Biblica® Open Sorani Kurdish Book of Life
یۆحەنا 11
مردنی له‌عازر
مرۆڤێك ناوی له‌عازر بوو نه‌خۆش بوو، خه‌ڵكی بهیتعهنیا بوو، ئه‌و لادێیه‌ی له‌گه‌ڵ مریهمو مه‌رسای خوشكی تیایدا ده‌ژیان. ئه‌م مریه‌مه ئه‌وه بوو كه خوداوه‌ندی بهبۆن چه‌وركردو به‌قژی پێیه‌كانی سڕیه‌وه، له‌عازری نه‌خۆشیش برای ئه‌م بوو. هه‌ردوو خوشكه‌كه ناردیان به‌دوای عیسادا تا پێی بڵێن: (گه‌وره‌م، ئه‌وه‌ی خۆشتدهوێ نه‌خۆشه.) كاتێ عیسا ئه‌مه‌ی بیست ووتی: (ئه‌م نه‌خۆشیه بهمردن كۆتایی نایه‌ت، به‌ڵكو ده‌بێته هۆی شكۆداری خودا، ئه‌وسا به‌هۆی ئه‌مه‌وه ڕۆڵه‌ی خودا شكۆدار ده‌بێ.)
له‌گه‌ڵ ئه‌وه‌ی عیسا مه‌رساو خوشكه‌كه‌ی و له‌عازری خۆش ده‌ویست، له‌و شوێنه‌ی كه‌لێی بوو دوو ڕۆژ مایه‌وه هه‌رچه‌نده به‌نه‌خۆشیه‌كه‌ی له‌عازریشی زانیبوو. دوای ئه‌وه عیسا به قوتابیه‌كانی ووت: (با بگه‌ڕێینه‌وه بۆ ناوچه‌ی یه‌هودیه!) قوتابیه‌كان پێیانووت: (مامۆستا، ئایا ده‌گه‌ڕێیته‌وه بۆ ناوچه‌ی یه‌هودیه، باشه ماوه‌یه‌ك له‌مه‌وبه‌ر جووله‌كه‌كان نه‌یانویست به‌ردبارانت بكه‌ن؟) عیسا له وه‌ڵامدا ووتی: (ئایا ڕۆژ دوانزه سه‌عات نییه؟ ئه‌وه‌ی بهرۆژ بڕوات ساتمه ناكات، چونكه ڕووناكی ئه‌م جیهانه ده‌بینێ. به‌ڵام ئه‌وه‌ی بهشهو بڕوات ساتمه ده‌كات، چونكه ڕووناكی تیادانییه.) ئینجا عیسا ووتی: (له‌عازری خۆشه‌ویستمان خه‌وتووه، به‌ڵام من ده‌ڕۆم خه‌به‌ری ده‌كه‌مه‌وه.) قوتابیه‌كان ووتیان: (گه‌وره‌م، گه‌ر ئه‌و نووستوه، ئه‌وسا بهساغی خه‌به‌ری ده‌بێته‌وه.) قوتابیه‌كانی وایانزانی مه‌به‌ستی لهنووستنی ئاساییه، به‌ڵام عیسا مه‌به‌ستی له‌مردنی له‌عازر بوو. ئه‌و كاته عیسا به‌ئاشكرا پێ‌ووتن: (له‌عازر مردووه. به‌ڵام له‌به‌ر ئێوه من دڵشادم كه له‌وێ نه‌بووم، تا باوه‌ڕ بهێنن. بابرۆین بۆ لای!) ئینجا تۆما كه به دووانه ناسرابوو لای قوتابیه‌كانیكه ووتی: (با ئێمه‌ش بڕۆین له‌گه‌ڵی تا له‌گه‌ڵ ئه‌ودا بمرین!)
من زیندووبوونه‌وه‌و ژیانم
كاتێ عیسا گه‌یشت، له‌عازر چوار ڕۆژ بوو نێژرابوو. بهیتعهنیاش ته‌نها نزیكه‌ی دوو میل له قودسه‌وه دووربوو. ژماره‌یه‌كی زۆر لهجوولهكه هاتبوونه لای مه‌رساو مریه‌م تا سه‌ره‌خۆشی براكه‌یان لـێ‌بكه‌ن. كاتێ مه‌رسا زانی عیسا هاتووه، هاته‌ده‌ره‌وه بۆ چاوپێكه‌وتنی، مریه‌میش لهماڵهوه دانیشتبوو. ئینجا مه‌رسا بهعیسای ووت: (گه‌وره‌م، گه‌ر لێره بوویتایه، براكه‌م نه‌ده‌مرد. به‌ڵام ده‌زانم ته‌نانه‌ت ئێستاش هه‌رچی له‌خودا داوا بكه‌یت ده‌تداتێ.) عیسا له‌وه‌ڵامدا ووتی: (براكه‌ت زیندووده‌بێته‌وه.) مه‌رسا ووتی: (ده‌زانم هه‌ڵده‌ستێته‌وه له‌هه‌ستانه‌وه‌ی مردووان له‌ڕۆژی دواییدا!) عیسا له‌وه‌ڵامدا ووتی: (من زیندووبوونه‌وه‌و ژیانم. هه‌ر كه‌سێ باوه‌ڕم پێ‌بهێنێ، ئه‌گه‌ر مردیش زیندووده‌بێته‌وه. هه‌روه‌ها هه‌ر كه‌سێ زیندوو بێ و باوه‌ڕم پێ‌بهێنێ هه‌رگیز نامرێ. ئایا باوه‌ڕ به‌مه ده‌كه‌یت؟) ئه‌ویش وه‌ڵامی دایه‌وه: (به‌ڵێ گه‌وره‌م. من باوه‌ڕ ده‌كه‌م تۆ مه‌سیحی ڕۆڵه‌ی خودای هاتووی بۆ جیهان!)
گریانی عیسا
دوای ئه‌وه‌ی ئه‌مه‌ی ووت، چوو مریه‌می خوشكی بانگبكات، به‌دزیه‌وه پێی ووت: (مامۆستا لێره‌یه، بانگتدهكا!) مریه‌م كه ئه‌مه‌ی بیست خێرا هه‌ستاو هاته لای. عیسا جارێ نه‌گه‌یشتبووه دێیه‌كه، به‌ڵكو هێشتا له‌وشوێنه بوو كه تیایا چاوی بهمهرسا كه‌وتبوو. جووله‌كه‌كانیش، ئه‌وانه‌ی لهماڵهوه له‌گه‌ڵیدا بوونو بۆ دڵنه‌وایی هاتبوون، كه بینییان ئاوا هه‌ستایه سهرپێو خێرا چووه ده‌ره‌وه، شوێنی كه‌وتن، چونكه وایانزانی ده‌ڕوات تا له‌سه‌ر گۆڕه‌كه بگری. كاتێ مریه‌م عیسای بینیو گه‌یشته ئه‌و شوێنه‌ی ئه‌وی لـێ‌بوو، كه‌وت به‌سه‌ر پێیداو ووتی: (گه‌وره‌م، گه‌ر لێره بوویتایه، براكه‌م نه‌ده‌مرد!) عیسا كه مریهمو ئه‌و جووله‌كانه‌ی بینی له‌گه‌ڵی هاتبوون ده‌گرین، دڵی پڕ بوو له‌په‌ژاره‌یه‌كی زۆر، ئینجا پرسی: (له‌كوێ ناشتوتانه؟) ئه‌وانیش وه‌ڵامیان دایه‌وه: (گه‌وره‌م، وه‌ره سه‌یركه!) عیسا گریا. لـهمكاتهدا جووله‌كه‌كان بهیهكتریان ووت: (سه‌یركه چه‌ندی خۆشدهویست!) هــه‌ندێكیان پرسـیاریان كرد: (ئایا نه‌یده‌توانی ئه‌مه‌ی كه چاوی كوێرانی چاك كرده‌وه، نه‌یهێشتایه له‌عازر بمرێ؟(
زیندووبوونه‌وه‌ی له‌عازر
جارێكیكه عیسا دڵی پڕبوو له په‌ژاره. ئینجا له‌گۆڕه‌كه نزیك كه‌وته‌وه كه ئه‌شكه‌وتێك بوو ده‌رگاكه‌ی به‌ردێكی گه‌وره‌ی له‌سه‌ر بوو. عیسا ووتی: (به‌رده‌كه لابه‌ن!) مه‌رسا ووتی: (گه‌وره‌م ئه‌مه ڕۆژی چواره‌مینێتی، بۆنی كردووه.) جا عیسا پێی ووت: (پێم نه‌ووتی گه‌ر باوه‌ڕت هه‌بێ شكۆمه‌ندی خودا ده‌بینی؟) ئه‌وسا به‌رده‌كه‌یان لابردو عیسا سه‌یری ئاسمانی كردو ووتی: (ئه‌ی باوك، سوپاست ده‌كه‌م چونكه گوێت لێ‌گرتم، من زانیومه كه تۆ هه‌میشه گوێم لێ‌ده‌گری. به‌ڵام من ئه‌مه‌م ووت له‌به‌ر ئه‌و خه‌ڵكه‌ی له ده‌وروپشتم ڕاوه‌ستاون تا باوه‌ڕ بهێنن تۆ منت ناردووه.) كاتێ ئه‌مه‌ی ووت به‌ده‌نگێكی به‌رز بانگی كرد: (له‌عازر وه‌ره ده‌ره‌وه!) ئه‌وسا مردووه‌كه هاته‌ده‌ره‌وه، به‌كفن دهستو قاچی به‌سترابوو، سه‌ریشی به‌قوماشێك پێچرابوو. لێره عیسا به‌وانه‌ی ده‌وروپشتی ووت: (بیكه‌نه‌وه با بڕوات. (
پلانێك بۆ كوشتنی عیسا
ژماره‌یه‌كی زۆر لهجوولهكهكان له‌وانه‌ی كه هاتبوون بۆ دڵنه‌وایی مریه‌م، كاتێ ئه‌مه‌یان بینی باوه‌ڕیان هێنا بهعیسا. به‌ڵام هه‌ندێ له‌وان چوونه لای فه‌ریسیه‌كان تا هه‌واڵی ئه‌وه بده‌ن كه عیسا كردوویه‌تی. ئینجا سه‌رۆك كاهینهكانو فه‌ریسیه‌كان ئه‌نجومه‌نی باڵایان كۆكرده‌وه‌و ووتیان: (چی بكه‌ین؟ ئه‌م كابرایه نیشانه‌ی سه‌رسوڕهێنه‌ری زۆر ده‌كات. گه‌ر به‌م شێوه‌یه وازی لـێ‌بهێنین هه‌موو خه‌ڵكه‌كه باوه‌ڕی پێ‌ده‌هێنن، ئیتر ڕۆمانیه‌كان دێنو په‌رستگاكه‌مان له‌ناو دهبهنو میلله‌ته‌كه‌مان ڕاپێچ ده‌كه‌ن!) یه‌كێ له‌وان كهناوی قه‌یافا بوو ئه‌و ساڵه سه‌رۆك كاهین بوو ووتی: (ئێوه هیچ نازانن! ئێوه تێ‌ناگه‌ن باشتروایه پیاوێك بمرێ و ببێ بهقوربانی گه‌ل، له‌جیاتی ئه‌وه‌ی میلله‌ته‌كه هه‌مووی له‌ناوبچێ.) قه‌یافا له‌خۆیه‌وه ئه‌م قسه‌یه‌ی نه‌كرد، به‌ڵام چونكه له‌و ساڵه‌دا كاهینی به‌رز بوو، پێشبینیكردبوو* كه عیسا له‌پێناوی گه‌لدا ده‌مرێ، ئه‌مه‌ش ته‌نها له‌پێناوی گه‌ل نا، به‌ڵكو هه‌روه‌ها له‌پێناوی كۆكردنه‌وه‌ی ڕۆڵه‌كانی خودا كه په‌رشوبڵاوبوونه‌ته‌وه تا بیانكات به‌یه‌ك. له‌و ڕۆژه‌وه ئیتر جووله‌كه‌كان بڕیاریاندا عیسا بكوژن. ئیتر ئه‌ویش به‌ئاشكرا به‌ناویاندا نه‌ده‌رۆیشت، به‌ڵكو چوو بۆ شارێك ناوی ئه‌فرایم بوو، كه‌وتۆته شوێنێكی نزیك بیابان، له‌وێ له‌گه‌ڵ قوتابیه‌كانی مایه‌وه. له‌و كاته‌دا جه‌ژنی تێپه‌ڕبوونی جووله‌كه نزیك بووبوه‌وه، خه‌ڵكێكی زۆر له‌لادێكانه‌وه هاتبوون بۆ قودس تاكو هه‌ستن بهمهراسیمی خۆپاككردنهوهی پێش جه‌ژن. ئه‌وان به‌دوای عیسادا ده‌گه‌ڕان، كاتێ لهپهرستگادا كۆبوونه‌وه پرسییان: (ڕاتان چیه؟ ئایا نایه‌ت بۆ جه‌ژن؟) سه‌رۆك كاهینهكانو فه‌ریسیه‌كان فه‌رمانیان ده‌ركردبوو كه‌وا هه‌ركه‌سێك عیسا ببینێ ده‌بێ خه‌به‌ری لـێ‌بدات تا بیگرن.
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.