Biblica® Open Sorani Kurdish Book of Life
کردار 3
چاكبوونهوهی ئیفلیجێك
ڕۆژێكیان كاژێری سێی پاش نیوه‌ڕۆ پهترۆسو یۆحه‌ننا له‌كاتی نوێژكردن چوونه په‌رستگا. له‌به‌رده‌م ده‌رگای په‌رستگادا كه پێیده‌وترا ده‌رگای جوان، پیاوێكی به‌زگماك ئیفلیج دانیشتبوو، هه‌موو ڕۆژێك ههڵیاندهگرتو له‌وێ دایاندهنا تا سواڵ بكات له‌وانه‌ی ده‌هاتنه په‌رستگاكه‌وه. كاتێ كابرا پهترۆسو یۆحه‌ننای بینی هاتنه ناو په‌رستگا، داوای خێری لـێ‌كردن، ئه‌وانیش به ووردی تێیانڕوانی، ئینجا په‌ترۆس پێیووت: (سه‌یرمان بكه!) ئه‌ویش چاوی تێبڕینو چاوه‌ڕێی ده‌كرد شتێكی بده‌نێ. په‌ترۆس ووتی: (نه زێڕم پێیه‌و نه زیو، به‌ڵام ئه‌وه‌ی هه‌مه ده‌تده‌مێ، به‌ناوی عیسای مه‌سیحی ناسیری هه‌سته‌و بڕۆ!) په‌ترۆس ده‌ستی ڕاستی گرتو هه‌ڵیساند، یه‌كسه‌ر هێز كه‌وته قاچو ئێسقانه‌كانی. ئیتر كابرا هه‌ڵبه‌زییه‌وه‌و ده‌ستیكرد به ڕۆیشتن، له‌گه‌ڵ پهترۆسو یۆحه‌ننا چووه په‌رستگا، له‌خۆشیان به ڕۆیشتنه‌وه قه‌ڵه‌مبازی ده‌داو ستایشی خودای ده‌كرد. هه‌موو ئه‌وانه‌ی لهوێبوون بینییان كابرا به‌پێی خۆی ده‌ڕواو ستایشی خودا ده‌كات. ئیتر خه‌ڵكه‌كه زانییان كابرا ئه‌و سواڵكه‌ره ئیفلیجه‌یه كه‌وا كردبووی به خوو له‌به‌رده‌م ده‌رگای په‌رستگا داده‌نیشت ئه‌وه‌ی پێی ده‌وترا جوان، جاهه‌موو سه‌ریان سوڕما له‌وه‌ی به‌سه‌ر كابرا هاتووه.
ووتاری په‌ترۆس له‌په‌رستگا
له‌هۆڵی په‌رستگـا كه به هۆڵی سلێمان ناسرا بوو كابرای ئیفلیج ده‌ستیگرتبوو به پهترۆسو یۆحه‌نناوه، ژماره‌یه‌كی زۆر له‌خه‌ڵكه‌كه به‌سه‌رسامیه‌وه لێیان كۆبوونه‌وه، كاتێ په‌ترۆس ئه‌مه‌ی بینی پێیووتن: (ئه‌ی نه‌وه‌ی ئیسرائیل، بۆچی سه‌رتان سوڕماوه له‌وه‌ی ڕوویداوه؟ بۆچی چاوتان تێ‌بڕیوین واده‌زانن ئێمه به‌توانای خۆمان یاخود به‌له‌خواترسیمان وامان له‌و پیاوه كردووه بڕوا؟ خودای ئیبراهیمو ئیسحاقو یاقوب، خودای باوباپیرانمان، عیسای ڕۆڵه‌ی خۆی شكۆداركرد، ئه‌وه‌ی ئێوه داتان به‌ده‌سته‌وه بۆ مردنو ڕهتتانكردهوه له‌به‌رده‌م پیلاتۆس، له‌كاتێكدا بڕیاری دابوو ئازادی بكات. ئێوه ئه‌و پاكوپیرۆزه بێ‌تاوانه‌تان ڕه‌تكرده‌وه‌و داوای لێبووردنتان بۆ بكوژێك كرد، جا ئێوه سه‌رۆكی ژیانتان كوشت. به‌ڵام خودا لهنێو مردووان زیندوویكرده‌وه، ئێمه‌ش شایه‌تین بۆ ئه‌مه. ئه‌م كابرایه‌ی ئێوه دهیبیننو ده‌یناسن، باوه‌ڕی به‌ناوی ئه‌و هه‌بوو، بۆیه هێزو توانای بۆ گه‌ڕایه‌وه. به ناوی عیساو ئه‌و باوه‌ڕه‌ی به‌هۆیه‌وه دێت، ئه‌م ته‌ندروستیه ته‌واوه‌ی بهكابرا به‌خشی لهبهرچاوی هه‌مووتان. (من ده‌زانم ئه‌ی برایان ئێوه‌و سه‌رۆكه‌كانتان به‌نه‌شاره‌زایی ههڵسوكهوتتانكرد، به‌ڵام خودا به‌مه هێنایه‌دی ئه‌وه‌ی له‌سه‌ر زمانی هه‌موو پێغه‌مبه‌ران ووتبووی كه‌وا مه‌سیحه‌كه‌ی ده‌بێ ئازار بچێژێ. كه‌واته تۆبه بكهنو بگه‌ڕێنه‌وه تاگوناههكانتان بسڕێته‌وه، ئینجا خوداوه‌ند ده‌رگای خۆشیتان لـێ‌بكاته‌وه، ئه‌ویش به‌وه‌ی جارێكی تر عیسای مه‌سیحتان بۆ بنێرێته‌وه، ئه‌وه‌ی لهپێشا بۆی دیاریكردوون. جا ده‌بێ مه‌سیح لهئاسمان بمێنێته‌وه تا ئه‌و كاته‌ی هه‌موو شتێك چاك ده‌بێته‌وه هه‌روه‌ك چۆن خودا لهكۆنهوه له‌سه‌ر زاری پێغه‌مبه‌ره پیرۆزه‌كانی دواوه. موسا بهباپیرانی ووتوه: [[خوداوه‌ند، خودا لهنێو براكانتان پێغه‌مبه‌رێكتان بۆ ده‌نێرێ وه‌ك من، هه‌رچیه‌كتان پێ‌ده‌ڵێ گوێیلـێ‌بگرن. به‌ڵام ئه‌وه‌ی گوێی لـێ‌ناگرێ له‌ناو گه‌ل ڕیشه‌كێش ده‌كرێ.]] ئه‌و كاتو سه‌رده‌مه هه‌موو پێغه‌مبه‌ران باسیان كردووه، له‌سامۆئیله‌وه تا ئه‌وانه‌ی دوای ئه‌و هاتوون. ئێوه‌ن ڕۆڵه‌ی پێغهمبهرانو ئه‌و په‌یمانه‌ی خودا له‌گه‌ڵ باوباپیرانمان به‌ستی، كاتێ به ئیبراهیمی ووت: [[به نه‌وه‌ی تۆ هه‌موو گه‌لانی سه‌ر زه‌وی پیرۆز ده‌بن.]] له‌پێناوی ئێوه خودا ڕۆڵه‌ی خۆی هه‌ستانده‌وه‌و یه‌كه‌مجار بۆ ئێوه‌ی نارد، تا پیرۆزتان بكات به‌گه‌ڕانه‌وه‌ی هه‌ر یه‌كێكتان لهخراپه.)
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.