Biblica® Open Sorani Kurdish Book of Life
لۆقا 24
زیندووبوونه‌وه‌ی عیسای مه‌سیح
ئافره‌ته‌كان، ڕۆژی یه‌ك شه‌ممه به‌یانی زوو، بهخۆیانو ئه‌و بۆنو بابه‌تی مانه‌وه‌ی ئاماده‌یان كردبوو، هاتنه سه‌ر گۆڕه‌كه. سه‌یریان كرد به‌ردی سه‌ر گۆڕه‌كه لاچووه، به‌ڵام كه چوونه‌ژووره‌وه، سهیریانكرد ته‌رمه‌كه‌ی عیسای خوداوه‌ند نه‌ماوه. كاتێ له‌م كاره سه‌ریان سووڕمابوو، له‌پڕ دوو پیاویان بهجلی بریسكه‌داره‌وه به‌ته‌نیشتی خۆیانه‌وه بینی. ترس دایگرتنو سه‌ریان شۆڕ كرده سه‌ر زه‌وی، دوو كابراكه ووتیان: (بۆچی ده‌گه‌ڕێن به‌دوای یه‌كێكی زیندوو له‌ناو مردوواندا؟ ئه‌و لێره نییه، زیندووبووه‌ته‌وه، بیركه‌نه‌وه له‌وه‌ی لهجهلیل پێی ووتن، كاتێ ووتی: ڕۆڵه‌ی مرۆڤ، پێویسته بدرێ به‌ده‌ست گوناهبارانه‌وه، ئینجا لهخاچبدرێو له‌ڕۆژی سێهه‌م هه‌ستێته‌وه.) ئینجا قسه‌كانی عیسایان هاته‌وه یاد. گۆڕه‌كه‌یان بهجێهێشتو گه‌ڕانه‌وه، هه‌واڵی هه‌موو ئه‌م شتانه‌یان بهیانزه قوتابیه‌كه‌و ئهوانیتر دا. ئه‌و ژنانه‌ش كه هه‌واڵی ئه‌م شتانه‌یان به‌نێرراوان ڕاگه‌یاند، بریتی بوون له‌مریه‌می مه‌جده‌لـیو یۆناو مریه‌می دایكی یاقوبو هه‌ندێ ئافرهتیتر كه له‌گه‌ڵیان هاتبوون. گێڕانه‌وه‌ی قسه‌كانیان هه‌ر لهوڕێنهی ده‌كرد، بۆیه باوه‌ڕیان پێ‌نه‌كردن. ئینجا په‌ترۆس هه‌ستاو ڕایكرد بۆ سه‌ر گۆڕه‌كه، كاتێ دانه‌ویه‌وه ته‌نها ئه‌و كفنه‌ی بینی كه تێیه‌وه پێچرابوو، ئینجا زۆر به‌سه‌رسوڕمانه‌وه له‌وه‌ی كه ڕوویدا بوو، ئه‌وێی به‌جێ‌هێشت.
دووان لهقوتابیهكان عیسا ده‌بینن
دووان له‌قوتابیه‌كانی، له‌و ڕۆژه‌دا چوون بۆ دیێ عیمواس، كه ته‌نها حه‌وت میل له قودسه‌وه دوور بوو. لهڕێ باسی ئه‌و هه‌موو شتانه‌یان ده‌كرد كه ڕوویدابوو. له‌وكاته‌دا قسه‌یان ده‌كرد، عیسا خۆی نزیك بووه‌وه لێیانو له‌گه‌ڵیان ڕۆیی به‌ڕێدا. به‌ڵام چاویان به‌سترا له‌ناسینی. عیسا لێیپرسین: (ئه‌وه باسی چی ده‌كه‌ن به‌ڕێوه؟) ئه‌وانیش به‌دڵته‌نگیه‌وه ڕاوه‌ستان، یه‌كێكیان كه ناوی كلیۆپاس بوو ووتی: (چیه، ده‌ڵێی تۆ نامۆیت له‌قودس لات داوه، ئاگات لهوهنییه كه له‌م ڕۆژانه‌دا ڕوویداوه؟) ئه‌ویش پێی ووتن: (چی ڕووی داوه؟) ئه‌وانیش ووتیان: (ئه‌وه‌ی سه‌باره‌ت به‌عیسای ناسیری ڕوویداوه، پێغه‌مبه‌رێكی تواناداربوو له‌قسه‌و كرداری له‌لای خوداو هه‌موو گه‌ل. به‌ڵام سه‌رۆك كاهینهكانمانو فه‌رمانڕه‌واكان دایانبهدهستهوه بۆ لهخاچدانو مردن. ئێمه هیوامان به‌و هه‌بوو، كه به خوێنی خۆی ئیسرائیل ده‌كڕیته‌وه، له‌گه‌ڵ هه‌موو ئه‌مانه‌شدا ئه‌مڕۆ سێهه‌م ڕۆژه ئه‌مه ڕوویداوه. هه‌ندێ له‌و ئافره‌تانه‌ی له‌گه‌ڵمانن به‌هه‌واڵێك زۆر سه‌رسامیان كردین، چونكه به‌یانی زوو چووبوونه سه‌ر گۆڕه‌كه، ته‌رمه‌كه‌یان نه‌بینی بوو، ئینجا گه‌ڕانه‌وه‌و ئه‌مه‌یان باسكردو ووتیان: ئێمه دوو فریشته‌مان بینی ده‌یان ووت: ئه‌و زیندووه. هه‌ندێ لهئێمه چوونه سه‌ر گۆڕه‌كه‌و سهیریانكرد ئه‌وه‌ی ئافره‌ته‌كان گێڕایانه‌وه ڕاسته‌و لهگۆڕهكهدا كه‌سیان نه‌بینی.) ئینجا عیسا پێی ووتن: (ئه‌ی تێ‌نه‌گه‌یشتووان، ئه‌ی كه‌م باوه‌ڕان به هه‌موو ئه‌وانه‌ی كه پێغه‌مبه‌ران باسیان كردووه، ئه‌ی باشه نه‌ده‌بووایه مه‌سیح ئه‌م ئازارانه بچێژێ‌و ئینجا بچێته شوێنی شكۆمه‌ندی خۆی.) ئه‌وسا دهستیكرد به‌ڕوونكردنه‌وه‌ی ئه‌و شتانه‌ی له‌سه‌ری نووسراوه، هه‌ر له‌ته‌وراتی موساوه تا گشت په‌رتووكه‌كانی پێغه‌مبه‌ران.
وورده وورده نزیك ده‌بوونه‌وه له‌و دێیه‌ی قوتابیه‌كان بۆی هاتبوون. عیسا وا خۆی نیشاندا ئه‌و ده‌ڕوات بۆ شوێنێكی دوورتر. قوتابیه‌كان زۆریان لـێ‌كردو ووتیان: (ئه‌وا ڕۆژئاوا دهبێتو تاریك دادێت، بمێنه‌وه لامان.) ئه‌ویش به‌مه ڕازی بوو، له‌گه‌ڵیان هاته ماڵه‌وه. كاتێ له‌سه‌ر خوان دانیشتن، ده‌ستی برد نانێكی هه‌ڵگرت، پیرۆزی كردو له‌تیكرد، ئینجا دای پێیان. دهستبهجێ چاویان كرایه‌وه‌و ناسیانه‌وه، ئیتر له‌به‌رچاویان نه‌ما. به‌یه‌كتریان ووت: (ئه‌مه بۆیه كاتێ قسه‌ی بۆ ده‌كردین، دڵمان له‌ناو سنگماندا وه‌ك ئاگر گڕی گرتبوو.) دوای ئه‌مه یه‌كسه‌ر ههستانو گه‌ڕانه‌وه بۆ قودس، سهیریانكرد یانزه قوتابیه‌كه‌و ئه‌وانه‌ی له‌گه‌ڵیانن، هه‌موو كۆبوونه‌ته‌وه، ده‌یان ووت: (ڕاسته! گه‌وره‌مان هه‌ستاوه‌ته‌وه، دهریشكهوتووه بۆ شه‌معون.) ئینجا هه‌ر دووكیان دهستیانكرد به‌گێڕانه‌وه‌ی ئه‌وه‌ی له‌ڕێگا ڕوویدابوو، هه‌روه‌ها چۆن له‌كاتی نان لهتكردنهكهدا ناسییانه‌وه.
عیسا بۆ نێرراوان ده‌رده‌كه‌وێ
كاتێ باسی ئه‌مه‌یان ده‌كرد، عیسا خۆی هاته ناوهڕاستیانو له‌نێوانیان ڕاوه‌ستا، پێی ووتن: (سڵاوتان لـێ‌بێت.) به‌ڵام له‌به‌ر ترسو له‌رزی خۆیان وایانزانی ئه‌مه ڕۆحه. عیسا پێی ووتن: (ئه‌وه بۆچی واسه‌رتان لـێ‌شێواوه؟ بۆچی بیری وادێ به‌دڵتان؟ سه‌یری دهستو قاچم بكه‌ن، ده‌ستم لـێدهنو دڵنیابن كه من ئه‌وم، چونكه ڕۆح گۆشتو ئێسقانی نییه وه‌ك من ئێستا هه‌مه.) كاتێ ئه‌مه‌ی ووت دهستو قاچی نیشاندان. له‌خۆشیو سه‌رسوڕماندا بهتهواوی باوه‌ڕیان نه‌ده‌كرد، ئینجا پێی ووتن: (هیچتان لێره هه‌یه بخورێت؟) ئیتر ئه‌وانیش پارچه‌یه‌ك ماسی برژاویان دایه، ئه‌ویش لێیوهرگرتنو له‌به‌رچاویان خواردی.
ئه‌وسا پێی ووتن: (ئا ئه‌مه‌یه ئه‌و قسانه‌ی بۆم ده‌كردن، كاتێ له‌گه‌ڵتان بووم: پێویسته هه‌موو ئه‌وانه‌ی له‌ته‌وراتی موساو په‌رتووكی پێغهمبهرانو زه‌بوور ده‌رباره‌ی من نووسراون بێته‌دی.) ئینجا بیرو هۆشی كردنه‌وه، تا كتێبی پیرۆز تێ‌بگه‌ن. پێی ووتن: (ئاوها نووسراوه، پێویست بوو مه‌سیح ئازاربكێشێو بمرێ‌و دوایی له‌ڕۆژی سێهه‌م زیندووبێته‌وه. هه‌روه‌ها به‌ناوی ئه‌وه‌وه تۆبهكردنو لێخۆشبوونی گوناه ڕابگه‌یندرێ بۆ هه‌موو گه‌لان، به‌ده‌ست پێ‌كردن له‌قودسه‌وه. ئێوه شایه‌تی ئه‌م شتانه‌ن. ئه‌وه‌ی باوكم به‌ڵێنی پێ‌دابوو من خۆم بۆتانی ده‌نێرم، به‌ڵام جارێ له‌ناو شار بمێننه‌وه، تا ئهوكاتهی لهئاسمانهوه جلی به‌هێزیتان له‌به‌رده‌كرێت.)
گه‌ڕانه‌وه‌ی عیسا بۆ ئاسمان
دوای ئه‌مـه پێشیان كـهوتو بردنی بۆ دێی بهیتعـهنیا، ده‌ستی به‌رزكـرده‌وه‌و پیرۆزیكردن. لهوكـاتهدا كه پیرۆزی ده‌كـردن، لێیان جـیابووه‌وه‌و به‌رزبووه‌وه بۆ ئاسمان. چۆكیان بۆ داداو ئیتر زۆر بهشادیهوه گه‌ڕانه‌وه بۆ قودس. به به‌رده‌وامیش ده‌ڕۆیشتن بۆ په‌رستگاو ستایشی خودایان ده‌كرد
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.