Biblica® Open Sorani Kurdish Book of Life
مەرقۆس 9
شێوه گۆڕانی عیسا
ئینجا عیسا پێی ووتن: (ڕاستیتان پێ‌ده‌ڵێم: هه‌ندێ له‌وانه‌ی لێره‌دا ڕاوه‌ستاون، تامی مردن ناچێژن تا پادشاهێتی خودا* نه‌بینن كاتێ به‌تواناوه دێت.
دوای ئه‌مه به‌شه‌ش ڕۆژ، عیسا پهترۆسو یاقوبو یۆحه‌ننای له‌گه‌ڵ خۆی بردو به‌یه‌كه‌وه چوونه سه‌ر چیایه‌كی به‌رز. كاتێ له‌به‌رچاویان شێوه‌ی خۆی به‌ته‌واوی گۆڕی، جله‌كانی به‌شێوه‌یه‌ك سپیبوو بریسكه‌ی ده‌دایه‌وه زیاتر له‌هه‌موو ڕووناكی ئه‌م سه‌ر زه‌ویه. له‌و كاته‌دا موساو ئه‌لیاس ده‌ركه‌وتن بۆیان، له‌گه‌ڵ عیسادا ده‌دوان. ئینجا په‌ترۆس به‌عیسای ووت: (گه‌وره‌م، شتێكی خۆشه لێره بمێنینه‌وه گه‌ر ده‌ته‌وێت سێ چادر ههڵدهدهین یه‌كێ بۆ تۆ، یه‌كێ بۆ موسا، یه‌كێكیش بۆ ئه‌لیاس.) په‌ترۆس نه‌یده‌زانی چی ده‌ڵێ، له‌و كاته‌دا هه‌ر سێ قوتابیه‌كه ترسیان لێ نیشتبوو، ئینجا هه‌ورێك باڵی كێشا بهسهریانو ده‌نگێك له‌هه‌وره‌كه‌وه بانگی كرد: (ئا ئه‌وه‌تا ڕۆڵه‌ی خۆشه‌ویستم، ئه‌وه‌ی پێی دڵشام، گوێی بۆ ڕاگرن.) دوای ئه‌مه قوتابیه‌كان خێرا سه‌یری ده‌وروپشتیان كرد، به‌ڵام له‌عیسا زیاتر كه‌سیان نه‌بینی. كاتێ له‌شاخه‌كه هاتنه خواره‌وه، عیسا ئاگاداریكردنه‌وه: (ئه‌مه‌ی بینیان جارێ به‌كه‌سی ڕانه‌گه‌یه‌نن، تا ڕۆڵه‌ی مرۆڤ له‌ناو مردووان هه‌ڵده‌ستێته‌وه.) ئه‌وانیش ڕاسپارده‌كه‌یان جێبهجێكرد، به‌ڵام له‌ناوخۆیان پرسیاریانكرد: (باشه مه‌به‌ست له‌هه‌ستانه‌وه له‌نێو مردوواندا چییه؟) ڕووی پرسیاریان كرده عیساو ووتیان : (باشه بۆچی مامۆستایانی شه‌ریعه‌ت ده‌ڵێن، ده‌بێ یه‌كه‌مجار ئه‌لیاس بێته‌وه؟) عیسا وهڵامیدانهوهو ووتی: (ئه‌مه ڕاسته، ئه‌لیاس دێتو هه‌موو شتێ ده‌خاته‌وه شوێنی خۆی. سه‌ره‌ڕای ئه‌مه بۆچی له‌كتێبی پیرۆزدا نووسراوه، ڕۆڵه‌ی مرۆڤ ده‌بێت ئازار بكێشێتو به‌چاوی نزم سه‌یر بكرێ؟ به‌ڵام پێتان ده‌ڵێم ئه‌لیاس هات، چیانویست پێیانكرد، به‌و شێوه‌یه‌ی له‌كتێبی پیرۆز ده‌رباره‌ی نووسراوه.)
ده‌ركردنی ڕۆحی پیس
كاتێ عیساو قوتابیه‌كانی هاتنه‌وه لای قوتابیهكانیكه، بینییان خه‌ڵكێكی زۆریان لێكۆبووهتهوه، له‌وانه هه‌ندێ له‌مامۆستایانی شه‌ریعه‌ت خه‌ریكی گفتوگۆ كردنن له‌گه‌ڵیان. كه خه‌ڵكه‌كه عیسایان بینی هه‌موو سه‌رسام بوون، خێرا بۆ لای چوون تاسڵاوی لێبكهن. ئه‌وسا عیسا لێیپرسین: (ده‌رباره‌ی چی ده‌دوێن؟) یه‌كێ له‌نێوان خه‌ڵكه‌كه‌وه هاواریكرد، ووتی: (مامۆستا كوڕه‌كه‌م هێناوه‌ته لات ڕۆحی پیسی تێدایه، لاڵیكردووه. كاتێ ده‌یگرێ، ده‌یدا به‌زه‌ویداو كه‌ف له‌ده‌می دێتو ددانه چركێی پێدهكهوێت. داوام له‌قوتابیه‌كانت كرد ڕۆحه‌كه ده‌ركه‌ن، به‌ڵام نه‌یانتوانی. عیسا له‌وه‌ڵامدا ووتی: (ئه‌ی نه‌وه‌ی بێباوهڕ! تاكه‌ی له‌گه‌ڵتان بم؟ تاكه‌ی بارتان هه‌ڵگرم؟ ئا بیهێنن بۆ لام.) ئه‌وانیش كوڕه‌كه‌یان هێنایه لای عیسا. هه‌ر كه ڕۆحه پیسه‌كه عیسای بینی، منداڵه‌كه فێی لێهاتو كه‌وته سه‌ر زه‌وی، كه‌ف له‌ده‌می هاتو دهستیكرد بهگهوزینو خۆ خولانه‌وه. عیسا له‌باوكی كوڕه‌كه‌ی پرسی: (له‌كه‌یه‌وه وای لێدێت؟) ئه‌ویش له وه‌ڵامدا ووتی: (له‌منداڵییه‌وه. زۆر جار ڕۆحه پیسه‌كه خستویه‌تیه ناو ئاو و ئاگره‌وه تابیكوژێ. گه‌ر بتوانی شتێكمان بۆ بكه‌یت، به‌زه‌ییت پێمان بێته‌وه‌و یارمهتیمانبده.) عیسا پێی ووت: ((گه‌ر بتوانی)؟ ئه‌وه‌ی باوه‌ڕبهێنێ هه‌موو شتێكی بۆ ده‌بێت.) ده‌ستبه‌جێ باوكی منداڵه‌كه هاواری كرد: (باوه‌ڕم هه‌یه، یارمه‌تی بێ‌باوه‌ڕیم بده.) عیسا كه بینی خه‌ڵكه‌كه لێیان كۆده‌بنه‌وه، به‌ڕۆحه پیسه‌كه‌ی ووت: (ئه‌ی ڕۆحی كه‌ڕو لاڵ، فه‌رمانت پێدهدهم بڕۆ ده‌ره‌وه له‌و كوڕه‌و جارێكی كه نه‌گه‌ڕێیته‌وه بۆ لای!) دوایی ڕۆحه‌كه هاواریكردو كوڕه‌كه‌ی به‌توندی خستو هاته ده‌ره‌وه. كوڕه وه‌ك مردووی لێهات، كه‌سانێكی زۆر ووتیان: (مرد.) به‌ڵام كاتێ عیسا دهستیدایه دهستیو ههڵیساند، ئه‌ویش هه‌ستایه سه‌رپێ. كاتێ عیسا گه‌ڕایه‌وه بۆ ماڵ، قوتابیه‌كان به‌ته‌نها لێیان پرسی: (بۆچی ئێمه نه‌مانتوانی ئه‌و ڕۆحه ده‌ركه‌ین؟) وه‌ڵامی دایه‌وه: (ئه‌م جۆره ڕۆحه ده‌رناكرێ به‌نوێژ نه‌بێت.)
دووه‌م باسی مردنی عیسا
دوای ئه‌مه له‌وێ ڕۆیشتنو به‌ناوچـه‌ی جه‌لیل تێپهڕین، عیساش نهیدهویست كـه‌س پێی بزانێ، چونكه خه‌ریكـی فێركـردنی قوتابیه‌كانی بوو، پێیووتن: (ڕۆڵه‌ی مرۆڤ، ده‌درێ به‌ده‌ستی خه‌ڵكیه‌وه، ده‌كوژرێ، دوای كوشتنی به‌سێ ڕۆژ هه‌ڵده‌ستێته‌وه). به‌ڵام ئـه‌وان ئـه‌م قســه‌یه تێنـهگـهیـشتنو ترسـان لێیبپرسن.
كێ مه‌زنترینه؟
ئینجا عیسا چوو بۆ شاری كه‌فه‌رناحوم. كاتێ گه‌یشته ماڵه‌وه، له‌قوتابیه‌كانی پرسی: (ئه‌وه له‌ڕێگا باسی چیتان ده‌كرد؟) قـوتابیه‌كان هیچ وه‌ڵامیان نه‌دایه‌وه، چونكه له‌ڕێگه مشتومڕی ئه‌وه‌یان بوو، كامیان مه‌زنتره. ئینجا عیسا دانیشت، هه‌ر دوانزه قوتابیه‌كه‌ی بانگكرده لای خۆیو پێیووتن: (گه‌ر یه‌كێ ویستی یه‌كه‌مین بێت. باخۆی بخاته دوای هه‌مووانه‌وه‌و ببێته خزمه‌تكار بۆ هه‌مووتان.) هه‌ر له‌وێدا منداڵێكی بانگكرد، گرتیه باوه‌شیه‌وه‌و له‌ناوه‌ڕاستیان ڕایگرتو پێیووتن: (ئه‌وه‌ی به‌ناوی منه‌وه پێشوازی له‌یه‌كێ له‌م مناڵانه بكات، ئه‌وا پێشوازی له‌من ده‌كات، هه‌روه‌ها ئه‌وه‌ی پێشوازی له‌من ده‌كات، ئه‌وا پێشوازی له‌من ناكات، به‌ڵكو له‌وه‌ی ناردوومی.)
ئه‌وه‌ی دژمان نییه له‌گه‌ڵمانه
ئینجا یۆحه‌ننا ووتی: (مامۆستا، یه‌كێكمان بینی به‌ناوی تۆوه ڕۆحی پیسی له‌خه‌ڵكی ده‌رده‌كرد، ڕێمان لێگرت، چونكه دوامان ناكه‌وێت.) عیسا ووتی: (ڕێی لێمهگرن. كه‌سێ نییه به‌ناوی منه‌وه كاری سه‌رسوڕهێنه‌ر بكاتو بتوانێ به‌خراپه باسم بكات. جا ئه‌وه‌ی دژمان نییه له‌گه‌ڵماندایه. چونكه ئه‌وه‌ی به‌ناوی منه‌وه جامێ ئاوی پێدان، له‌به‌رئه‌وه‌ی سه‌ر به مه‌سیحن، ڕاستیتان پێ‌ده‌ڵێم ئه‌و كه‌سه پاداشتی وون نابێت.
كۆسپ دروستكردن
( ئه‌وه‌ی ببێته كۆسپ بۆ یه‌كێك له‌م بچووكانه‌ی باوه‌ڕیان به‌من هه‌یه، ئه‌وا باشتره بۆ ئه‌و به‌ردی ده‌ستار به‌ملیه‌وه ههڵواسرێو فڕێ بدرێته ناو قوڵایی ده‌ریاوه. هه‌روه‌ها گه‌ر ده‌ستت تووشی گوناهی كردی، بیبڕهوه، باشتره بڕۆیته ناو ژیانی هه‌تاهه‌تایی به‌یه‌ك ده‌سته‌وه له‌وه‌ی به‌هه‌ردوو ده‌ستته‌وه بڕۆیت بۆ دۆزه‌خ، بۆ ناو ئاگرێ كوژانه‌وه‌ی بۆ نییه. [چونكه له‌وێ كرمه‌كانیان مردنیان بۆ نییه‌و ئاگریان ناكوژێته‌وه.] هه‌روه‌ها گه‌ر قاچت تووشی گـوناهـی كردی، بیبڕهوه، باشتره به‌یه‌ك قاچـه‌وه بڕۆیته ناو ژیانی هه‌تاهه‌تاییه‌وه له‌وه‌ی به‌هه‌ردوو قاچه‌وه بڕۆیته ناو دۆزه‌خه‌وه. بۆ ناو ئاگرێ كوژانه‌وه‌ی بۆ نییه. [له‌وێ كرمه‌كانیان مردنیان بۆ نییه‌و ئاگریان ناكوژێته‌وه.] هه‌روه‌ها گه‌ر چاوت تووشی گوناهی كردی ده‌ریبهێنه، باشتره بڕۆیته ناو پادشاهێتی خوداوه به‌بێ چاو له‌وه‌ی به‌دوو چاوه‌وه بڕۆیته ناو دۆزه‌خه‌وه. له‌وێ كرمه‌كانیان مردنیان بۆ نییه‌و ئاگریان ناكوژێته‌وه. چـونكـه هه‌موو به‌ئاگـر سوێر ده‌كرێن. خـوێ باشـه، به‌ڵام گـه‌ر خوێ سوێریه‌كه‌ی نه‌ما، چی سوێریه‌كه‌ی بۆ ده‌گه‌ڕێنێته‌وه؟ با له‌ده‌رونتان گشتكات خوێ هه‌بێت، هه‌روه‌ها ئاشتی خوازبن به‌رامبه‌ر به‌یه‌كتری.)
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.