Biblica® Open Sorani Kurdish Book of Life
مەرقۆس 5
ده‌ركردنی ڕۆحی پیس
ئینجا گه‌یشتنه شاری جه‌راسین كه كه‌وتۆته ئه‌وبه‌ری ده‌ریاچه‌كه‌وه. هه‌ركه عیسا له‌به‌له‌مه‌كه هاته‌خواره‌وه، له‌ناو گـۆڕستانی ئه‌و ناوچه‌یه‌دا، كـابرایه‌ك كه ڕۆحی پیسی تیابوو لێی هاته پێشه‌وه، ئه‌و كابرایه له‌گۆڕستاندا ده‌ژیاو كه‌سیش نه‌یده‌توانی بیبه‌ستێته‌وه. تـه‌نانه‌ت به‌زنجیریـش. زۆرجـار بهكۆتو زنجیر دهیانبهستهوه، به‌ڵام زنجیری ده‌پچڕاندو كۆتی ده‌شكاند، كـه‌سیش نـه‌یده‌توانی بیـگرێ. شه‌و و ڕۆژ یا له‌گۆڕستان بوو یا له‌شاخ، هاواری ده‌كردو له‌شی خۆی به‌به‌رد بریندار ده‌كرد. به‌ڵام كاتێ له‌دووره‌وه عیسای بینی، ڕایكرده لایو كـڕنۆشی بۆ برد، به‌ده‌نگی به‌رز هاواریكرد: (چیت له‌من ده‌وێ، ئه‌ی عـیسای ڕۆڵه‌ی خودای گه‌وره؟ سوێندت ده‌ده‌م به‌خـودا ئازارم مــه‌ده!) چونكه عیسا پێی ووتبوو: (ئه‌ی ڕۆحی پیس له‌م پیاوه وه‌ره ده‌ره‌وه!) ئینجا عـیسا لێیپرسی: (ناوت چییه؟) وه‌ڵامی دایه‌وه: (ناوم لـیجیۆنه، چـونكه ئێمـه لـه‌شـكرێكی گه‌وره‌ین.) زۆر له‌عیسا پاڕایه‌وه ده‌ریان نه‌كات بۆ ده‌ره‌وه‌ی ناوچه‌كه. له‌و ناوه‌دا ڕانه به‌رازێكی گه‌وره ده‌له‌وه‌ڕان له‌قه‌راغی شاخێكدا، ڕۆحه پیسه‌كان لێیپاڕانهوه ڕێیان بدات بچنه ناو به‌رازه‌كانه‌وه. ئه‌ویش ڕێیدان. ڕۆحه پیسه‌كان له‌پیاوه‌كه هاتنه‌ده‌ره‌وه‌و چوونه ناو به‌رازه‌كانه‌وه، ئینجا ڕانه به‌رازه‌كه كه ژماره‌یان نزیكه‌ی دوو هه‌زار ده‌بوو، كه‌وتنه ڕاكردنو له‌قه‌راغی ئه‌و شاخه‌ی به‌قه‌دیه‌وه بوون، هه‌ڵدێران بۆ ناو ده‌ریاچه‌كه‌و هه‌موو خنكان.
شوانی به‌رازه‌كان خێرا چوون بۆ ناو شارو كێڵگه‌كان تا ئه‌م هه‌واڵه بڵاوبكه‌نه‌وه، جاخه‌ڵكه‌كه هاتنه‌ده‌ره‌وه بۆ بینینی ئه‌وه‌ی ڕویداوه. كاتێ هاتنه لای عیسا، ئه‌و پیاوه‌یان بینی كه له‌شكرێ رۆحی پیسی تێدابوو لای عیسادا دانیشتووه بهپۆشتهییو ئه‌قڵ ته‌واوییه‌وه. به‌مه خه‌ڵكه‌كه ترسیان لێنیشت. هه‌روه‌ها ئه‌وانه‌ی ڕووداوه‌كه‌یان بینیبوو، بۆ خه‌ڵكه‌كه‌یان گێڕایه‌وه چی ڕوویدا سه‌باره‌ت به‌و پیاوه‌ی ڕۆحه پیسه‌كانی تێدا بوو هه‌روه‌ها به‌رازه‌كان. ئیتر هه‌موو داوایان له‌عیسا كرد له‌ناوچه‌كه‌یان بڕوات.
ئینجا عیسا سواری به‌له‌م بوو، پیاوه‌كه‌ی ڕۆحه پیسه‌كانی لێدهركرا بوو، له‌عیسا پاڕایه‌وه ڕێی بدات له‌گه‌ڵی بێت. به‌ڵام عیسا ڕێگه‌ی نه‌داو پێیووت: (بگه‌ڕێوه بۆ ناوماڵو كه‌سوكارت، بۆیان بگێڕه‌وه خوداوه‌ند چی بۆت كردوه‌و چۆن به‌زه‌یی پیاتداهاته‌وه.) جا كابرا به‌هه‌موو ده شاره‌كه‌دا گه‌ڕاو ئه‌وه‌ی عیسا بۆیكردبوو بۆخه‌ڵكی گێڕایه‌وه. خه‌ڵكه‌كه‌ش به‌مه زۆر سه‌رسام بوون.
زیندووكردنه‌وه‌ی كچێك
كاتێ عیسا گه‌ڕایه‌وه ئه‌وبه‌ری ده‌ریاچه‌كه، ژماره‌یه‌كی زۆر خه‌ڵك له‌كه‌ناری ده‌ریاچه‌كه‌دا لێی كۆبوونه‌وه، پیاوێك ناوی یایرۆس بوو، پێشه‌وایه‌كی كه‌نیشت بوو، كاتێ عیسای بینی، هاتو له‌به‌رپێی كهوتو لێیپاڕایهوهو پێیووت: (كچه بچووكه‌كه‌م له‌سه‌ره‌مه‌رگدایه، وه‌ره ده‌ستی لێبده تا چاك بێته‌وه‌و زیندووبێته‌وه.) عیسا له‌گه‌ڵی ڕۆیشت، ژماره‌یه‌كی زۆر له‌خه‌ڵكیش به‌دوایدا ڕۆیشتنو پاڵه‌په‌ستۆیان ده‌كرد.
چاكردنهوهی ژنێك
هه‌ر له‌وێدا ژنێك هه‌بوو، ماوه‌ی دوانزه ساڵبوو خوێن لێچوونی هه‌بوو، له‌سه‌ر ده‌ستی چه‌ند پزیشكێك ئازاری زۆری چه‌شتبوو، ئه‌وه‌ی هه‌یبوو دابووی به پزیشك، به‌ڵام هیچ سوودێكی نه‌بوو، به‌ڵكو هه‌تا ده‌هات خراپتر ده‌بوو. ژنه باسی عیسای بیستبوو، بۆیه هاته ناو خه‌ڵكه‌كه‌وه‌و له‌دواوه ده‌ستی له‌چمكی كراسه‌كه‌یدا، له‌به‌رئه‌وه‌ی ژنه‌كه ووتی ته‌نها به‌ده‌ست لێدانی چمكی كراسه‌كه‌ی چاكدهبێتهوه. ژنه‌كه دهستبهجێ خوێن لێچوونهكهی ڕاوه‌ستاو هه‌ستی بهچاكبوونهوه كرد له‌نه‌خۆشیه‌كه‌ی. كاتێ عیسا هه‌ستی كرد هێزێك لێیهاتهدهرهوه، سه‌یری خه‌ڵكه‌كه‌یكردو پرسی: (كێ ده‌ستی لهجلهكانمدا؟) قوتابیه‌كانی پێیان ووت: (هه‌موو ده‌وروپشتیان گرتوویتو پاڵه‌په‌ستۆت ده‌كه‌ن، كه‌چی تۆ ده‌پرسی كێ ده‌ستی لیَدام؟) به‌ڵام ئه‌و سه‌یری دهوروپشتیكرد، بۆ ئه‌وه‌ی بزانێ ئه‌و كه‌سه كێبوو. ژنه‌كه‌ش به‌ڕووداوه‌كه‌ی خۆی زانی، بهترسو لـه‌رزه‌وه هاته پێشه‌وه، چۆكی داداو هه‌موو شتێكی به‌ڕاستی پێووت. ئینجا عیسا به‌ژنه‌كه‌ی ووت: (كـچم، باوهڕتبوو چـاكی كـردیته‌وه، بڕۆ دڵنیابه، چـاك بوویته‌وه لـه‌نه‌خۆشیه‌كه‌ت.)
له‌و كاته‌ی عیسا قسه‌ی ده‌كرد، ههندێكهس له‌ماڵی پێشه‌وای كه‌نیشته‌كه‌وه هاتن، ووتیان: (كچه‌كه‌ت مرد، ئیتر ئه‌رك مه‌خه‌ره به‌ر مامۆستا بۆ هاتن.) كاتێ عیسا ئه‌مه‌ی بیست، قسه‌ی له‌گه‌ڵ باوكه‌كه كردو ووتی: (مه‌ترسه، ته‌نها باوه‌ڕت هه‌بێ.) كه ڕۆیی بۆ ماڵه‌كه نه‌یهێشت كه‌س له‌گه‌ڵی بڕوات ته‌نها پهترۆسو یاقـوبو یۆحه‌ننای برای یاقوب نه‌بێت. كاتێ گه‌یشتنه ماڵی پێشه‌وای كه‌نیشته‌كه، سهیریكرد خه‌ڵكه‌كه دهگرینو شیوه‌ن ده‌كه‌ن، ئه‌ویش پێیووتن: (بۆچی شڵهژاونو ده‌گرین؟ ئه‌م كچه نه‌مردووه، به‌ڵكو نووستوه.) به‌مه خه‌ڵكه‌كه پێی پێكهنین، به‌ڵام عیسا خه‌ڵكه‌كه‌ی هه‌موو كرده ده‌ره‌وه‌ی ژووره‌كه‌و دایكو باوكی كچه‌كه‌و ئهوانیتر كه له‌گه‌ڵی بوون بردنی بۆ سه‌ر جێگای كچه‌كه. ده‌ستی كچه‌كه‌ی گرت، بانگی كردو ووتی: (ئه‌ی كیژۆڵه، پێت ده‌ڵێم هه‌سته!) كچه‌كه ته‌مه‌نی دوانزه ساڵبوو، یه‌كسه‌ر هه‌ستایه سهرپێو دهستیكرد به ڕۆیشتن، خه‌ڵكه‌كه‌ش هه‌موو له‌مه زۆر سه‌ریان سوڕما. جا ڕایسپاردن، ئه‌وه‌ی ڕوویداوه جارێ به‌كه‌سی نه‌ڵێن، ئینجا پێیووتن شتێك بهێنن بۆ كچه‌كه تابیخوات.
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.