Skip to content
BibleKenya

Lamma Bible Translation Project

Luka 20

Ruu hɨnɛ ayuu Yesɔ kaka

Si lewɔɔ aɗagbete Yesɔ usi jaa gbete shɔ pɛli vi yuu ãnɛ aɗɔn u ɗɔgbete mati shɔ vi, u ɗɔu nwari shɔ ruu tɔ̃vɨn, yupɛ̃ni jaa yuu ãnɛ a shɔmala nya ãsinɛ Musa a yupɛ̃ni dɔlayi i arɛ, i hɨunɛ,<<Geliu nɛ, a kpaa kaka gbete a pɛli vim awuni yɛ piya? pi ã kakau piya?>>

Yesɔ kasiyinya nɛ, <<Nkɔ ma n hɨ ɔ ruuwɔɔ pɛjo, ɔ gelin nɛ, Yɔhana shɔ batizima u kaka shɛ a Ɗalapa ɗɔbiya ko a shɔzɛ ɗɔbii ya?>>

Kɛɗɔn i gaa nya masinɛ ai nɔɔ nɛ, <<U yɛ shakɛnɛ iviya? u kɛ shanɛ nɛ, <A Ɗalapa ɗɔbii,> Yɛ hɨunɛ, <Aru ivi ɔji ã sisɨn ɓa Yɔhana biini ɓa viya? > Ama u kɛ shanɛ nɛ a shɔzɛ ɗɔbii, mɔɔmiyi kpai i yɛ loriu a tari, aru gbete kopiya ã sisɨn tɛttɔ nɛ Yɔhana u pɛ Ɗa jashonɛ.>>

Aruumkɔ Shɔwiyi kasinya nɛ,<<Ɔ ji zɛ ɗɔgbete u kaka shɛ aɗɔnyɛ ɓa.>>

Kɛɗɔn Yesɔ geliyi nɛ, <<Nkɔ ma n yɛn gelɔɔ kaka gbete n pɛli vim awuni yɛ ɓa.>>

Ruɓusinɛ ayuu shɔ jalanɛyi gbete i tɛ ɗɔ a saa i lakɨn

Kɛɗɔn Yesɔ geli shɔ kɛ ruɓusinɛmː Shɔ wɔɔ siɗɔn gbete lajaa inabi yɛ, a turɛ a ã shɔjalanɛ ai tɛ saa i lakɨn a naa nɛi kɔsintɔ, kɛɗɔn a sã nyaba a yɛ zati ji sɔɔ wɛrɛ ɓa tɛ̃ɛ̃ti ɓa. Naa ɗaa vi yeenɛ pɛlitɛ, a shou foo wɔɔ a shɔgbeteyi tɛ ɗɔ au naa yɛ ɗɔbii, nɛu tɛsin nɔlaa inabi ai naa. Ama shɔ ɗɔ tɛnɛwiyi i waa foou i dɔ̃u wɛrɛ naa waati iji ãu viwɔɔ ɓa. Kɛɗɔn a shou foo wɔɔ sɔ̃n, ama shɔ ɗɔ tɛnɛwiyi i wau sɔ̃nrɛ, i tasiu raarɛ vi yusẽkɔ sheeli i dɔ̃u sɔ̃nji naa waati. Kɛɗɔn Shou foo gbete au pɛsi taati sɔ̃nrɛ, shɔ ɗɔ tɛnɛwiyi i waurɛ a ntariu nɔrɔ̃ vɔrɔ bi i turɛ i lokiu ɓili.

Kɛɗɔn shɔ jau shanɛ,<<N yɛn pɛli kɛ iviya? N yɛn shokɛ n jaa gbete n ɔriyɛ waanɛ; N zɛtɛttɔ i yɛ ntau nyatɔ!>>

Ama naa shɔ ɗɔ tɛnɛwiyi i zɛ shɔ jaa inabiu ɓɛjaatɛ , i geli zɔɔ nɛ, <<Shompɛ shɔ jam ɓɛjaa gbete yɛ shau vivɔ yɛ,>>U nyounɛ nɔgbete u vinaa yɛ ɔ̃ u ɓɛɛ. Kɛɗɔn i tuurɛ a yɛti jauni i nyou vɔrɔ i lokiurɛ.

Shɔ jau yɛ pɛli shɔgbete i tɛ jaa a saa i lakɨn kɛpikoviya? <<Shɔ jau yɛ arɛ u nyo jawiyitɔ, a tuu jaurɛ a ãkɛ shɔwɔyi naa nɛi kɔsintɔ.>>

Naa mɔɔ i nta vimtɛ i shanɛ, <<Mɛnɛ ukɔ ɔ̃nɛ nanniǃ>>

Yesɔ kɨnnɔɔ ai bi a shanɛ, Ɗa nya ruubiim u dɔɔ kɛnɛ iviya?

<<Tari gbete shɔvi maanɛ i bɛ̃ɛ̃ yɛ

ukɔ ɔ̃tɛ tari gbete au tɛɛ gãsiyi a vishonɛni.>>

Kopiya au kɛ nwesinɛ tariu yɛ yeliu kɛra- kɛra, ama tariu kɛ shi-shinɛ a shɔwɔɔ yuu yɛ nau ɗete-dete u rii naa zɨng.

Ruu hɨnɛ ayuu sabɛnɛ shonɛ

Shɔmala nya ãsinɛ a yupɛ̃ni gbete pɛli vi yuu ãnɛ a jaa Ɗa i kã nyaba nɔgbete i yɛ sã Yesɔ a ɗaukɔ, aru i zɛtɛttɔ nɛ nwa rubusinɛm ji ai yuukɔ, ama i nta seti aru mɔɔyi.

Kayisa sabɛnɛ shorinɛ

Kɛɗɔn shɔwiyi kã nyaba gbete i yɛ sã Yesɔ yɛ, i woo shɔwɔyi a saa nɛi tasiyi yuu naa i pɛ shɔ tɔ̃vɨn, i shoyirɛ a Yesɔ ɗɔbii nɛi hɨliu ruu i ɗasiu kɛ tari, ai sisɨn nɛi ãukɛ shɔ kaka gbete yeeruu Gɔmna Roma a naa . Jashonɛyi gbete shɔ shoyi a Yesɔ ɗɔbii i hɨunɛ,<<Shɔmala u zɛtɛttɔ vigbete a shayɛ àà vimatinɛni pɛ tɔ̃vɨn, u zɛtɛttɔ a yukɔnɛ ɓa shɔwɔɔyi ruubiini ɓa, ama a mati shɔvi tɔ̃vɨn aru Ɗalapa sisɨn gbete.>> Geliu pɛ, aa zɛnɛ pɛ tɔ̃vɨn ya au nya ãsinɛ, u shori japɛ̃pɛ̃ɛ saa bɛnɛtɔ ya ko ɓa tɔ̃vɨn ɓa?

Ama Yesɔ zɛi sisɨn tɛttɔ nɛi kasin ɗasinɛ, a geliyinɛ, <<Ɔ tasi saa silivau pɛ. Pi jasuru a nii ni a sauni piya?>>

I kasinya nɛ, <<Kayisa.>>

Kɛɗɔn Yesɔ shanɛ,<<Ɔ ã Kayisa jo vigbete ɔ̃ u ɓɛɛ yɛ, ɔ ã Ɗalapa sɔ̃njo vigbete Ɗalapa ɓɛɛ yɛ.>>

I ji kpaa nyaba gbete i yɛ sã Yesɔ a shɔ ɗekɨn aru kɔ̃linɛni ɓa, kɛɗɔn i ɔ̃ a nyani shok i bi zaatɔ aru gbete Yesɔ geliyɛni.

Ruu hɨnɛ ayuu vɔrɔ yunɛ sàà

Kɛɗɔn gãsi Sadukiyawayi gbete i shanɛ vɔrɔ yɛ yuu ɓa sàà ni ɓa, i a Yesɔ ɗɔbii i hɨnɛ, <<Shɔmala, Musa bee ruu labeenɛ nya ãsinɛ shanɛ, <Shɔgbete kɛ vɔnɛ ji yee jaa ɓa a ɓesoni ɓa, ɓɛzɔ̃ yɛ zɛnɔɔtɔ u sɔri suvɔrɛ u yeeri ɓɛzɔ̃ jaarɛ a suuni.> Shɔwɔyi isi ai yeenɛ maazii. Jamari tɛ sorɛ a vɔrɛ ji kpaa jaa ɓa. Kɛɗɔn shɔu pɛsiyɛ tɛ suurɛ, a vɔrɛ ji kpaa jaa ɓa. Shɔgbete pɛsi shɔ zitiu pɛli sɔ̃njo nankɔ, i piti gbete gbete yɛnɛ maazii i ji kpaa jaa ɓa. A kɨntiuni piti kpai suu vɔrɛ. Dɔdɔrim gelinɛ, leegbete vɔrɔyi yulapa a sàà yɛ, suu yɛ ɔ̃kɛ pi so atette shɔ maazii miyi gbete i tɛutɛttɔ piti kpai miyi piya?>>

Yesɔ kasiyinya nɛ, <<Vɔshɔyi i tɛ so tɔ a kotipini, shɔ ãi soro tɔ aru shɔ tɛyirɛ. Ama vɔshɔyi a sɔrɔyini gbete i yɛtɛ a nɔgbete Ɗalapa yɛ yusiyilapa atette shɔgbete i vɔ tɛttɔyɛ, ruu so tɛnɛ ɓa, a vɔshɔ tɛnɛni ɓa ɗɔmɓa. Aruumkɔ i yɛ ɔ̃ naa Ɗa jashonɛyi lapa i yɛ vɔ tɔɓa. I kɛ Ɗa jaayi, aruviya i yulapatɛ a sààni. Ko Musa ma tasi tɛttɔ wasa-wasa nɛ, shɔgbete i vɔtɛ i yɛ yulapatɔ a suru ni. Au laabeenɛ ayuu yaa shaanɛ jalaa, Musa nwanyatɔ a Ubeyelapa yuuni nɛu pɛ <Ibirayi Ɗalapa, Ishayaku Ɗalapa a Yakubu Ɗalapa.> U pɛ Ɗalapa gbete u suru aɗɔnyɛ, ama ɓa shɔgbete i vɔ tɛttɔ i ɓɛɛ ɓa, a Ɗalapa ɗɔbii i piti kpai i suru aɗɔn.>>

Gãsi shɔmala nya ãsinɛ gbete i si ɗɔnyɛ i risi Yesɔ nyanɛ, <<A shatɛ tɔ̃vɨn tɛpɛ-tɛpɛ shɔmalaǃ>> Yunɛ ɗɔukɔ shɔwɔ ji hɨ Yesɔ ruuwɔ tokɨn ɓa.

Ruu hɨnɛ a kirisi yuu

Kɛɗɔn Yesɔ hɨyinɛ, <<Ɔ sha pi aru iviya nɛ kirisi u pɛ Dauda ɓɛuruu viya? Dauda au yuu shatɛttɔ labeene Zabura nɛː

<<Uɓeyelapa gelin n Uɓeyelapa nɛː

Ɔ̃nɛ yɛm ang nakɨnmi

setɛ n pɔ̃ a shɔnɔpɔ̃yitɛ

i ɔ̃ la ɔ̃nɛ gbete a pɔ̃ dɔɔ aɗɔn.>>

Dauda kɛ ɓaa kirisi nɛ, Uɓeyelapa, <<Kirisi yɛ ɔ̃ u ɓɛjaa kɛpikoviya?>>

Yesɔ gɔ̃ shɔ yushoo aru shɔmala nya ãsinɛ Musa

Si mɔɔyi piti kpai i ɗɔɔ showenɛ a Yesɔ nya, Yesɔ geliu jaɗɔyinɛ, <<Ɔ kɔyuutɔ aru shɔmala nya ãsinɛyini, shɔgbete kasi rakinɛ a kpenti fãrã wɔsɔ̃n i ɔrinɛ shɔu kuuti a tipi shɔ geeyi nya a lumɔɔ, i kasinɛ shɔ yasiyi ɗɔɔ ɔ̃nɛ pẽniba aɗɔgbete Yahudawayi i toli nya ɗɔnyɛ aru ruu nwanɛ, wɔsɔ̃n shɔu yasiyi ɗɔ tɔ̃vɨn a ɗɔɔ yumusinɛ. Ikɔyi ɔ̃rɛ shɔgbete ai shaa suvɔyi vi, i gaki Ɗa dɔkɔkɔ nɛ shɔ zɛyitɔ, i raaɓoonɛ yɛ tɛ shɔwɔɔ ɓɛɛtɔ piti kpai.>>

Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.