Skip to content
BibleKenya

Lamma Bible Translation Project

Yɔhana 1:5

Verse 5 is marked below, with the whole chapter around it. Read from the start

Ruu Gbete à Suru Yɛ

A gaanɛ ruu siɗɔn, ruu si ji a Ɗalapa ni a ɗɔzɔ, ruu sijo Ɗalapa kɔ. Yuunɛ a gaanɛ ruu si a Ɗalapa ni. Au kabiikɔ Ɗalapa pɛli vi piti kpai; A Ɗalapa vi shɛshinɛ kpai pɛli jo au nii kɔ. Ruu ukɔ ɔ̃rɛ nyaba suru kpaanɛ, Surunkɔ n ti ɗɔsẽsẽrɛ a shɔzɛ bi. Ɗɔsẽsẽ kolirɛ a ɗɔkɨnri , ɗɔkɨnri ji kuki ɗɔsẽsẽ dɔɔɓa.

Ɗalapa shou jashonɛ, jaau u nii nɛ Yɔhana. Yɔhana arɛ u geli shɔ ruu ɗɔsẽsẽ, nɛ kopiya u nta ruum u ã sisɨntɔ a ɗɔsẽsẽuni. Yɔhana ubiiba u siɓa ɗɔsẽsẽukɔ ɓa; arɛ aru u geli shɔ ruu, aru ɗɔsẽsẽ. Shomkɔ ɔ̃rɛ ɗɔsẽsẽ nizɛ, ɗɔsẽsẽ gbete arɛ a kootipi a koli a shɔ yuu piti kpai. Ruum si ji a kootipikɔ, Ɗalapa pɛli kootipi ji au kabiikɔ, piti shomni kpai shɔ kootipi i ji zɛu nii ɓa. A arɛ aru u shɔbiiyi, ama ɓɛshɔzɛyi i ji tɛu naa ɓa. Ama shɔ gbeteyi i tɛu naa piti kpai ai ã sisɨn au bi, kɛɗɔn a ãi naarɛ nɛi ɔ̃ Ɗa jaayi. I ji ɔ̃ Ɗa jaayi ɓa naa shɔzɛ ɓa, aruukɔ shɔ ji yeeyi ɓa a nyaba gbete shɔzɛ yee jaa yɛ ɓa, ama Ɗalapa au yuu ukɔ ɔ̃rɛ i ɓeye. Ruukɔ rii shɔzɛrɛ, ruu nizɛ tɔ̃vɨn tɛpɛ-tɛpɛ, u ɗɔ ɔ̃nɛ au tete. U zɛu basinɛtɛ, bassinɛ jagbete au tɛ a ɓeye Ɗalapa naa yɛ. Yɔhana nwanya sitɛ au yuuni. Yɔhana sɨnnyavɔ a kakani a shanɛ,<<Shɔmpɛ shɔgbete n nwanya si au yuuni gbete n tɔnɛ,< Shɔ gbete yɛ a ang knti, ama tɛng tɛttɔ a kakani, aru iviya n ɓɛɛ yeenɛ u siɗɔn.> >>

Au tete sisɨn tɔ̃vɨn kpai ãu nyabatɛ tasiu vɔ susãritɛ a bi piti kpai, Tasiu vɔ susãri gbete gbete kopiya. Ɗalapa ã nya-ãsinɛ a Musa naa, ama a ãu sisɨn tɔ̃vɨn a nyaba tɔ̃vɨn ni a Yesɔ kirisi naa. Shɔwɔ ji zɛ Ɗalapa ɓa au nɔni shãã ɓa, ama u jagbete ukɔ ɔ̃rɛ Ɗalapa, u a ɓeyeni i zali, ukɔ pɔ̃urɛ u zɛ Ɗalapa nii rɛ.

Yɔhana Shɔ Batizima Ãnɛ Nyanwaanɛ

Yupɛ̃ni Yahudawayi i sho gãsi shɔlansi a Urushalima a Lawiyawayini a Yɔhana ɗɔbii, nɛi hɨu pɛ nɛ,<<A ɓɛɛ piya?>> Yɔhana ji bɛ̃ɛ̃ nya kasinɛɓa, nwanya ji nta yusẽɓa, a shanɛ:<<N ɓa kirisi ɓa.>> I hɨnɛ<< Akɛ piya? Mɔkaa Iliya ya?>> Yɔhana kasi nyanɛ,<<Ɓa, n ɓa ukɔ ɓa,>>I hɨu sɔ̃n nɛ, <<Mɔkaa kɛ janyagadi ya?>>Yɔhana risinyanɛ.<<Ɓa>>. Kɛɗɔn i shanɛ<< geliu nɛ akɛ piya, nɗa u kpaa vigbete u yɛ geli shɔgbete i shouyɛrɛ, A shaɓɛkɛnɛ ivi aa yuuni viya?>> Yɔhana kasiyinyarɛ a sha vigbete laabeenɛ janyagadi Ishaya shayɛ nɛ:

<< Pɛ nkɔ Yeenya gbete a ɗɔɔ nya ɓaanɛ a ɗɔgbete laa ɓa ɗɔmɓayɛ:

Ɔ kɔri Uɓeyelapa nyaba gbɔrɔrɔ!>>

Jashonɛ gbete, shɔ Farasiya i shoyɛ, i hɨ Yɔhana nɛ,<<A sitɛ ɓa kirisi ɓa, a ɓa Iliya ɓa, sɔ̃n ɓa janyagadi ɓa, kɛpi ruuvi a pɛli shɔ Batizima viya?>> Yɔhana kasiyinya nɛ,<<N pɛlɔɔ Batizima a mii, ama awɔ tetem shɔwɔɔ a ɗɔɔ shinɛ gbete ɔ ji zɛuɓa. U ɗɔɔ anɛ ang knti, ama n ji tɛsiɓa n kaliu rii koodɔɔ rɛ ɓa.>> Vim kpai shɔ pɛli a Betani, a kagɨnri a nya ɓooti Urudu, a ɗɔgbete Yɔhana pɛli shɔ Batizimayɛ.

Ɗa Jamɛrɛ

A dii ɓuru Yɔhana zɛ Yesɔ rɛ u ɗɔgbete au ɗɔbiiyɛ, kɛɗɔn a shanɛ,<<Nkɔ Ɗa Jamɛrɛ yɛm, shɔgbete au tu shɔ ruuvini a kootipi piti kpai! Shɔmpɛ shɔgbete ang nwanya si au yuu yɛkɔ n shanɛ,<Jawɔɔ kaanɛ ang knti, ama tɛngtɛttɔ a kakani, aru viya nɓɛɛ yeenɛ u siɗɔn.> N ang yuu si n ji zɛu ɓa kɔjɔ, ama n arɛ n ɗɔgbete n pɛli shɔ Batizima a mii a nɔgbete n tasiu shɔ Israila i zɛu niitɔ.>> Kɛɗɔn Yɔhana shi au yuu a shanɛ: <<N zɛ Ɗa Suru a ɗɔɔ nɔnɛ a kolapa naa koro, a ɔ̃ au yuu. N ang yuu si n ji zɛɓa nɛ ukɔ ɓa, see Ɗalapa gbete shonyɛ nɛn pɛli Batizima a mii, gelin nɛ,< A yɛ zɛ Ɗa Surutɔ a ɗɔɔ nonɛ a jawɔɔ yuu; ukɔ ɔ̃rɛ shɔ gbete yɛ pɛli shɔ Batizima a Ɗa suru,> Yɔhana shanɛ, n zɛ Ɗa suru tɛ, n gelɔɔtɛ ukɔ ɔ̃rɛ Ɗa jaa>>

Yesɔ Jadɔɔ Gbete Gaa yuu A Yiniyɛ

A dii ɓuru toti Yɔhana u si ɗɔɔ shinɛ au jadɔɔyini ziti, Naa zɛ Yesɔ tɛ a ɗɔɔ rakinɛ a shanɛ. << Ɔ kɨnnɔɔ pɛ, nkɔ Ɗa Jamɛrɛ yɛm!>> Yɔhana jadɔɔyi ziti naa i nta vigbete shayɛtɛ i gɨn Yesɔ rɛ. Yesɔ zaanɔɔ, zɛyirɛ i ɗɔgbete i gɨuyɛ, a hɨyi nɛ, <<Ɔ kã iviya?>>I kasinya nɛ,<<A ɗɔɔ ɔ̃nɛ piya, Rabbi?>>(ukɔ ɔ̃rɛ Shɔmala.) Kɛɗɔn a kasiyinya nɛ,<<Ɔ anɛ ɔ zɛrɛ,>>( Si gɨnɗadɔɔ pɛlitɛ nɛ̃ɛti a niti.) kɛɗɔn i yɛrɛ awuni i zɛu ɗɔ ɔ̃nɛrɛ, ɗaa yisiyi kɛji ɗɔukɔ zɨlu. Ai tete shɔwi si Anduru, Siman Bituru ɓɛzɔ̃. Tɛ̃ɛ̃ti a kpaa ɓɛzɔ̃ Siman geliunɛ <<U kpaa Shɔshɔranɛtɛ.>>( Ukɔ ɔ̃rɛ <<kirisi>> Kɛɗɔn tuu Siman a n-tiu Yesɔ ɗɔbiirɛ.

Yesɔ zɛurɛ a shanɛ,<<A nii nɛ Siman Yɔhana ɓɛɛ jaa. Ama shɔyɛ ɓa,anɛ Kɛfasi>>(Ukɔ ɔ̃rɛ zali a nii gbete shɔ ɓa,anɛ Bituru, Bituru ukɔ ɔ̃rɛ <<Tari>>.)

Yesɔ Ɓaa Filibu a Nataninya Nya

Kɛ a dii ɓuru Yesɔ sɨn a sisɨn nɛn yɛ Galili. A kpaa Filibu a geliunɛ, <<Gɨnn pɛ!>> (Filibu u si a Besaida, koomɔ gbete Anduru a Bituru i ɗɔnyɛ.) Filibu kpaa Nataninya a geliunɛ,<<U kpaa shɔ gbete Musa bee vi au yuu a laabeenɛ nya-ãsinɛtɛ, wɔsɔ̃n shɔ gbete janyagadiyi i bee vi au yuuyɛtɛ. Upɛ Yesɔ Yusufu jaa, a Nazara.>>

Nataninya hɨnɛ<<Vitɔ̃vɨng yɛ shɛ kati a Nazarani ya?>>Filibu kasinya nɛ, <<Anɛ a zɛrɛ.>> Naa Yesɔ zɛ Nataninya tɛ kaanɛ au ɗɔbii, nwanya au yuu a shanɛ, <<Nkɔ shɔ Israila tɔ̃vɨn yɛm; vi nyazɔ̃ ɓau biini ɓa!>> Nataninya hɨunɛ,<<A zɛmpi koviya?>>Yesɔ kasinya nɛ,<<N zɛa adɔɔ sɨnti si Filibu ji ɓaa nya pɛɓa.>> Nataninya kasinya nɛ,<<Shɔmala, Apɛ Ɗa jaa! A kpati Israila!>> Yesɔ shanɛ,<<Dɔdɔrim a ã tɔ̃vɨn ji aru gbete n gelaa n-tɛ n zɛa adɔɔ sɨnti ya? A yɛ zɛ vigbete au tɛɛ shɔmtɔ a banɛni!>> Kɛɗɔn Yesɔ geliyinɛ, <<N gelɔɔmi pɛ nizɛ: Ɔ yɛ zɛ kolapa ɓɛlitɛ ɔ zɛ Ɗajaashonɛlapa i ɗɔɔ lapa gẽnɛ a nonɛni a shɔzɛja yuu.>>

Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.