Biblica® Open Sorani Kurdish Book of Life
کردار 8
چه‌وسانه‌وه‌ی باوه‌ڕداران
شاول ڕازی بوو به كوشتنی ئیستفانۆس.
هه‌ر له‌و ڕۆژه‌دا كۆمه‌ڵی باوه‌ڕداران تووشی چهوسانهوهیهكی زۆر هات لهقودس. هه‌موو باوه‌ڕداران لهناوچهكانی یه‌هودیه‌و سامیره بڵاوبوونه‌وه، به‌ڵام نێرراوان هه‌ر لهقودس مانه‌وه. ئیتر هه‌ندێ پیاوی لهخوداترس ئیستفانۆسیان ناشتو زۆر له‌سه‌ری گریان. به‌ڵام شاول هه‌وڵی له‌ناوبردنی باوه‌ڕدارانی ده‌دا، له‌م ماڵه‌وه ده‌چوو بۆ ئه‌و ماڵ ژنو پیاوی ڕاده‌كێشاو ده‌یخستنه به‌ندیخانه.
مزگێنیدان لهسامیره
ئه‌و باوه‌ڕدارانه‌ی بڵاوببوونه‌وه لهشوێنێكهوه ده‌چوون بۆ شوێنێكیكه‌و مزگێنی ووشه‌ی خودایان به‌خه‌ڵكی ده‌دا. جا فیلیپۆس بۆ شارێك ڕۆیشت له‌ناوچه‌ی سامیره، سه‌باره‌ت به‌مه‌سیح بۆ دانیشتوانی قسهیكرد. كاتێ خه‌ڵكه‌كه گوێیان لێی گرتو نیشانه‌ی سه‌رسوڕهێنه‌ریان لێی بینی، هه‌موو زۆر بایه‌خیان دا به‌وه‌ی ووتی، چونكه ڕۆحی پیس له‌زۆر كه‌س كه‌تیایان نیشته‌جێ‌بوون، ده‌هاته ده‌ره‌وه‌و بهدهنگی به‌رز هاواریان ده‌كرد، هه‌روه‌ها شهلو گۆجی زۆری چاككردهوه، ئه‌وسا خۆشی هه‌موو شاره‌كه‌ی گرته‌وه.
پێش ئه‌مه له‌و شاره‌دا جادوگه‌رێك هه‌بوو ناوی شه‌معون بوو، جادوی ده‌كردو دانیشتووی سامیره سه‌ریان سوڕمابوو لێی، ده‌یووت من پیاوێكی مه‌زنم. گه‌وره‌و بچووك گوێیان لـێدهگرتو دهیانووت: (ئه‌م پیاوه گه‌وره‌ییو توانای خودای تیادایه.) ئه‌وان گوێیان بۆ ده‌گرت، چونكه ماوه‌یه‌كی درێژ بوو جادوگه‌رێتی لهناویاندا ده‌كرد.
كاتێ باوه‌ڕیان هێنا به‌ووشه‌كانی فیلیپۆس ئه‌وه‌ی مزگێنی پادشاهێتی ئاسمانو ناوی عیسای مه‌سیحی پێ‌دان، ئیتر ژنو پیاو له‌ئاوهه‌ڵكێشران. ئه‌وسا شه‌معونیش باوه‌ڕی هێناو له‌ئاوهه‌ڵكێشرا، خوی به فیلیپۆس گرتبوو، سه‌ریسوڕما بوو كاتێ نیشانه‌و كاری سه‌رسوڕهێنه‌ری ده‌بینی له‌سه‌رده‌ستی ده‌كرا. كاتێ نێرراوان لهقودس بیستیان كه‌وا دانیشتوانی سامیره باوه‌ڕیان به ووشه‌ی خودا هێناوه، ئه‌وسا پهترۆسو یۆحه‌ننایان بۆ لایان نارد. هه‌ر دووكیان نوێژیان بۆ كردن تاكو ڕۆحی پیرۆز وه‌رگرن، چونكه هێشتا ڕۆحی پیرۆز نه‌ڕژابوو بـه‌سـه‌ر كـه‌سـیان، بـه‌ڵكو ته‌نها به‌ناوی عیسای خوداوه‌ند له‌ئاو هه‌ڵكێشرابوون. جا پهترۆسو یۆحه‌ننا ده‌ستیان خسته سه‌ر سه‌ریان، ئه‌وسا ڕۆحی پیرۆزیان وه‌رگرت. كاتێ شه‌معون بینی ڕۆحی پیرۆز چووه ناو ئه‌و باوه‌ڕدارانه‌ی كه دوو نێرراوه‌كه ده‌ستیان خسته سه‌ر سه‌ریان، هه‌ندێ پاره‌ی خسته به‌رده‌م په‌ترۆس و یۆحه‌نناو پێیووتن: (ئه‌و توانایه بهمنیش بده‌ن، هه‌تا ده‌ست بخه‌مه سه‌ر هه‌ر كه‌سێك ڕۆحی پیرۆز وه‌رگرێ.) په‌ترۆس پێیووت: (با زیوه‌كه‌ت له‌گه‌ڵ خۆت له‌ناوبچێ! چونكه له‌و باوه‌ڕه‌دا بووی تۆ ده‌توانی به‌هره‌ی خودا به پاره بكڕی! تۆ له‌م شته‌دا مافو بهشتنییه، چونكه دڵت ڕاست نییه به‌رامبه‌ر خودا. تۆبه بكه له‌به‌ر ئه‌م خراپه‌یه، نوێژ بكه بۆ خوداوه‌ند تا لهمهبهستی دڵت خۆشبێ، چونكه ده‌تبینم تێكه‌ڵ به‌تاڵاو بوویتو كه‌وتوویته داوی گوناه.) جا شه‌معون ووتی: (هه‌ر دووكتان له‌پێناوی من نوێژ بكه‌ن بۆ خوداوه‌ند، هه‌تا هیچ شتێك له‌وه‌ی باسی ده‌كه‌ن به‌سه‌رمدا نه‌یه‌ت. دوای ئه‌وه‌ی پهترۆسو یۆحه‌ننا شایه‌تی ووشه‌ی خوداوهندیانداو له‌وێ ئاشكرایانكرد، گه‌ڕانه‌وه بۆ قودسو ووشه‌ی خودایان بۆ زۆر لادێكانی ناوچه‌ی سامیره ڕاگه‌یاند.
فیلیپۆسو وه‌زیری حه‌به‌شه
فریشته‌یه‌كی خوداوه‌ند له‌گه‌ڵ فیلیپۆس دواو پێیووت: (هه‌سته بڕۆ به‌ره‌و خواروو، به‌ڕێگای نێوان قودسو غه‌ززه‌دا. ئه‌ویش هه‌ستاو ڕۆیشت، له‌وكاته‌دا تووشی پیاوێكی گرنگی خه‌ساوی حهبهشیبوو كه وه‌زیری كاروباری دارایی بوو لای كه‌نداكه‌ی شاژنی حه‌به‌شه، هاتبووه قودس بۆ په‌رستن، كاتێ بهسواری گالیسكه‌كه‌ی ده‌گه‌ڕایه‌وه بۆ حه‌به‌شه، خه‌ریكی خوێندنه‌وه بوو له‌په‌رتووكی ئه‌شعیای پێغه‌مبه‌ر، رۆحی پیرۆز به فیلیبۆسی ووت: (بڕۆ دوای ئه‌و گالیسكه‌یه كه‌وه.) ئیتر فیلیپۆس به په‌له دوایكه‌وت، گوێی لهكابرا بوو په‌رتووكی ئه‌شعیای ده‌خوێنده‌وه‌و لێیپرسی: (ئایا ئه‌وه‌ی ده‌یخوێنیته‌وه تێیدهگهی؟) ئه‌ویش له‌وه‌ڵامدا ووتی: (چۆن ئه‌مه بتوانم گه‌ر یه‌كێك بۆم ڕووننهكاتهوه؟) ئینجا فیلیبۆسی بانگكرد بچێته سه‌ر گالیسكه‌كه‌یو له‌گه‌ڵی دابنیشێ. كابرا له‌و په‌رتووكه‌ی ده‌یخوێنده‌وه گه‌یشتبووه ئه‌و به‌شه‌ی كه ده‌ڵێ: [[وه‌ك به‌رخێك كه‌وا ده‌برێ بۆ سه‌ربڕین، هه‌روه‌ها وه‌ك به‌رخێكی بێ‌ده‌نگ له‌به‌رده‌ست ئه‌وه‌ی خوری لێدهبڕیتهوه، به‌م شێوه‌یه ده‌می نه‌كرده‌وه. لهكاتێ كه ملكهچبوو بهناڕهوایی هه‌ڵسوكه‌وتیان له‌گه‌ڵ كرد. جا كاتێ ژیانی له‌سه‌ر زه‌وی نه‌ما، ئیتر كێ باسی نه‌وه‌كانی ده‌كات؟]]
لێره كابرا به فیلیپۆسی ووت: (پێمبڵێ: ئه‌شعیای پێغه‌مبه‌ر مه‌به‌ستی له كێیه له‌م ووته‌یه‌دا؟ له‌خۆی یاخود له یه‌كێكیكه؟) ئیتر فیلیپۆس كه‌وته قسهكردنو ده‌ستیكرد به مزگێنیدانی عیسا به ده‌ست پێ‌كردن له‌و په‌رتووكه‌وه. كاتێ به‌ڕێگاوه بوون، گه‌یشتنه شوێنێك ئاوی لـێ‌بوو، كابرا به فیلیپۆسی ووت: (ئه‌وه ئاوه، چی ڕێم لـێ‌ده‌گرێ له‌ئاوهه‌ڵبكێشرێم؟) [فیلیپۆس له‌وه‌ڵامدا ووتی: (ئه‌مه ده‌بێ گه‌ر به هه‌موو دڵته‌وه باوه‌ڕ بهێنی.) جا كابرا ووتی: (باوه‌ڕ ده‌كه‌م عیسای مه‌سیح ڕۆڵه‌ی خودایه.(] فه‌رمانیدا گالیسكه‌كه ڕاوه‌ستێ، ئه‌وسا هه‌ردووكیان به‌یه‌كه‌وه چوونه سه‌ر ئاوه‌كه‌و فیلیپۆس كابرای خه‌ساوی له‌ئاوهه‌ڵكێشا. كاتێ له ئاوه‌كه هاتنه‌ده‌ره‌وه ڕۆحی خوداوه‌ند فیلیپۆسی ڕفاند، ئیتر كابرا فیلیپۆسی نه‌بینییه‌وه. ئه‌ویش به‌خۆشیه‌وه به‌ڕێگای خۆی ڕۆیشت. دوای ئه‌وه فیلیپۆس له ئه‌شدود بینرا، ئینجا ڕۆیشت بۆ مزگێنیدان له هه‌موو ئه‌و شارانه‌ی ئه‌وێ تا گه‌یشته شاری قه‌یسه‌ریه.
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.