1 Timoti 2

Shɔ Sisɨn Ãnɛyi Ɗa Bassinɛ

1Aru nankɔ n masɔɔbii ɔ gaa pɛ: ɔ gakitɔ, ɔ gaki Ɗa aru vigbete ɔ kasiyɛtɔ, ɔ yɛ ɗekɨn a gakinɛni, ɔ dɔ̃ri Ɗalapa tɔ aru shɔzɛ piti kpai; 2aru kpatiyi a shɔ gãsiyini gbeteyi sã ɗɔ pɛ̃nibani, nɔgbete u ɔ̃ ɔ̃nɛ tɔ̃vɨn a ɔ̃nɛbiinyatɔ̃nɛni, ɔ̃nɛ gbete shɔ bassi Ɗalapa yɛ a ɔ̃nɛ tɔ̃vɨn ko-pi nyaba shɔpiya. 3Shɔm pɛ tɔ̃vɨn, Ɗalapa shɔgbete raauyɛ nta yɛti purutɔ awuni, 4shɔgbeteu kasi kopiya u kpaa raanɛtɔyɛ, i kpaa tɔ̃vɨn zɛnɛ. 5Aruviya Ɗalapa gbete sheeli, shɔu shi atette Ɗalapa a shɔzɛni pɛ gbete, shɔm ukɔ Kirisi Yesɔ, 6Shɔgbeteu ãu yuu aru u raa shɔzɛ piti kpai. A ɗaa au tɔ̃yɛ shɔwakɔ ɔ̃rɛ vitasinɛ gbete Ɗalapa kasi nɛ kopiya u kpaa raanɛtɔ, 7A ruumkɔ shɔ shonrɛ nɛn ɔ̃ jashonɛ a shɔgbeteyi ɓa Yahudawa ɓa shɔmala, n nwaruu sisɨn ãnɛ a vitɔ̃vɨng shanɛ . N yee ɓa nyaɓa; n geli shɔ pɛ vitɔ̃vɨng!

8N kasirɛ kopiɗɔpiya shɔ sisɨn ãnɛ ikɛ tolinyanɛ aru bassi Ɗa, n kasirɛ vɔshɔyi gaki Ɗa, vɔshɔ gbeteyi ãyuu tɛttɔ a Ɗalapa bi i ɗeeyi naa a lapa i ɗɔ Ɗa gakinɛ, ikɔyi lɛsi sisɨnɛ ikɔyi nyamasinɛ. 9N kasi sɔ̃n, soroyi i bariki bi gbete ntotɔyɛ i tosi fãrãtɔ tɔ̃vɨn tɛpɛ-tɛpɛ; ikɔyi bariki vinɛ a sɔ̃yuu bang nɛyi baasipɛrɛ, ko fãrã mɛɛ, ko vikɔrɔ, ko fãrã au saa yuu bang, 10Ama i shovishonɛ tɔ̃vɨn, gbete yɛ tasinɛi pɛ so gbeteyi ɓayi yuunɛ i pɛ shɔ Ɗalapa bassinɛ. 11Mɛnɛ soroyi i mati vi kali-kali a yuuãnɛ a vitɔ̃vɨng atette yuuroorinɛ. 12N ji ãyi naa ɓa i mati shɔ virɛ ko i tasiyi kaka a vɔshɔyi yuuni ɓa; ɔ̃riyitɛ kaka jazɨng akɔrɔ i ɔ̃ a nyanishok. 13Aruviya Ɗalapa shɛshi pɛ Adamu ɗekɨn, kɛɗɔn a shɛshi Hawawu kɛkn. 14Wɔsɔ̃n japɛ̃pɛ̃ɛ̃ ji ɗaki ɓa Adamu ɓa; japɛ̃pɛ̃ɛ̃ ɗaki pɛ soro aka Ɗalapa nya-ãsinɛ. 15Ama Ɗalapa yɛ raa soro a nyaba jaayi yeenɛ, naa kɛ yɛ ɗeknnɛ sisɨnmɛɛnɛ a sisɨn ãnɛni, a ɔrinɛ a ɔ̃nɛ wɔsɔ-wɔsɔ, a sisɨn roorinɛni.