Biblica® Open Sorani Kurdish Book of Life
ڕۆما 4
نموونه‌ی ئیبراهیم
بۆیه چی بڵێین له‌باره‌ی ئیبراهیم كه به‌پێی گۆشتو خوێن باوكمانه، چی دۆزییه‌وه؟ ئه‌گه‌ر ئیبراهیم به‌پێی كردار بێ‌تاوان بووه مافی ئه‌وه‌ی هه‌بوو شانازی بكات، به‌ڵام نه‌ك به‌رامبه‌ر خودا. كتێبی پیرۆز چی ده‌ڵێ؟ :[[ئیبراهیم باوه‌ڕی به خودا هێنا، ئه‌مه‌ش به ڕاستودروستی بۆی دانرا.]]
ئه‌وه‌ی كار ده‌كات، كرێیه‌كه‌ی به به‌ره‌كه‌ت بۆ دانانرێ، به‌ڵكو مافی خۆیه‌تی. ئه‌وه‌ش كار ناكات، به‌ڵام باوه‌ڕی به‌وه هه‌یه خودا خوانه‌ناس بێ‌تاوان ده‌كات، ئه‌وا به‌هۆی باوه‌ڕ بهڕاستودروست داده‌نرێ. هه‌روه‌ك چۆن داود باس له‌پیرۆزی ئه‌و مرۆڤه ده‌كات، كه خودا بهڕاستودروست دایده‌نێت بێ هیچ كردارێك، كاتێ ده‌ڵێ: [[خۆزگه‌ده‌خوازرێ به‌وانه‌ی گوناهه‌كانیان به‌خشراوه‌و هه‌ڵه‌كانیان داپۆشراوه! خۆزگه‌ده‌خوازرێ به‌و كه‌سه‌ی خوداوهند گوناهی له‌سه‌ر ناژمێرێ!]]
جا ئایا ئه‌م خۆزگه‌یه ته‌نها بۆ خه‌ته‌نه‌كراوانه یاخود بۆ ئه‌وانه‌شه كه خه‌ته‌نه‌نه‌كراون؟ چونكه باسمانكرد به‌هۆی باوه‌ڕه‌وه ئیبراهیم به ڕاستودروست دانرا. به‌ڵام چۆن ئه‌مه‌ی بۆ دانرا؟ دوای خه‌ته‌نه‌كردن یا پێش خه‌ته‌نه‌كردن؟ بێ‌گومان ئه‌مه دوای خه‌ته‌نه‌كردن نه‌بوو، به‌ڵكو پێشی بوو. ئیتر ئیبراهیم نیشانه‌ی خه‌ته‌نه‌كردنی وه‌رگرت وه‌ك مۆری ڕاستودروستی به‌هۆی باوه‌ڕ، كاتێ هێشتا خه‌ته‌نه نه‌كرابوو، تا ئیبراهیم بوو به‌باوكی هه‌موو ئه‌وانه‌ی باوه‌ڕیان هه‌یه‌و خه‌ته‌نه نه‌كراون، به ڕاستودروستی بۆیان دابنرێ، هه‌روه‌ها بوو بهباوك بۆ ئه‌و خه‌ته‌نه‌كراوانه‌ی نه‌ك ته‌نها خه‌ته‌نه‌كراون، به‌ڵكو له‌به‌رئه‌وه‌ی به‌ڕێگای ئه‌و باوه‌ڕه‌دا ده‌ڕۆن كه هی ئیبراهیمی باوكمانه، پێش ئه‌وه‌ی خه‌ته‌نه بكرێ.
له‌سه‌ر بناغه‌ی شه‌ریعه‌ت نه‌بوو ئه‌و به‌ڵێنه‌ی بهئیبراهیمو نهوهكانی درا، تاكو ببێ بهمیراتگری جیهان، به‌ڵكو له‌سه‌ر بناغه‌ی ئه‌و ڕاستودروستیه بوو كه به‌هۆی باوه‌ڕه‌وه‌یه. گه‌ر خاوه‌ن شه‌ریعه‌ته‌كان ته‌نها میراتگر بوونایه، ئه‌و كاته باوه‌ڕ بێ سوود ده‌بوو، به‌ڵێنی خوداش ده‌شكێنرا، چونكه شه‌ریعه‌ت ده‌بێته هۆی تووڕه‌یی خودا، گه‌ر شه‌ریعه‌ت نه‌بووایه سه‌رپێچی ده‌رنه‌ده‌كه‌وت. بۆیه به‌ڵێن به باوه‌ڕه‌وه‌یه‌و به‌پێی به‌ره‌كه‌ته، تاكو مسۆگه‌ر بێ بۆ هه‌موو نه‌وه‌ی ئیبراهیم، نه‌ك ته‌نها بۆ خاوه‌ن شه‌ریعه‌ته‌كان، به‌ڵكو بۆ ئه‌و باوه‌ڕدارانه‌ش كه باوه‌ڕی ئیبراهیمیان هه‌یه، ئه‌و باوكی هه‌مووانه. هه‌روه‌ك له‌كتێبی پیرۆزدا نووسراوه: [[من تۆم كرد به‌باوكی زۆر لهمیللهتان.]] ئه‌و باوكی ئێمه‌یه له‌به‌رچاوی ئه‌و خودایه‌ی ئیبراهیم باوه‌ڕی پێ‌هێنا، ئه‌و خودایه‌ی مردووان زیندووده‌كاته‌وه، ئه‌و شتانه بانگ ده‌كات كه بوونیان نییه وه‌ك ئه‌وه‌ی بوونیان هه‌بێ.
هه‌رچه‌نده هیواش بڕابوو، ئیبراهیم به ئومێده‌وه باوه‌ڕی هێنا كه‌وا ده‌بێ به باوكی زۆر لهمیللهتان، به‌پێی ئه‌وه‌ی پێی ووترا بوو: [[نه‌وه‌كه‌ت به‌م شێوه‌یه ده‌بێ.]] له‌گه‌ڵ ئه‌وه‌ی له‌شی وه‌ك مردوو بوو، چونكه ته‌مه‌نی نزیكه‌ی سه‌د ساڵ بوو، هه‌روه‌ها سارای ژنی منداڵدانی مردبوو، هێشتا هه‌ر باوه‌ڕی لاواز نه‌ببوو، گومانی نه‌بوو لهبهڵێنی خودا، به‌ڵكو باوه‌ڕی به‌هێزی كردبوو، به‌مه‌ش شكۆمه‌ندی بۆ خودا دانا، بهتهواوی باوه‌ڕی به‌وه هه‌بوو ئه‌وه‌ی خودا به‌ڵێنی پێ‌داوه ده‌توانێ بیكات، له‌به‌ر ئه‌مه بوو [[بهڕاستودروستی بۆی دانرا.]] ئه‌وه‌ی نووسراوه: [[بۆی دانرا]] ته‌نها له‌پێناوی ئه‌و نه‌بوو، به‌ڵكو له‌پێناوی ئێمه‌ش بوو، جا ئێمه‌ش بۆمان دانرا به‌هۆی باوه‌ڕمان بهخودا ئه‌وه‌ی عیسای مه‌سیحی له‌نێو مردووان زیندووكرده‌وه، خودا ئه‌وی دایه‌ده‌ست مردن له‌پێناوی گوناهه‌كانمان، ئینجا هه‌ڵیسانده‌وه له‌پێناوی بێتاوانكردنمان.
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.