Biblica® Open Sorani Kurdish Book of Life
کردار 6
هه‌ڵبژاردنی حه‌وت خزمه‌تكار
كاتێ له‌و ڕۆژانه‌دا ژماره‌ی قوتابیه‌كان زیادی ده‌كرد، گیروگرفت كه‌وته نێوان عیبرانیهكانو جووله‌كه یۆنانیه‌كان، چونكه جێ‌به‌جێ‌كردنی پێویستی ڕۆژانه‌ی بێوه‌ژنه‌كانیان پشتگوێ خرابوو. بۆیه دوانزه نێرراوه‌كه هه‌موو قوتابیانیان بانگكردو پێیانووتن: (نابێ ئێمه واز له‌ووشه‌ی خودا بهێنینو به‌ئازووقه دابه‌شكردن خه‌ریك بین. ئه‌ی برایان له‌نێو خۆتان حه‌وت پیاو هه‌ڵبژێرن كه ناوبانگیان باش بێتو پڕبن لهڕۆحی پیرۆزو لهدانایی، هه‌تا هه‌ستن به‌جێ‌به‌جێ‌كردنی ئه‌م ئه‌ركه. به‌ڵام ئێمه، به‌رده‌وام ده‌بین له‌سه‌ر نوێژكردنو خزمهتكردنی ووشه‌ی خودا.) خه‌ڵكه‌كه هه‌موو ئه‌م پێشنیاره‌یان به‌دڵ بوو، یه‌كه‌مجار ئیستفانۆسیان هه‌ڵبژارد، ئه‌ویش پیاوێكی پڕ له‌باوه‌ڕو ڕۆحی پیرۆز بوو، ئینجا فیلیپۆسو پوروخۆرسو نیكانۆرو تیمۆنو پهرمیناسو نیقولاوسی ئه‌نتاكی كه ناجووله‌كه‌بوو ببوو به‌جووله‌كه. ئه‌وانه له‌پێش نێرراوان دانرانو ئه‌وانیش ده‌ستیان خسته سه‌ر سهریانو نوێژیان بۆ كردن. ئیتر ووشه‌ی خودا زیاتر بڵاوبووه‌وه، هه‌روه‌ها ژماره‌ی قوتابیان له قودس زیاد بوو، كۆمه‌ڵێكی گهورهش له كاهینه‌كان گوێڕایه‌ڵی باوه‌ڕ بوون.
گرتنی ئیستفانۆس
ئیستفانۆسیش پڕ له بهرهكهتو هێزی خودا، كاری سه‌رسوڕهێنه‌رو نیشانه‌ی گه‌وره‌ی له‌نێو گه‌ل ده‌كرد. جا هه‌ندێ له‌وانه‌ی سه‌ر بهكهنیشتی كۆیـله ئــازاد كـراوه‌كان بوون، له‌گه‌ڵ جووله‌كه قهیرهوانییهكانو ئه‌سكه‌نده‌ریه‌كان شه‌ڕه قسه‌یان له‌گه‌ڵ ئیستفانۆسكرد، هه‌روه‌ها چه‌ند كه‌سێكی ناوچه‌ی كیلیكیاو ئاسیاشیان له‌گه‌ڵدابوو. به‌ڵام نه‌یانتوانی به‌ربه‌ره‌كانی ئه‌و داناییه‌و ئه‌و ڕۆحه بكه‌ن كه تیایدا ده‌دوا. هیچیان بۆ نه‌كرا چه‌ند كه‌سێكیان هاندا تا بڵێن: (گوێمان له‌ئیستفانۆس بوو كفری سه‌باره‌ت به موساو خودا ده‌كرد.) ئینجا گهلو پیرانو مامۆستایانی شه‌ریعه‌تیان جۆشدا، ئه‌وسا گرتیانو هێنایانه لای ئه‌نجوومه‌ن، شایه‌تی درۆیان به‌سه‌ره‌وه دروستكردو ده‌یان ووت: (ئه‌م كابرایه دژی ئه‌م شوێنه پیرۆزه‌و شه‌ریعه‌ت هه‌میشه قسه دهكاتو وازناهێنێ. چونكه گوێمان لێیبوو ده‌یووت عیسای ناسیری ئه‌م په‌رستگایه دهروخێنێو ئه‌و خووڕه‌وشتانه‌ی له‌موسا وه‌رمانگرتووه ده‌یگۆڕێ.) كاتێ سهیریانكرد هه‌موو ئه‌وانه‌ی لهكۆڕهكه ئامادهبوون سه‌رنجیاندا، بینییان ده‌موچاوی وه‌ك ده‌موچاوی فریشته وایه.
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.