Biblica® Open Sorani Kurdish Book of Life
یۆحەنا 14
دڵته‌نگ مه‌بن
(دڵته‌نگ مه‌بن. ئێوه باوه‌ڕتان بهخودا هه‌یه، كه‌واته باوه‌ڕیش به‌من بكه‌ن. ماڵی باوكم ژووری زۆری لێیه، گه‌ر وانهبووایه ئه‌وسا پێم ده‌ووتن، من ده‌ڕۆم بۆ ئه‌وێ تا شوێنتان بۆ ئاماده‌بكه‌م. دوای ئه‌وه‌ی ڕۆیشتمو شوێنم بۆ ئاماده‌كردن، ده‌گه‌ڕێمه‌وه لاتانو له‌گه‌ڵ خۆم ده‌تانبه‌م، تاكو ئێوه‌ش له‌و شوێنه بن كه منی لێده‌بم. ئێوه ڕێگای ئه‌و شوێنه پێ‌ده‌زانن كه من بۆی ده‌چم.)
من ڕێگاو ڕاستیو ژیانم
ئینجا تۆما ووتی: (گه‌وره‌م، نازانین تۆ بۆكوێ ده‌ڕۆی، ئیتر چۆن ڕێگه‌كه بزانین؟) عیسا وه‌ڵامی دایه‌وه: (من ڕێگاو ڕاستیو ژیانم. كه‌س نایه‌ت بۆ لای باوك به‌هۆی منه‌وه نه‌بێ. گه‌ر ئێوه من بناسن، ئه‌وا باوكیشم ده‌ناسن، له‌ئێستا به‌دواوه دهیناسنو بینیوتانه.) لێره فیلیپۆس پێی ووت: (گه‌وره‌م، باوكمان نیشان بده ئیتر به‌سمانه!)
عیسا وه‌ڵامی دایه‌وه: (ماوه‌یه‌كی دوورو درێژه من له‌گه‌ڵتانم هێشتا هه‌ر نه‌تناسیوم ئه‌ی فیلیپۆس؟ ئه‌وه‌ی منی بینیوه باوكی بینیوه، ئیتر چۆن ده‌ڵێی باوكمان نیشانبده؟ ئایا باوه‌ڕ ناهێنی من له‌باوكدام، باوكیش لهمندایه؟ ئه‌و قسانه‌ی كه ده‌یڵێم له‌خۆمه‌وه نایڵێم، به‌ڵكو ئه‌و باوكه‌ی له‌مندا نیشته‌جێ بووه، ئه‌و كاره‌كانی خۆی ده‌كات. باوه‌ڕم پێ‌بكه‌ن من لهباوكدامو باوكیش لهمندایه، ئه‌گه‌ر نا باوه‌ڕم پێ‌بكه‌ن به‌هۆی كاره‌كان خۆیانه‌وه. ڕاستی ڕاستیتان پێ‌ده‌ڵێم: ئه‌وه‌ی باوه‌ڕ به‌من بكات ئه‌و كارانه ده‌كات كه من ده‌یكه‌م، به‌ڵكو له‌وانه‌ش مه‌زنتر ده‌كات، چونكه من بۆ لای باوك ده‌ڕۆم. هه‌رچیه‌ك به‌ناوی منه‌وه داوابكه‌ن بۆتانی ده‌كه‌م، هه‌تا باوك له‌ڕۆڵه‌دا شكۆداربێ. گه‌ر شتێكتان به‌ناوی من داواكرد، من بۆتانی ده‌كه‌م.)
به‌ڵێنی هاتنی ڕۆحی پیرۆز
(گه‌ر ئێوه منتان خۆش بوێ به‌ڕاسپارده‌كانم كارده‌كه‌ن. ئه‌وسا لهباوكم داواده‌كه‌م یارمه‌تیده‌رێكی* دیكه‌تان بداتێ‌و تاهه‌تایه له‌گه‌ڵتان بمێنێته‌وه، ئه‌وه‌ش ڕۆحی ڕاستییه، كه‌وا جیهان ناتوانێ وه‌ریگرێ چونكه نایبینێتو نایناسێت، به‌ڵام ئێوه ده‌یناسن چونكه له‌گه‌ڵتان ده‌مێنێته‌وه‌و له‌ناوتان ده‌بێت. بهههتیوی به‌جێتان ناهێڵیم، به‌ڵكو ده‌گه‌ڕێمه‌وه لاتان. پاش ماوه‌یه‌كی كه‌م جیهان نامبینێت، به‌ڵام ئێوه دهمبینن. جاچونكه من زیندووم، ئێوه‌ش هه‌روه‌ها زیندووده‌بنه‌وه. له‌و ڕۆژهدا ده‌زانن باوك لهمندایه، ئێوه‌ش له‌مندان، منیش له ئێوه‌دام. ئه‌وه‌ی ڕاسپارده‌كانی منی لایه‌و كاریپێ ده‌كات، ئه‌وه منی خۆشدهوێت. ئه‌وه‌ی منی خۆشبوێ، باوكم خۆشیدهوێ، منیش خۆشمدهوێو خۆمی پێ‌نیشان ده‌ده‌م.)
ئینجا یههوزایهكیتر كه یه‌هوزای ئه‌سخه‌ریوتی نه‌بوو، پرسیاری لـێ‌كرد: (گه‌وره‌م، بۆچی ده‌ته‌وێ خۆت بۆ ئێمه ده‌رخه‌یت به‌ڵام بۆ جیهان نا؟) عیسا وه‌ڵامی دایه‌وه: (ئه‌وه‌ی منی خۆش بووێت كار بهووتهكانم ده‌كات، باوكیشم خۆشی ده‌وێت، ئێمه بۆ لای ئه‌و دێینو لای ئه‌و نیشته‌جێ ده‌بین. ئه‌وه‌ش منی خۆش ناوێ كارناكات به ووته‌كانم. ئه‌م ووشانه‌ی گوێتان لـێ‌ده‌بێ هی من نییه، به‌ڵكو هی ئه‌و باوكه‌یه كه ناردوومی. من ئه‌م شتانه‌م پێووتن له‌كاتێكدا هێشتا لاتانم. به‌ڵام ڕۆحی پیرۆز، ئه‌و یارمه‌تیده‌ره‌ی باوك به‌ناوی من ده‌ینێرێ، هه‌موو شتێكتان فێر ده‌كات، هه‌روه‌ها هه‌موو ئه‌و شتانه‌ی پێم ووتوون بیرتان ده‌خاته‌وه.
ئاشتی عیسا
(ئاشتیتان بۆ به‌جێ‌ده‌هێڵم. ئاشتی خۆمتان ده‌ده‌مێ. به‌ڵام به‌و شێوه‌یه نا كه جیهان دهتانداتێ. دڵته‌نگ مه‌بن، هه‌روه‌ها مه‌ترسن. گوێتان لـێ‌بوو من پێمووتن: من لاتان دهڕۆمو دواتر ده‌گه‌ڕێمه‌وه لاتان. گه‌ر ئێوه منتان خۆش بوێ، دڵشاد ده‌بن چونكه من ده‌ڕۆم بۆلای باوك، له‌به‌رئه‌وه‌ی باوك لهمن مه‌زنتره. ئه‌وه‌تا ئێستا هه‌واڵی ئه‌وه‌م پێ‌دان پێش ڕوودانی، بۆ ئه‌وه‌ی هه‌ركاتێ ڕوویدا باوه‌ڕبهێنن. ئیتر له‌مه‌ولا زۆر قسه‌تان له‌گه‌ڵ ناكه‌م، چونكه گه‌وره‌ی ئه‌م جیهانه وا دێتو هیچ ده‌سه‌ڵاتێكی به‌سه‌ر من نییه. به‌ڵام ده‌بێ جیهان بزانێ من باوكم خۆش ده‌وێ، هه‌روه‌ها باوك چۆن ڕایسپاردم وا ڕه‌فتار ده‌كه‌م. هه‌ستن! با لێره بڕۆین!)
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.