Lamma Bible Translation Project
Luka 10
Yesɔ sho u jadɔyi laa taati au jaa kopi tu ziti
Akɨntini Yesɔ lɔ shɔwɔyi laa taati au jaa kopi tu ziti (72) a shoyirɛ ziti-ziti, nɛi yɛ ang ɗekɨn a komɔɔ a ɗɔgbete kasi yanɛ yɛ. Yesɔ geliyinɛ, Visha gbete shɔ yeerɛ waanɛ, ama shovishonɛyi i ɓa bang ɓa. Aruumkɔ ɔ gaki Uɓeyelapa u dɔ̃ shɔgbete yɛ yeruu visha, i toliurɛ. Ɔ yɛnɛ, n showɔrɛ naa jamɛrɛ̃ɛ̃ atette viɓiliyi. Ɔkɔɔ tuu lazɔrɔ nɛ naani ko kurãtinɛ a naani; wɔsɔ̃n ɔkɔɔ gee shɔwɔyi nyanɛ dɔkɔkɔ a nyabani.
<<Ɔkɛ to ko wɛrɛ shɔpiyanɛ, vi gbete ɔ gaa shanɛyɛ, Ɔ̃nɛ binyatɔ̃nɛ u ɔ̃ a wɛrɛni.>> Shɔ binyatɔ̃nɛ ɔrinɛ kɛ ɔ̃nɛ a wɛrɛuni, kɛɗɔn ɔ nya geenɛ binyatɔ̃nɛ yɛ ɔ̃rɛ awuni, shɔ binyatɔ̃nɛ ɔrinɛ ji ɔ̃ ɓa a wɛrɛni ɓa, ɔ nya geenɛ binyatɔ̃nɛ yɛ sɔɔ sɔ̃n ɔ ɗɔbii. Ɔ ɔ̃ a wɛrɛukɔ shɔ kɛ tɛwɔɔ naa nɛ yɛ setɛ ɔ yaa koutɛ, vigbete shɔ kɛ ãwɔnɛ ɔ sharɛ ɔ ɓoorɛ aru kopiya shɔ shoriu jou vi ɗɔnwanɛ, ama ɔkɔɔ ranɛ wɛrɛ -wɛrɛ.
Komɔɔ gbete ɔ toyɛ piti kpai shɔkɛ tɛ ɔ naa nɛ, ɔ sha vigbete shɔ n-tɔɔyɛ piti kpai. Ɔ gati shɔ vɔrɔtɔ gbete a ɗɔuni ɔ geliyinɛ, <<Ɗa kpati roonɛ atɛ māāni awɔ ɗɔbii.>> Ama ɔkɛ to komɔɔnɛ gbete shɔ ji tɛwɔɔ naa ɓa, ɔ yɛ a nyaɓa ɔ shanɛ, aru gbete ɔ bẽẽ u ruu ntanɛtɔ, ɔ zaburu ko gbete rɛɛ au dɔɔ ma u kutɔɔtɛ, ama ɔ zɛtɔnɛ Ɗa kpati roonɛ atɛ awɔ ɗɔbii māāni. N gelɔɔtɛ a lee gadi shɔ sɔdomyi Ɗalapa yɛ nta raa ba ikɔ, u tɛɛ komɔɔ watɔ!
Ɔ yuukɔnɛ aɗɔn Komɔɔ gbete i ji yaa ruuvini ɓa
Ɔ kɔɔ yuutɔ, korazin! ɔ kɔɔ yuutɔ, Besaida! Aru vibii zaanɛ gbete shɔ tasɔɔ yɛ shɔ si tasi Taya a sɔdom, i si kɔsi sisɨntɛ tɛ̃ɛ̃tɛ̃ɛ̃, i tosi fãrã hɨmri a tɛ̃ɛ̃ pnti ai yuu, aru u tasinɛ i yaa ruuvinitɛ. A lee gadi Ɗalapa yɛ nta raa ba shɔ Taya a sɔdom u tɛɛ ɔ ɓɛɛtɔ. Shɔzɛ gbete i a kapanahum ɔ sinnɛ a sisɨnni nɛ Ɗalapa yɛ tɛwɔ naatɔ kunyasini ya? Yɛ pɛli ɓa, ɔ yɛ to yaa wɛrɛ.
Yesɔ geliu jadɔyi nɛ, shɔ gbete kɛ weshonɛ awɔ nyani, wesho ang nya; shɔ gbete kɛ bɛ̃ɛ̃ ɔnɛ bɛ̃ɛ̃ nkɔng; <<ama shɔgbete kɛ bɛ̃ɛ̃ n ruubiinɛ bɛ̃ɛ̃ shɔgbete shongyɛ.>>
Yesɔ jadɔyi laa taati au jaa kopi tu ziti i sɔnɛ
Shɔzɛ laa taati au jaa kopi tu ziti (72) i sɔɔ a sisɨn puru ai shanɛ, Uɓeyelapa, <<ko suru kɔ̃liyi ma i ntau nyatɔ aɗagbete u ãsinya āā niiǃ>>
Yesɔ kasinyanɛ, n zɛ japɛ̃pɛ̃ɛ̃ shishi a kolapa naa jalɛ. Weshopɛ n ãwɔ kakatɛ ɔ naa sɔɔyi a nɛngyi wɔsɔ̃n ɔ tɛɛ shɔnɔpɔ̃yi i kaka piti kpai; viwɔ yɛ kpawɔ ɓa. piti kpai ɔkɔɔ nta sisɨn purunɛ aru suru kɔ̃linɛ i ntawɔ nyatɔ, ama ɔ nta sisɨn puru nɛ Ɗalapa bee ɔ niitɛ a kolapa.
Yesɔ nta sisɨn puru
A ɗaukɔ Ɗa suru pɔ̃ Yesɔ nta sisɨn puru ɓolong-ɓolong a shanɛ, maye, Uɓeyelapa shɔ kolapa a kotipiǃ N dɔ̃raatɛ aru gbete a ɓusi shɔsẽrẽ a shɔruzɛnɛyi vimtɔ a arɛ a tasi jajjayi, nankɔ uɓeye, ukɔ vigbete tɔ̃ràà yɛ.
<<Maye ãng vi tɛttɔ piti kpai, shɔwɔɔ ji zɛ jau ruubii ɓa see ji ɓeye kɔ sheeli, toti shɔwɔɔ jɛ zɛ maye ɓa see ji ɓɛjaa kɔ sheeli a shɔgbeteyi ɓɛjaa lɔyɛ nɛn kasiyi vi tasinɛ.>>
Kɛɗɔn Yesɔ rinɔɔ au jaɗɔyi ɗɔbii aɗagbete shɔwɔyi ɓa aɗɔn ɓa shanɛ, <<Ɗalapa u tasɔɔ vɔɔ susãri biini aru ɔ zɛ vigbete n pɛliyɛtɛ! N gelɔɔtɛ Ɗa jashɔnɛyi waanɛ a kpatiyini i kãtɛ nɛi zɛ vigbete ɔ zɛɓangkɔ iji zɛɓa, i kãtɛ nɛi nta vigbete ɔ ntaɓangkɔ iji ntaɓa.>>
Ruɓusinɛ ayuu shɔ Samarita tɔ̃vɨn wɔɔ
Kɛɗɔn shɔmala nya-ãsinɛ Musa a Yesɔ ɗɔbii nɛn ɗautɔ a hɨunɛ, <<Shɔmala, n pɛlikɛ ivi n kpaa suru gbete sɔ̃nyaɓa yɛ viya?>>
Yesɔ kasinya nɛ, <<Shɔ beenɛ ivi a Ɗa nya ruubiini viya? A taudɔɔ nɛ iviya?>>
Jau kasinya nɛ:<<A ɔrii Ubeyelapa a Ɗalapa piti a sisɨnni kpai, piti a suruni kpai, piti a kakani, a piti a ɓoroni kpai; wɔsɔ̃n a ɔrii a shɔ nyakasiri naa a ɔrii a yuu yɛ.>>
Yesɔ risinyanɛ, <<A shatɛ tɛpɛ-tɛpɛ, pɛli vimnɛ a yɛ ɔ̃ a suruni.>>
Ama shɔmala nya-ãsinɛ Musa kasinɛn tasinɛn ruuvini ɓa, kɛɗɔn hɨ Yesɔ nɛ, << N shɔ nyakasiri piya?>>
Yesɔ kasinya nɛ, <<Shɔwɔɔ siɗɔn shɛ a Urushalima u ɗɔ ɓakinɛ yɛnɛ Yariko. Kɛɗɔn kpɛsi zɔ a shɔ nyabazẽnɛyini a nyaɓa, i saurɛ i rau vi piti kpai i wau dasak i yɛrɛ a yau suru a Ɗa naa.>> Kɛɗɔn shɔ nya-waanɛ a jaa Ɗa arɛ tɛɛ ji nyaɓaukɔ, naa zɛ jautɛ a ɗɔɔ roonɛ a tɛɛ kagbete sãnyaɓa a yɛrɛ. Sɔ̃nji nankɔ, jawɔɔ arɛ shɔ laduru lawi, naa atɛ a ɗɔuni a zɛ jaurɛ, tɛɛ sɔ̃njo kagbete a nyabaukɔ. Ama shɔ Samariya u ɗɔɔ zati yɛnɛ a nyabaukɔ, naa zɛutɛ, raa pɛliurɛ awuni. Yɛu ɗɔbii a sɔɔriu nɔrɔ a mii inabi a nteriu nɔɔ a marɛ, Kɛɗɔn tuurɛ a pɔ̃u a gãtɔla a n-tiu ɗɔɔ susunɛ, a kɔurɛ. A dii ɓuru tuu saa gbete shɔ ɓaanɛ siliva ziti, a ã shɔ ɗɔ susunɛrɛ, nɛu zɛsiungtɔ, a geliunɛ, nɛnkɛ sɔɔnɛ nɛn yɛn sɔriu vigbete kɛ nyɔnɛ piti kpaitɔ.
Yesɔ yisi nya ruu nɛ<<Áá zɛnɛ pi ɔ̃rɛ shɔ nyakãsiri atette shɔzɛ taati miyi, aru jaa gbete shishi a shɔ nyabazẽnɛyi naa piya?>>
Shɔmala nya-ãsinɛ Musa kasinya nɛ, <<Shɔ gbete ntau raayɛ.>>
Yesɔ risiunya nɛ,<<Yɛnɛ a pɛlijo nankɔ.>>
Yesɔ yɛ Marata a Mariyamu i ɗɔbi
Aɗagbete Yesɔ au jaɗɔyini i a nyaɓa yɛnɛ, naa atɛ a jakomɔɔ wɔɔ aɗɔgbete suwɔɔ u niinɛ Marata, suu tɛ Yesɔ naarɛ au wɛrɛ. Marata ɓɛzɔ̃ wujaa aɗɔn u niinɛ Mariyamu, ɓɛzɔ̃ wujau ɔ̃ a Yesɔ ɗɔbii maani u ɗɔu wesho au vimatinɛ. Ama Marata siu sisɨn a ɗɔɔ vishaanɛ nwanɛ, kɛɗɔn Marata a Yesɔ ɗɔbii a hɨunɛ, Uɓeyelapa, yuu ji yɔraa ɓa nɛ mazɔ̃ Marata yantɛ nɛn nwa vishaanɛ ang yɔbm ɓaya! geliunɛ u pɔ̃sing naa jo.
Ama Uɓeyelapa kasinya nɛ, <<Marata, Marata, a yɔri yuutɛ, a yukɔni ayuu vi waanɛ i yuu.>> Ama vitɔ̃vɨng ji gbete sheeli gbete Ɗalapa kasiyɛ, ukɔ ɔ̃rɛ vigbete mariyamu loyɛ shɔwɔɔ yɛ raabau naani ɓa.
Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.