛ pi ɔ̃rɛ pẽniɓa ai tetteni piya. Yesɔ zɛ vigbete i lɛri ai sisɨn tɛttɔ, kɛɗɔn a tuu jajja pẽtẽrẽ a shiriu a ɗekɨn. Yesɔ geli u jaɗɔyinɛ, <<Shɔgbete kɛ tɛ jajja pẽtẽren naa nɛ ang nii tɛpɛ nkɔng, shɔgbete kɛ tɛng naa nɛ tɛ shɔgbete shong-yɛ, shɔgbete ɔ̃rɛ pẽtẽrẽ au tetteni piti kpai ukɔ ɔ̃rɛ pẽniɓa tɛɛ gãsitɛ kpai.>>

Yɔhana shanɛ, <<Mashɔwɛrɛ, u zɛ jawɔ kɛ shɛshi suru kɔ̃linɛ aa nii, u zãruutɔ aru gbete u ɓa au tetteni ɓa.>>

Yesɔ kasinya nɛ, ɔkɔɔ zãruunɛ, aru shɔgbete ji masi nya ɓa ukɔɔni ɓa upɛ u ɓɛɛ.

Shɔ Samariya jakomɔɔ i ɓẽẽ Yesɔ naa tɛnɛ

Naa Yesɔ ɗagbete yɛ gẽ kolapa atɛ maani, kɛɗɔn a ã sisɨn rɛ yɛkɛ Urushalima. Sho jashonɛyi a ɗɛkɨn, jashonɛyi tokɛ jakomɔɔ a Samariya, aru i tɔ̃riu vi tɛlɛ, ama shɔ jakomɔɔwi i bɛ̃ɛ̃ Yesɔ naa tɛnɛtɔ, aru siyi zɛtɛttɔ Yesɔ pɔ̃ Urushalima yɛnɛ ɗekɨn. Naa Yesɔ jaɗɔyi Yakub a Yɔhana i zɛtɛ nami i shanɛ, <<Uɓeyelapa a kasinɛ u ãsinya yaa u shɛ lapa u shayirɛ ya?>> Ama Yesɔ rinɔɔ a lasitɔ, kɛɗɔn Yesɔ au jaɗɔyini i yɛkɛ jakomɔɔ wɔɔ.

Raɓoonɛ a Yesɔ gɨnnɛni

Aɗagbete Yesɔ au jaɗɔyini i ɗɔɔ ranɛ a nyaba, kɛɗɔn jawɔɔ geli Yesɔ nɛ, << N yɛn gɨn atɔ ɗɔgbete akɛ yɛnɛ piti kpai.>>

Yesɔ risinya nɛ, zakula ma i too aɗɔn, janɔɔyi i ɗɔɔ roonɛ aɗɔn, ama Shɔzɛja u ɗɔɔ roonɛ ɓa. Yesɔ geli jawɔɔ nɛ <<Gɨnnɛ. >>

Ama jau risinya nɛ,<<Uɓeyelapa, n yɛpɛ n gbã maye pɛtɔ.>>

Yesɔ kasinya nɛ,<< yaa vɔrɔyi i gbã zɔji ai nɔɔ, ama yɛrɛ a nwari shɔ Ɗa ruu kpati roonɛ.>>

Shɔ wɔ sɔ̃n ɗɔn shanɛ, Uɓeyelapa, n yɛn gɨn atɔ, ama n yɛrɛ n vasi n shɔwɛrɛyi nya pɛgo.

Yesɔ geliu nɛ, shɔgbete sã naatɛ a laɓuti jalanɛ u ɗɔɔ zaanɛ kɛ gbɛɛ nɔɔnɛ akɨntini, Ɗa lakpati ɔ̃nɛ ɓau ɓɛɛ ɓa.

Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.