Lamma Bible Translation Project
Vishonɛyi 15
Shɔ ɔ̃ a Urushalima
Shɔ wɔɔyi shɛ a tipi Yahudiya i a Antiya rɛ ai gaa shɔ sisɨn-ãnɛ Ɗabii vimatinɛrɛ, i shanɛ, <<Shɔ ji yerɔɔ shaa ɓa naa gbete laabeenɛ Musa nya-ãsinɛ shayɛni ɓa, ɔ yɛ kpaa raanɛ ɓa.>> Bulus a Barnaba ni aruumkɔ i masinya a shɔwini ayuu ruum fɛ̃ɛm, kɛɗɔn shɔ marɛ nɛ Bulus a Barnaba ni a shɔ gãsiyini a Antiya nɛi yɛ Urushalima, jashonɛyi a shɔpẽni ɗɔbii aru ruumkɔ.
Shɔ gbeteyi gɨn Ɗa yɛ, i dɔ̃yi naarɛ, ai sɔɔkɛ tipi Fonishiya a Samariya, i geli shɔ ruu nɔgbete shɔ gbeteyi ɓa Yahudawa ɓa i ã sisɨn a Ɗabiiyɛ; ruum n ti shɔ sisɨn anɛ Ɗabii kpai yɛti puru fɛ̃ɛm. Naa Bulus a Barnaba ni i to Urushalimatɛ, shɔ Ɗa gɨnnɛyi i tɛyi naarɛ, a jashonɛyini wɔsɔ̃n shɔpẽni dɔlaani kɛɗɔn i sha vigbete Ɗalapa pɛliyɛ ai kabii kpai. Ama gãsi shɔ sisɨn ãnɛ Ɗabii gbeteyi ai kn gbete Farasiya ni, i yurɛ i shanɛ,<<Ɔ̃tɛ kaka jazɨng akɔrɔ shɔ yeeri shɔ gbeteyi ɓa Yahudawa ɓa shaatɔ, shɔu geliyi nɛi gɨn Musa nya-ãsinɛtɔ.>>
Jashonɛyi a shɔpẽni dɔlaayini ai gɨn Ɗa yɛ, i tolinyarɛ aru i sha ruumkɔ. A knti gbete i nwaruutɛ fɛ̃ɛm, kɛɗɔn Bituru yurɛ geliyi nɛ,<<N shɔbiiyi ɔ zɛ tɛttɔ tɛ̃ɛ̃tɛ̃ɛ̃ Ɗalapa lonrɛ awɔ tete aru n nwari shɔ gbeteyi ɓa Yahudawa ɓa ruu tɔ̃vɨn, nɔgbete i ntarɛ i ã sisɨnrɛ a ɗɔn. Ɗalapa au zɛ kopiya sisɨntɛ, tasitɛ nɛn tɛ shɔ gbeteyi ɓa Yahudawa naatɛ au ãyi Ɗa surutɛ, nagbete ãuyɛ. Ji ta shɔ gbeteyi ɓa Yahudawa ɓa a ukɔuni ɓa; Yaasiyi ruuvinitɛ aru i sisɨn ãnɛ a Ɗabii aɗɔn. Aru nankɔ aru ivi ɔ nta Ɗalapa sisɨn viya, a nyaba gbete ɔ pɔ̃si shɔ sisɨn anɛ Ɗabii, i vi kpette-kpetɛ gbete uɓeuruyi a wuyuni i ji zɛnɔɔ tunɛ ɓa viya? Ama u ã sisɨntɛ a Uɓeyelapa Yesɔ tɔ̃vɨn pɛlinɛ u kpaa naraanɛtɛ, ji nagbete ikɔma i kpaayɛ.>>
Kɛɗɔn mooyi kpai i ɔ̃rɛ nyani shɔk a ɗa gbeteyi wesho a Barnaba a Bulus nyayɛ, au sha ruu vibiizaanɛ a vinɔlusinɛ gbete Ɗalapa pɛli ai kabiiyɛ, atette shɔ gbeteyi ɓa Yahudawa ɓa. Naa i yisinya nwanɛtɛ, a Yakub kasinya a shanɛ, N shɔbiiyi ɔ wesho pɛ ang nya. Siman tadɔɔruu nɔgbete Ɗalapa gaa rɛ tasi shɔ gbeteyi ɓa Yahudawa ɓa ɔrinɛyɛ, aru Ɗalapa sẽ shɔ wɔɔ ai tete nɛi ɔ̃ n ɓɛɛ. Ruu gbete janyagadiyi i shayɛ ɔ̃ zali a ruumni, na gbete Ɗa nyaruubii shanɛ,
Uɓeyelapa shanɛ a knti vim n yɛn sɔɔtɔ,
n maa ɗɔɔ kpati roonɛ gbete Dauda sãyɛ sɔ̃ntɔ.
n yɛn tɔ̃ri ɗɔgbete sakiyɛ sɔ̃ntɔ
n yɛn pɔ̃rɛ u ɔ̃ sɔ̃n a kakani.
Kɛɗɔn shɔzɛ gãsi gbeteyi yaayɛ kpai i yɛ kãntɔ,
Shɔ gbeteyi ɓa Yahudawa ɓa kpai, gbete n ɓai nya i ɔ̃ n ɓɛɛyɛ.
Uɓeyelapa sha nankɔ, au sha vim si ji tɛ̃ɛ̃tɛ̃ɛ̃ yɛ.
A ruumkɔ Yakubu yɛ ɗekɨn a shanɛni nɛ, ji tɔ̃ɓa u bɔ̃ɔ̃ shɔ gbeteyi ɓa Yahudawa ɓa ai ɗɔɔ Ɗa ɗɔbii sɔɔnɛrɛ ɓa. Ama u beeri sẽkoo u geliyinɛ ikɔ shaa vishaanɛ gbete ɓa wɔsɔ-wɔsɔ ɓanɛ, aruviya shɔ ã jaɗayi, ikɔ kã sonɛ ko vɔshɔnɛ, ikɔ shaa vivaa gbete shɔ zau kɔrɔnɛ, wɔsɔ̃n a kpaani nɛ. Aru Musa nya-ãsinɛ shɔ ɓalitɔ si ji tɛ̃ɛ̃tɛ̃ɛ a Yahudawayi ɗɔ-ɔ̃nɛ ko-pi lee susunɛ shɔpiya, shɔ nwau ruubiitɔ ko-pi komoo shɔpiya
Sẽkoo yɛnɛ shɔ gbeteyi ɓa Yahudawa ai ã sisɨntɛ Ɗabiiyɛ
Kɛɗɔn jashonɛyi a shɔpɛ̃n dɔlaayi, a nyazɔ a shɔ Ɗa gɨnnɛyini kpai, i marɛ ai lɔɔ gãsi vɔshɔyi ai tete, wɔsɔ̃n Bulus a Barnaba ni i shoyirɛ a Antiya. I lo shɔzɛ ziti Yahuda gbete shɔ ɓaunɛ Barsaba a Sila, shɔ gbete shɔ sisɨn ãnɛ Ɗabii i ãyi basitɔ fɛ̃ɛm, i bee sẽkoo gbete shanɛː
Ukɔu jashonɛyi a shɔpẽni dɔlaayi a mɛzɔ̃yi, u gee u ɓɛzɔ̃yi nyatɛ kpai shɔ gbeteyi ɓa Yahudawa ɓa ai dɔdɔrim a Antiya, a tipi Suriya a tipi Kilisiyani, u nta tɛttɔ nɛ gãsi shɔ wɔyi au kn i pɔ̃ ɔ yukɔnɛtɛ, i pɔ̃tɛ ɔ sisɨn a ɗɔɔdunɛ a nya gbeteyi shayɛ; ama ɓa ukɔu ãsiyi-nyarɛ nankɔ ɓa. U ɔ̃tɛ a nyazɔɔ au kasinɛ kpai u lɔɔ gãsiyi shɔ wɔɔyitɛ jashonɛyi u shoitɛ awɔ ɗɔbii, i yɛ a a ɓɛsayi Barnaba a Bulus ni nyazɔɔ, Shɔ gbeteyi ai kasi vɔnɛtɛ aru Uɓeyelapa Yesɔ kirisi vishonɛ. Arumkɔ u sho shɔ Yahuda tɛ a Sila ni. i ai yuu i yɛ gelɔɔtɔ ai nya i yɛ gelɔɔ ji vi gbete u beeyɛkɔ. Ɗa suru a ukɔuni u matɛ au kasitɛ shɔkɔ pɔ̃sɔɔ vi kpetɛ-kpetɛ nɛ gbete au tɛɛ nya gɨnnɛmyɛ, ɔ sã ɓɛɛ jo vi gbete u gelɔɔ dɔdɔrim: ɔkɔɔ shaa vishaanɛ gbete shɔ ã vigãnkiyinɛ; ɔkɔɔ shaa kpaani, ɔkɔɔ shaa vivaa gbete shɔ zau kɔrɔnɛ, ɔkɔɔ roonɛ shɔ soni ko vɔshɔni. ɔkɛ kɔɔyuunɛ a vimni, ɔ pɛli vitɔ̃vɨngtɛ, ɔ ɔ̃ tɔ̃vɨn.
kɛɗɔn shɔ sho jashonɛyirɛ, ai yɛ Antiya rɛ, naa i toli shɔ sisɨn ãnɛ Ɗabiitɛ kpai, kɛɗɔn i ãyi sẽkoourɛ. Naa shɔ wɔɔyi ɓalitɛ, i nta yɛti purutɔ aru ruu bimanɛ gbete a ɓuzɨnyɛ. Yahuda a Silani aru si pɛ janyagadi, i geliyi ruu fɛ̃ɛm, masiyibii a ãyi kaka. A knti gbeteyi ɔ̃tɛ dɔkɔkɔ a ɗɔuni, kɛɗɔn shɔ sisɨn ãnɛ Ɗabii i ai naarɛ a yɛti ɔ̃nɛbiinyatɔ̃nɛ, i sɔɔ shɔ gbeteyi shoirɛ ɗɔbiirɛ.
Ama Sila kasirɛ a ɔ̃rɛ a ɗɔukɔ. Bulus a Barnaba ni i nyo dii gãsi a Antiya kɔ, i a shɔ wɔyini waanɛ i mati shɔ vi ai nwari shɔ Uɓeyelapa nyaruubii.
Bulus a Barnaba i Vɔsirɛ
Akɨntini a lewɔɔ Bulus geli Barnaba nɛ, <<U sɔɔ komoo kopishɔpiyanɛ au nwari shɔ Uɓeyelapa ruubii aɗɔnyɛ u zɛ shɔ sisɨn ãnɛ Ɗabiiyi, aru u zɛ nɔgbete i ɔ̃nɛ pɛ.>> Si Barnaba kasinɛn tuu Yɔhana Marku a naani. Ama Bulus zɛrɛ ji tɔ̃ɔ̃ɓa i yɛrɛ a Markuni ɓa, aru ji ɔ̃ ɓa ikɔ ni anɛ ɗagbeteyi yisinya vishonɛrɛ ɓa, ama yaai a tipi pampiliya. Nyamasinɛ siɗɔn, vim pɔ̃rɛ i vɔsirɛː Barnaba tuu Markurɛ, i to latosi yɛnɛ Sayipuru. Ama Bulus lɔɔ Silarɛ i yaa ɗɔurɛ, akɨnti gbete shɔ sisɨn ãnɛ Ɗabii shatɛ nɛ Ɗa u shaariyitɔ a nyaba Uɓeyelapa tɔ̃vɨn shonɛ. I tɛɛkɛ tipi Suriya a Kilikiya, i ɗɔgbete i masi shɔ gbeteyi gɨn Ɗabiiyɛ.
Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.