Kuvi Bible
ନେ ଜା଼ 12
ଏମିନି ଲ଼କୁ ସା଼ଲୱି କିନାଣି ଜୀୱୁ ନ଼ନେସି, ଏ଼ୱାସି ବୁଦି ଜୀୱୁ ନ଼ନେସି; ସାମା ଆମ୍ବାଆସି ଲା଼ଗିନାଣି ଅ଼ପଅସି, ଏ଼ୱାସି ର଼ ଜ଼ନ୍ତ ସମାନା।
ନେହେଁ ଲ଼କୁ ପ୍ରବୁ ତା଼ଣାଟି କାର୍ମା ବେଟାଆ଼ନେସି, ସାମା ଲାଗେଏ ଅଣ୍ପୁ ଅଣ୍ପିନାରାଇଁ ଏ଼ୱାସି ଦ଼ହ କିନେସି।
ଲାଗେଏ ତଲେ ଏ଼ନି ମାଣ୍ସି ସୂସ୍ତି ଆ଼ଅସି, ସାମା ଦାର୍ମୁ ଲ଼କୁତି ଡାକି ଏଚେଲା ଗୁଚିକିୱି ଆ଼ଏ।
ଗୂଣୁଗାଟି ଆୟାଟି ତାନି ଡକ୍ରାତି ଟ଼ପେରି ସମାନା; ସାମା ଲାଜା ହୀନି ଆୟାଟି ତାନି ବାରେ ପେ଼ଣ୍କା-ଡୁମ୍କା ରୂୟିନି ସମାନା।
ଦାର୍ମୁ ଗାଟାରି ଅଣ୍ପୁ ପା଼ଡ଼ା ଆ଼ତାୟି; ସାମା ଲାଗେଏ ଲ଼କୁ ଜା଼ପ୍ନାୟି ନା଼ଡ଼ି କିନାୟି।
ଲାଗେଏତାରି ପା଼ୟାଲି ତାକି କା଼ପୁ କା଼ନି କାତା ଜ଼ଲିନେରି, ସାମା ସଲ୍କେ ଲ଼କୁତି ଗୂତି ଏ଼ୱାରାଇଁ ଗେଲ୍ପିନେ।
ଲାଗେଏତି ଲ଼କୁ ନା଼ସା ଆ଼ହାଁ ଡ଼ୟଅରି, ସାମା ଦାର୍ମୁଗାଟାରି ଇଲୁ କା଼ଲେଏ ଡ଼ୟିନେ।
ମାଣ୍ସି ତାନି ନେହେଁ ବୁଦି ତଲେ ଗା଼ୱୁରମି ବେଟା ଆ଼ନେସି, ସାମା ଆମ୍ବାଆସି କୁଟୁ ହିୟାଁଗାଟାସି, ହୀଣି କିୱି ଆ଼ନେସି।
ଏମିନି ଲ଼କୁ ତା଼ଣା କା଼ଦି ହିଲେଏ ଅ଼ଡ଼େ ଜାହାରାଇଁ ଗା଼ୱୁରମି କିନେସି ଏ଼ ଲ଼କୁ କିହାଁ ଏମିନି ଲ଼କୁ ହୀଣି ଆ଼ନେସି ଅ଼ଡ଼େ ଏ଼ୱାଣି ତା଼ଣା ହ଼ଲିୟା ହ଼ଲେଣିସିକା ମାନୁ ଏ଼ ମାଣ୍ସି କାଜାସି।
ଦାର୍ମୁ ମାଣ୍ସି ତାନି ଜ଼ନ୍ତ ଜୀୱୁତି ଜୀୱୁ ନ଼ନେସି, ସାମା ଲାଗେଏ ଲ଼କୁ କାର୍ମା ମେହ୍ଅସି।
ଆମ୍ବାଆସି ଜାହାରା ବୂମି ଡ଼ୂନେସି, ଏ଼ୱାସି ହା଼ରେପୂରେ କା଼ଦି ବେଟାଆ଼ନେସି; ସାମା ଆମ୍ବାଆସି ଉଜେଏତି କାମାତା ଡ଼ୟିନେସି, ଏ଼ୱାସି ବୁଦି ହିଲାଆଗାଟାସି।
ଲାଗେଏ ଲ଼କୁ ଲାଗେଏ କାମା କିନାରା ଜା଼ଲାତି ଜୂପ୍କା ଆ଼ନେସି; ସାମା ଦାର୍ମୁ ଲ଼କୁତି ଡାକି ପା଼ଡ଼େୟି ଆ଼ୟିନାୟି।
ଲାଗେଏତାସି ତାନି ଗୂତିତି ଲାଗେଏ କାତା ତାକି ପା଼ନ୍ଦାତା ହେର୍ନେସି, ସାମା ଦାର୍ମୁଗାଟାସି ଦୁକୁଟି ଗେଲ୍ପି ଆ଼ନେସି।
ମାଣ୍ସି ତାନି ଗୂତି ବ଼ଲୁତି ପା଼ଡ଼େୟି ତଲେ ନେହିଁ ତଲେ ପାଞ୍ଜିନେସି, ଇଞ୍ଜାଁ ମାଣ୍ସି କେୟୁଟି କିତି କାମାତି ପା଼ଡ଼େୟି ଏ଼ୱାଣାକି ହୀପ୍କିଆ଼ନେ।
ବୁଦି ହିଲାଆ ଲ଼କୁତି ଜିରୁ ତାନି ନ଼କିତା ପା଼ଡ଼ାଆ଼ତାୟି ସାମା ଆମ୍ବାଆସି ବୁଦିଗାଟାସି, ଏ଼ୱାସି ଜା଼ପ୍ନାଣି ୱେନେସି।
ବୁଦି ହିଲାଆଗାଟାଣି କାର୍ବି ଦେବୁଣିଏ ତ଼ଞ୍ଜାଆ଼ନେ; ସାମା ସୁତରି ଲ଼କୁ ଲାଜାତି ପ୍ଡିକ୍ନେସି।
ସାତା ସା଼କି ଦାର୍ମୁ ୱେ଼କ୍ନେସି; ସାମା ମିଚି ସା଼କି ନା଼ଡ଼ି କିନାଣି ୱେ଼କ୍ନେସି।
ଇଲେତି ଲ଼କୁ ମାନେରି, ଆମିନାଣି ଡା଼ୟୁ ନ଼କିତା ଅଣ୍ପାଆନା ଜ଼ଲିନାୟି ସୂରି ତଲେ ଉହ୍ନି ସମାନା ଆ଼ନେ; ସାମା ବୁଦି ଗାଟାସି ଜ଼ଲିତିହିଁ ଲ଼କୁ ନେହିଁ ଆ଼ନେରି।
ସାତା ଜ଼ଲିନି ଗୂତି କା଼ଲେଏ ତୀରି ଡ଼ୟିନେ; ସାମା ମିଚି ଜ଼ଲିନି ୱେନ୍ଦରି ଗା଼ଡ଼େକାତାୟି।
ଲାଗେଏ ଅଣ୍ପୁ ଅଣ୍ପିନାଣା ହିୟାଁତା ନା଼ଡ଼ି କିନାୟି ଡ଼ୟିନେ, ସାମା ହିତ୍ଡ଼ି କାତା ୱେହ୍ନାସି ରା଼ହାଁ ଆ଼ନେସି।
ଦାର୍ମୁ ଲ଼କୁ ତାକି ଏ଼ନି ବା଼ଦା ୱା଼ଏ; ସାମା ଲାଗେଏ ଲ଼କୁ କସ୍ତ ତଲେ ଡ଼ୟିନେସି।
ମିଚି କାତା ଜ଼ଲିନି ଗୂତି ପ୍ରବୁତି ଅ଼ପାଆଗାଟାୟି; ସାମା ଏମିନିଗାଟାରି ସାତା ଲେ଼ମ୍ବିନେରି, ଏ଼ୱାରି ତାନି ରା଼ହାଁଗାଟାରି।
ସୁତରି ଲ଼କୁ ବୁଦିତି ପାଙ୍ଗାତା ୱେ଼କ୍ଅସି; ସାମା ଲାଗେଏ ଲ଼କୁତି ମ଼ନ ବୁଦି ହିଲାଆ ଗାଟାଣି ୱେ଼କ୍ନେସି।
କାମା କିନାଣି କେୟୁ ସା଼ଲୱି କିନେ; ସାମା ନିସ୍ତା ଲ଼କୁ ୱେଟି କାମା କିନେସି।
ମାଣ୍ସିତି ହା଼ରେକା ଅଣ୍ପୁ ମ଼ନତି ହୀଣି କିନେ; ସାମା ନେହେଁ ବ଼ଲୁ ଏ଼ୱାଣି ରା଼ହାଁ କିନେ।
ଦାର୍ମୁ ଲ଼କୁ ତାନି ପା଼ଡ଼ିତି ଲ଼କୁଇଁ ତାନି ଜିରୁ ତ଼ହ୍ନାସି; ସାମା ଲାଗେଏ ଲ଼କୁତି ଜିରୁ ଏ଼ୱାରାଇଁ ବା଼ଣିକିନେ।
ନିସ୍ତାଗାଟାସି ବେ଼ଟାତା ଆସାମାନି ଜ଼ନ୍ତତି ୱାଜଅସି, ସାମା କସ୍ତ କିନି ମାଣ୍ସି ହା଼ରେକା ବାତ୍କୁତି ଅଦିକାରା ଆ଼ନେସି।
ଦାର୍ମୁତି ଜିରୁତା ଜୀୱୁ ଡ଼ୟିନେ; ଇଞ୍ଜାଁ, ଏମ୍ବାତି ତା଼କିନି ଜିରୁତା ହା଼କି ଡ଼ୟେଏ।
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.