Biblica® Open Sorani Kurdish Book of Life
کردار 21
پێشبینیه‌كان ده‌رباره‌ی ئازاری پۆڵس
كاتێ كه لهیهكتری جیابووینه‌وه، به‌ڕێكی به‌ڕێگای ده‌ریادا به‌ره‌و كوس ڕۆیشتین. بۆ ڕۆژی داهاتوو گه‌یشتینه دورگه‌ی ڕودس له‌وێشه‌وه به‌ره‌و دورگه‌ی پاترا ڕۆیشتین، له‌وێ كه‌شتیه‌كمان بینی بۆ فنیقیه ده‌چوو، سواری بووینو ڕۆیشتین. كاتێ دورگه‌ی قوبروسمان بینی به ده‌سته چه‌پ به‌جێمان هێشت، جا به‌رده‌وام بووین له‌گه‌شته‌كه‌مان به‌ره‌و سوریا، ئه‌وسا گه‌یشتینه مینای سورو لێی دابه‌زین، چونكه كه‌شتیه‌كه له‌وێ باره‌كه‌ی به‌تاڵ ده‌كرد. كاتێ له‌وێ قوتابیه‌كانمان دۆزیه‌وه، حه‌وت ڕۆژ لایان ماینه‌وه، ئه‌وانیش به‌هۆی ڕۆحی پیرۆزه‌وه ئامۆژگاری پۆڵسیانكرد نه‌ڕوات بۆ قودس. كاتێ ماوه‌ی مانه‌وه‌مان لایان ته‌واو بوو ڕۆیشتین تا گه‌شته‌كه‌مان ته‌واو بكه‌ین، تادهرهوهی شار خۆیانو ژنو منداڵیان له‌گه‌ڵمان هاتن. له‌سه‌ر قه‌راغی ده‌ریا چۆكمانداداو نوێژمان كرد، جا یه‌كترمان بهخودا سپارد، سواری كه‌شتیه‌كه بووین، ئه‌وانیش گه‌ڕانه‌وه بۆ ماڵه‌كانیان.
ئه‌وسا له‌ڕێگای ده‌ریاوه به‌رده‌وام بووین له گه‌شته‌كه‌مان، لهشاری سوره‌وه ڕۆیشتین بۆ شاری پتولمایس، له‌وێ هه‌واڵی برایانمان پرسیو سڵاومان لێكردنو ڕۆژێك له‌گه‌ڵیان ماینه‌وه. بۆ ڕۆژی داهاتوو چووین بۆ شاری قه‌یسه‌ریه بهمیوانی له‌ماڵی فیلپۆسی مزگێنیدهر ماینه‌وه، كه یه‌كێك بوو له‌و حه‌وت پیاوه‌ی خزمه‌تیان ده‌كرد له كۆمه‌ڵی باوه‌ڕداران، ئه‌ویش چوار كچی هه‌بوو به‌ووشه‌ی خودا ده‌دوان. كاتێ ئێمه له‌وێ بووین له‌ناوچه‌ی یه‌هودیه یه‌كێك هه‌بوو ناوی ئاغابوس بوو به‌ووشه‌ی خودا ده‌دوا، هات بۆ لامان. پشتێنه‌كه‌ی پۆڵسی هه‌ڵگرت، دهستو قاچی پێ‌به‌سته‌وه‌و ووتی: (ڕۆحی پیرۆز ده‌ڵێ خاوه‌نی ئه‌م پشتێنه، جووله‌كه‌كان به‌م شێوه‌یه له‌قودس ده‌یبه‌ستنه‌وه، ده‌یده‌نه ده‌ستی بێگانه‌كان.) كاتێ ئه‌مه‌مان بیست، ئێمه‌و ئه‌وانه‌ی دانیشتووی ئه‌وێ بوون، داوامان لهپۆڵس كرد نه‌چێ بۆ قودس، به‌ڵام ئه‌و پێیووتین: (ئه‌وه چیتانه دهگرینو دڵم ده‌شكێنن؟ من ئاماده‌م نه‌ك ته‌نها له قودس به‌ند بكرێم، به‌ڵكو لهبهر ناوی عیسای خوداوه‌ند بشمرم.) ئیتر نه‌مانتوانی ڕازی بكه‌ین، بێ‌ده‌نگ بووینو ووتمان: (با بهخواستی خوداوه‌ند بێ.) دوای ماوه‌یه‌ك خۆمان ئاماده‌كرد بۆ گه‌شت، به‌ره‌و قودس ڕۆیشتین، له‌گه‌ڵ هه‌ندێ لهقوتابیانی شاری قه‌یسه‌ریه، ئێمه‌یان برده ماڵی مه‌ناسونی قوبروسی كه قوتابیه‌كی كۆن بوو، تا له‌وێ بمێنینه‌وه.
له‌قودس
كاتێ گه‌یشتینه قودس، برایان به خۆشیه‌وه پێشوازیان لێ‌كردین. ڕۆژێ دوای گه‌یشتنمان پۆڵس له‌گه‌ڵمان هات بۆ لای یاقوب هه‌موو پیرانیش له‌وێ بوون. پۆڵس سڵاوی لێ‌كردن، ئه‌وسا یه‌ك له‌دوای یه‌ك هه‌واڵی هه‌موو ئه‌و شتانه‌ی دانێ كه خودا كردوویه‌تی له‌نێوان ئه‌وانه‌ی جووله‌كه نین به‌هۆی كاری ئه‌و. كاتێ ئه‌م هه‌واڵانه‌یان بیست، ستایشی خودایان كردو پێیانووت: (ئه‌ی برا ده‌بینی چۆن هه‌زاران جووله‌كه باوه‌ڕیان هێنا، هه‌موویان دڵگه‌رمن بۆ شه‌ریعه‌تی موسا. وایان بیستووه كه تۆ ئه‌و جووله‌كانه‌ی له‌نێوان بێگانه‌دا ده‌ژین بانگیان ده‌كه‌یت بۆ هه‌ڵگه‌ڕانه‌وه له شه‌ریعه‌تی موسا، هه‌روه‌ها ڕایاندهسپێری منداڵهكانیان خه‌ته‌نه نهكهنو په‌یڕه‌وی خووڕه‌وشتی باوباپیریان نه‌كه‌ن، كه‌واته ده‌بێ چی بكرێ، چونكه بێ‌گومان هه‌واڵی هاتنت ده‌بیستن؟ جا ئه‌وه بكه كه پێت ده‌ڵێین: چوار پیاومان لایه نه‌زریان له‌سه‌ره، بیانبه بۆ په‌رستگاو خۆت پاك بكه‌وه له‌گه‌ڵیان، نرخی سه‌رتاشینه‌كه‌یان بۆ بده، ئه‌وسا هه‌موو ده‌زانن ئه‌وه‌ی ده‌رباره‌ی تۆ بیستوویانه ڕاست نییه، تۆش وه‌ك ئه‌وان له‌سه‌ر شه‌ریعه‌ت ده‌ڕۆیت. به‌ڵام بۆ ئه‌و باوه‌ڕدارانه‌ی ناجووله‌كه‌ن، نامه‌یه‌كمان ناردووه تیایدا ڕامانسپاردون ئه‌و قوربانیانه‌ی بۆ بته‌كان ده‌كرێ نه‌یخۆن، هه‌روه‌ها خوێن نه‌خۆنه‌وه‌و گۆشتی ئه‌و ئاژه‌ڵانه‌ی خنكێنراون نهیخۆنو داوێن پیسی نه‌كه‌ن.(
ئیتر به‌م شێوه‌یه ڕۆژێ دوای ئه‌وه پۆڵس چوار پیاوه‌كه‌ی برد، پاش ئه‌وه‌ی خۆی پاككردهوه له‌گه‌ڵیان، چوو بۆ په‌رستگا هه‌تا ئه‌و به‌رواره تۆمار بكات كه هه‌فته‌ی پاكبوونه‌وه كۆتایی پێ دێت، هه‌روه‌ها له‌جیاتی هه‌ر یه‌كێكیان ئه‌و قوربانیه‌ی پێویسته پێشكه‌شی بكات.
گرتنی پۆڵس
كاتێ خه‌ریك بوو حه‌وت ڕۆژی پاكبوونه‌وه ته‌واوبێ، هه‌ندێ جووله‌كه‌ی ناوچه‌ی ئاسیا پۆڵسیان بینی له‌په‌رستگا، خه‌ڵكه‌كه‌یان هانداو گرتیان، ئینجا هاواریانكرد: (فریاكه‌ون ئه‌ی پیاوانی ئیسرائیل! ئه‌مه ئه‌و پیاوه‌یه له‌هه‌موو لایه‌كه‌وه خه‌ڵك فێری شتێك ده‌كات دژی گهلو شهریعهتهكهمانو ئه‌م شوێنه‌ش، ته‌نانه‌ت یۆنانی هێناوه بۆ په‌رستگاو ئه‌م شوێنه پیرۆزه‌ی گڵاو كردووه!) ئه‌مه‌یان ووت چونكه تۆرۆفیموسی خه‌ڵكی شاری ئه‌فه‌سۆسیان له‌گه‌ڵ پۆڵس بینی بوو، جا وایانزانی له‌گه‌ڵ خۆی بردوویه‌تی بۆ په‌رستگا.
ئه‌وسا هه‌موو خه‌ڵكی شار ووروژان، خه‌ڵكه‌كه په‌لاماری پۆڵسیانداو ڕایانكێشایه ده‌ره‌وه‌ی په‌رستگا، یه‌كسه‌ر ده‌رگاكه‌یان داخست، كاتێ ئه‌وان هه‌وڵی كوشتنیان ده‌دا، سه‌ركرده‌یه‌كی ڕۆمانی بیستی كه‌وا قودس هه‌مووی ووروژاوه. دهستبهجێ كۆمه‌ڵێ سه‌ربازو سه‌رپه‌لێكی بردو خێرا بۆ لایان ڕۆیشت. كاتێ جووله‌كه‌كان سهرۆكو سه‌ربازه‌كانیان بینی وازیان هێنا له‌لێدانی پۆڵس. ئیتر سه‌رۆكه‌كه لێی نزیكبووهوهو گرتی، فهرمانیدا به سه‌ربازه‌كانی به دوو زنجیر بیبه‌ستنه‌وه، ده‌یویست بزانێ ئه‌مه كێیهو چی كردووه، به‌ڵام هه‌ندێكیان شتێكیان دهووتو ههندێكیكهیان شتێكیكه. جا كه نه‌یتوانی ڕاستی شته‌كه ده‌ربخات به‌هۆی ووروژانی خه‌ڵكه‌كه‌وه، فهرمانیدا پۆڵس ببرێ بۆ سه‌ربازگه. كاتێ سه‌ربازه‌كان گه‌یاندیانه سه‌ر پێ‌پلیكانه‌كان ناچاربوون هه‌ڵیگرن تا ڕزگاری بكه‌ن له‌ده‌ستی خه‌ڵكه‌كه، چونكه ئه‌و خه‌ڵكه‌ی كۆبووبونه‌وه دوایكهوتنو هاواریان ده‌كرد: (با له سێداره بدرێ!)
پێش ئه‌وه‌ی پۆڵس بچێته سه‌ربازگه‌كه، به سه‌رۆكه‌كه‌ی ووت: (ئایا ده‌توانم شتێكت پێبڵێم؟) سه‌رۆكه‌كه لێی پرسی: (یۆنانی ده‌زانی؟) كه‌واته تۆ ئه‌و پیاوه میسریه نیت ماوه‌یه‌ك له‌مه‌وبه‌ر ئاژاوه‌ی نایه‌وه، به‌چوار هه‌زار پیاوكوژه‌وه چوو بۆ بیابان! ئه‌وسا پۆڵس ووتی: (من جووله‌كه‌ی ته‌رسوسم كه شارێكی به‌ناوبانگه له ناوچه‌ی كیلیكیه. داوات لێدهكهم ڕێگام بده‌ی قسه له‌گه‌ڵ خه‌ڵك بكه‌م.) ئیتر سه‌رۆكه‌كه ڕێگایدا، پۆڵس له‌سه‌ر پێ‌پلیكانه‌كان ڕاوه‌ستا، به‌ده‌ست ئیشاره‌تی بۆ خه‌ڵكه‌كه كرد، كاتێ بێدهنگی باڵی كێشا به‌و ناوه، دهستیكرد به‌قسه‌كردن بۆیان به‌زمانی عیبریو ووتی:
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.