Lamma Bible Translation Project
Luka 23
Yesɔ a Bilatu ɗekɨn
Kɛɗɔn mɔɔyi kpai i tuu Yesɔ i n-tiu Bilatu ɗekɨn rɛ, a i gaa Yesɔ i shanɛ, <<U kpai jam u ɗɔgbete nisi u shɔbii yɛ, geli shɔ nɛ shɔkɔ shorii kayisar sabɛnɛ nɛ, tasiu yuu nɛn pɛ kirisi, kpati.>>
Bilatu hɨ Yesɔ nɛ, <<Mokaa kpati Yahudawa ya? >> Yesɔ risi Bilatu nyanɛ, <<Ji nɔgbete a shabangkɔ. >>
Kɛɗɔn Bilatu geli yupɛ̃ni gbete pɛli vi yuu ãnɛ a jaa Ɗa a mɔɔyini nɛ, <<N ji kpaa jam ɓa vigbete tasinɛ pɛli ruuvinɛtɛ ɓa.>>
Ama mɔɔyi i yɛ ɗekɨn i ɗɔgbeteyi bɔ̃ɔ̃ Bilatu waanɛ, <<Au vi matinɛ shɔzɛ waanɛ a tipi Yahudiya kpai i ɔ̃nɛ binyatɔ̃nɛ ɓa, gaa vim a Galili dɔdɔrim anɛ ɗɔm. >>
Yesɔ a Hiridu ɗekɨn
Naa Bilatu nta vigbete mɔɔyi shatɛ a hɨyinɛ, <<Jam upɛ shɔ galili ya?>> Aɗagbete Bilatu ntatɛ nɛ Yesɔ upɛ Hirudu tipi, kɛɗɔn a ãi naarɛ yɛnɛ Hirudu ɗɔbii, a ɗauni si Hiridu u sijo Urushalimakɔ.
Naa Hirudu zɛ Yesɔ tɛ nta yɛti purutɔ waanɛ, kã Yesɔ zɛnɛ si tɛttɔ tɛ̃ɛ̃tɛ̃ɛ̃, u sisɨn ɓɛɛ jo nɛn kasi Yesɔ zɛnɛ u ɗɔ vibii zaanɛ pɛlinɛ. Kɛɗɔn Hiridu hɨli Yesɔ ruu waanɛ ama Yesɔ ji risiu nyawɔ ɓa. Yupɛ̃ni gbete i pɛli vi yuu ãnɛ a jaa Ɗa a shɔmala nya ãsinɛ Musa gbete i shili a ɗɔuniyɛ i a Hirudu ɗekɨn a sha vi kɔ̃linɛ a Yesɔ yuu. Hiridu au sojayini i ã Yesɔ yusẽ a ãriu nya, kɛɗɔn i tosiu fãrã tɔ̃vɨn abi i sɔriurɛ a Bilatu ɗekɨn. A leeukɔ Bilatu a Hirudu i ɔ̃ ɓɛusa a zɔni, aru gbete siyi pɛ shɔnɔpɔ̃ a zɔni.
Shɔ yeeruu a Yesɔ yuu nɛ vɔtɔ
Bilatu ɓaa yupɛ̃niyi gbete i pɛli vi yuu ãnɛ a jaa Ɗa nya, a kpatiyini a shɔzɛ piti kpai nya au ɗɔbii, a geliyinɛ, <<Ɔ n ti jam ang ɗɔbii nɛ nisiu shɔbiiyi nɛi kɔi ntau nyanɛ, ama n hɨliu ruutɛ awɔ ɗekɨn, n ji kpau ɓa aru kɔ̃linɛ wɔni ɓa gbete ɔ ɓaanɛ pɛliyɛ. Hiridu ma ji kpau ɓa aru kɔ̃linɛ wɔni ɓa sɔriutɛ au ɗɔbii, jam ji pɛli viwɔɔ ɓa gbete au yɛtɛ nɔgbete shɔ nyou vɔrɔ yɛɓa. Aruumkɔ n yɛn pɔ̃rɛ shɔ waurɛ, n yau naarɛ.>>
Ama mɔɔyi i ɓaa nya a kakani nɛ, <<Ɔ nyɔnɛǃ Ɔ yasiu Barnaba naa.>> (Si shɔ ma Barnaba tɛ a jahm aru ba gbete n ti a komɔɔyɛ, a shɔ nyɔnɛ.)
Bilatu kasi Yesɔ naa yaanɛ, kɛɗɔn a gaki mɔɔwiyi sɔ̃nrɛ. Ama i shati nya nɛ, <<Ɔ bau naa a laa, Ɔ bau naa a laaǃ >>
Bilatu geli mɔɔwiyi sɔ̃n au na taati nɛ, <<Ama pɛli pi ruuvini shopiya?>> N ji kpau ɓa a vigbete yɛtɛ nɔgbete shɔ nyou vɔrɔ yɛɓa. N yɛn pɔ̃rɛ shɔ waurɛ, shɔ yau naa u yarɛ. Ama moowi yɛ ɗekɨn a nya shatinɛ tɛɛ kaka, nɛ shɔu ɓaa Yesɔ naa laa, a kɨntini piti kpai i nya shatinɛu shaarirɛ. Kɛɗɔn Bilatu yee ruurɛ a Yesɔ yuu nɛ shɔu pɛli vigbete i kasiyɛ. Bilatu yasiyi shɔgbete ai kasiyɛ naarɛ, shɔgbete a shɔ mau jahm aru ba waanɛ a shɔ nyɔnɛ, kɛɗɔn a ãi Yesɔ kɛkn naa nɛi pɛliu vigbete i kasiyɛ.
Shɔ ɓaa Yesɔ naa a laa
Aɗagbete sɔjayi i ɗɔɔ yɛnɛ a Yesɔ ni, i kpɛsi jawɔɔ a nyaba u niinɛ Siman gbete a Bakurani u ɗɔɔ komɔɔ tonɛ shɛ jakomɔɔ, i pɔ̃urɛ nɛu tusi Yesɔ laa gbete shɔ ɓau naa aɗɔnyɛ, pɔ̃siu laarɛ turɛ a gɨn Yesɔ akɨnti. Mɔɔ waanɛ i gɨn Yesɔ akɨntini, ai tetteni suuwɔyi siɗɔn, i ɗɔɔ sɨnɛ a lɛrinɛni a Yesu yuu. Yesɔ rinɔɔ ai bi a shanɛ, <<Suu Urushalimayi ɔkɔɔ sɨn nyavɔnɛ ang yuu; Ama ɔ sɨn jo awɔ yuu a mɛjaayi. Dii kanɛ gbete shɔyɛ shanɛ, <Ɗa u tasi Suu gbeteyi i ji yee jaayi ɓa shãni ɓa, a suu gbete i yee jaa ɓa, wɔsɔ̃n shɔgbete i ji ã jaa mii ɓa shãni ɓa vɔɔ susãri biini!> A ɗaukɔ shɔ yɛ geli kɔpɔ kɛnɛ,
<<Zɨnɛ au biǃ>>
I geli jakɔpɔ nɛ <<Kukiunɛǃ>>
Vim ɗɔm kɛ pɛlinɛ nankɔ a laa zazani, yɛ ɔ̃ kɛpikoviya a laa watinɛni viya?
Shɔwɔyi si ziti, i piti kpai i shɔ ruuviniyi, shɔ n-tirɛ nɛ aru shɔ nyɔi vɔrɔ a nyazɔ a Yesɔ ni. Naa atɛ aɗɔgbete shɔ ɓaanɛ, << Yuu zɔ̃pu>> i ɓaa Yesɔ naa a laa a ɗoukɔ, a shɔ ruuvini zitiwini, gbete au nakɨn gbete au nagãng. Yesɔ shanɛ, <<Maye, yasiyi ruuvinitɔ i ji zɛ vigbete i pɛliyɛ ɓa.>> Sojayi vɔsi Yesɔ fãrã bi ai nɔɔ, a nyaba laapa ntanɛ.
Shɔgbete i shi a ɗɔu i shirɛ i ɗɔɔ zɛnɛ, yupɛ̃ni Yahudawayi i ãri Yesɔ nyanɛ, <<Raa shɔwɔyitɛ, u rau yuunɛ kɛ ɔ̃nɛ kirisi gbete Ɗalapa lɔuyɛ.>>
Sojayi i ãriu nyarɛ i a māāni au ɗɔbii, i tu mii gbari a ãurɛ shɔ jaa inabi, i shanɛ, <<A kɛ ɔ̃nɛ kpati yahudawa raa a yuunɛ.>>
A yuu laa gbete i ɓau naa ɗɔnyɛ shɔ bee viwɔ au yuu nɛ, <<Shompɛ kpati Yahudawa.>>
Shɔzɛ gbete atette bɔɔyi gbete shɔ ɓai naa ayiniyɛ ãri Yesɔ nyanɛ, ɓa mokaa kirisi ɓaya raa a yuunɛ piti ukɔuni kpaiǃ
Ama shɔ gbete wɔɔ lasiutɔ, a shanɛ, a nta seti Ɗalapa ɓaya? U tɛ yusho gɔ̃nɛ awuni zaali. Ù yusho gbete shɔ gɔ̃ ɓangkɔ ɓɛɛji aru vikɔ̃linɛ gbete ù pɛliyɛ, ama jam ji pɛli vikɔ̃linɛ wɔ ji ɓa.
Kɛɗɔn jau geli Yesɔ nɛ, << Kpaa sisɨn tɔ Yesɔ ang yuuni, a kanɛ aa ɗɔɔ kpati roonɛ.>>
Yesɔ geli jau nɛ, <<N gelaatɛ nizɛ, nam a yɛ ɔ̃ a nkɔni a ɗɔbii nyatɔ̃nɛ.>>
Yesɔ vɔnɛ
Atette niti ɗɔkɨnri kuki tipiu piti kpai yɛnɛ nya ɗarɛ, aru a leeu ɗaa ji too nya ɓa. Fãrã gbete shɔ ma a jaa Ɗa gbete shɔ pɛli vi yuu ãnɛ aɗɔn vɔsi ɗɔ ziti. Yesɔ ɓaa nya a kakani a shanɛ, <<Maye n ãng surutɛ a naa.>>Naa Yesɔ yisi ruum shɛnɛtɛ a vɔrɛ.
Naa Yupɛ̃ni soja zɛ vigbete pɛliyɛtɛ, a bɛli Ɗalapa nii rɛ a shanɛ, <<Nizɛ kɔ jam upɛ shɔ tɔ̃vɨnǃ>> Mɔɔ gbete i shili a ɗɔu aru i ã nɔɔ vishaanɛ, i zɛ nɔgbete Yesɔ vɔyɛtɔ, i piti kpai i sɔɔ wɛrɛ aɗɔ naa waanɛ a nɔsisɨn i tete sisɨn vɨnri. Shɔgbete i zɛ Yesɔ tɛttɔ, a suu gbete i gɨu dɔɔ a tipi Galili i shi kpɛlɛ i ɗɔɔ nɔɔ kɨnnɛ.
Yesɔ vɔrɔ gbãnɛ
Jawɔ sidɔn u niinɛ Yusufu, u sijo atette kpati shɔ ruu yeenɛni. U pɛ shɔ tɔ̃vɨn shɔ ntau nyatɔ, ji gɨn shɔwiyi ruumanɛ jo ɓa. Shɛ a Arimatiya a komoo Yahudiya, u ɓɛɛ jo ɗɔgbete ga Ɗa lakpati ɔ̃nɛ anɛ. A yurɛ a yɛ Bilatu ɗɔbii a gakiu rɛ nɛu ã Yesɔ vɔrɔ. Kɛɗɔn yɛrɛ nosi Yesɔ birɛ a lirɛ a làá vɔrɔ gbãnɛwɔ shɔ ɓaanɛ lili, ama i tosi Yesɔ rɛ sàà sɔɔ gbete a nyapuru a shɔji gbã vɔrɔ ɓa ɗɔm ɓayɛ. Leu si lee bi manɛ aru vitɔ̃rinɛ lee susunɛ.
Suu gbete i gɨu Yesɔ yunɛ Galili, i yɛ a Yusufu nɛi zɛ ɗɔgbete shɔ pɔ̃ Yesɔ vɔrɔ aɗɔnyɛ pɛ anɔgbete shɔ yɔ vɔrɔu yɛ. Naa i zɛ vɔrɔtɛ i sɔɔ wɛrɛrɛ nɛi kã ɗɔ nɔɔ sumu-sumu a nɔɔ pnnɛ gbete shɔ pn abi vɔrɔ yɛ pɛ. Alee susunɛ i susurɛ nagbete nya ãsinɛ Musa shayɛ.
Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.