Biblica® Open Sorani Kurdish Book of Life
یۆحەنا 12
چه‌وركردنی عیسا بۆ مردن
شه‌ش ڕۆژ پێش جه‌ژنی تێپه‌ڕبوون عیسا هات بۆ دێی بهیتعهنیا، ئه‌وه‌ی عیسا له‌عازری تیا زیندووكرده‌وه له‌نێو مردوواندا. له‌عازر داوه‌تی نانخواردنی ئێواره‌ی سازكرد بۆ عیسا، مه‌رسای خوشكی ده‌ستیكرد بهخزمهتكردن، له‌عازر خۆی یه‌كێ بوو له‌وانه‌ی له‌سه‌ر خوان له‌گه‌ڵ عیسادا دانیشتبوو. مریه‌میش سێیه‌كی لیترێك بۆنی ناردینی گرانبه‌های بێ‌غه‌شی هێناو هه‌ردوو قاچی عیسای پێ چه‌وركرد، ئینجا بهقژی هه‌ردوو قاچی سڕیه‌وه، ئیتر ماڵه‌كه هه‌مووی پڕبوو له‌بۆنی خۆش. یه‌كێ لهقوتابیهكانی كه یه‌هوزای ئه‌سخه‌ریوتی بوو، ئه‌وه‌ی لهدواییدا ناپاكی له‌گه‌ڵدا ده‌كات ووتی: ( بۆچی ئه‌م بۆنه بهسێ سه‌د دینار* نه‌فرۆشراو دابهشنهكرا به‌سه‌ر هه‌ژاراندا؟) ئه‌ویش ئه‌مه‌ی نه‌ووت چونكه به‌زه‌یی بهههژاراندا ده‌هاته‌وه، به‌ڵكو له‌به‌رئه‌وه‌ی دز بوو، ئه‌و دانرا بوو به‌سه‌ر پاره‌ی سندوق به‌ڵام هه‌رچیه‌كی تیا دابنرایه ده‌یدزی. عیساش وه‌ڵامی دایه‌وه: (وازی لـێ‌بهێنه! ئه‌و ئه‌م بۆنه‌ی هه‌ڵگرتبوو بۆ ڕۆژی ناشتنم، چونكه هه‌ژاران هه‌موو كاتێ لاتانن، به‌ڵام من هه‌موو كاتێ لاتان نیم.) كاتێ ژماره‌یه‌كی زۆر لهجوولهكهكان زانییان عیسا له‌وێیه، هاتن ته‌نها بۆ ئه‌وه‌نا كه عیسا ببینن، به‌ڵكو بۆ ئه‌وه‌ش له‌عازر ببینن كه له‌نێو مردوواندا زیندووی كردبووه‌وه. ئه‌وسا سه‌رۆك كاهینه‌كان بڕیاریاندا له‌عازریش بكوژن، چونكه ژماره‌یه‌كی زۆر له جووله‌كه‌كان به‌هۆی ئه‌وه‌وه دههاتنو باوه‌ڕیان به‌عیسا دههێنا.
چوونه ناو قودس وه‌ك پادشا
ڕۆژێ دوایی، ژماره‌یه‌كی زۆر له خه‌ڵكی كه هاتبوون بۆ جه‌ژن، بیستیان عیسا هاتووه بۆ قودس. لقه دار خورمایان برد له‌گه‌ڵ خۆیانو هاتنه‌ده‌ره‌وه بۆ پێشوازیكردنیو هاواریانكرد: (هۆسانا! پیرۆزه ئه‌وه‌ی به‌ناوی خوداوه‌نده‌وه دێت! ئه‌و پادشای ئیسرائیله!) عیسا جاشكێكی بینی، سواری بوو، وه‌ك له‌كتێبی پیرۆزدا نووسراوه: [[مه‌ترسه ئه‌ی كچی شاری داود، پادشاكه‌ت دێته لات به سواری جاش ماكه‌رێك.]] قوتابیه‌كانی عیسا یه‌كه‌مجار ئه‌مانه تێنه‌گه‌یشتن. به‌ڵام پاش ئه‌وه‌ی عیسا شكۆداركرا، بیریان كه‌وته‌وه كه له‌كتێبی پیرۆزدا ئه‌مه ده‌رباره‌ی نووسراوه، ئه‌وانیش ئهمهیانكرد بوو بۆ ئه‌و.
ئه‌و خه‌ڵكه‌ی كه له‌گه‌ڵیدا بوون كاتێ له‌عازری بانگكرد لهگۆڕداو زیندووی كرده‌وه له‌نێو مردووان، شایه‌تی ئه‌مه‌یان بۆ ده‌دا. جا له‌به‌رئه‌وه خه‌ڵكه‌كه هاتنه‌ده‌ره‌وه بۆ پێشوازی، چونكه بیستبوویان كه ئه‌و نیشانه سه‌رسوڕهێنه‌ره‌ی كردووه. فه‌ریسیه‌كان بهیهكتریان ووت: (ده‌بینن بێسووده؟ ئا ئه‌وه‌تا هه‌موو جیهان شوێنی كه‌وتووه!)
مردن ده‌رگایه بۆ ژیان
هه‌ندێ یۆنانی له‌گه‌ڵ ئه‌و خه‌ڵكه‌بوون كه له‌جه‌ژندا هاتبوون بۆ خوداپه‌رستی، ئه‌وسا چوونه لای فیلیپۆس كه خه‌ڵكی شاری سه‌یدای ناوچه‌ی جه‌لیل بوو، پێیان ووت: (گه‌وره‌م، ده‌مانه‌وێ عیسا ببینین.) فیلیپۆس ڕۆیشتو ئه‌مه‌ی به ئه‌نده‌راوس ووت، ئینجا به‌یه‌كه‌وه ڕۆیشتن ههواڵیاندا به عیسا.
جا عیسا پێی ووتن: (ئه‌وه‌تا كاتی شكۆداركردنی ڕۆڵه‌ی مرۆڤ نزیك بووه‌ته‌وه. ڕاستی ڕاستیتان پێ‌ده‌ڵێم: ده‌نكه گه‌نم هه‌روه‌ك خۆی ده‌مێنێته‌وه، گه‌ر نه‌كه‌وێته ناو زهویو نه‌مرێ، به‌ڵام كه مرد ئه‌وكاته ده‌نكی زۆری لـێ‌به‌به‌ردێ. ئه‌وه‌ی ژیانی خۆی خۆش بوێ، ده‌یدۆڕێنێ. ئه‌وه‌ش كه ڕقی لهژیانی خۆی ده‌بێته‌وه له‌م جیهانه‌دا، ده‌یهێڵێته‌وه بۆ ژیانی هه‌تاهه‌تایی. ئه‌وه‌ی ده‌یه‌وێ خزمه‌تم بكات با شوێنم بكه‌وێ. جا من له‌هه‌ر شوێنێكدابم، خزمه‌تكاریشم له‌وێیه. هه‌روه‌ها ههركهسێ خزمه‌تم بكات باوكم ڕێزی لـێ‌ده‌گرێ.
عیسا باسی مردنی خۆی ده‌كات
(ئێستا دڵم ته‌نگه، چی بڵێم؟ ئه‌ی باوك، ڕزگارم بكه لهوكاته سه‌خته‌ی چاوه‌ڕێم ده‌كات؟ نه‌خێر! له‌پێناوی ڕوودانی ئه‌م كاته هاتووم. جا ئه‌ی باوك، ناوی خۆت شكۆداركه!) له‌وكاته‌دا ده‌نگێ لهئاسمانهوه وه‌ڵامی دایه‌وه: (شكۆدارم كردووه‌و شكۆداریشی ده‌كه‌مه‌وه.) هه‌ندێ له‌وانه‌ی له‌وێ ئاماده‌بوون كاتێ گوێیان لهدهنگهكه بوو ووتیان: (ئه‌مه ده‌نگی هه‌وره!) به‌ڵام هه‌ندێكی كه‌یان ووتیان: (فریشته بوو قسه‌ی له‌گه‌ڵ كرد.) عیسا له‌وه‌ڵامدا ووتی: (ئه‌م ده‌نگه له‌پێناوی من نه‌بوو، به‌ڵكو له‌پێناوی ئێوه بوو. ئێستا كاتی حوكمدانه به‌سه‌ر ئه‌م جیهانه! ئێستا سه‌رۆكی ئه‌م جیهانه ده‌كرێته ده‌ره‌وه! كاتێ من له‌سه‌ر زه‌وی به‌رزده‌كرێمه‌وه، هه‌مووان بانگدهكهم بۆ لای خۆم.) عیسا ئه‌مه‌ی ووت تا دهستنیشانیكات به‌چ شێوه‌یه‌ك ده‌مرێ. خه‌ڵكه‌كه پێیانووت: (ئێمه لهشهریعهتدا بیستوومانه مه‌سیح تاهه‌تایه بهزیندوویهتی ده‌مێنێته‌وه، ئیتر چۆن تۆ ده‌ڵێی ڕۆڵه‌ی مرۆڤ ده‌بێ به‌رزبكرێته‌وه؟ ئه‌م ڕۆڵه‌ی مرۆڤه كێیه؟) عیسا پێی ووتن: (ڕووناكی كاتێكی كورت له‌گه‌ڵتان ده‌مێنێته‌وه. جـا بهردهوامبن له‌ڕۆیشتن تا دونیا ڕووناكهو تاریكیتان به‌سـه‌ردا نه‌هـاتووه، چـونكه ئه‌وه‌ی بهتاریكـیدا ده‌ڕوات نازانێ بۆ كــوێ ده‌ڕوات. باوه‌ڕبهێنن بهڕووناكـی هه‌تا ڕووناكـیتان لـه‌گـه‌ڵدایه، ئه‌وكــاته ده‌بنه ڕۆڵه‌ی ڕووناكی.) دوای ئه‌وه‌ی عیسـا ئه‌مــه‌ی ووت، ڕۆیشتو خۆی لێیان شــارده‌وه. لــه‌گـه‌ڵ ئه‌وه‌ی كه زۆر نیشانه‌ی سه‌رسورهێنه‌ری لهبهردهمیانكرد، باوه‌ڕیان پێ‌نه‌هێنا، تا ووته‌ی ئه‌شعیای پێغه‌مبه‌ر بێته‌دی: [[ئه‌ی خـوداوه‌ند كـێ باوه‌ڕی هێنا به ووته‌كانمان؟ ده‌ستی خوداوه‌ند بۆ كێ ده‌ركه‌وت؟]] ئه‌وان نه‌یانتوانی باوه‌ڕبهێنن، چونكه ئه‌شعیا دیسان ووتبووی: [[چاویانی كوێرو دڵیانی ڕهقكردووه، تاكو به‌چاویان نهبیننو به‌دڵیان هه‌ست نه‌كه‌ن، ئه‌وسا بگه‌رێنه‌وه‌و چاكیان بكه‌مه‌وه.]] ئه‌شعیا ئه‌مـه‌ی ووت بوو، چـونكه شـكۆی ئه‌وی بینی بوو و باسیكـرد بوو. لـه‌گـه‌ڵ ئه‌وه‌شدا ژماره‌یه‌كی زۆر لــهسهرۆكهكان باوه‌ڕیان به عیسا كـرد، بێ‌ئــه‌وه‌ی باوه‌ڕه‌كـه‌یان ده‌ربخه‌ن، لهترسی ئه‌وه‌ی فه‌رمانی ده‌ركـردنیان له‌كه‌نیشتدا به‌سه‌ر بدرێ، چونكـه ئه‌وان زیاتر حـه‌زیان لـه‌شـكۆی خـه‌ڵكـی بوو نه‌ك شـكۆی خـودا.
ڕووناكی باوه‌ڕ
ئینجا عیسا به‌ده‌نگێكی به‌رز ووتی: (ئه‌وه‌ی باوه‌ڕم پێ‌بهێنێ، باوه‌ڕ بهمن ناهێنێ به‌ڵكو به‌وه‌ی كه ناردوومی، ئه‌وه‌ش منی بینیوه، ئه‌وه‌ی بینیوه كه ناردوومی. من وه‌ك ڕووناكی هاتومه‌ته جیهان، تائه‌وه‌ی باوه‌ڕم پێ‌بهێنێ له تاریكیدا نه‌مێنێته‌وه. گه‌ر یه‌كێ گوێی لهووتهكانم بوو و كاری پێ‌نه‌كرد، من حوكم ناده‌م به‌سه‌ری، چونكه من نه‌هاتووم تا حوكم به‌سه‌ر جیهاندا بده‌م، به‌ڵكو هاتووم بۆ ڕزگاری جیهان. ئه‌وه‌ی دانمپیانهنێو بهووتهكانم ڕازی نه‌بێ، هه‌یه كه‌وا حوكمبدا به‌سه‌ری، ئه‌و ووشه‌یه‌ی كه ووتم ئه‌و حوكم ده‌دات به‌سه‌ری لهڕۆژی دواییدا، چونكه من هیچ شتێكم لهخۆمهوه نه‌وتووه، به‌ڵكو ئه‌و باوكه‌ی ناردوومی چی ڕاسپاردووم ئه‌وه ده‌ڵێم. هه‌روه‌ها من ده‌زانم ڕاسپارده‌ی ئه‌و ژیانی هه‌تاهه‌تاییه، جا هه‌ر ووته‌یه‌ك من ده‌یڵێم، به‌و شــێوه‌یه ده‌یڵێم كه باوكم پێی ووتووم.(
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.