Kuvi Bible
ନେ ଜା଼ 14
ବୁଦିଗାଟି ଆୟାଟି ତାନି ଇଲୁ ତିୟାରା କିନେ; ସାମା ବୁଦି ହିଲାଆଗାଟାୟି ଏ଼ଦାଆଁ ତାନି କେୟୁ ତଲେ ନସ୍ତ କିନେ।
ଆମ୍ବାଆସି ତାନି ସ଼ଜେତି ମାଣ୍କି ତଲେ ତା଼କିନେସି, ଏ଼ୱାସି ପ୍ରବୁଇଁ ଆଜିନେସି; ସାମା ଏଟ୍କା ଜିରୁ ହାନାସି ଏ଼ୱାଣାଇଁ ହୀଣି କିନେସି।
ବୁଦି ହିଲାଆଗାଟାଣି ଗୂତିତା ଡା଼ହାରାତି ଟେଙ୍ଗା ଡ଼ୟିନେ; ସାମା ବୁଦିଗାଟାଣି ଗୂତି ଏ଼ୱାରାଇଁ ଗେଲ୍ପିନେ।
କ଼ଡିୟାଁ ହିଲାଆସାରେ ଦ଼ନି ୱାରାଆୟି ଡ଼ୟିନେ; ଇଞ୍ଜାଁ କ଼ଡିୟାଁ ବା଼ଡ଼୍ୟୁଟି ହା଼ରେକା ବାତ୍କୁ ଆ଼ନେ।
ନାମାକମୁ ଗାଟାସି ମିଚି ସା଼କି ୱେହ୍ଅସି; ସାମା ମିଚି ସା଼କିଗାଟାସି ମିଚି ୱେହ୍ନେସି।
ନିନ୍ଦାଗାଟାସି ବୁଦି ପାରିତିହିଁ ବେଟାଆ଼ଅସି; ସାମା ତେଲ୍ହିନାଣାକି ବୁଦି ମେ଼ଡ଼ାଆ଼ନେ।
ବୁଦି ହିଲାଆଗାଟାଣି ତା଼ଣା ହାଚିସାରେ ମୀରୁ ତାନି ବୁଦିଗାଟି ଗୂତି ମେହ୍ଅତେରି।
ସୁତରି ଲ଼କୁ ବୁଦି ତଲେ ଜାହାରା ଜିରୁ ଅଣ୍ପିନେସି; ସାମା ନା଼ଡ଼ିକିନାୟି ବୁଦି ହିଲାଆଗାଟାରି ତେଲ୍ହାଲି ଆ଼ଡାଆଗାଟାୟି।
ବୁଦି ହିଲାଆଗାଟାରି ଦ଼ହତି କିଜୱି ଇଞ୍ଜିଁ ଅଣ୍ପିନେରି; ସାମା ସ଼ଜେତି ଲ଼କୁ ବିତ୍ରା କାର୍ମା ଡ଼ୟିନେ।
ହିୟାଁ ଜାହାରା ଦୁକୁତି ପୁନେ; ଇଞ୍ଜାଁ ପୁନାଆତି ଲ଼କୁ ତାନି ରା଼ହାଁତା ଆଣ୍ତାଲି ଆ଼ଡଅସି।
ଲାଗେଏ ଲ଼କୁତି ଇଲୁ ନା଼ସା ଆ଼ନେ; ସାମା ସ଼ଜେ ଲ଼କୁତି ତୂମୁ ନା଼ସା ଆ଼ଏ।
ମାଣ୍ସି ନ଼କିତା ଏମି ଏମିନି ଜିରୁ ନେହିଁ ତ଼ଞ୍ଜାଆ଼ନେ; ସାମା ତାନି ଡା଼ୟୁ ହା଼କିତି ଜିରୁ ଡ଼ୟିନେ।
କାକ୍ନି ବେ଼ଲାତା ଜିକେଏ ମ଼ନ ଦୁକୁ ଆ଼ନେ; ଅ଼ଡ଼େ ରା଼ହାଁତି ଡା଼ୟୁ ଦୁକୁଟି ଡ଼ୀନାୟି ୱା଼ନେ।
ହିୟାଁ ତଲେ ଏଟ୍କା ଜିରୁ ହାନାସି ତାମି ମାଣ୍କିତି ପା଼ଡ଼େୟି ବେଟାଆ଼ନେସି; ଇଞ୍ଜାଁ ନେହିଁ ଲ଼କୁ ତାନି ତା଼ଣାଟିଏ ରା଼ହାଁ ଆ଼ନେସି।
ବୁଦି ହିଲାଆଗାଟାସି ବାରେ କାତା ନାମିନେସି; ସାମା ସୁତରି ଲ଼କୁ ପୁଞ୍ଜା ହେ଼ଣ୍ତାହାଁ ତା଼କିନେସି।
ବୁଦିଗାଟାସି ଜାଗ୍ରାତା ଡ଼ୟିନେସି ଅ଼ଡ଼େ ଲାଗେଏତାଣି ପିହ୍ନେସି; ସାମା ବୁଦି ହିଲାଆଗାଟାସି ଏଟ୍କା ଆ଼ହାଁ ୱେହ୍ନି କାତା ଆହ୍ଅସି।
ଆମ୍ବାଆସି ଦେବୁଣିଏ କାର୍ବି ଆ଼ନେସି, ଏ଼ୱାସି ବୁଦି ହିଲାଆ କାମା କିନେସି; ଇଞ୍ଜାଁ ଲାଗେଏ ଅଣ୍ପୁ ଅଣ୍ପିନି ବୁଦି ହିଲାଆଗାଟାସି ମାଣ୍ସିତି ଅ଼ପାଆଗାଟାସି ଆ଼ନେସି।
ଜାଗ୍ରାତା ଆ଼ଆ ଲ଼କୁ ବୁଦି ହିଲାଆ ସମାନା ଅଦିକାରା ବେଟାଆ଼ନେରି; ସାମା ସୁତରି ଲ଼କୁ ବୁଦିଗାଟି ଟ଼ପେରି ତୁର୍ୱି ଆ଼ନେରି।
ଲାଗେଏତି ଲ଼କୁ ନେହିଁ ଲ଼କୁ ନ଼କିତା ଅ଼ଡ଼େ ଲାଗେଏତି ଲ଼କୁ ଦାର୍ମୁଗାଟାରି ଦୁୱେରିତା ମେଣ୍ତା କୁତିନେରି।
କା଼କୁଲିଗାଟାସି ତାମି ପା଼ଡ଼ିତି ଲ଼କୁ ତା଼ଣା ଜିକେଏ ଅ଼ପାଆଗାଟାସି ଆ଼ନେସି; ସାମା ବାତ୍କୁଗାଟାଣି ହା଼ରେକା ତ଼ଣେସିଙ୍ଗା ଡ଼ୟିନେରି।
ଆମିନି ଲ଼କୁ ପା଼ଡ଼ିତି ଲ଼କୁଇଁ ହୀଣି କିନେସି, ଏ଼ୱାସି ପା଼ପୁ କିନେସି; ସାମା ଆମ୍ବାଆସି କା଼କୁଲି ଗାଟାଣାଇଁ କାର୍ମା ମେହ୍ନେସି ଏ଼ୱାସି ନେହାସି।
ରଅଣି ଲାଗେଏ ଅଣ୍ପୁ ଅଣ୍ପିନି ଲ଼କୁ ଏ଼ନାଆଁ ନା଼ଡ଼ିକିୱି ଆ଼ଅସି ? ସାମା ନେହିଁ ଅଣ୍ପୁ ଅଣ୍ପିନାଣାକି କାର୍ମା ଅ଼ଡ଼େ ସାତା ଏ଼ୱାଣାକି ଆ଼ନେ।
ବାରେ କାମାତି ପା଼ଡ଼େୟି ମାନେ; ଇଞ୍ଜାଁ ୱାର୍ଇ ଗୂତିତି ବ଼ଲୁ ତଲେ କା଼କୁଲି ଆ଼ନେ।
ବୁଦିଗାଟାରି ଟ଼ପେରି ଏ଼ୱାରି ବାତ୍କୁ; ଇଞ୍ଜାଁ ବୁଦି ହିଲାଆଗାଟାରି ତା଼ଣାଟି ୱାର୍ଇ ବୁଦି ହିଲାଆଗାଟାୟି ହ଼ନେ।
ସାତା ସା଼କି ଏଟ୍କା ଲ଼କୁତି ଜୀୱୁ ଗେଲ୍ପିନେ; ସାମା ଆମ୍ବାଆସି ମିଚି ୱେହ୍ନେସି ଏ଼ୱାସି ନା଼ଡ଼ି କିନାସି।
ପ୍ରବୁତି ଆଜିନାୟି ଆ଼ଟ୍ୱା ବା଼ର୍ସୁ ଗାଟାୟି; ଅ଼ଡ଼େ ତାନି ମୀର୍କା ବାସା ଟା଼ୟୁ ବେଟାଆ଼ନେରି।
ହା଼କିତି ପା଼ନ୍ଦାଟି ୱେଟ୍ହାଲି ତାକି ପ୍ରବୁ କାତାତି ଆଜି ଜୀୱୁତି ଜାର୍ଣା ସମାନା।
ହା଼ରେକା ଲ଼କୁ ପାଡା ଆ଼ତିସାରେ ରାଜାତି ଗା଼ୱୁରମି ଆ଼ନେ; ସାମା ଆମ୍ବିୟା ଲ଼କୁ ହିଲଅରି, ଏମ୍ବାଆଁ ସା଼ଲୱି କିନାସି ନା଼ସା ଆ଼ନେସି।
ଆମ୍ବାଆସି ତବେ କାର୍ବି ଆ଼ଅସି, ଏ଼ୱାସି ହା଼ରେକା ବୁଦିଗାଟାସି; ସାମା ଦେବୁଣିଏ କାର୍ବି ଆ଼ନାସି ବୁଦି ହିଲାଆଗାଟାସି।
ସୂସ୍ତି ହିୟାଁ ଆଙ୍ଗାତି ଜୀୱୁ ସମାନା; ଇଞ୍ଜାଁ ଡା଼ହାରା ଡୁମୁତି ନା଼ସା କିନି ସମାନା।
ଆମିନି ମାଣ୍ସି କା଼କୁଲି ଗାଟାଣାଇଁ ଲାଗେଏ କିହିଁ ଲେ଼ମ୍ବିନେସି, ଏ଼ୱାସି ତାନି ରାଚିକିତାଣାଇଁ ନିନ୍ଦା କିନେସି; ଇଞ୍ଜାଁ ଆମ୍ବାଆସି କା଼କୁଲି ଗାଟାଣାଇଁ କାର୍ମା ମେହ୍ନେସି ଏ଼ୱାସି ଏ଼ୱାଣାଇଁ ମା଼ନି କିନେସି।
ଲାଗେଏତି ଲ଼କୁ ତାନି ଲାଗେଏ କାମା ତଲେ ନା଼ସା ଆ଼ନେସି, ସାମା ହା଼ନି ବେ଼ଲାତା ଦାର୍ମୁଗାଟାଣି ଟା଼ୟୁ ମେଡ଼ାଆ଼ନେ।
ତେଲ୍ହାଲି ଆ଼ଡିନାଣା ମ଼ନତା ବୁଦି ଡ଼ୟିନେ; ଇଞ୍ଜାଁ ବୁଦି ହିଲାଆଗାଟାଣି ହିୟାଁତି ଅଣ୍ପୁ ପୁଣ୍ମ୍ବିଆ଼ନେ।
ଦାର୍ମୁଗାଟାସି ଦେ଼ସାତି ପାଡି କିନେସି; ସାମା ପା଼ପୁ ମାଣ୍ସି ଲ଼କୁତି ହୀଣିଗାଟାୟି।
ଆମିନି ହ଼ଲେଏସି ବୁଦି ତଲେ କାମା କିନେସି ରାଜା ଏ଼ୱାଣାଇଁ ରା଼ହାଁ ଆ଼ନେସି; ଇଞ୍ଜାଁ ଆମ୍ବାଆସି ଲାଜାତି କାମା କିନେସି ଏ଼ୱାଣାଇଁ ଏ଼ୱାସି କାର୍ବି ଆ଼ନେସି।
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.