Kuvi Bible
ନେ ଜା଼ 13
ବୁଦିଗାଟି ମୀର୍ଏସି
ବୁଦିଗାଟି ମୀର୍ଏସି ତାମି ତାଞ୍ଜିତି କାତା ୱେନେସି; ସାମା ନିନ୍ଦାକିନାସି ଲା଼ଗିନାଣି ୱେନଅସି।
ମାଣ୍ସି ତାନି ଗୂତିତି ହା଼ଡା ତଲେ ନେହିଁ ଦିଣ୍ସୁ ବେଟାଆ଼ନେସି; ସାମା ନାମୁକମୁ ହିଲାଆଗାଟାଣି ଜୀୱୁ କସ୍ତ ବେଟାଆ଼ନେ।
ଆମିନି ମାଣ୍ସି ତାନି ଗୂତି ଲକ୍ହା ଇଟିନେସି, ଏ଼ୱାସି ତାନି ଜୀୱୁତି ଗେଲ୍ପିନେସି; ସାମା ଆମ୍ବାଆସି ଅଣ୍ପାଆନା କାତା ଜ଼ଲିନେସି, ଏ଼ୱାସି ନା଼ସା ଆ଼ନେସି।
ନିସ୍ତାଗାଟାସି ମ଼ନତା ଏ଼ନାଆଁ ମ଼ନ କିନେସି, ଆ଼ତି ଜିକେଏ ଏ଼ନାଆଁ ବେଟାଆ଼ଅସି, ସାମା କାମାଗାଟାସି ଏ଼ନାଆଁ ମ଼ନ କିନେସି ଏ଼ଦାଆଁ ବେଟାଆ଼ନେସି।
ଦାର୍ମୁଗାଟାସି ମିଚିତି ଅ଼ପଅସି; ସାମା ଲାଗେଏତି ଲ଼କୁ ଗାନ୍ଦା ସମାନା, ଅ଼ଡ଼େ ଏ଼ୱାସି ଲାଜା ବେଟାଆ଼ନେସି।
ଦାର୍ମୁ, ସ଼ଜେ ଜିରୁତା ତା଼କିନି ଲ଼କୁଇଁ ଗେଲ୍ପିନେ; ସାମା ଲାଗେଏତାୟି ପା଼ପୁ ଗାଟାଣାଇଁ ତିରିମ୍ଣିପ୍ନେ।
ଆମ୍ବାଆସି ଜାହାରାଇଁ ବାତ୍କୁଗାଟାସି ଇଞ୍ଜିଁ ତ଼ହ୍ନେସି, ସାମା ଏ଼ୱାଣିୱାୟି ଏ଼ନାୟି ହିଲେଏ; ଆମ୍ବାଆସି ଜାହାରାଇଁ କା଼କୁଲିଗାଟାସି ତ଼ହ୍ନେସି, ସାମା ଏ଼ୱାଣିୱାୟି ହା଼ରେକା ବାତ୍କୁ ମାନେ।
ମାଣ୍ସି ତାନି ଜୀୱୁତି ଗେଲ୍ପାଲି ତାକି ବାତ୍କୁ ହୀହାଲି ଆ଼ଡିନେସି; ସାମା କା଼କୁଲିଗାଟାସି ଦାକା ହୀନାଣି ୱେନଅସି।
ଦାର୍ମୁଗାଟାଣି ଉଜେଡ଼ି ରା଼ହାଁ କିନେ; ସାମା ଲାଗେଏ ଲ଼କୁତି ଦୀୱଁ ଡୁମ୍ବାହାନେ।
ଆଙ୍କାରା ତଲେ ୱାର୍ଇ ଗଡ଼୍ହା ନିଙ୍ଗିନେ; ସାମା ଆମ୍ବାଆସି ୱେହ୍ନି କାତା ୱେନେସି ଏ଼ୱାଣି ତା଼ଣା ବୁଦି ମାନେ।
ମିଚି ତଲେ ବେଟାଆ଼ହାମାନି ଦ଼ନ ନସ୍ତ ଆ଼ନେ, ସାମା କସ୍ତ ତଲେ ବେଟାଆ଼ହାମାନି ଦ଼ନ ପାଡାଆ଼ନେ।
ଆ଼ସା ପୂରା ଆ଼ହାଲି ୱେ଼ଡ଼ା ଆ଼ତିହିଁ ମ଼ନ ନୀରାସା ଆ଼ନେ; ସାମା ମ଼ନତି ଅଣ୍ପୁ ପୂରା ଆତିହିଁ ଜୀୱୁତି ମା଼ର୍ନୁ ସମାନା।
ଆମିନି ଲ଼କୁ ମାହାପୂରୁତି ୱେହ୍ନି କାତା ହୀଣି କିନେସି, ଏ଼ୱାସି ନା଼ସା ଆ଼ନେସି; ସାମା ଆମ୍ବାଆସି ହୁକୁମି ଆଜିନେସି, ଏ଼ୱାସି ଦା଼ନା ବେଟାଆ଼ନେସି।
ହା଼କିତି ପା଼ନ୍ଦାଟି ୱେଟ୍ହାଲି ତାକି ବୁଦିଗାଟାଣି ମେ଼ରା ଜୀୱୁତି ଜାର୍ଣା ସମାନା।
ନେହିଁ ବୁଦିତି ପା଼ଡ଼େୟି କାର୍ମା ମେହ୍ନାୟି, ସାମା ନାମାକମୁ ହିଲାଆ ଗାଟାଣି ଜିରୁ କସ୍ତଗାଟାୟି।
ବାରେ ସୁତରି ଲ଼କୁ ବୁଦି ତଲେ କାମା କିନେସି; ସାମା ମୁର୍କୁଗାଟାସି ବୁଦି ହିଲାଆଗାଟାଣି ୱେ଼କ୍ନେସି।
ଲାଗେଏତି କାବ୍ରୁ ୱେସ୍କା ହାନାସି ବା଼ଦା ବେଟାଆ଼ନେସି; ସାମା ନାମାକମୁତି କାବ୍ରୁ ୱେସ୍କା ହାନାସି ନେହେଁ ଆ଼ନେସି।
ଆମିନି ମାଣ୍ସି ଜା଼ପ୍ନାଣି ଆବଅସି, ଏ଼ୱାସି କା଼କୁଲି ଅ଼ଡ଼େ ଲାଜା ବେଟାଆ଼ନେସି; ସାମା ଆମ୍ବାଆସି ଲା଼ଗିନି କାତା ୱେନେସି ଏ଼ୱାସି ମା଼ନି ବେଟାଆ଼ନେସି।
ଅଣ୍ପୁ ପୂରା ଆ଼ନାୟି ଜୀୱୁତାକି ଡ଼ାକ୍ନେ; ଇଞ୍ଜାଁ ମୁର୍କୁ ଲ଼କୁ ଲାଗେଏତାଣି ପିସାଲି ଅ଼ପଅସି।
ବୁଦିଗାଟାରି ତଲେ ତା଼କାଦୁ, ଆତିହିଁ ମୀରୁ ବୁଦିଗାଟାତେରି ଆ଼ଦେରି; ସାମା ମୁର୍କୁ ଲ଼କୁ ତଲେ ଜାଟୁ ଆ଼ତିସାରେ ସା଼ସ୍ତି ବେଟାଆ଼ଦେରି।
ପା଼ପୁଗାଟାରି ଜେ଼ଚ ଲାଗେଏତାୟି ଡ଼ୟିନେ; ସାମା ଦାର୍ମୁଗାଟାରାକି ନେହିଁ ଦା଼ନା ମେଡ଼ାଆ଼ନେ।
ନେହିଁ ମାଣ୍ସି ତାନି ତାଙ୍ଗା ମୀର୍କାକି ତାନି ଅଦିକାରା ପିସାହାନେସି; ସାମା ପା଼ପୁଗାଟାରି ଦ଼ନ ଦାର୍ମୁଗାଟି ଲ଼କୁତାକି କୂଡ଼ିକିୱି ଆ଼ନେ।
କା଼କୁଲିଗାଟାଣି ତା଼ସା ତଲେ ହା଼ରେକା କା଼ଦି ଆ଼ନେ; ସାମା ଲାଗେଏ କାମା ତାକି ଆମ୍ବା ଆମ୍ବାଆରାୱାୟି ନା଼ସା ଆ଼ନେ।
ଆମ୍ବାଆସି ବାଡ଼୍ଗା ଲେ଼ମ୍ବାଲି କୂନେସି, ଏ଼ୱାସି ତାନି ମୀର୍ଏଣାଇଁ ଅ଼ପିହିଲଅସି; ଇଞ୍ଜାଁ ଆମ୍ବାଆସି ଏ଼ୱାଣାଇଁ ଜୀୱୁ ନ଼ନେସି, ଏ଼ୱାସି ସମାନା ବେ଼ଲାତା ସା଼ସ୍ତି ହୀନେସି।
ଦାର୍ମୁଗାଟାସି ତାନି ଜୀୱୁତି ଊସ୍କି ତୀରେ ତିନେସି, ସାମା ପା଼ପୁଗାଟାଣି ବାଣ୍ତି ଊସ୍କି ତୀରେଏ।
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.