Biblica® Open Sorani Kurdish Book of Life
مەرقۆس 15
عیسا ده‌درێته ده‌ست پیلاتۆس
كاتێ ڕۆژ بووه‌وه، سه‌رۆك كاهینهكانو پیرانو مامۆستایانی شهریعهتو هه‌موو ئه‌نجوومه‌ن به‌یه‌كه‌وه كۆبوونه‌وه. ئینجا عیسایان به‌ده‌ستی به‌ستراوه‌وه بردو دایانه ده‌ستی پیلاتۆس. پیلاتۆس لێیپرسی: (تۆی پادشای جووله‌كه؟) عیسا وه‌ڵامی دایه‌وه: (تۆ ووتت.) لێره سه‌رۆك كاهینه‌كان تاوانی زۆریان خسته‌پاڵی. پیلاتۆس دووباره لێیپرسی: (چییه، هیچ وه‌ڵام ناده‌یته‌وه؟ بزانه چیت پێدهڵێن!) به‌ڵام عیسا هیچ وه‌ڵامی نه‌دایه‌وه، پیلاتۆس به‌مه سه‌رسام بوو.
بڕیاری له‌خاچ دانی عیسا
پیلاتۆس له‌هه‌موو جه‌ژنێك یه‌كێك له‌و به‌ندانه‌ی ئازاد ده‌كرد كه‌گه‌ل داوای ده‌كرد. یه‌كێك كه ناوی باراباس بوو، له‌و كاته‌دا له‌به‌ندیخانه‌ی پیلاتۆس به‌ندبوو له‌گه‌ڵ هاوڕێكانی كه گێرهشێوێنو پیاوكوژ بوون. ئینجا خه‌ڵكه‌كه هه‌موو داوایان له‌پیلاتۆس كرد ئه‌وه‌ی هه‌موو كاتێك بۆیانی ده‌كات، جێبهجێ بكات. پیلاتۆسیش قسه‌ی له‌گه‌ڵ كردنو لێیپرسین: (ده‌تانه‌وێ پادشای جووله‌كه‌تان بۆ ئازادكه‌م؟) چونكه ده‌یزانی سه‌رۆك كاهینه‌كان له‌ڕقا ئه‌میان داوه به‌ده‌سته‌وه. به‌ڵام سه‌رۆك كاهینه‌كان خه‌ڵكه‌كه‌یان هاندا تاكو داوای ئازادكردنی باراباس بكه‌ن. پیلاتۆس دیسان لێیپرسین: (ئه‌ی باشه چیبكهم له‌وه‌ی كه به‌پادشای جووله‌كه ناوی ده‌به‌ن؟) یه‌ك له‌دوای یه‌ك هاواریانكرد: (له‌خاچی بده!) پیلاتۆس لێیپرسین: (باشه چ خراپه‌یه‌كی كردووه؟) كه‌چی ئه‌وان زیاتر هاواریانكرد: (له‌خاچی بده!) جا چونكه پیلاتۆس ده‌یویست خه‌ڵكه‌كه ڕازی بكات، هه‌ستا باراباسی بۆ ئازادكردن، دوای ئه‌مه عیسا درایه به‌ر قامچیو نێررا بۆ له‌خاچدان.
سه‌ربازه‌كان گاڵته به‌عیسا ده‌كه‌ن
سه‌ربازه‌كان بردیانه ناو خانوویه‌ك كه هی ئمپراتۆریه‌ت بوو، له‌وێ هه‌موو له‌شكره‌كه‌یان بانگكردو لێیكۆبوونه‌وه. كراسێكی ئه‌رخه‌وانی گرانبه‌هایان له‌به‌ركرد، له‌سه‌ر سه‌ری تۆقێكیان دانا له‌دڕك دروستكرابوو. دهستیانكرد به‌سڵاو لێكردنیو دهیانووت: (سڵاوت لێبێت ئه‌ی پادشای جووله‌كه!) ئینجا به‌قامیش كێشایان به‌سه‌ریو خۆیان بۆ چه‌مانده‌وه‌و چۆكیان بۆداداو تفیان لێكرد. دوای ئه‌وه‌ی به‌باشی گاڵته‌یان پێكرد، كراسه ئه‌رخه‌وانییه‌كه‌یان له‌به‌رداكه‌ندو جله‌كانی خۆییان له‌به‌ركرده‌وه‌و بردیانه ده‌ره‌وه بۆ له‌خاچدان.
مردنی عیساو له‌خاچدانی
كابرایه‌ك كه له‌وێوه ده‌ڕۆیشت، بانگیانكردو ناچاریانكرد تاكو خاچه‌كه‌یان بۆ هه‌ڵگرێت. ئه‌و كابرایه‌ش ناوی شه‌معونی قه‌یره‌وانی بوو، باوكی ئه‌سكه‌نده‌رو ڕوفوس، تازه له‌كێڵگه ده‌هاته‌وه. ئینجا عیسایان برد بۆ شوێنێك پێی ده‌وترا گولگۆسه واته (كاسهسهر). ئینجا مه‌ییان داپێی تێكه‌ڵكرابوو له‌گه‌ڵ تاڵاو، به‌ڵام نه‌یخوارده‌وه. دوای ئه‌وه‌ی لهخاچیاندا كراسه‌كه‌یان دابهشكرد، شێروخه‌تیان له‌سه‌ركرد بۆئه‌وه‌ی بزانن هه‌ریه‌كه‌یان چی به‌رده‌كه‌وێت. ئه‌و كاته‌ی لهخاچیاندا كاژێری نۆی به‌یانی بوو، تاوانه‌كه‌شی به‌سه‌ر سه‌ریه‌وه نووسرابوو: پادشای جووله‌كه. له‌گه‌ڵ دوو دز لهخاچیاندا، یه‌كێ له‌ده‌ستی ڕاستیه‌وه، ئه‌ویكه‌ش له‌ده‌ستی چه‌پیه‌وه. [به‌مه نووسراوی كتێب هاته‌دی كه‌ده‌ڵێت: له‌ریزی تاوانباران دانرا.] ئه‌وانه‌ی به‌وێدا تێده‌په‌ڕین، قسه‌یان پێدهووتو گاڵته‌یان پێ‌ده‌كرد، سه‌ریان باده‌داو دهیانووت: (ها! ئه‌ی ڕوخێنه‌ری په‌رستگاو دروستكه‌ره‌وه‌ی به‌سێ ڕۆژ، له‌سه‌ر خاچه‌كه وه‌ره خواره‌وه‌و خۆت ڕزگار بكه.) به‌هه‌مان شێوه سه‌رۆك كاهینهكانو مامۆستایانی شه‌ریعه‌ت گاڵته‌یان پێدهكردو به‌یه‌كتریان ده‌ووت: (بزانه خهڵكیكهی ڕزگاركرد، به‌ڵام ناتوانێ خۆی ڕزگار بكات. با ئێستا مه‌سیحی پادشای ئیسرائیل له‌سه‌ر ئه‌و خاچه دابه‌زێت، تا هه‌موو ببینینو باوه‌ڕبهێنین.) ته‌نانه‌ت دزه‌كانیش كه له‌گه‌ڵی له‌خاچده‌دران گاڵته‌یان پێ‌ده‌كرد.
كاتێ بوو به‌دوانزه‌ی نیوه‌ڕۆ، تاریكی باڵی كێشا به‌سه‌ر زه‌ویداو زه‌وی هه‌موو تاریكبوو، تا كاژێری سێی پاش نیوه‌ڕۆ. له‌كاژێری سێی پاش نیوه‌ڕۆدا عیسا به‌ده‌نگێكی به‌رز هاواریكرد: (ئیلۆی، ئیلۆی، له‌ما شه‌به‌قته‌نی؟) به‌واتای (خودای من، خودای من، بۆ وازت لێهێنام؟) هه‌ندێ كه‌س كه له‌وێ ڕاوه‌ستابوون، كاتێ گوێیان له‌مه بوو ووتیان: (ئه‌وه بانگی ئه‌لیاس پێغه‌مبه‌ر ده‌كات.) یه‌كێ خێرا ڕایكردو ئه‌سفنجێكی له‌سركه هه‌ڵكێشاو كردی به‌سه‌ر قامیشێكه‌وه‌و دایپێی، تاكو لێیبخواتهوهو ووتی: (بابزانین ئه‌لیاس دێت دایبگرێت!)
ئینجا عیسا به‌ده‌نگێكی به‌رز هاواریكردو ڕۆحی دابه‌ده‌سته‌وه. په‌رده‌ی په‌رستگاش له‌سه‌ره‌وه تاخواره‌وه دڕاو بوو به‌دوو به‌شه‌وه. كاتێ ئه‌و سه‌رپه‌له‌ی به‌رامبه‌ری ڕاوه‌ستابوو، بینی عیسا چۆن ڕۆحی سپارد، ووتی: (به‌ڕاستی ئه‌م مرۆڤه ڕۆڵه‌ی خودا بوو!) ژنێكی زۆر له‌دووره‌وه ته‌ماشای ڕووداوه‌كه‌یان ده‌كرد، له‌نێوانیاندا مریه‌می مهجدهلیو مریه‌می دایكی یاقوبی بچووكو یوسفو سالومه‌یان له‌گه‌ڵ بوو، ئه‌مانیش ئه‌وانه بوون كه‌به‌دوای عیسادا دهڕۆیشتنو خزمه‌تیان ده‌كرد كاتێ له‌جه‌لیل بوو، هه‌روه‌ها زۆر ژنی تریش له‌گه‌ڵی هاتبوون بۆ قودس.
ناشتنی عیسا
كاتێ ئێواره داهات، ئه‌و ڕۆژه ڕۆژی خۆئاماده‌كردن بوو، مانای ڕۆژێك پێش ڕۆژی شه‌ممه، یوسف كه‌خه‌ڵكی شاری ڕامه بوو، ئه‌ندامێكی به‌رزی ئه‌نجوومه‌نی باڵای جووله‌كه‌بوو، ئه‌ویش له‌وانه‌بوو كه چاوه‌ڕێی پادشاهێتی خودایان ده‌كرد، هاتو بێترس چووه لای پیلاتۆسو داوای ته‌رمه‌كه‌ی عیسایكرد. پیلاتۆس سه‌ری سوڕما له‌وه‌ی كه عیسا مردووه، سه‌رپه‌له‌كه‌ی بانگكردو لێیپرسی: (ئایا ده‌مێكه مردووه؟) كاتێ سه‌رپه‌له‌كه باسه‌كه‌ی بۆ گێڕایه‌وه، فهرمانیدا ته‌رمه‌كه‌ی عیسا بده‌ن به‌یوسف. ئینجا یوسف كه‌تانی كڕی، لاشه‌كه‌ی داگرتو به‌كه‌تان كفنیكردو له‌گۆڕێكدا ناشتی كه له‌به‌رد هه‌ڵكه‌نرا بوو. دوایی به‌ردێكی گلۆر كرده‌وه به‌ر ده‌رگای گۆڕه‌كه. مریه‌می مهجدهلیو مریه‌مه‌كه‌یتر كه دایكی یوسف بوو، سه‌یریان ده‌كرد بۆ ئه‌وه‌ی بزانن له‌كوێ ده‌نێژرێ.
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.