1Korantiyi 5

Kpãntang Pɛlinɛ a Wɛrɛ Ɗa

1Nizɛ kɔ shɔ shatɛtɔ dɔdɔrim nɛ kpãntang pɛlinɛ awɔ tetteni waanɛ ko shɔgbete i gɨn Ɗa ɓa ma pɛli ruuvinintɛ jo. Shɔ gelinɛ jawɔ rootɛ a ɓini wɛrɛni! 2Ɔyɛ baasi kɛpi koviya? Ji kɔri ɓa u ɔ̃ nankɔ ɓa tɔ̃ɔtɔ ɔ lesi sisɨntɔ, a jaa gbete au pɛli vimyɛni ɔ shɛshiu kati awɔ tetteni. 3Ko n biba gbete n kpɛlɛ a ɔkɔni, n nyazɔ a ɔkɔni a suru; n si tɔnɛn ɔ̃ a ɗɔu a ɔkɔni, n si yeeri jau ruu tɛttɔ a Yesɔ Kirisi nii ni gboti. 4Nagbete ɔkɛ toli nyanɛ n suru jo a ɔkɔni, ji naa Uɓeyelapa Yesɔ Kirisi kaka a ukɔni. 5Ɔ tuu jau ɔ ãu japẽpẽ a naa aru gbete shɔu lesiu bitɔ, shɔyɛ rau surutɔ a legbete Uɓeyelapa yɛ yee ruu yɛni. 6Ji kɔriɓa ɔ baasirɛ ɓa! Ɔ zɛ nya shɔ shayɛ tɛttɔ nɛ, << Jaa yisiti fẽe ukɔ sɨn borodi punɛrɛ.>> 7Ɔ̃rɔɔtɛ kaka jazɨng akɔrɔ ɔ zɔ̃ jaa yisiti gbete gbaali ruuvini awɔ bitɔ nɗa ɔ ɔ̃kɛ tɛpɛ-tɛpɛ. Kɛɗɔn ɔyɛ ɔ̃kɛ naa borodi sɔɔ gbete au yisiti ɓa ɗɔn ɓayɛ, n zɛtɛttɔ ɔji nankɔ. Aru gbete shɔ ã viyuu ãnɛ jamɛrɛ̃ɛ̃ yuumusinɛ vishaanɛ tɛnɛda tɛttɔ maani, ukɔ ɔ̃rɛ Kirisi. 8U pɛli viyuumusinɛ tɛnɛda, ama ɓa a borodi gbete au yisiti gbaali ruuvini aɗɔn a lanɛni ɓa. Ama a borodi gbete u yisiti ɓa, ukɛ sɔɔ kɛ borodi gbete au wasak a tɔ̃vɨn ni. 9A sẽkɔ gbete n beerɔyɛ n gelɔɔ tɛttɔ n-tɔ ɔkɔ ɓasi yuunɛ a shɔ kpãntangyini. 10Dɔdɔrim n ji shaɓa nɛ shɔgbeteyi gɨn Ɗa ɓa ai pɛli kpãntang ko shɔvi kasinɛ bang yi ko ɓooyi ko shɔgbeteyi gɨn vigbete u suru ɓayɛ. Kɛ ɔ̃nɛ ɗɔkɔ ɔ shɛkati a kotipini dangdang. 11Vigbete n shayɛ n-tɔ ɔkɔ ɓasi yuunɛ a shɔgbete i ɓai yuunɛ shɔ sisɨn ãnɛ ama i pɛ kpãtang ko shɔgbete vi tɛsiyi ɓa yɛ a shɔ gbete i gɨn vigbete au suru ɓa aɗɔn ɓayɛ ko shɔgbete i dãli shɔyɛ ko shɔgbete a saa sɨiiyɛ ko ɓooyi. Ɔkɔ ɔ̃nɛ nɛi shaa vishaanɛ a shɔmiyini. 12A kɨntiuni piti kpai, yuu ji wamɓa a shɔgbete i ɓa au tetteni ɓa n yeeriyi ruu ɓa a yuu ɓa, ama Ɔyɛ yeeri ruujo shɔgbete i awɔ teteyɛ yuu ɓaya? 13Nagbete Ɗanyaruubii shayɛnɛ, <<Ɔ zɔ̃ shɔgbeteyi pɛli vikɔ̃linɛ kati awɔ atete.>>