Biblica® Open Sorani Kurdish Book of Life
لۆقا 1
چۆن ئه‌م مزگێنییه نووسرا
ئه‌ی پـایه‌به‌رز سـاوفیلۆس*، كاتـێ زۆر كـه‌س هه‌سـتان به‌نووسـینی ئه‌و ڕووداوانـه‌ی لای ئـێـمه ڕوویـدابـوو، به‌پێی ئه‌وه‌ی بهدهستمان گه‌یشتبوو، له‌وانه‌ی له‌سـه‌ره‌تاوه بـیـنـه‌ری ڕووداوهكـانو خـزمه‌تـكـاری ووشــه‌كـه بـوون. دوای ئـه‌وه‌ی هــه‌مـوو شـتێكم به ووردی لـه‌سـه‌ره‌تای باسـه‌كـه‌وه پشكنی، وام بهباش زانی بهڕیـَكوپێكـیو یه‌ك لـه‌دوای یه‌ك بۆتی بنووسم، تاكو ڕاسـتی ئه‌و شـتانه بزانی كه ڕاگه‌ێندراوه.
مزگێنی لهدایكبوونی یه‌حیا
له‌سه‌رده‌می هێرۆدسی پادشای ناوچه‌ی یه‌هودیا، كاهینێك* هه‌بوو ناوی زه‌كه‌ریا* بوو له‌كۆمه‌ڵه‌ی ئه‌بیا، ژنه‌كه‌شی ناوی ئه‌لیسابات بوو لهنهوهی هاڕون*، هه‌ردووكیان مرۆڤی چاك بوون له‌به‌رچاوی خودا، په‌یڕه‌وی ڕاسپاردهكانو فێركردنه‌كانی خوداوه‌ندیان ده‌كرد به‌بێ كهموكوڕی. منداڵیان نه‌بوو، چونكه ئه‌لیسابات نه‌زۆك بوو، هه‌ردووكیشیان زۆر به‌ساڵدا چووبوون.
له‌كاتێكدا زه‌كه‌ریا لهنۆرهی كۆمه‌ڵه‌كه‌ی خۆیدا كاروباری كاهینایه‌تی جێ‌به‌جێ ده‌كرد. به‌پێی نه‌ریتی ئه‌وسای كاهینایه‌تی نۆره‌ی هات بچێته ناو په‌رستگای خوداوه‌ند*و بخورد بسووتێنێ. له‌كاتی سووتانی بخورده‌كه‌دا، خه‌ڵكی هه‌موو لهدهرهوه نوێژیان ده‌كرد. له‌لای ڕاستی قوربانگه‌ی* بخورده‌كه‌وه فریشته‌یه‌كی خوداوه‌ند ده‌ركه‌وت. كاتێ زه‌كه‌ریا ئه‌مه‌ی بینی، تێك چوو، ترسی لـێ‌نیشت. به‌ڵام فریشته‌كه پێی ووت: (ئه‌ی زه‌كه‌ریا مه‌ترسه، چونكه نوێژه‌كه‌ت بیسترا، هه‌روه‌ها ژنه‌كه‌ت ئه‌لیسابات له تۆ كوڕێكی دهبێتو ناوی ده‌نێیت یه‌حیا. پێی شادومان دهبیتو زۆر كه‌س به له‌دایك بوونی دڵخۆش ده‌بن. چونكه لای خوداوه‌ند مه‌زن ده‌بێت. شهرابو مه‌ی ناخواته‌وه، هه‌ر له‌سكی دایكیه‌وه پڕ ده‌بێت له‌ڕۆحی پیرۆز. هه‌روه‌ها زۆر لهڕۆڵهكانی ئیسرائیل بۆ لای خوداوه‌ندی خۆیان ده‌گه‌ڕێنێته‌وه. بهڕۆحو توانای ئه‌لیاسه‌وه پێش خوداوه‌ند ده‌كه‌وێت، تا باوكان له‌گه‌ڵ مناڵاندا ئاشتبكاتهوهو یاخیبووان بگه‌ڕێنێته‌وه بۆ دانایی ڕاستودروستان، ئینجا گه‌ل بۆ خوداوه‌ند ئاماده‌بكات.) زه‌كه‌ریاش بهفریشتهكهی ووت: (به‌چی ئه‌مه بزانم، چونكه من پیاوێكی بهتهمهنمو ژنه‌كه‌شم به‌ساڵدا چووه؟) فریشته‌كه وه‌ڵامیدایه‌وه: (من ئه‌و جبرائیله‌م لهبارهگای خودا ڕاده‌وه‌ستم، نێرراوم بۆ ئه‌وه‌ی له‌گه‌ڵت بدوێمو ئه‌م مژده‌یه‌ت بده‌مێ. جا ئه‌وه‌تا تۆ لاڵ دهبیتو توانای قسه‌كردنت نامێنێ تا ئه‌و ڕۆژه‌ی ئه‌مه‌ی تیا ده‌بێت، چونكه باوه‌ڕت بهووتهكانم نه‌كرد، ئه‌وه‌ی له‌كاتی خۆی دێته‌دی.) خه‌ڵكه‌كه چاوه‌ڕوانی زه‌كه‌ریا یان ده‌كردو سه‌رسام بووبوون لهدواكهوتنی له‌ناو په‌رستگادا. به‌ڵام كاتێ هاتهدهرهوه نه‌یتوانی له‌گه‌ڵیان بدوێ، ئینجا زانییان كه له‌په‌رستگادا بینینی خودایی دیوه. به‌ئیشاره‌ت له‌گه‌ڵیان ده‌دواو هه‌ر به‌لاڵی مایه‌وه. كاتێ ڕۆژانی خزمهتكردنی له‌ناو په‌رستگادا تهواوبوو، گه‌ڕایه‌وه بۆ ماڵه‌وه.
دوای ئه‌وه، ئه‌لیساباتی ژنی سكی پڕبوو، ماوه‌ی پێنج مانگ ئه‌م شته‌ی شارده‌وه‌و ده‌یووت: ( خوداوه‌ند وایلـێكردم، له‌م ڕۆژانه‌دا ئاوڕی لـێ‌دامه‌وه بۆ ئه‌وه‌ی شوره‌ییو سه‌ر شۆڕیم له‌ناو خه‌ڵكی له‌سه‌ر لابه‌رێ.)
مزگێنی لهدایكبوونی عیسا
كاتێ ئه‌لیسابات سكی شه‌ش مانگبوو، جبرائیلی فریشته لهلایهن خوداوه نێررا بۆ شارێك له‌ناوچه‌ی جه‌لیل ناوی ناسیره بوو، بۆ لای كچێكی نیشانكراو له‌پیاوێك ناوی یوسف بوو، لهبنهماڵهی داود، ناوی ئه‌م كچه‌ش مریه‌م بوو. فریشته‌كه هاته لایو پێی ووت: (ئه‌ی ئه‌و كه‌سه‌ی به‌ره‌كه‌تی خودات به‌سه‌ردا ڕژاوه، سڵاوت لـێبێ، خوداوه‌ندت له‌گه‌ڵه.) مریه‌م به‌ووته‌ی فریشته‌كه شێواو بیری كرده‌وه ده‌بێ ئه‌م جۆره سڵاوكردنه چیبێت. فریشته‌كه پێی ووت: (مه‌ترسه ئه‌ی مریه‌م، خودا به‌ره‌كه‌تی پێت داوه، ئا ئه‌وه‌تا سكت پڕ ده‌بێ‌و كوڕێكت ده‌بێ ناوی ده‌نێیت عیسا. ئه‌و مه‌زن ده‌بێت، به‌ڕۆڵه‌ی خودا ناوده‌برێت، خوداوه‌ند خوداش ته‌ختی داودی باوكی پێ‌ده‌به‌خشێ. هــه‌روه‌هــا تـاهه‌تایه به‌سه‌ر ماڵی یاقوبدا فه‌رمانڕه‌وایه‌تی ده‌كات، پادشاهێتیه‌كه‌شی كۆتایی بۆ نییه.) مریه‌م بهفریشتهكهی ووت: (چۆن شتیوا ڕوو ده‌دا كه من شووم نه‌كردبێ؟) فریشته‌كه وه‌ڵامی دایه‌وه: ( ڕۆحی پیرۆز دێ به‌سه‌رتاو هێزی خودا سایه‌ی سه‌رت ده‌بێت. چونكه ئه‌و پیرۆزه‌ی لێت ده‌بێت به‌ڕۆڵه‌ی خودا ناوده‌برێت. ئه‌وه‌تا ئه‌لیساباتی خزمیشت به‌و ته‌مه‌نه به‌ساڵدا چووه‌وه سكی پڕه به كوڕێك. ئا ئه‌وه‌ی پێیان ده‌ووت نه‌زۆك سكی شه‌ش مانگه. چونكه هیچ شتێك نییه لای خودا نه‌بێت.) مریه‌م ووتی: (من خزمه‌تكاری خوداوه‌ندم. ئه‌وه‌ی ده‌یڵێیت ڕازیم به‌بوونی.) جا فریشته‌كه به‌جێیهێشت.
دیده‌نی مریهمو ئه‌لیسابات
هه‌ر له‌و ڕۆژانه‌دا، مریه‌م بهخێرایی به‌ره‌و شاخ ڕۆیشت، بهمهبهستی شارێك له شاره‌كانی ناوچه‌ی یه‌هوزا. چووه ماڵی زه‌كه‌ریاو سڵاوی لهئهلیسابات كرد. كاتێ ئه‌لیسابات گوێی لهسڵاوی مریه‌م بوو، منداڵه‌كه له‌سكیدا جوڵا، ئینجا ئه‌لیسابات پڕبوو له‌ڕۆحی پیرۆز.
بهدهنگێكی به‌رز هاواریكردو ووتی: (تۆ له‌ناو ژناندا پیرۆزیت، پیرۆزه ئه‌وه‌ی لهسكتدایه. منكێم هه‌تا دایكی گه‌وره‌كه‌م بێت بۆ لام؟ كه سڵاوی تۆ گه‌یشته گوێم، لهخۆشیدا منداڵه‌كه لهسكمدا جوڵایه‌وه. خۆزگه ده‌خوازرێ به‌وه‌ی باوه‌ڕی هێناوه به‌وه‌ی چی لهخوداوهندهوه پێی ووتراوه دێته‌دی.)
ستایشی مریه‌م
مریه‌م ووتی: (گیانم ستایشی خوداوه‌ند ده‌كات، ڕۆحم دڵشاده به‌خودای ڕزگاركه‌رم. چونكه سه‌یری ساكاری كاره‌كه‌ره‌كه‌یكرد، ئه‌وه‌تا له‌ئێستا به‌دواوه هه‌موو نه‌وه‌كان خۆزگه‌م پێدهخوازن. چونكه توانادار كاری مه‌زنی بهمن ئهنجامدا، پاكوپیرۆزه ناوی ئه‌و، به‌زه‌یی بۆ ئه‌وانه‌یه كه نه‌وه دوای نه‌وه لیێ‌ده‌ترسن. هێزی ده‌ستی ده‌رخست، خواستی لووت به‌رزه‌كانی ته‌فروتونا كرد له‌بۆچوونه‌كانی دڵیان، تواناداره‌كانی لهتهختهكانیان هێنایه خواره‌وه‌و ساكاره‌كانی بڵند كرده‌وه. برسییه‌كانی له‌خێرو به‌ره‌كه‌تی خۆی تێركرد، ده‌وڵه‌مه‌نده‌كانی بهدهستی به‌تاڵ ڕه‌وانه‌كرد. یارمه‌تی ئیسرائیلی خزمه‌تكاری خۆی داو به‌زه‌یی خۆی یادكه‌وته‌وه، هه‌ر وه‌كو چۆن قسه‌ی له‌گه‌ڵ باپیرانمان كردبوو، له‌گه‌ڵ ئیبراهیمو نه‌وه‌كانی بۆ هه‌تاهه‌تایه.) دوای ئه‌وه‌ی مریه‌م لای ئه‌لیسابات نزیكه‌ی سێ مانگ مایه‌وه، گه‌ڕایه‌وه بۆ ماڵه‌كه‌ی.
له دایكبوونی حه‌زره‌تی یه‌حیا
ئه‌لیسابات كاتی منداڵ بوونی هاتو كوڕێكی بوو. دراوسێكانیو خزمانی بیستیان كه خوداوه‌ند به‌زه‌یی مه‌زنی خۆی به‌سه‌ردا ڕژاندووه، له‌گه‌ڵی شادومان بوون. له‌ڕۆژی هه‌شته‌مدا ئامادهبوون، بۆ ئه‌وه‌ی كوڕه‌كه خه‌ته‌نه بكه‌ن، خه‌ریك بوو ناوی بنێن زه‌كه‌ریا، له‌سه‌ر ناوی باوكی. به‌ڵام دایكی ووتی: (نه‌خێر، به‌ڵكو ناوی ده‌نرێ یه‌حیا.) پێیان ووت: (كه‌س نییه له‌خێڵه‌كه‌تدا به‌م ناوه ناونرابێت.) به‌ئیشاره‌ت به‌باوكیان ووت: (چ ناوێكی ئه‌وێ ناوبنرێ؟) ته‌خته‌یه‌كی داواكردو له‌سه‌ری نووسی: (ناوی یه‌حیایه.) هه‌موویان له‌مه سه‌رسام بوون. دهستبهجێ زه‌كه‌ریا زمانی كرایهوهو ده‌ستی كرد به‌ستایش كردنی خودا. هه‌موو دراوسێكانی ترسیان لـێ‌نیشت، ئه‌م كارانه‌ش له‌ناوچه‌ی چیای یه‌هودیا، بوو به‌قسه‌و باسی ناو خه‌ڵكی. هه‌موو ئه‌وانه‌ی ئه‌مه‌یان بیست، ئه‌م باسه‌یان خسته دڵیانه‌وه، ووتیان: (ئایا ئه‌م منداڵه ده‌بێ به‌چی؟) چونكه ده‌ستی خوداوه‌ندی له‌گه‌ڵ بوو.
ستایشی زه‌كه‌ریا
زه‌كه‌ریای باوكی پڕبوو له‌ڕۆحی پیرۆز، به‌ووشه‌ی خودا دواو ووتی: ( ستایش بۆ خوداوه‌ند خودای ئیسرائیل، چونكه گه‌له‌كه‌ی به‌سه‌ركرده‌وه‌و به‌خوێن كڕییه‌وه. هێزیكی بۆ ڕزگاریمان هه‌ڵسانده‌وه لهماڵی داودی به‌نده‌ی خۆی. هه‌روه‌ك له‌كۆنه‌وه دواوه به‌زمانی پێغه‌مبه‌ره پیرۆزه‌كانیه‌وه. بۆ ڕزگاریمان لهدوژمنانو له‌ده‌ستی ناحه‌زانمان. بۆ ده‌رخستنی به‌زه‌یی خۆی به‌رامبه‌ر باپیرانمان. بۆ یادكردنه‌وه‌ی په‌یمانی پیرۆزی. ئه‌و سوێنده‌ی بۆ ئیبراهیمی باوكمانی خوارد. بۆ فریاكه‌وتنمان له‌ده‌ستی دوژمنان، تا بێترس بیپه‌رستین، بهپیرۆزیو ڕاستودروستی به‌رامبه‌ر ئه‌و هه‌موو ڕۆژانی ژیانمان. تۆش ئه‌ی منداڵ، پێغه‌مبه‌ری خودات پێ‌ده‌ووترێ، چونكه پێش خوداوه‌ند ده‌كه‌وی تا ڕێگای بۆ ئاماده بكه‌یت. تاكو گه‌له‌كه‌ی فێر بكه‌یت كه‌وا ڕزگاری بهلێخۆشبوونی گوناهیان ده‌بێت. چونكه به‌هۆی به‌زه‌ییو میهره‌بانی خودامان، خۆری به‌ره‌به‌یان له‌ئاسمانه‌وه بۆمان ده‌رده‌كه‌وێ. تا ڕووناكی بدات به‌وانه‌ی له‌ناو تاریكیو له‌سێبه‌ری مه‌رگدا دانیشتوون، تا قاچه‌كانمان به‌ره‌و ڕێگای ئاشتی ببات.) منداڵه‌كه گه‌شه‌ی ده‌كردو لهڕۆح به‌هێز ده‌بوو، لهدهشتودهر مایه‌وه تا ئه‌و ڕۆژه‌ی خۆی بۆ ئیسرائیل ده‌رخست.
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.