Skip to content
BibleKenya

Lamma Bible Translation Project

Yɔhana 8:32

Verse 32 is marked below, with the whole chapter around it. Read from the start

Su Gbete Shɔ Sãu Ɗɔɔ Kpangtang Pɛlinɛ

Kɛɗɔn kopiya yɛ wɛrɛ rɛ, ama Yesɔ yɛ ɓɛɛkɛ kɔpɔ gbete laa zeetung aɗɔnyɛ. A dii ɓuru gadi zɨɨnkɔ Yesɔ sɔɔ wɛrɛ Ɗa rɛ. shɔ toli nya au ɗɔbii kpai, kɛɗɔn Yesɔ ɔ̃rɛ a tipi a gaa shɔ vi matinɛrɛ Shɔmala nya-ãsinɛ a Farasiyayi i n-tiu su gbete shɔ sãu a ɗɔɔ kpangtang pɛlinɛ, i pɔ̃urɛ ai ɗekɨn. I geli Yesɔ nɛ, <<Shɔmala, sum shɔ sãu a ɗɔɔ kpangtang pɛlinɛ. Au nya-ãsinɛ, Musa ãsinyanɛ ɔ̃tɛ kaka jazɨng akɔrɔ shɔ lɔriu a tari u vɔrɛ, a sha ɓɛɛkɛnɛ iviya?>> I sha vim i ɗasi Yesɔ tɔ aru nɛn ɗa i kpaau kɛkn a ruu kɔ̃linɛni, ama Yesɔ ɓakirɛ a bee vi a janaa a tipi. Naa i ɗɔgbete i yɛ ɗekɨn a ruu hɨnɛni, kɛɗɔn Yesɔ yulapa a geliyi nɛ,<<Shɔ gbete ji pɛli ruuvini ɓa ɗɔnni ɓa, ukɔu lɔu ɗekɨn pɛrɛ a tari.>> Kɛɗɔn Yesɔ ɓaki sɔ̃nrɛ u ɗɔɔ vi beenɛ a tipi. Naa i nta ruumtɛ, i yaa ɗɔurɛ gbete gbete, gaa pɛ a shɔ pẽniba bi yɛnɛ shɔ wujayi bi. Shɔ yaa Yesɔ a ɗɔu a yɔbm a suuni i ɗɔɔ shinɛ a ɗɔukɔ. Yesɔ yulaparɛ a hɨ suunɛ,<< I kɛ piya? Shɔwɔɔ ji gɔ̃ a yusho ɓaya?>>

Suu kasinya nɛ,<<Mashɔwɛrɛ, shɔwɔɔ ji gɔ̃n yusho ɓa.>>

Kɛɗɔn Yesɔ shanɛ,<<Nkɔng ma n yɛn gɔ̃ a yusho ɓa, yɛnɛ ama mɔkaa pɛli ruuvininɛ toti.>>

Yesɔ Kɔ Ɔ̃rɛ Ɗɔsẽsẽ A Koo

Yesɔ nwanya sɔ̃n a Farasiyayi toti nɛ, <<Nkɔng ɔ̃rɛ ɗɔsẽsẽ a koo,>> A shanɛ, <<Shɔgbete kɛ gɨnnɛ yɛ raɓa a ɗɔkɨnrini ɓa ama yɛ kpaa ɗɔsẽsẽ gbete ã suruyɛtɔ.>>

Arumkɔ Farasiyayi i geli Yesɔ nɛ, << Dɔdɔrim a shijo ayuu aa kɨnti ni; vigbete a shayɛ ji tasi viwɔɔ ɓa.>>

Yesɔ kasiyinya nɛ,<< Ko n shijo àng yuu áng kɨnti ni, vigbete n sha ɓam nizɛ, n zɛ ɗɔgbete n shɛ a ɗɔntɛ a ɗɔgbete n yɛni. Ɔ ji zɛ ɗɔgbete n shɛ a ɗɔnni aɗɔgbete n yɛyyɛni ɓa. Ɔ yeeri shɔ ruu ɔ gɨn ɓɛɛjo shɔzɛ vi pɛlinɛ sheeli, n yeeruu ji ɓa a shɔ yuuni ɓa. Ama n si tɔnɛn pɛlitɔ n ruu yeenɛ si ɔ̃ nizɛ, aru gbete n ɓa yɔbm ɓa, maye gbete shongyɛ u a nkɔng ni. Awɔ nya ãsinɛ shɔ bee tɛttɔ nɛ shɔzɛ ziti i kɛ pɔ̃naanɛ, vigbete i shayɛ ɔ̃tɛ nizɛ. Nkɔng shijo ang knti ang yuu, maye gbete shongyɛ uku ma shitɛjo ang knti ang yuuni.>>

I hɨu nɛ,<<Mɛye u piya?>> Yesɔ kasinya nɛ,

<<Ɔ ji zɛn nii ɓa, ko maye ɔ ji zɛu nii ɓa, ɔ si zɛn niitɔ ɔ si zɛ maye tɛjo.>>

Yesɔ sha vim aɗagbete u ɗɔ shɔ vimatinɛ a wɛrɛ Ɗa yɛ, a ɗɔgbete shɔ pɔ̃ ɓari vinaa ãnɛ aɗɔnyɛ. Shɔ ji sãu ɓa, aru gbete u ɗaa sãnɛ si ji pɛli ɓa.

Ɗɔgbete N Yɛ, Yɛ Ɔ yɛ Ɗɔu Ɗɔɔɓa

Kɛɗɔn Yesɔ geliyi sɔ̃nnɛ,<<N yɛn yɛtɔ; ɔ yɛ kãnɗɔtɔ ama ɔ yɛ vɔ awɔ ruuvinini. Ɗɔgbete n yɛ, yɛ ɔ yɛ ɗɔu dɔɔɓa.>>

Kɛɗɔn yupɛ̃ni Yahudawayi i shanɛ,<<Tɔnɛ ɗɔgbete nɛn yɛ, yɛ nɛu zɛnɔɔ yɛnɛ ɓa, yɛ nyou yuu kɛtɔya?>>

Yesɔ kasinya nɛ,<<Ɔ ɓɛɛjo shɔ kootipimkɔ ama n a ɓɛɛ a kolapa. Ɔ ɓɛɛjo shɔ kootipimkɔ ama n ɓa shɔ kootipi ɓa. Arumkɔ n gelɔɔkɨn n-tɛ ɔ yɛ vɔ awɔ ruuvinini. Ɔ ji ã sisɨn ɓa nɛn pɛ ukɔng ɓa, ɔ yɛ vɔ awɔ ruuvinini.>>

I hɨunɛ, mɔkaa piya? Yesɔ kasinya nɛ,<<Ji nankɔ vigbete n gaa wɔ gelinɛ yɛ. N vigbete n sha awɔ yuu aɗɔn waanɛ, n yeruu dɔɔtɔ awɔ yuuni. Ama shɔ gbete shongyɛ u pɛ shɔ tɔ̃vɨn wɔsɔ-wɔsɔ, n gelɔɔ vigbete shɛ au nyayɛ.>>

I ji zɛ ɓa nɛ Yesɔ nwariyinya pɛ a ɓeye yuu ɓa. Kɛɗɔn a geliyi nɛ,<<Ɔ kɛ ɗee Shɔzɛja nɛ lapa, ɔ yɛ zɛtɔ nɛ ukɔ ɔ̃rɛ piya; ɔ yɛ zɛtɔ nɛ vi kpai n pɛli ɓang kaka bi ɓa, ama n sha ɓɛɛjo vigbete maye ãsing nya nɛn shayɛ kɔ sheeli. Shɔ gbete shongyɛ u à nkɔng ni, ji yamɓa yɔbmni ɓa, aru gbete n pɛli vigbete kasiyɛ.>>

Shɔzɛ waanɛ gbete i nta Yesɔ a ɗɔɔ vim shanɛ i ã sisɨntɔ au biini.

Tɔ̃vɨn Ãnɛ Yɛ Pɔ̃rɛ Ɔ Ranaarɛ

Kɛɗɔn Yesɔ geli shɔgbete i ã sisɨn au bi nɛ,<<Ɔ kɛ gɨn vigbete n matɔɔnɛ, ɔ pɛ n jadɔɔyi kɔ nizɛ; Ɔ yɛ zɛ vi tɔ̃vɨntɔ, vi tɔ̃vɨn pɛlinɛ yɛ pɔ̃rɛ ɔ ranaa weze.>>

I kasinya nɛ, <<U pɛ Ibirayi Laduru, u ji ɔ̃ shɔwɔyi foo ji shãaɓa. Rugbete a shanɛ u ranaa weze u dɔɔ kɛnɛ iviya?>>

Yesɔ geliyi nɛ,<<N gelɔɔm pɛ vi nizɛː kopiya kɛ pɛli ruuvininɛ upɛ foo a ruuvinini. Foo u ɓa jawɛrɛ dangdang ɓa. Ama jaa u pɛ jawɛrɛ dangdang. Jaa kɛ pɔ̃ wɔnɛ ɔ ranaanɛrɛ, ɔ yɛ ranaa weze nizɛ. N zɛ tɛttɔ ɔ pɛ Ibirayi laduru. Ama ɔ ɗɔgbete ɔ kã nyaba nɛi nyontɔ, aru gbete ɔ ji tɛng n vimatinɛ ɓa. N a ɗɔgbete n sha vigbete n zɛ a maye ɗɔbiiyɛ, ama ɔ pɛli sɔ̃njo vigbete ɔ nta a meyeyi nyayɛ.>>

I kasi Yesɔ nyanɛ,<<Uɓeye pɛ Ibirayi.>>

Yesɔ risiyinya nɛ,<<Ɔ si ɔ̃ Ibirayi ɓɛɛ jaa kɔ nizɛ, ɔ si pɛliji vigbete Ibirayi pɛliyɛ. Ɔ zɛpɛ n shɔ gbete n gelɔɔ ruu tɔ̃vɨn gbete n nta a Ɗalapa nya, ɔ ɗɔgbete ɔ kã nyaba nɛi nyontɔ. Ibirayi ji pɛli ji nankɔ ɓa! Ɔ pɛli ɓɛɛjo vishonɛ gbete meyeyi i pɛliyɛ.>>

I kasinya nɛ, <<Ɗalapa au yuu ukɔ Uɓeye sheeli, ukɔu pɛ ɓɛɛ jaa tɔ̃vɨnyi.>>

Yesɔ geliyi nɛ, <<Ɗalapa si tɔnɛn ɔ̃ ɔ Ɓeye kɔ nizɛ, ɔ si ɔrintɔ, aru n a, a Ɗalapa ɗɔbii, dɔdɔrim n yɛm. N ji a ɓa ang kaka bi ɓa, ama ukɔ shongrɛ. Ɔ ji nta vigbete n gelɔɔyɛ ɓa ruu iviya? Aru gbete ɔ ma sisɨn ɓa ang nya ruubiini ɓa. Meye ɓɛɛ japɛ̃pɛ̃ɛ̃, vigbete ɔ gɨn yɛ ji vigbete meye kasiyɛ. Gaadijo a ɗekɨn u pɛ shɔyuvɔ-nyonɛ, ji ɔ̃ jo shããni a nyaba tɔ̃vɨnni ɓa, aru gbete u ruwɔɔ ji a vi tɔ̃vɨnni ɓa. Kɛ yeenyanɛ ɓɛɛ au ɗɔbii vi tɔ̃vɨn, aru u pɛ shɔ nyayeenɛ, ukɔ ɔ̃rɛ shɔ nyayeenɛyi i ɓeye piti kpai. Ama n shapɛ vi tɔ̃vɨn, aruukɔ ɔ ji ã sisɨn ɓa ang biini ɓa. pi yɛ tasi pi nɛn n shɔruuvini pɛlinɛ piya? N kɛ shanɛ vi tɔ̃vɨn, aru ivi ɔ ji ã sisɨn ɓa ang biini ɓa viya? Shɔ gbete apɛ a Ɗalapa ɗɔbii, weshotɔ Ɗalapa nyaruubiini. vi gbete pɔ̃rɛ ɔ ji wesho ɓa Ɗalapa ruubiini ɓa, ɔ ɓau ɓɛɛ ɓa.>>

Yesɔ Tɛɛ Ibirayi Tɛ

I hɨ Yesɔ nɛ,<< U ji sha si ɓa, vi tɔ̃vɨn ɓaya n-tɛ apɛ shɔ Samariya, rãmã sɔ̃n aa biini ɓaya?>>

Yesɔ kasinya nɛ,<< N rãmã ɓa biini ɓa, n basi pɛ maye, ama ɔ ji basin ɓa. N ji kã bassinɛ ɓa ang yuu ɓa. Ama shɔ gbete kãrin aɗɔn, ukɔ ɔ̃rɛ shɔ ruu yeenɛ ang yuu. N gelɔɔm pɛ vi nizɛː shɔ gbete kɛ gɨn n vimatinɛ nɛ yɛ ɔ̃ a suruni dangdang.>>

Kɛɗɔn i geli Yesɔ nɛ,<< Dɔdɔrim kɔ nyanwanɛ wɔɔ tɔɓa u zɛtɛ a rãmã a ɗɔnǃ Ibirayi vɔrɛ, janyagadiyi i vɔrɛ, piti shomni kpai a shanɛ shɔgbete kɛ gɨn a vimatinɛ nɛ yɛ ɔ̃ a suruni dangdang. Ibirayi vɔrɛ, a tɔɔkɛnɛn tɛɛ uɓeye Ibirayi tɛya? Janyagadiyi i vɔ sɔ̃njirɛ. A risaa yuu kɛ piya?>>

Yesɔ kasinya nɛ, << Nkɛ basin yuunɛ, n basinɛu yɛ ɔ̃ ɓa viwɔɔ ɓa. Maye ko ɔ̃rɛ shɔgbete basinyɛ shɔ gbete ɔ tɔɔnɛ ukɔ ɔ̃rɛ ɔ Ɗalapa. Ɔ ji zɛu ɓa shãa ɓa, ama n zɛutɛ. N si tɔɔnɛn shanɛ n ji zɛu ɓa, n si ɔ̃tɛ shɔ nyayeenɛ awɔ ɗɔbiini. Ama n zɛutɛ n gɨu nyatɔ. Meyeu Ibirayi nta sisɨn purutɔ aru u zɛ ɗagbete n yɛ a yɛ; zɛrɛ a nta sisɨn purutɔ.>>

I geli Yesɔ nɛ,<< A ji yɛ saa laa ziti atu kopi (50) ɓa, a nɛn zɛ Ibirayi tɛya?>>

Yesɔ risinya nɛ,<<N gelɔɔm pɛ vi nizɛ, Ibirayi ɓɛɛ yeenɛ, n siɗɔn.>>

Kɛɗɔn i sii tari nɛi lɔruu awuni, ama Yesɔ bɔrɛ a yaa wɛrɛ Ɗaurɛ.

Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.