Skip to content
BibleKenya

Lamma Bible Translation Project

Vishonɛyi 16

Timoti gɨn Bulus a Sila

Kɛɗɔn Bulus yɛ Dabi a Lisitira, a ɗɔ gbete shɔ Ɗa gɨnnɛ siɗɔn u niinɛ Timoti ɔ̃yɛ, u ɓini si ɓɛɛ Yahudiyawa gɨn ji Ɗalapa kɔ, ama u ɓeye si ɓɛɛ Helenawa. Shɔ Lisitira a Ikoniya ni gbeteyi ã sisɨn a Ɗabii kpai i nwanya tɔ̃vɨn tɔ a Timoti yuuni. Bulus kasi nɛn yɛ a Timotini, aruumkɔ tuurɛ yeeruu shaarɛ, pɛli nankɔ aru Yahudawa gbeteyi ɔ̃nɛ a ɗɔuyi zɛ ɓeye tɛttɔ kpai u pɛ Helenawa. A ɗagbete i ɗɔ gbeteyi gɨn komoo-komooyɛ, i geli shɔ gbeteyi ã sisɨn a Ɗabii ruu nya-ãsinɛ gbete Yesɔ jashonɛyi a yupɛ̃ni dɔlaayi i mayɛ a Urushalimarɛ, ai geliyi nɛi gɨn nya-ãsinɛmtɔ. Aruumkɔ shɔ sisɨn anɛ a Ɗabii i sisɨn ãnɛ lakirɛ i yɛ ɗekɨn kopi leepiya.

Bulus nɔri aru Torowasa

Kɛɗɔn i zaa tipi Pijiya a Galantiya ni aru Ɗa suru zãri i ruu Uɓeyelapa nyaruubii shanɛtɔ a Asiya ni Naa i atɛ a nyaɓala tipi Misiya, i kãnɛyi yɛ tipi Pitiniya ama Suru Yesɔ ji yaayi ɓa. Kɛɗɔn i zaakɛ tipi Misiya i yɛ Torowasarɛ. A zɨngbaukɔ Bulus nɔritɔ a zɛ jawɔ a Makidoniya shitɛ, u ɗɔgbete gakiu yɛ shanɛ nɛ,<<A tipi Makidoniya a pɔ̃siunaa pɛ.>> Akɨnti gbete Bulus nɔritɛ, tɛ̃ɛ̃ti u mabiirɛ aru tɛrɛ yɛnɛ Makidoniya, u zɛ tɛttɔ nɛ Ɗalapa ɓaunyarɛ aru u nwari shɔ ruu tɔ̃vɨn a ɗɔwakɔ

Lidiya ãsisɨn a Ɗabii a Filipi

Kɛɗɔn u yuurɛ a Torowasa a latosi u tɛrɛ yɛnɛ Samutaraki, a dii gadi u yɛkɛ Neapoli. Kɛ ɗɔwakɔ u tɛ a tipi yɛnɛ Filipi, a komoo ɗekɨn a makidoniya; shɔ gbete kpanti roma sãyɛ. U ɔ̃ a ɗɔwakɔ lee ɗɔkɔkɔ. A lee susunɛ u shɛrɛ a komoouni u yɛkɛ nyaɓooti, u pɔ̃ sisɨn u tɔnɛ mɛnɛ Yahudawayi i ɗɔ nyatoli aru Ɗa gakinɛ aɗɔn. U ɔ̃rɛ au nwanya a su gbeteyi tolinya a ɗɔuyɛ. Su wɔɔ siɗɔn shɔ ɓaunɛ Lidiya shɔ tipi Tayatira, mɛli fãrã mizaarɛ gbete u saa yuuniyɛ, u si shɔ Ɗa bassinɛ, a Uɓeyelapa ɓeliu sisɨnrɛ aru u nta vi gbete Bulus shayɛ. A knti gbete shɔ pɛliu Batizimatɛ au shɔwɛrɛyini, kɛɗɔn gakiu rɛ a shanɛ,<<Ɔkɛ kasinɛ nɛn shɔ sisɨn ãnɛ a Ɗabii nizɛ a Uɓeyelapa nii ɔ arɛ ɔ nɔ ang wɛrɛ.>>Putuu nyarɛ kɛɗɔn u kasirɛ.

Bulus a Sila Shɔ mayi a jaahm a Filipi

A lewɔɔ u ɗɔgbete u yɛ ɗɔ Ɗa gakinɛ, kɛɗɔn u kpɛsi a jaa suu wɔɔni gbete u suru kɔ̃linɛ biini au pɔ̃rɛ ntalaapaatɔ. Shɔ jaawi kpaa saa tɔ fɛ̃ɛm a nyaba laapaa gbete suu ntayɛ. Suu gɨli Bulus a ukɔni, u ɗɔ nya shaatinɛ shanɛ,<<Jaa miyi pɛ Ɗalapa gbete vi tɛu kaka ɓa u jawɛrɛyi, i gelɔɔ pɛ nɔgbete ɔ ranaanɛyɛ!>> Suu yɛ ɗekɨn a pɛlinɛni nankɔ lee waanɛ, kɛɗɔn Bulus lɛsi sisɨn fɛ̃ɛm, a zaarɛ a geli suru kɔ̃linɛu nɛ,<<N ãsaanyatɛ a Yesɔ kirisi nii, shɛnɛ a jaa suu biniǃ>> Tɛ̃ɛ̃ti suru shɛrɛ au biini.

Naa shɔ jaayi zɛtɛ i nyaba saa kpaanɛ yeetɛ, kɛɗɔn i sã Bulus a Silani, i gɔ̃irɛ yɛnɛ ɓuzɨn lumoo a shɔ ruuyeenɛyi ɗɛkɨn. I n-tiyirɛ a shɔ ruuyeenɛi ɗekɨn, i shanɛ, <<Jaa miyi pɛ Yahudawayi, i ɗɔgbete n ti yukɔnɛ au komooyɛ. I mati nakoo gbete u nya-ãsinɛ zãaritɛ; u pɛ shɔ tipi Roomayi, u tɛ nakoom ɓa, ko u mati ɓa.>> Mooyi i ɓasi yuu i nwanya kɔ̃linɛrɛ a Bulus a Sila yuu,

shɔ ruuyeenɛyi ntali i fãrã rɛ, ai ãsi-nyarɛ nɛ shɔ wayinɛ. A knti gbete shɔ wayitɛ fɛ̃ɛm, kɛɗɔn shɔ pɔ̃yirɛ a jaahm, shɔ geli shɔ jaahm nɛu gau tɔ̃vɨn. Naa shɔ jaahm tɛ nya-ãsinɛntɛ, kɛɗɔn a tosiyirɛ a ɓuzɨn jaahm gbikiri-gbikiri, a pɔ̃yi dɔɔ a ɓuzɨn laa kpete-kpete ziti ai tete a ɓaarɛ.

Simɛnɛ atette zɨmba Bulus a Silani a nyazɔɔ i si ɗɔ Ɗa gakinɛ a soo tɔ̃nɛ Ɗa ɓɛlinɛni, shɔ jaahm gãsiyi i ɗɔ gbeteyi wesho ai nyayɛ. Ɓa shɔ zɛnɛni ɓa, a tipi zɨntirɛ waanɛ, vim pɔ̃rɛ dɔjaa jaahm zɨntirɛ. Tɛ̃ɛ̃ti nyejaawiyi i ɓelirɛ kpai, saganya kalirɛ kpai a shɔ jaahm dɔɔyi ni. Naa shɔ jaahmwiyi i yulapatɛ, a zɛrɛ nyejaahm ɓɛlitɛ, tɔnɛ mɛnɛ shɔ jaahmwiyi yutɛ, kɛɗɔn zɔu zaalirɛ naa yɛ nyɔu yuu awuni. Ama Bulus shati nya a kakani a shanɛ, <<Mɔkaa lɛsaa yuunɛǃ U kpai u ɗɔnkɔǃ>>

Shɔ jaahm ganɛ ɓaanya nɛ shɔu n ting yaa, kɛɗɔn to ɓuzɨn a nwesi a Bulus dɔɔ a Silani u bi a ɗɔɔ zaanɛ aru seeti. Kɛɗɔn a shɛshi ɓili a hɨnɛ,<<Shɔmala n pɛlikɛ ivi n ranaarɛ viya?>>

I kasinya nɛ, <<A sisɨn a Uɓeyelapa Yesɔ nii, a yɛ ranaatɔ mɔkɔ aa shɔwɛrɛyini.>> Kɛɗɔn shɔ nwariu Ɗa nyaruubiirɛ, a shɔzɛ gãsi gbeteyi au wɛrɛ kpai. A tete zɨmbauni shɔ jaahɨm ganɛu tuyirɛ a sɔɔriyi nɔrɔrɛ. Tɛ̃ɛ̃ti shɔ pɛli shɔ jaahm u Batizima rɛ au shɔwɛrɛyini kpai. Kɛɗɔn a n ti Bulus a Silani yɛnɛ u wɛrɛ a ãyi vishaanɛrɛ nɛi shaatɔ, ukɔ au shɔwɛrɛyini i nta yɛti purutɔ fɛ̃ɛm, aru dɔdɔrim i ã sisɨntɛ Ɗalapa bi. A dii gadi yupɛ̃ni Roomayi sho shɔdiimanɛyi a nya ãsinɛni nɛ,<<Shɔ yaa shɔmiyi naa nɛ.>>

A shɔ jaahm ganɛu geli Bulus nɛ,<<Yupɛ̃niyi i sho nyatɛ nɛ shɔu yaa a naa a Silani. Arumkɔ ɔ shɛnɛ ɔ yɛ atette binyatɔ̃nɛ.>> Ama Bulus geli yupɛ̃niyi shɔdiimanɛuwi nɛ,<<Shɔ ji kpau ɓa a ruukɔ̃linɛ wɔni ɓa, ama i wau a shɔ ɗekɨn, a shɔmni kpai u pɛ jaa tipi Roomayi, i lokiu a jaahm. Dɔdɔrim i kasinɛ i dɔ̃u naa kaali, yɛ pɛli ɓaǃ Ɔ̃tɛ kaka jazɨng a kɔrɔ yupɛ̃ni Roomayi i aɗɔm i shɛshiyirɛ ai yuu.>>

Yupɛ̃ni shɔdiimanɛyi yɛrɛ geli yupɛ̃ni Roomyi ruumrɛ; naa i ntatɛ nɛ Bulus a Silani nɛi pɛ jaa tipi Romayi, seeti pɛliyitɔ. I arɛ i gaki Bulus a Silani nɛi yasiyi ruukɔ̃linitɔ; kɛɗɔn i shɛshiyirɛ a jaahmni, ai gakiyi rɛ nɛi yaa koounɛ. Bulus a Silani i yaa jaahm-urɛ i yɛkɛ Lidiya wɛrɛ. A ɗɔwakɔ i kpaa shɔ sisɨn ãnɛyi a Ɗabiirɛ, i nwaariyinya bimanɛrɛ ai yaa ɗɔurɛ.

Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.