Biblica® Open Sorani Kurdish Book of Life
ڕۆما 2
حوكمی دادپه‌روه‌رانه‌ی خودا
كه‌واته هیچ بیانویه‌كت نییه ئه‌ی ئه‌و مرۆڤه‌ی حوكم به‌سه‌ر خه‌ڵكی ده‌ده‌یت، چونكه كاتێ حوكم به‌سه‌ر خه‌ڵكی ده‌ده‌یت، خۆت تاوانبار ده‌كه‌یت، له‌به‌رئه‌وه‌ی تۆ حوكم به‌سه‌ر خه‌ڵكی ده‌ده‌یت، خۆشت هه‌مان شت ده‌كه‌یت. به‌ڵام ئێمه ده‌زانین حوكمی خودا ڕاسته به‌سه‌ر ئه‌و كه‌سانه‌ی ئه‌م جۆره شتانه ده‌كه‌ن. ئه‌ی ئه‌و مرۆڤه‌ی حوكم به‌سه‌ر ئه‌وانه ده‌ده‌یت كه ئه‌م جۆره شتانه دهكهنو خۆشت هه‌مان شت ده‌كه‌یت، ئایا وا ده‌زانی تۆ ڕزگارت ده‌بێ لهحوكمی خودا؟ یاخود به‌چاوی سووك سه‌یری ده‌وڵه‌مه‌ندی نهرمونیانیو دانبهخۆگرتنو ئارامی خودا ده‌كه‌یت؟ ئایا تۆ نازانی نهرمونیانی خودا هانت ده‌دا بۆ تۆبه‌كردن؟
به‌ڵام تۆ له‌به‌ر دڵڕهقیو تۆبه نه‌كردنت، تووڕه‌یی بۆ خۆت كۆده‌كه‌یته‌وه بۆ ڕۆژی تووڕه‌بوون، ئه‌و ڕۆژه‌ی سزای دادپه‌روه‌رانه‌ی خودای تیا ده‌رده‌كه‌وێ. ئه‌وسا هه‌ر مرۆڤێك پاداشتی خۆی وه‌رده‌گرێ به‌پێی كرداری. ژیانی هه‌تاهه‌تایش بۆ ئه‌و كه‌سانه ده‌بێ كه ههوڵدهدهن بۆ شكۆمهندیو ڕێزگرتنو نه‌مری به بهردهوامبوونیان له‌سه‌ر كرداری چاك، به‌ڵام تووڕهییو ڕق بۆ ئه‌وانه‌ی هه‌وڵی خۆویستی دهدهنو ملكه‌چی ڕاستی نابن به‌ڵام بۆ گوناه مل شۆڕ ده‌كه‌ن. هه‌روه‌ها ناخۆشیو ته‌نگانه بۆ هه‌موو مرۆڤێكه كه ڕه‌فتاری خراپ ده‌كات، یه‌كه‌مجار بۆ جووله‌كه ئینجا بۆ یۆنانی. شكۆمهندیو ڕێزو ئاشتی بۆ هه‌موو ئه‌وانه‌ی چاكه ده‌كه‌ن یه‌كه‌مجار بۆ جووله‌كه ئینجا یۆنانی، چونكه خودا لایه‌نگیری كه‌س ناكات.
هه‌موو ئه‌وانه‌ی شه‌ریعه‌تیان نییه‌و هه‌ڵه ده‌كه‌ن، به‌بێ شه‌ریعه‌ت له‌ناوده‌چن. ئه‌وانه‌ش كه شه‌ریعه‌تیان هه‌یه‌و هه‌ڵه ده‌كه‌ن، هه‌ر به‌و شه‌ریعه‌ته تاوانبار ده‌كرێن. ئه‌وانه‌ی شه‌ریعه‌تیان بیستووه بێ‌تاوان نین له‌به‌رامبه‌ر خودا، ته‌نها ئه‌وانه نه‌بێت كه كاری پێ‌ده‌كه‌ن، ئه‌وانه بێ‌تاوان ده‌بن. جا كاتێ ئه‌وانه‌ی جووله‌كه نین، واته ئه‌وانه‌ی شه‌ریعه‌تیان نییه، ئه‌وه‌ی كه شه‌ریعه‌ت داوای ده‌كات، هه‌روه‌ك شتێكی سروشتی له‌سه‌ری ده‌ڕۆن، ئه‌وانه شه‌ریعه‌تن بۆ خۆیان، هه‌رچه‌نده ئه‌وان ئه‌و شه‌ریعه‌ته‌یان نییه. ده‌ریده‌خه‌ن ناوه‌ڕۆكی شه‌ریعه‌ت لهدڵیان نووسراوه، ویژدانو بیریشیان لهناوهوه شایه‌تی بۆ ئه‌مه ده‌دات، ئه‌مه‌ش جارێك تاوانباریان ده‌كات، جارێكی دیكه به‌رگرییان لێ‌ده‌كات. هه‌موو ئه‌م شتانه‌ش له‌و ڕۆژه‌دا ده‌بێ، كاتێ خودا حوكم به‌سه‌ر نهێنی خه‌ڵكی ده‌دات به‌هۆی عیسای مه‌سیح، به‌پێی مزگێنیم.
جووله‌كه‌و شه‌ریعه‌ت
به‌ڵام ئه‌ی ئه‌وه‌ی ناوی خۆت بهجوولهكه ده‌به‌یت، پشت بهشهریعهت ده‌به‌ستی، شانازی به‌خودا ده‌كه‌یت، خواستی ئه‌و دهزانیتو چی باشه جیای ده‌كه‌یته‌وه به‌هۆی ئه‌وه‌ی له‌شه‌ریعه‌ت فێری بووی، ئه‌گه‌ر باوه‌ڕت به‌خۆت هه‌یه تۆ ڕێنیشانده‌ری كوێرانیو ڕووناكی بۆ ئه‌وانه‌ی له تاریكیدان، هه‌روه‌ها فێركه‌ری نهزانهكانو مامۆستای منداڵانی، چونكه تۆ شێوه‌ی زانیاریو ڕاستیت هه‌یه له‌شه‌ریعه‌ت، كه‌واته تۆ، ئه‌ی ئه‌و كه‌سه‌ی خه‌ڵكی فێر ده‌كه‌یت، بۆچی خۆت فێرناكه‌ی؟ له‌كاتێكدا ئامۆژگاری ده‌كه‌یت :دزی مه‌كه‌ن، كه‌چی خۆت دزی ده‌كه‌یت؟ ئه‌ی ئه‌وه‌ی ده‌ڵێیت داوێنپیسی مه‌كه‌ن، كه‌چی خۆت داوێنپیسی ده‌كه‌ی؟ ئه‌ی ئه‌وه‌ی ڕقت له‌بت ده‌بێته‌وه، كه‌چی په‌رستگاكان تاڵان ده‌كه‌ی؟ ئه‌ی ئه‌و كه‌سه‌ی شانازی بهشهریعهت ده‌كه‌یت، كه‌چی ده‌ته‌وێ سووكایه‌تی به‌خودا بكه‌یت به‌وه‌ی سه‌رپێچی شه‌ریعه‌ت ده‌كه‌یت؟ له‌به‌ر ئه‌مه له‌كتێبدا نووسراوه: [[به‌هۆی ئێوه‌وه له‌ناو ئه‌وانه‌ی جووله‌كه نین كفر به‌ناوی خودا ده‌كرێ.]] جا خه‌ته‌نه‌كردن كاتێ سوودی هه‌یه به‌پێی شه‌ریعه‌ت هه‌ڵسوكه‌وت بكه‌یت، به‌ڵام گه‌ر تۆ به‌پێچه‌وانه‌ی شه‌ریعه‌ت ڕه‌فتار بكه‌یت، ئه‌و كاته خه‌ته‌نه‌كردنه‌كه‌ت وه‌ك بێ خه‌ته‌نه‌ی لێدێت. جا گه‌ر هاتوو خه‌ته‌نه نه‌كراوان به‌پێی شه‌ریعه‌ت ڕه‌فتاریان كرد، ئایا وه‌ك خه‌ته‌نه‌كراوان دایان نانێن؟ ئیتر ئه‌وه‌ی لهبنهڕهت خهتهنهنهكراوه، به‌ڵام له‌سه‌ر شه‌ریعه‌ت ده‌ڕوا، ئایا حوكم نادا به‌سه‌ر تۆی جووله‌كه ئه‌ی ئه‌وه‌ی سه‌رپێچی شه‌ریعه‌ت ده‌كه‌یت هه‌رچه‌نده خاوه‌نی كتێبیتو خه‌ته‌نه‌كراوی؟
جووله‌كه ئه‌وه نییه به‌ڕواڵه‌ت جووله‌كه‌یه، خه‌ته‌نه‌كراویش ئه‌وه نییه له‌شی خه‌ته‌نه‌كراوه، به‌ڵام جووله‌كه‌ی ڕاسته‌قینه ئه‌وه‌یه له‌دڵ جووله‌كه‌یه، خه‌ته‌نه‌كردنیش خه‌ته‌نه‌كردنی دڵه كه بهڕۆح ده‌بێ نه‌ك به‌نووسراوی شه‌ریعه‌ت. جا ئه‌مه ئه‌و مرۆڤه‌یه كه ستایشی خودا به‌ده‌ست ده‌هێنێ نه‌ك هی ئاده‌میزاد.
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.