2 Korinti 9

Naapɔ̃nɛ aru shɔ sisɨn ãnɛ Ɗabiiyi

1Ji ɔ̃ ɓa kaka jazɨng akɔrɔ n beerɔɔ rɛ aru naapɔ̃sinɛ gbete shɔ pɛli shɔ sisɨn ãnɛ a Ɗalapa bi a Yudiyani ɓa. 2N zɛ tɛttɔ ɔ sisɨn naapɔ̃nɛ aɗɔn, n bassi tɛttɔ a shɔ ɗekɨn a tipi Makidoniya awɔ yuuni. N geliyi nɛ,<<Ɔ shɔ sisɨn ãnɛ a Akaya ɔ mabii tɛttɔ a saa gbete tɛwa.>>Ɔ bimanɛ gbete ɔ wuniyɛ pɔ̃yitɛ i nisitɛ a nɔrɔni. 3Dɔdɔrim n ɗɔgbete n sho shɔ sisɨn ãnɛ a Ɗabii, aruviya u baassinɛ gbete awɔ yuu aru ruum ukɔ ɔ̃nɛ weze ɓa. Ama ji nagbete n sha ɓamkɔ, ɔ ɔ̃ a bimanɛni awɔ vinaa pɔ̃nɛni. 4Aru n kaanɛ a shɔ sisɨn ãnɛ Ɗabii a Makidoniyani, n ji kasiɓa i kpaa ɔrɛ ɔ ji mabiiɓa ɓa, kɛ ɔ̃nɛ nankɔ, u yɛ ɓoo yusẽtɔ aru baasinɛ gbete u pɛli awɔ yuuni fɛ̃ɛm, ɓa nkɔng ɓoo yusẽrɛ sheeli ɓa piti a ɔkɔɔni! 5Arumkɔ n zɛrɛ pɛ tɔ̃vɨn n gaki shɔ sisɨn ãnɛ Ɗabiimiyitɔ, i yɛ ang ɗekɨn i toli vi gbete ɔ marɛ nɛi ãyɛ, aru u kaanɛ u kpai ɗɔgbete, yɛ tasi kɛkɨn nɛ ɔ ã ji ɔ kasinɛni, ɓanɛ ɔ̃rɔɔ kaka jazɨng akɔrɔ ɓa.

6Ɔ kpaa sisɨntɔ nɛ shɔgbete kɛ ɓaa zɔvinɛ fɛ̃ɛ yɛ yee visha ji pɛ̃tɛ̃rɛ̃; shɔgbete kɛ ɓa zɔvinɛ waanɛ yɛ yee visha ji bang. 7Ko-piya u ã ji nɔgbete pɔ̃ au sisɨnyɛ, ɓa atette sisɨn lɛsinɛ ɓa ko shɔ pɔ̃a a kakabi ɓa; aruviya Ɗalapa ɔri shɔ gbete ã vi a sisɨn puruyɛ. 8Ɗalapa zɛnɔtɔ u ãwɔ vigbete ɔ kasiyɛ waanɛ, aruviya ɔ kpaa vi gbete ɔ kasiyɛ kpai au tɛɛ namtɔ, aru ɔ pɛli vishonɛ tɔ̃vɨn. 9Nagbete Ɗanyaruubii shayɛ nɛ,

<<Ã shɔraa vitɔ fɛ̃ɛm,

U tɔ̃vɨn pɛlinɛ ɔ̃ dangdang.>>

10Ɗalapa shɔ gbeteu ã shɔ zɔvi shɔ ɓaayɛ, a vishaanɛni aru shaanɛ, yɛ ãwɔ zɔvitɔ ɔ ɓaarɛ gbete ɔ kasiyɛ piti kpai, ukɔ yɛ pɔ̃rɛ zɔviu barɛ, u pɔ̃rɛ ɔ naa ãnɛ gbete ɔ ãyɛ u sha fɛ̃ɛm. 11Koleepiya yɛ tasɔɔ vɔɔ susãritɔ a vi piti kpai, aru ɔ ɔ̃ shɔ gbeteyi ã shɔ vi sisɨn gbete, nɔgbete shɔ waanɛ i yɛ dɔ̃ri Ɗalapa kɨn aru ɔ vi ãnɛ gbete i tɛ au naa. 12Aruviya vishonɛ gbete ɔ pɛlinkɔ shori ɓa shɔ gbeteyi ã sisɨn Ɗabii vigbete i kasiyɛkɔ sheeli ɓa, ama pɔ̃rɛ shɔ waanɛ i yɛ ɗekɨn a Ɗalapa dɔ̃rinɛni. 13Aru vishonɛn u vitasanɛ gbete au n-tiyɛ awɔ ruu yuuyɛ, shɔzɛ waanɛ i yɛ bassi Ɗalapa niitɔ aru ɔ yuurorinɛ a ruu tɔ̃vɨn Kirisi, awɔ vinaa gbete ɔ ã shɔyɛ a shɔ gãsiyini kpai. 14I yɛ gaki Ɗalapa tɔ awɔ yuuni aru vishonɛ tɔ̃vɨn au tɛɛ kaka gbete Ɗalapa pɛlɔɔyɛ. 15U dɔ̃ri Ɗalapantɔ aru gbete ãu vi pɛ̃niba a nyayɛ sha viwɔ dɔɔɓa au yuuni ɓayɛ.