Biblica® Open Sorani Kurdish Book of Life
عیبرانییەکان 10
چونكه شه‌ریعه‌ت ته‌نها سێبه‌ری شته باشه‌كانی داهاتووه، نه‌ك وێنه‌ی ته‌واوی ڕاستیه‌كان، بۆیه هه‌رگیز ناتوانێ به‌و قوربانیانه‌ی به به‌رده‌وامی پێشكه‌ش ده‌كرێ ساڵ له‌دوای ساڵ، ئه‌وانه دروستو ته‌واو بكات كه له‌خودا نزیك ده‌بنه‌وه بۆ په‌رستن. ئه‌گینا پێویستی نه‌ده‌كرد بهردهوامبن لهپێشكهشكردنی قوربانی، چونكه ویژدانی خواپهرستان، كه‌ی به‌ته‌واوی جارێك پاكبووهوه، ئیتر جارێكیتر پێویستی بهپاكبوونهوه نییهو هه‌ست به‌گوناهی ڕابووردووی ناكات. له‌ڕاستیدا، ئه‌و قوربانیانه ساڵ بهساڵ گوناهی بهبیر مرۆڤ ده‌خسته‌وه، ئه‌گینا به‌هیچ جۆرێك خوێنی مه‌ڕو گوێره‌كه گوناهی ئێمه لانابات. له‌به‌رئه‌وه كاتێ مه‌سیح هاته ئه‌م جیهانه ووتی: [[تۆ قوربانیو خێرت نه‌ویست، به‌ڵكو له‌شێكت داوه پێم. به‌قوربانی سووتاو و قوربانی گوناه دڵخۆش نه‌بووی. جا ئهوكاته پێم ووتی: (ئه‌وه‌تا هاتووم تابهخواستی تۆ كار بكه‌م، ئه‌مه ئه‌وه‌یه له‌كتێبی پیرۆز له‌سه‌رم نووسراوه.]](
ئه‌و یه‌كه‌مجار ووتی: [[تۆ قوربانیو خێرو قوربانی سووتاو و قوربانی گوناهت نهویستو پێی دڵخۆش نه‌بووی]]، هه‌رچه‌نده هه‌مووی به‌پێی شه‌ریعه‌ت ده‌كرد، ئینجا مه‌سیح ووتی: [[ئه‌وه‌تا هاتووم تا به‌خواستی تۆ كار بكه‌م.]] كه‌واته به‌مه یاسای یه‌كه‌می لابرد، تا یاسای دووه‌م دابنێ. به‌پێی ئه‌م خواسته‌ی خودا، ئێمه پیرۆز بووین كاتێ عیسای مه‌سیح یه‌كجار له‌شی خۆی كرد به‌قوربانی له‌پێناوی هه‌مووان.
له‌كۆندا سه‌رۆك كاهینه‌كان هه‌موو ڕۆژێك سه‌رله‌نوێ ده‌بووایه قوربانگایان ئاماده بكردایه، له‌به‌ر پێشكهشكردنی قوربانی بۆ خودا، هه‌رچه‌نده ئه‌و جۆره قوربانیانه نه‌یانده‌توانی گوناهی هیچ مرۆڤێك لاببه‌ن. به‌ڵام ئه‌و كاهینه به‌رزه [مه‌سیح] یه‌كجار قوربانیه‌كی پێشكهشكرد له‌جیاتی هه‌موو گوناهێك، ئه‌وسا بۆ هه‌تاهه‌تایه له‌لای ده‌سته ڕاستی خودا دانیشت. ئه‌و له‌وێ چاوه‌ڕێ ده‌كات، هه‌تا خودا هه‌موو دوژمنه‌كانی دهخاته ژێر پێیه‌وه. چونكه ئه‌و بهیهك قوربانی، ئه‌وانه‌ی پیرۆزكراون، دروستو ته‌واوی كردن. ڕۆحی پیرۆزیش خۆی شایه‌تیمان بۆ ده‌دات، دوای ئه‌وه‌ی خودا ده‌ڵێ: [[ئه‌مه ئه‌و په‌یمانه‌یه كه له‌گه‌ڵیان ده‌یبه‌ستم، دوای ئه‌و ڕۆژانه خوداوه‌ند ده‌ڵێ: یاساكانم ده‌خه‌مه ناو دڵیان، هه‌روه‌ها له‌ناو مێشكیان ده‌ینووسم.]] ئینجا به‌رده‌وام ده‌بێ‌و ده‌ڵێ: [[جارێكیتر هه‌رگیز یادی گوناههكانو هه‌ڵه‌كانیان ناكه‌مه‌وه.]] هه‌روه‌ها كاتێ ئه‌م گوناهانه به‌خشران، ئیتر پێویست ناكات قوربانی بۆ گوناه بكرێ.
ئه‌نجامی قوربانی مه‌سیح
به‌م شێوه‌یه برایانی خۆشه‌ویست، ئێستا به‌ته‌واوی باوه‌ڕمان به‌وه هه‌یه، به‌هۆی خوێنی عیسای مه‌سیح، ده‌توانین بڕۆینه شوێنی هه‌ره پیرۆز. به‌و ڕێگا زیندوو و تازه‌یه‌ی به‌دڕاندنی په‌رده‌ی په‌رستگا كرایه‌وه، واته به‌له‌شی خۆی. هه‌روه‌ها له‌به‌رئه‌وه‌ی كاهینی به‌رزمان هه‌یه سه‌رپه‌رشتی ماڵی خودا ده‌كات، كه‌واته، پێویسته نزیك بكه‌وینه‌وه له‌خودا بهدڵێكی پاكو پڕ له‌متمانه‌ی باوه‌ڕ، دوای ئه‌وه‌ی دڵمان پاككرایهوه له‌یژدانێكی خراپ به‌پرژاندنی خوێن به‌سه‌ری، هه‌روه‌ها له‌شمان به‌ئاوی پاك خاوێن كراوه‌ته‌وه. با دهستبگرین به‌و هیوایه‌ی شایه‌تی بۆ ده‌ده‌ین، بێ‌ئه‌وه‌ی له‌هاتنه‌دی دوودڵ بین، چونكه ئه‌وه‌ی به‌ڵێنی پێ‌داوین ڕاستگۆیه، هه‌روه‌ها با ئاگاداری یه‌كتری بینو یه‌كتری هانبدهین بۆ خۆشهویستیو كرداری چاك. واز لهكۆبوونهوهكانتان مه‌هێنن، هه‌روه‌ك هه‌ندێكتان له‌سه‌ری ڕاهاتوون، به‌ڵكو یه‌كتری هانبدهن بۆ ئاماده‌بوون، له‌مه‌ش زیاتر چونكه ده‌بینن ڕۆژی خوداوه‌ند نزیكبووهتهوه.
گه‌ر ئێمه به‌ده‌ستی ئه‌نقه‌ست گوناه بكه‌ین، دوای ئه‌وه‌ی ڕاستیمان ناسی، ئه‌وسا هیچ قوربانیه‌ك نییه بۆ لێ‌خۆشبوونی گوناهمان. هیچ شتێكی دیكه‌مان بۆ نامێنێته‌وه جگه له‌وه‌ی چاوه‌ڕێی ڕۆژی لـێپرسینه‌وه‌ی ترسناكو تووڕه‌یی ئه‌و ئاگره بكه‌ین كه دوژمنانی پێ ده‌سوتێنرێ. ده‌زانن گه‌ر یه‌كێك دوو یان سێ شایه‌تی به‌سه‌ره‌وه بێ كه‌وا به‌رپێچی شه‌ریعه‌تی موسای كردووه، بێ به‌زه‌ییانه سزای مردنی به‌سه‌ر ده‌درێ. كه‌واته به‌ڕای ئێوه، ده‌بێ چه‌ند زیاتر بێ سزای ئه‌وه‌ی به سووكی سه‌یری ڕۆڵه‌ی خودا دهكاتو له‌هه‌مان كات خوێنی په‌یمان به پیس داده‌نێ كه پیرۆزی كردووه، هه‌روه‌ها گاڵته به به‌ره‌كه‌تی خودا ده‌كات؟ چونكه ئێمه ئه‌وه باش ده‌ناسین كه ووتویه‌تی: [[تۆڵه سه‌ندن هی منه، منم پاداشت ده‌ده‌مه‌وه.]] هه‌روه‌ها نووسراوه: [[خوداوه‌ند حوكم به‌سه‌ر گه‌له‌كه‌ی ده‌دات.]] زۆر ترسناكانه كه‌وتنه به‌رده‌ستی خودای زیندوو.
به‌ڵام ڕۆژانی ڕابردووتان له‌یاد بێ، كاتێ ژیانتان ڕووناك كرایه‌وه‌و چه‌ند دانتان به‌خۆتان گرتو تووشی ئازار هاتن به‌تێكۆشانێكی سهختو درێژ. له‌لایه‌ك ئێوه تووشی جنێو و چه‌وسانه‌وه هاتوون، له‌لایه‌كی دیكه به‌شداری ئه‌وانه‌تان كرد كه بهههمان شێوه هه‌ڵسوكه‌وتیان له‌گه‌ڵ ده‌كرا. هه‌روه‌ها به‌شداری به‌ندكراوانتان كرد له‌ئازاره‌كانیان، كاتێ ده‌ستیان به‌سه‌ر ماڵو سامانتان گرت، به‌خۆشیه‌وه دانتان به‌خۆتان گرت، چونكه ده‌زانن له‌ئاسمان سامانێكی باشترو نه‌فه‌وتاوتان هه‌یه. كه‌واته بێ متمانه مه‌بن، چونكه پاداشتی مه‌زنه. ئێوه پێویستتان به‌دان به‌خۆگرتن هه‌یه، تا كاربكه‌ن به‌خواستی خوداو به‌ڵێنه‌كه‌ی بهدهستبهێنن. [[چونكه ئه‌وه‌ی چاوه‌ڕێی ده‌كرێ بێت، دوای ماوه‌یه‌كی زۆر كورت دێتو دواناكه‌وێ. خودا ده‌ڵێ: ئه‌وه‌ی بهباوهڕ بێ‌تاوان ده‌بێ، ده‌ژی، هه‌روه‌ها ئه‌گه‌ر هه‌ڵگه‌ڕایه‌وه، ئه‌وه جێی ڕه‌زامه‌ندی من نابێ.]] جا ئێمه سه‌ربه‌و هه‌ڵگه‌ڕاوانه نین كه له‌ناوده‌چن، به‌ڵكو سه‌ربه‌وانه‌ین كه باوه‌ڕیان هه‌یه‌و ڕزگار ده‌بن.
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.