Biblica® Open Sorani Kurdish Book of Life
یاقوب 4
ملكه‌چی خودا بن
هۆی ئه‌م دوژمنایهتیو ناكۆكییه چییه له‌ناوتان؟ ئایا به‌هۆی ئاره‌زووه خراپه‌كانی ئه‌ندامانی له‌شتان نییه كه ده‌جه‌نگێت له‌گه‌ڵتان؟ ئاره‌زوو دهكهنو ده‌ستتان ناكه‌وێ ئه‌وسا ده‌كوژن. چاوتان له‌ماڵی خه‌ڵكه‌و ناگه‌نه مه‌به‌ستی خۆتان، ئه‌وسا دوژمنایهتیو شه‌ڕ ده‌كه‌ن. ئه‌وه‌ی ده‌تانه‌وێ ده‌ستتان ناكه‌وێت، چونكه لهخودا داوا ناكه‌ن. گه‌ر داواشتانكرد وه‌ریناگرن، چونكه بهمهبهستی خراپ داوای ده‌كه‌ن، تا ئاره‌زووه‌كانی خۆتانی پێ تێر بكه‌ن.
ئه‌ی داوێنپیسان، ئایا نازانن خۆشه‌ویستی جیهان دوژمنایه‌تییه له‌گه‌ڵ خودا؟ ئه‌وه‌ی بیه‌وێ ببێت بهخۆشهویستی جیهان، ئه‌وه بووه به دوژمنی خودا. ئایا ئه‌وه‌ی كتێبی پیرۆز ووتویه‌تی ڕاست نییه كه ده‌ڵێت خودا دڵگه‌رمه بۆ ئه‌و ڕۆحه‌ی تیاماندایه؟ به‌ڵام خودا به‌ره‌كه‌تی زۆرتر ده‌دات بۆیه كتێب ده‌ڵێت: [[خودا به‌رهه‌ڵستی لووتبه‌رزه‌كان دهكاتو به‌ره‌كه‌تی به‌سه‌ر ڕۆحسووكان ده‌بارێنێ.]]
جا ملكه‌چی خودا بنو به‌رهه‌ڵستی شه‌یتان بكه‌ن تا لێتان ههڵبێت. نزیكبنهوه لهخودا ئه‌ویش لێتان نزیك ده‌بێته‌وه. ده‌ستتان پاك بكه‌نه‌وه ئه‌ی گوناهباران، دڵتان خاوێن بكه‌نه‌وه ئه‌ی ڕاڕایه‌كان. خه‌فه‌ت بخۆنو بگرینو شیوه‌ن بكه‌ن، تا پێكه‌نینتان ببێت بهگریانو خۆشیتان ببێت بهناخۆشی. له‌به‌رده‌م خوداوه‌ند خۆتان به‌نزم ڕاگرن ئه‌وسا خودا به‌رزتان ده‌كاته‌وه.
ئه‌ی برایان با كه‌ستان به‌خراپه باسی ئه‌وی دیكه‌تان نه‌كات، چونكه ئه‌وه‌ی به‌خراپه باسی براكه‌ی بكات یاخود حوكمی به‌سه‌ر بدات ئه‌وا به‌خراپه باسی شه‌ریعه‌ت دهكاتو حوكمی به‌سه‌ر ده‌دات. گه‌ر تۆ حوكم به‌سه‌ر شه‌ریعه‌ت بده‌یت، ئه‌وا تۆ كاری پێ ناكه‌یت به‌ڵكو خۆت ده‌كه‌یت به‌دادوه‌ر به‌سه‌ریه‌وه. له‌كاتێك یه‌ك شه‌ریعه‌تدانه‌رو یه‌ك دادوه‌ر هه‌یه، ئه‌وه‌ی ده‌توانێت حوكمی ڕزگاربوونو له‌ناوچوون بدات. به‌ڵام تۆ كێی تا حوكم به‌سه‌ر نزیكه‌كه‌ت بده‌یت؟
پشتبهستن به‌خودا
ئێستا گوێبگرن، ئه‌ی ئه‌وانه‌ی كه ده‌ڵێن: (ئه‌مڕۆ یان به‌یانی ده‌ڕۆین بۆ فڵان شار له‌وێ ساڵێك ده‌مێنینه‌وه، كاسبی دهكهینو پاره په‌یدا ده‌كه‌ین.) ئێوه كه نازانن به‌یانی چی ڕووده‌دات، كه‌واته ژیانتان چییه؟ هه‌ڵمێكه ماوه‌یه‌كی كه‌م ده‌رده‌كه‌وێت دوایی نامێنێت. له‌جیاتی ئه‌وه پێویسته بڵێن: (گه‌ر خوداوه‌ند خواستی له‌سه‌ر بوو و ژیاین، ئه‌م كاره‌و ئه‌وی دیكه ده‌كه‌ین.) ئه‌گینا ئێوه به لووتبهرزییهوه شانازی ده‌كه‌ن، ئه‌م جۆره شانازیه‌ش خراپه‌یه. بۆیه هه‌ر كه‌سێك بزانێت چاكه بكاتو له‌گه‌ڵ ئه‌وه‌شدا نه‌یكات ئه‌وه گوناه ده‌كات.
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.