Biblica® Open Sorani Kurdish Book of Life
مەرقۆس 1
ده‌ركه‌وتنی حه‌زره‌تی یه‌حیا
ئه‌مه سه‌ره‌تای مزگێنی عیسای مه‌سیحی ڕۆڵه‌ی خودایه: به‌پێی ئه‌وه‌ی له‌په‌رتووكی ئه‌شعیای پێغه‌مبه‌ردا نووسراوه: [[ئا ئه‌وه‌تا من نێرراوی خۆم له‌پێشته‌وه ده‌نێرم، ئه‌وه‌ی ڕێگات بۆ ئاماده ده‌كات. ده‌نگێك لهدهشتودهر بانگه‌واز ده‌كات، ڕێگا بۆ خوداوه‌ند ئاماده‌بكه‌ن، ڕێڕه‌وی ڕێك بخه‌ن.]] ئه‌وه‌بوو یه‌حیای خه‌ڵك له‌ئاوهه‌ڵكێش له‌ده‌شت ده‌ركه‌وت، له‌ئاوهه‌ڵكێشانی تۆبه‌كردنی ڕاگه‌یاند بۆ گوناه به‌خشین. دانیشتوانی ووڵاتی یه‌هودیاو قودس، هه‌موو هاتنه لای یه‌حیا، تا له‌ڕووباری ئوردون له‌سه‌ر ده‌ستی ئه‌و لهئاوههڵكێشرێنو دان به‌گوناهه‌كانیان بنێن. جلو به‌رگی یه‌حیا بریتیبوو له‌مووی ووشتر، ناوقه‌دی به‌پارچه چه‌رمێك به‌سترا بوو، خواردنیشی بریتی بوو له‌هه‌نگوینی كێویو كولله. ئه‌مه‌ش ڕاگه‌یاندنه‌كه‌ی ئه‌و بوو: (له‌دوای من یه‌كێك دێت زۆر له‌من به‌تواناتره، یه‌كێكه ته‌نانه‌ت شایانی ئـه‌وه‌نیم قه‌یتانی پێڵاوه‌كانیشی بكه‌مه‌وه. من له‌ئاو هه‌ڵتان ده‌كێشم، به‌ڵام ئه‌و له‌ڕۆحی پیرۆز هه‌ڵتان ده‌كێشێت.)
له‌ئاوهه‌ڵكێشانی عیسا
له‌و ڕۆژانه‌دا، له‌شاری ناسیره‌ی ناوچه‌ی جه‌لیل عیسا هات، له‌سه‌ر ده‌ستی یه‌حیا له‌ڕووباری ئوردن له‌ئاوهه‌ڵكێشرا. كاتێ له‌ئاوه‌كه به‌رزبووه‌وه، بینی ئاسمان كرایه‌وه، ڕۆحی پیرۆز له‌شێوه‌ی كۆترێك له‌سه‌ری نیشته‌وه‌و ده‌نگێك له‌ئاسمانه‌وه ووتی: (تۆی ڕۆڵـــه‌ی خۆشه‌ویستم، ئه‌وه‌ی پێی دڵشادم.)
دوای ئه‌مه عیسا له‌لایه‌ن ڕۆحی پیرۆزه‌وه برایه دهشتودهر. چل ڕۆژ له‌وێدا له‌ناو مارو مێروودا مایه‌وه، شه‌یتان هه‌ر له‌گه‌ڵی خه‌ریك بوو تاكو تاقی بكاته‌وه، فریشته‌ی ئاسمانیش له‌و كاته‌دا خزمه‌تیان ده‌كرد.
عیسا قوتابیه‌كانی هه‌ڵده‌بژێرێ
دوای ئه‌وه‌ی یه‌حیا گیرا، عیسا گه‌ڕایه‌وه بۆ ناوچه‌ی جه‌لیل، مزگێنی خودای ڕاده‌گه‌یاندو ده‌یووت: (كاته‌كه هاتووه‌و پادشاهێتی خودا نزیـكبـووهتهوه، تـۆبـهبكـهنو باوه‌ڕبهێنن به‌م مزگێنییه.)
له‌كاتێكدا عیسا له‌سه‌ر كه‌ناری ده‌ریای جه‌لیل ده‌ڕۆیشت شهمعونو ئه‌ندراوسی برای بینی، خه‌ریكی ئه‌وه‌بوون تۆڕی ماسی فڕێ بده‌نه ده‌ریاچه‌كه‌وه، هه‌ردووكیان ماسیگر بوون. عیسا پێی ووتن: (وه‌رن دوام بكه‌ون، ده‌تانكه‌م به‌ڕاوكه‌ری مرۆڤ.) ئه‌وانیش ده‌ستبه‌جێ تۆڕه‌كانیان بهجێهێشتو دوایكه‌وتن. ئینجا هه‌ندێك له‌وێ دووركه‌وته‌وه، یاقوبی كوڕی زه‌بدیو یۆحــه‌ننای برای بینی، لـه‌به‌له‌مێكدا خـه‌ریكی چاككردنی تۆڕه‌كانیان بوون. یه‌كسه‌ر بانگی كردن تا دوای كه‌ون، ئه‌وانیش زه‌بدی باوكیان له‌گه‌ڵ ئیشكه‌ره‌كانیتر له‌به‌له‌مه‌كه‌دا بهجێهێشتو دوایكه‌وتن.
ده‌ركردنی ڕۆحی پیس
ئینجا هه‌موو ڕۆیشتن بۆ شاری كه‌فه‌رناحوم. له‌ڕۆژی شه‌ممه‌دا عیسا چووه كهنیشتو ده‌ستیكرد به‌فێركردن. ئه‌وانه‌ی له‌وێ بوون هه‌موو سه‌رسام بوون، چونكه وه‌ك ده‌سـه‌ڵاتـدارێك فــێری ده‌كــردن، نه‌ك وه‌كو مامۆستایانی شه‌ریعه‌ت. له‌كه‌نیشته‌كه پیاوێكی لێبوو ڕۆحی پیسی تیابوو، هاواری كردو ووتی: (ئه‌ی عیسای ناسیری چیت ده‌وێ لێمان؟ هاتووی بمانكوژیت؟ من ده‌زانم تۆ كێیت. تۆ پیرۆزی خودای!) عیسا هه‌ڕه‌شه‌ی لێ‌كردو ووتی: (بێدهنگبهو له‌و كابرایه وه‌ره ده‌ره‌وه!) ئینجا ڕۆحه پیسه‌كه كابراكه‌ی كوتا به‌زه‌ویداو هاوارێكی بهرزیكردو لێی هاته‌ده‌ره‌وه. خه‌ڵكه‌كه هه‌موو سه‌ریان سوڕماو كه‌وتنه پرسیار له‌یه‌كتری: ئه‌مه چییه؟ ئه‌م فێركردنه تازه‌یه به‌ده‌سه‌ڵاته‌وه‌یه، ته‌نانه‌ت ڕۆحه پیسه‌كانیش ملكه‌چن بۆی كاتێ فه‌رمانیان به‌سه‌ر ده‌دات). ده‌ستبه‌جێ ناوبانگی عیسا، له‌هه‌موو ناوچه‌ی جهلیلو ده‌وروپشتی بڵاوبووه‌وه.
چاكردنه‌وه‌ی خه‌ڵكێكی زۆر
كاتێ كه‌نیشته‌كه‌یان به‌جێ‌هێشت، چوون بۆ ماڵی شه‌معون، ئهندراوسو یاقوبو یۆحه‌نناشیان له‌گه‌ڵدا بوو. خه‌سووی شه‌معون له‌ناو جێ كه‌وتبوو له‌رزوتای هه‌بوو، خێرا ئه‌مه‌یان به‌عیسا ووت. عیساش لێینزیك بووه‌وه، ده‌ستی گرتو هه‌ڵیسانده‌وه سه‌رپێ. ده‌ستبه‌جێ له‌رزوتاكه‌ی نه‌ماو هه‌ستا بۆ خزمه‌تكردنیان. كاتێ ئێواره داهاتو ڕۆژئاوا بوو، خه‌ڵكه‌كه چی نه‌خۆشیان هه‌بوو له‌گه‌ڵ ئه‌وانه‌ی ڕۆحی پیسیان تێدابوو، هه‌موویان هێنایه لای. خه‌ڵكی شاره‌كه هه‌موو به‌رده‌رگای ماڵه‌كه‌یان لێگرتبوو، خه‌ڵكێكی زۆری چاككردهوه له‌جۆره‌ها نه‌خۆشی، هه‌روه‌ها ڕۆحی پیسی له‌زۆریان ده‌ركرد، بێئهوهی بهێڵێ قسه بكه‌ن، چونكه ده‌یانزانی كێیه.
مزگێنیدان له‌ناوچه‌ی جه‌لیل
بۆ ڕۆژی دوایی، به‌ره‌به‌یان پێش ده‌ركه‌وتنی ئاسۆ هه‌ستاو چووه شوێنێكی چۆڵهوانیو ده‌ستیكرد به‌نوێژكردن. شــهمـعـونو هـاوڕێكـانی به‌شوێن عیسادا گـه‌ڕان، كـه دۆزییـانـه‌وه پێیان ووت: (هه‌مـوو خه‌ڵـكـه‌كـه داوات ده‌كه‌ن.) ئه‌ویش پێی ووتن: (وه‌رن بـابـڕۆین بۆ ئــه‌م دێیانــه‌ی ده‌وروپشـت، تا لـه‌وێش ووشـه‌ی خـودا ڕابگه‌ێنم، چونكه لـه‌به‌ر ئه‌مــه هــاتـووم.) ئینجا ڕۆیشــت تاوه‌كو له‌كه‌نیشته‌كانی ناوچه‌ی جه‌لیل ووشه‌ی خودا ڕابگه‌ێنێ‌و ڕۆحی پیس لــه‌خـه‌ڵـكی ده‌ربكــات.
پاكبوونه‌وه‌ی نه‌خۆشی گولـی
یه‌كێك نه‌خۆشی گولی هه‌بوو، هاتو لێی پاڕایه‌وه، كه‌وته سه‌رچۆك له‌به‌رده‌میه‌و ووتی: (گه‌ر بته‌وێ پاكم ده‌كه‌یته‌وه) عیسا به‌زه‌یی پیاهاته‌وه، ده‌ستی لێیداو ووتی: (ده‌مه‌وێ، پاكبهرهوه.) هه‌ر كه ئه‌مه‌ی ووت، كابرا برینه‌كانی نه‌ماو پاك بووه‌وه. عیسا ده‌ستبه‌جێ ڕه‌وانه‌یكـردو به‌توندی ئاگاداریكرده‌وه‌و ووتی: (ئاگاداربه، ئه‌مه به‌كه‌س مه‌ڵێ، به‌ڵكو بڕۆ خۆت نیشانی كاهین بده، ئه‌و قوربانییه پێشكـه‌ش بكـه كه موسا فه‌رمانی پێداوه، بۆ پاكبوونه‌وه‌كه‌ت، وه‌ك شایه‌تییه‌ك بۆیان.) به‌ڵام كـابرا، ڕۆیشتو ئه‌م هه‌واڵه‌ی له‌هه‌موو لایه‌ك بڵاوكرده‌وه، ئیتر عیسا له‌وناوه نه‌یتوانی به‌ئاشكرا بچێته شاره‌كان، له‌شوێنی چۆڵه‌وانی ده‌مایه‌وه‌و خه‌ڵكی له‌هه‌موو لایه‌كه‌وه ده‌هاتنه لای.
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.