Biblica® Open Sorani Kurdish Book of Life
یۆحەنا 2
شایی له‌قانا
لهڕۆژی سێهه‌مدا لهدێی قانا لهناوچهی جه‌لیل شاییه‌ك هه‌بوو، دایكی عیساش ئاماده‌ی ئه‌و شاییه بوو، هه‌روه‌ها عیساو قوتابیه‌كانیشی بانگكرابوون بۆ ئه‌م شاییه. كاتێ شه‌راب ته‌واو بوو، دایكی چووه لای عیساو پێی ووت: (هیچ شه‌رابیان نه‌ماوه!) ئه‌ویش پێی ووت: (ئه‌مه په‌یوه‌ندی به‌منه‌وه هه‌یه یان به‌تۆ؟ هێشتا كاتی من نه‌هاتووه!) دوایی دایكی عیسا به‌ئیشكه‌ره‌كانی ووت: (ئه‌وه‌ی ئه‌و فه‌رمانتان پێ‌ده‌دات بیكه‌ن.) له‌وێدا شه‌ش كوپه‌ی به‌ردین هه‌بوو، جووله‌كه‌كان ئاوه‌كه‌یان به‌كارده‌هێنا بۆ پاككردنهوه به‌پێی خووڕه‌وشتی خۆیان، كوپه‌كان هه‌ریه‌كه‌ی هه‌شتا تا سه‌دو بیست لیتریان ده‌گرت. جا عیسا به‌ئیشكه‌ره‌كانی ووت: (كوپه‌كان پڕكه‌ن له‌ئاو.) ئه‌وانیش كوپه‌كانیان تا سه‌ر پڕكرد. ئه‌وسا پێی ووتن: (ئێستا لێیدهركهنو بیبه‌ن بۆ سه‌رپه‌رشتیكه‌ری شاییه‌كه!) ئه‌وانیش وایان كرد. كاتێ سه‌رپه‌رشتیكه‌ر تامی ئه‌و ئاوه‌ی كرد كه گۆڕابوو بۆ شه‌راب، به‌ڵام سه‌رچاوه‌كه‌ی نه‌ده‌زانی، ئه‌وه‌ی ئیشكه‌ره‌كان ده‌یانزانی چۆنه و چیه، ئه‌وسا زاوای بانگكردو پێی ووت: (خه‌ڵكی له‌پێشه‌وه شه‌رابه چاكه‌كه دادهنێنو دوای كه‌مێك خواردنه‌وه، شه‌رابی تر ده‌هێنن كه ئه‌وه‌نده باش نه‌بێ وه‌كو ئه‌وه‌ی یه‌كه‌م. به‌ڵام تۆ شه‌رابه باشه‌كه‌ت هێشتۆته‌وه بۆ ئێستا!)
ئه‌مه یه‌كه‌مین نیشانه‌ی سه‌رسوڕهێنه‌ر بوو كه عیسا لهدێی قانای ناوچه‌ی جه‌لیل كردی، ئه‌وه‌ی تیایدا شكۆمه‌ندی خۆی دهرخستو قوتابیه‌كانی باوه‌ڕیان پێ‌هێنا. دوای ئه‌مه عیساو دایكیو براكانیو قوتابیه‌كانی چوون بۆ شاری كه‌فه‌رناحوم، چه‌ند ڕۆژێك له‌وێ مانه‌وه.
پاكسازی په‌رستگا
كاتێ جه‌ژنی تێپه‌ڕبوونی جووله‌كه نزیك بووه‌وه، عیسا چوو بۆ قودس، له‌په‌رستگادا* ئه‌وانه‌ی بینی كه مانگاو مه‌ڕو كۆتریان ده‌فرۆشت، هه‌روه‌ها پاره‌گۆڕه‌وه‌كان له‌به‌رده‌م مێزه‌كانیان دانیشتبوون، عیسا له‌گوریس قامچیه‌كی دروستكردو ئه‌وانه‌ی له‌په‌رستگادا بوون بهخۆیانو مه‌ڕو مانگاوه هه‌موویانی ده‌ركرد. پاره‌ی پاره‌گۆڕه‌وه‌كانی په‌رشوبڵاوكرده‌وه‌و مێزه‌كانیانی سه‌ره‌وژێر كرد، ئینجا بهكۆتر فرۆشه‌كانی ووت: (ئه‌م شتانه لێره ببه‌نه ده‌ره‌وه! چۆن ده‌وێرن ماڵی باوكم بكه‌نه بازاڕ؟) لێره‌دا قوتابیه‌كان ئه‌و ئایه‌ته‌یان بیركه‌وته‌وه كه له‌كتێبی پیرۆزدا نووسراوه: [[دڵگه‌رمی بۆ ماڵه‌كه‌ت ده‌مسوتێنێ]].
ده‌سه‌ڵاتدارانی جووله‌كه به‌رهه‌ڵستی عیسایان كردو ووتیان: (نیشانه‌یه‌كمان بۆ بهێنه‌وه دهستنیشانی ده‌سه‌ڵاتت بكات بۆ ئه‌و كاره‌ی كردت!) جا عیسا لهوهڵامدا ووتی: (ئه‌م په‌رستگایه بڕوخێنن، لهسێ ڕۆژدا دروستی ده‌كه‌مه‌وه.) ئه‌وسا جووله‌كه‌كان پێیان ووت: (ئه‌م په‌رستگایه به‌چل و شه‌ش ساڵ دروستكراوه، تۆ بهسێ ڕۆژ دروستیده‌كه‌یته‌وه؟) به‌ڵام ئه‌و په‌رستگایه‌ی ئه‌و ده‌رباره‌ی قسه‌ی ده‌كرد، له‌شی خۆی بوو. كاتێ عیسا له‌ناو مردووان هه‌ستایه‌وه، ئه‌وسا قوتابیه‌كانی ئه‌م قسه‌یه‌ی عیسایان بیركه‌وته‌وه، ئینجا باوه‌ڕیان هێنا به‌كتێب*و به‌و ووتانه‌ی عیسا ووتبووی.
كاتێ عیسا لهجهژنی تێپه‌ڕبووندا لهقودس بوو، خه‌ڵكێكی زۆر ئه‌و نیشانه سهرسوڕهێنهرانهیان بینی كه كردیو باوه‌ڕیان به‌ناوی ئه‌و هێنا. به‌ڵام عیسا متمانه‌ی پێ نه‌كردن، چونكه هه‌موو خه‌ڵكی ده‌ناسی. ئه‌و پێویستی به‌كه‌س نه‌بوو شایه‌تی بۆ بدا ده‌رباره‌ی مرۆڤ، چونكه ناوه‌ڕۆكی مرۆڤی ده‌ناسی.
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.