Kuvi Bible
ନେ ଜା଼ 15
ସୁୱାଲା ହା଼ଡା କାର୍ବିତି ସାପି କିନେ; ସାମା କାର୍ବି ହା଼ଡା ରିସା କିୱିକିନେ।
ବୁଦିଗାଟାରି ୱେନ୍ଦରି ସାତେଏ ବୁଦିତି କାତା ୱେ଼କ୍ନେ; ସାମା ବୁଦି ହିଲାଆଗାଟାରି ଗୂତି ବୁଦି ହିଲାଆ କାତା ୱେ଼କ୍ନେ।
ପ୍ରବୁତି କାନୁ ବାରେୱାକି ସିନିକିନେ ଅ଼ଡ଼େ ନେହିଁ ଅ଼ଡ଼େ ଲାଗେଏ ଲ଼କୁଣି ସିନିକିହେ ମାନେ।
ହିତ୍ଡ଼ି ୱେନ୍ଦରି ଜୀୱୁତି ମା଼ର୍ନୁ ସମାନା; ସାମା କୁଟୁଗାଟି ୱେନ୍ଦରି ଜୀୱୁତା ଦୁକୁ ହୀନେ।
ବୁଦି ହିଲାଆଗାଟାସି ତାମି ଆ଼ବା ୱେହ୍ନି କାତା ହେଲା କିନେସି; ଇଞ୍ଜାଁ ଆମ୍ବାଆସି ଲା଼ଗିହିଁ ଜା଼ପ୍ନାଣି ୱେନେସି, ଏ଼ୱାସି ବୁଦି ବେଟାଆ଼ନେସି।
ଦାର୍ମୁଗାଟାଣି ଇଜ ହା଼ରେକା ଦ଼ନ ଡ଼ୟିନେ; ସାମା ଲାଗେଏ ଲ଼କୁତି ଲା଼ବାତା ଦୁକୁ ଡ଼ୟିନେ।
ବୁଦିଗାଟାଣି ଗୂତି ବୁଦିତି କାତା ୱେ଼କ୍ନେ; ସାମା ବୁଦି ହିଲାଆଗାଟାଣି ମ଼ନ ଏଲେକିଏ।
ଲାଗେଏ ଲ଼କୁତି ପୂଜା ପ୍ରବୁତି ନ଼କିତା ଅ଼ପାଆଗାଟାୟି ଆ଼ନେ; ସାମା ସ଼ଜେ ଲ଼କୁତି ପ୍ରା଼ତାନା ରା଼ହାଁ ଆ଼ନେସି।
ଲାଗେଏ ଲ଼କୁତି ମାଣ୍କି ପ୍ରବୁତି ନ଼କିତା ଆବାଆଗାଟାୟି ଆ଼ନେ; ସାମା ଦାର୍ମୁ ତଲେ ତା଼କିନି ଲ଼କୁଇଁ ଏ଼ୱାସି ଜୀୱୁ ନ଼ନେସି।
ଏଟ୍କା ଜିରୁ ହାନାଣାକି ଦୁକୁଗାଟି ସା଼ସ୍ତି ଗଟୱି ଆ଼ନେ; ଇଞ୍ଜାଁ ଆମିନିଗାଟି ଲ଼କୁ ଦାକା ହୀନାଣି ଅ଼ପଅସି, ଏ଼ୱାସି ହା଼ନେସି।
ତା଼ଡ଼େପୂରୁ ଅ଼ଡ଼େ ନା଼ସା ଆ଼ନାୟି ପ୍ରବୁତି ନ଼କିତା ଦେପି ଆ଼ହାଁ ଡ଼ୟିନେ; ଆତିହିଁ ମାଣ୍ସି ମୀର୍କାତି ହିୟାଁ କି ଏ଼ଦାଣି କିହାଁ ଗାଡି ଆ଼ଏ ?
ନିନ୍ଦାକିନାସି ଲା଼ଗିନାଣି ୱେଞ୍ଜାଲି ରା଼ହାଁ ଆ଼ଅସି, ଏ଼ୱାସି ବୁଦିଗାଟାଣି ଟଟତା ହାଲଅସି।
ରା଼ହାଁଗାଟି ମ଼ନ ମୂମ୍ବୁତି ପାର୍ସାଡ଼ା କିନେ; ଇଞ୍ଜାଁ ମ଼ନତି ଦୁକୁ ତଲେ ଜୀୱୁ କା଼ଡିନେ।
ବୁଦିଗାଟାଣି ମ଼ନ ବୁଦି ପାରିନେ; ସାମା ବୁଦି ହିଲାଆଗାଟାସି ବୁଦି ହିଲାଆଗାଟାଣି ତିନେସି।
ଦୁକୁଗାଟାସି ବାରେ ଦିନା ଦୁକୁ ତଲେ ଡ଼ୟିନେସି; ସାମା ଆମ୍ବାଆରି ମ଼ନ ରା଼ହାଁ ଏ଼ୱାସି କା଼ଲେଏ ବ଼ଜି କିନେସି।
ଗଡ଼୍ହା ତଲେ ହା଼ରେକା ବାତ୍କୁ କିହାଁ ମାହାପୂରୁଇଁ ଆଜାହାଁ ଇଚାଣି ବେଟାଆ଼ନାୟି ନେହେଁ।
ଡା଼ହାରାଗାଟି ଇଜ ଆଙ୍ଗାଆ଼ତି କ଼ଡି ଊଙ୍ଗା ତିନି କିହାଁ ଜୀୱୁ ନ଼ନାୟି ମାନି ତା଼ଣା କୁଚା ତିନାୟି ନେହେଁ।
କାର୍ବିଗାଟାସି ଗଡ଼୍ହା ନିକ୍ନେସି; ସାମା ଆମ୍ବାଆସି କ଼ପା ଆ଼ଅସି ଏ଼ୱାସି ଗଡ଼୍ହାତି ଡୂକ୍ନେସି।
ନିସ୍ତାଗାଟାଣି ଜିରୁ ହା଼ପ୍କାଗାଟି ବେୟିଁ ସମାନା, ସାମା ସ଼ଜେ ଲ଼କୁତି ଜିରୁ କାଜା ପା଼ହେରି ସମାନା କିୱିଆ଼ନେ।
ବୁଦିଗାଟି ମୀର୍ଏସି ତାଞ୍ଜିଇଁ ରା଼ହାଁ କିନେସି; ସାମା ବୁଦି ହିଲାଆଗାଟି ମୀର୍ଏସି ତାମି ତାଲିନି ହୀଣି କିନେସି।
ବୁଦି ହିଲାଆଗାଟାଣାକି ବୁଦି ହିଲାଆ ତା଼ଣା ରା଼ହାଁ ହ଼ନେ; ସାମା ବୁଦିଗାଟି ଲ଼କୁ ତାନି ଜିରୁ ସଲ୍କେ କିନେସି।
ନେହେଁ କାତା ୱେହ୍ନାରି ହିଲାଆସାରେ ଅଣ୍ପୁ ବାରେ ଉଜେଏ ଆ଼ନେ; ସାମା ବୁଦି ୱେହ୍ନାରି ତା଼ଣାଟି ଏ଼ଦି ତୀରି ଆ଼ନେ।
ଜାହାରା ଗୂତିତି ହା଼ଡା ତଲେ ମାଣ୍ସି ରା଼ହାଁ ଆ଼ନେସି, ଇଞ୍ଜାଁ ସମାନା ବେ଼ଲାତା ୱେହ୍ନି କାତା ଏଚେକା ନେହାୟି।
ଡ଼଼ଇତି ତା଼ଡ଼େପୂରୁ ପିସାଲି ତାକି ବୁଦିଗାଟି ଲ଼କୁ ତାକି ଜୀୱୁତି ଜିରୁ ଲାକୱାକି ହାନେ।
ଡା଼ହାରାଗାଟି ଲ଼କୁତି ଇଲୁ ପ୍ରବୁ ନା଼ସା କିନେସି; ସାମା ରା଼ଣ୍ତେଣିନି ହାନ୍ଦି ଏ଼ୱାସି ତୀରି କିନେସି।
ଲାଗେଏତି ଅଣ୍ପୁ ପ୍ରବୁତି ନ଼କିତା ଅ଼ପାଆଗାଟାୟି ଆ଼ନେ; ସାମା ସୁୱାଲା ହା଼ଡା ସୁଦୁ ଆ଼ନେ।
ଜୂପ୍କାଗାଟାସି ତାମି କୁଟମିତି ଦୁକୁ ହୀନେସି, ସାମା ଆମିନି ଲ଼କୁ ଲା଼ଞ୍ଚା ଅ଼ପଅସି, ଏ଼ୱାସି ନୀଡିନେସି।
ଦାର୍ମୁଗାଟାଣି ମ଼ନ ଅଣ୍ପାହାଁ କାତା ଜ଼ଲିନେ; ସାମା ଲାଗେଏ ଲ଼କୁତି ଗୂତି ଲାଗେଏତି କାତା ହ଼ନେ।
ପ୍ରବୁ ଲାଗେଏ ଲ଼କୁ ତା଼ଣାଟି ହେକ ଡ଼ୟିନେସି; ଇଞ୍ଜାଁ ଦାର୍ମୁଗାଟାରି ପ୍ରା଼ତାନା ଏ଼ୱାସି ୱେନେସି।
କାନୁତି ଉଜେଡ଼ି ମ଼ନତି ରା଼ହାଁ କିନେ; ଇଞ୍ଜାଁ ନେହିଁ କାବ୍ରୁ ଡୁମ୍କା-ପେ଼ଡ଼୍କାଣି ଆ଼ଟ୍ୱା କିନେ।
ଆମ୍ବାଆସି ଜୀୱୁହୀନି ଲା଼ଗିନି ହା଼ଡା ୱେନେସି, ଏ଼ୱାସି ବୁଦିଗାଟାରି ତଲେ ବାସା କିନେସି।
ଆମ୍ବାଆସି ଲା଼ଗିହିଁ ୱେହ୍ନାଣି ଆବଅସି, ଏ଼ୱାସି ତାନି ଜୀୱୁତି ହୀଣି କିନେସି; ସାମା ଆମ୍ବାଆସି ଲା଼ଗିନାଣି ୱେନେସି, ଏ଼ୱାସି ବୁଦି ବେଟାଆ଼ନେସି।
ପ୍ରବୁଇଁ ଆଜିନାୟି ବୁଦିଗାଟି ଜା଼ପିନାୟି; ଇଞ୍ଜାଁ କ଼ପା ହିଲାଆଗାଟାୟି ଗା଼ୱୁରମି ନ଼କିତା ଡ଼ୟିନେ।
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.