Luka 24

Yesɔ yunɛ sàà

1A gadi zɨɨnkɔ a lee susunɛ suwi yurɛ i yɛ yusàà, i tuu nɔɔ sũru-sũru gbete i tɔ̃ri yɛ i sã a naani. 2I kpaarɛ shɔ giri tariutɛ a nya sààuni. 3Kɛɗɔn i to ɓuzɨn yusàurɛ; ama iji kpaa Uɓeyelapa Yesɔ bi ɓa ɗɔmɓa. 4Aɗagbete i a ɗɔɔ yuyɔrinɛ, kɛɗɔn shɔwɔyi i ziti i shi ai ɗɔbii a fãrã ni a ɗɔɔ yaa kɔlinɛ waanɛ. 5Sijo vi seti kɔshe, suwi i ɓaki yuu a tipi, shɔwi i geli suwi nɛ, <<Ɔ kã shɔgbete u suru aɗɔn pikovi a tete vɔrɔ viya?>> 6U ɓa ɗɔnni ɓa; yulapatɛ. Ɔ kpaa sisɨn aru gbete gelɔɔyɛ aɗagbete usi Galili yɛ: 7Shanɛ ɔ̃tɛ kaka jazɨng a kɔrɔ Shɔzɛja shɔu ãu shɔ ruuvini naa, nɛ shɔu ɓau a naa laa, akɨnti lee taati u yulapa a suruni.

8Kɛɗɔn suwiyi i kpaa sisɨn kɛkn aru gbete Yesɔ geliyɛni, 9Naa i sɔtɛ a yusàuni, i geli Yesɔ jadɔyi kopi tu gbete vimrɛ a shɔ gãsiyini. 10Shompɛ suwiyi nii ikɔ ɔ̃rɛ Maryamu Magdaliya, Yuwana, a Mariyamu Yakubu ɓini; i a suu gãsiyi gbete isi a yiniyɛ i geli Yesɔ jashonɛyi vim piti kpai. 11Ama Yesɔ jashonɛyi i tɔnɛ mɛnɛ ɓa ruu tɔ̃ɓa, iji ã tɔ̃vɨn ɓa ai nyani ɓa. 12Ama Bituru yudeinɛ a yɛ yusàurɛ; a ta yugboti a kn nɔɔ yɛti sàuni ji zɛ viwɔ ɓa se làá vɔrɔ gbãnɛ. Kɛɗɔn sɔɔ wɛrɛ u bi a ɗɔɔ zaanɛ aru vigbete zɛyɛ.

Yesɔ jadɔyi a nyaba Imuwa

13A leeukɔ Yesɔ jadɔyi ziti i ɗɔɔ jakomɔɔ wɔɔ yɛnɛ gbete u niinɛ Imuwa, gbete siyɛ ɔ̃ kilomita kopi tu gbete yunɛ Urushalima; 14Isi ɗɔɔ ruu kɔrinɛ aru vigbete i zɛyɛ kpai. 15Aɗagbete i ɗɔɔ ruu kɔrinɛ, Yesɔ kpaa bi a yini maani i ɗɔɔ ranɛ a nyazɔ; 16Ama i zɛu ɗɔkɔ i ji zɛ Yesɔ nii ɓa.

17Yesɔ geliyi nɛ, << Ɔ kɔri pi ruu ivi a ɗɔɔ ranɛ ɗɔkɔviya?>>

kɛɗɔn i shirɛ shɔk, i nɔkɨn lɛsinɛ. 18Shɔzɛ gbete atete ni u niinɛ Kiliyobas, hɨ Yesɔ nɛ, <<A shɔzati a Urushalima ni ya, gbete ji zɛ vigbete a ɗɔɔ yɛnɛ dii ziti mini ɓaya?>>

19Yesɔ hɨyinɛ, <<Viu piviya?>>

I kasi Yesɔ nyanɛ.<<Aru vigbete shɔ pɛli Yesɔ shɔ Nazara yɛ,>>I kasinyarɛ nɛ, <<Jam u pɛ Ɗa jashonɛ gbete u kaka vishonɛ a nyanwanɛni aɗɔn a Ɗalapa ɗekɨn a shɔzɛni. 20U yupɛ̃ni gbete pɛli vi yuu ãnɛ a jaa Ɗa a kpatiyini i tuurɛ i ãu shɔ a naa nɛ shɔ nyɔutɔ, shɔ ɓau naarɛ a laa. 21Ama siu pɔ̃ sisɨn jo au bikɔ, utɔ ukɔ yɛ raa shɔ Isreilayi jo! Yɛ nemtɛ lee taati a vim pɛliyɛ. 22Suu gãsiyi i ãù vibiizaanɛtɛ; i yɛ yusàà gadii zɨɨnkɔ, 23ama i ji kpai Yesɔ vɔrɔ ɓa, i sorɛ i ɗɔɔ shanɛ nɛ, u zɛ nɔrinɛ suru Ɗa jashonɛ lapayi gbete i geliunɛ Yesɔ u a suru ni. 24Kɛɗɔn shɔ gãsiyi au tete i yɛtɛ a yusààni i kpaa jo nɔgbete suwi shayɛkɔ, ama i ji zɛu ɓa.>>

25Kɛɗɔn Yesɔ geliyinɛ, <<Gbee ɔ shɔgbete ɔ ruu ɓa yɛtini ɓam, ɔ shɔ gbete ɔ sisɨn kpete-kpete aru sisɨn anɛ a vigbete Ɗa jashonɛyi shayɛm!>> 26Ɔ ji zɛɓa nɛ, ɔ̃rii kirisi tɛ kaka jazɨng a kɔrɔ u ɓooraatɔ aru vimni, kɛɗɔn yɛ to uɗɔ bassinɛ kn ɓaya? 27Kɛɗɔn Yesɔ tasiyidɔɔ ruu vigbete Ɗa nyaruubii sha ayuu piti kpai, gaanɛ a Musa labeenɛ a vigbete janyagadiyi bee yɛ piti kpai.

28Nayi atɛ māāni a jakomɔɔni gbete i kasi yɛnɛ yɛ, kɛɗɔn Yesɔ pɛli naa yɛ tɛɛtɔ yɛnɛ ɗekɨn; 29Ama i bɔ̃urɛ i shanɛ, << Ɔ̃nɛ a ukuni aɗɔm, ɗarɛ pɛlitɛ, ɗɔkɛ tɔɔnɛtɔ.>> kɛdɔn Yesɔ gɨnyi rɛ a ɔ̃rɛ a ikɔ ni. 30Naa Yesɔ ɔ̃tɛ i shaakɛ vishaanɛ, a tuu borodi a dɔ̃ri Ɗalapa; kɛɗɔn a dali borodi rɛ a ãliyirɛ. 31Kɛɗɔn i nɔɔ ɓɛlirɛ i zɛu nii kɛkn, Ama nirɛ ai atete ni. 32I geli zɔnɛ, <<Aɗɔgbete u si a nyaba anɛ u sisɨn ji du ɓaya, a ɗagbeteu nwanya a ukɔni i tasiu dɔɔ Ɗa nyaruubii ɓaya?>> 33I yurɛ tɛ̃ɛ̃ti i sɔkɛ Urushalima, ɗɔgbete i kpai gãsi kopi tu gbete i toli nyatɛ a shɔwɔɔni, 34I shanɛ, <<Uɓeyelapa yuutɛ nizɛ kɔǃ shɛtɛ a Bituru ɗɔbiini.>> 35Kɛɗɔn shɔ zitiwiyi i tasiyi dɔɔ vigbete i zɛ a nyaba yɛ, a nɔgbete i zɛ Yesɔ a ɗɔgbete dali borodi yɛ.

Yesɔ shɛ u jadɔyi bi

36Aɗagbete shɔ zitiwi i ɗɔɔ ruum shanɛ, kɛɗɔn ɓai zɛnɛni ɓa Yesɔ au yuu shɛrɛ a shi ai tete, a gelinɛ, << Ɔ̃nɛ binyatɔ̃nɛ u ɔ̃ awɔ tetteni.>>

37Ama seti pɛlitɔ i tɔnɛ mɛnɛyi i zɛ rãmã. 38Ama Yesɔ geliyinɛ, <<Ɔ nta seti pi ruu iviya? Aru ivi sisɨn vãnɛm shɛpi ruuvi au sisɨnni viya? 39Ɔ kɨnnɔɔ pɛ ang naa ang dɔɔni, pɛji nkɔ ang yuu, ɔ ɗii naa pɛ ang bi, ɔ yɛ zɛtɔ, rãmã u yɔpɔ ɓa biini ɓa a kakani, nagbete ɔ zɛyɛ n awuni.>>

40Sha vimrɛ kɛɗɔn a tasiyi u naarɛ a dɔɔni. 41Piti kpai i ji ã sisɨn ɓa aru gbete i si doo ɗɔɔ sisɨn puru ntanɛ a bi zaanɛni; kɛɗɔn Yesɔ hɨyinɛ, <<Ɔ vishaanɛ a ɗɔnni ya?>> 42I ãu jazɨng wɔɔnɛ gbete, 43Tɛrɛ a shaa ai nɔɔ.

44Kɛɗɔn Yesɔ geliyi nɛ, <<Shompɛ vigbete n gelɔɔ yɛ aɗagbete sin a nyazɔ a ɔkɔɔniː>> Vigbete shɔ bee ang yuu a labeenɛ nya ãsinɛ Musa, a Ɗa jashonɛyi vi beenɛ a Zabura ni ɔ̃tɛ kaka jazɨng a kɔrɔ u ɔ̃ nizɛ.

45Kɛɗɔn Yesɔ ɓeli sisɨnrɛ nɛi zɛ Ɗa nya ruubii, 46a geliyi nɛ, shompɛ vigbete shɔ bee yɛː Ɔ̃tɛ kaka jazɨng a kɔrɔ kirisi u ɓooraatɔ, ɔ̃tɛ kaka jazɨng a kɔrɔ u yulapa a sàà a lee taati. 47Au niikɔ shɔyɛ nwari shɔ Ɗa nyaruubi a koo piti kpai, aru sisɨn kɔsinɛ a zɔɔ ruuvini yasinɛ. Shɔ yɛ gaa a Urushalima, 48Ɔkɔɔ ɔ̃rɛ shɔ shinɛ knti ayuu vimni, 49N ang yuu, n yɛn sho-shɔɔ vigbete maye ma a ɔkɔɔniyɛ. Ama setɛ shɔ awɔ kaka tɛttɔ a lapa.

Shɔ tuu Yesɔ yɛnɛ kolapa

50Kɛɗɔn Yesɔ shɛshirɛ a kɔmɔɔni, yɛnɛ tipi Betani. 51Aɗagbete Yesɔ u ai ɗɔɔ vɔɔ susãri tasi biiyɛ, Yesɔ yai ɗɔbiirɛ, kɛɗɔn shɔ turɛ yɛnɛ kolapa. 52I basiu rɛ kɛɗɔn i so tipi Urushalima rɛ, i sisɨn puru ɓolo-bolo. 53Ko-pi lee piya i a jaa Ɗa gbete shɔ pɛli vi yuu ãnɛ aɗɔnyɛ i ɗɔɔ Ɗalapa dɔ̃rinɛ.