Biblica® Open Sorani Kurdish Book of Life
کردار 19
پۆڵس له‌ئه‌فه‌سۆس
كه ئه‌پۆلۆس له‌كۆرنسوس بوو، پۆڵس گه‌یشته ئه‌فه‌سۆس، كاتێ به‌ناو ووڵاته‌كه‌دا ده‌ڕۆیشت له‌وێ هه‌ندێ قوتابی بینی. لێیپرسین: (ڕۆحی پیرۆزتان وه‌رگرت كاتێ باوه‌ڕتان هێنا؟) وهڵامیاندایهوه: (نه‌خێر! ته‌نانه‌ت ئێمه بوونی ڕۆحی پیرۆزمان نه‌بیستووه!) جا لێی پرسین: (كه‌واته له‌سه‌ر چ بناغه‌یه‌ك له‌ئاوهه‌ڵكێشران؟) ئه‌وانیش وهڵامیاندایهوه: (له‌سه‌ر بناغه‌ی له‌ئاوهه‌ڵكێشانی یه‌حیا.) ئینجا پۆڵس ووتی: (له‌ئاوهه‌ڵكێشانی یه‌حیا بۆ تۆبه‌كردن بوو، خه‌ڵكی بانگ ده‌كرد تاكو باوه‌ڕبهێنن به‌وه‌ی لهدوای دێت، واته عیسا.) كاتێ ئه‌مه‌یان بیست به‌ناوی عیسای خوداوه‌نده‌وه له‌ئاوهه‌ڵكێشران. هه‌روه‌ها كاتێ پۆڵس ده‌ستی خسته سه‌ریان، ڕۆحی پیرۆز دابه‌زییه سهریانو به‌زمانی ڕۆحی قسهیانكردو به‌ووشه‌ی خودا دوان، ژماره‌یان نزیكه‌ی دوانزه پیاو ده‌بوو.
ماوه‌ی سێ مانگ پۆڵس به‌رده‌وام بۆ كه‌نیشت ده‌چوو، به‌چاونه‌ترسی قسه‌ی ده‌كرد، له‌گه‌ڵ ئاماده‌بووان ده‌دواو هه‌وڵیده‌دا ڕازیان بكات به‌و ڕاستیانه‌ی تایبه‌ته به پادشاهێتی ئاسمان. به‌ڵام هه‌ندێكیان كهللهڕهقییان كردو نه‌یانویست باوه‌ڕبهێنن، دهستیانكرد به‌جنێودان به‌و فێركردنه له‌به‌رده‌م ئه‌وانه‌ی كۆبووبوونه‌وه. جا پۆڵس لێیان جیابووه‌وه به‌ته‌نها قوتابیه‌كانی له‌گه‌ڵ خۆی برد، هه‌موو ڕۆژێك گفتوگۆی ده‌كرد لهقوتابخانهی پیاوێك ناوی تیرانۆس بوو، بۆ ماوه‌ی دوو ساڵ له‌سه‌ر ئه‌مه به‌رده‌وام بوو. به‌م شێوه‌یه ووشه‌ی خوداوه‌ند بهههموو دانیشتوانی ئاسیا گه‌یشت لهجوولهكهو یۆنانی.
خوداش كاری سه‌رسوڕهێنه‌ری مه‌زنی له‌سه‌ر ده‌ستی پۆڵس ده‌كرد، تا وای لێهات خه‌ڵكی ده‌سته‌سڕه‌كه‌ی یاخود پارچه‌یه‌ك له‌جله‌كانی كهلهبهری كردبێ ده‌یانبردو ده‌یانخسته سه‌ر نه‌خۆشه‌كانیان، به‌مه نه‌خۆشیه‌كانیان نه‌ده‌ماو ڕوحه پیسه‌كانیان لێ‌ده‌هاته ده‌ره‌وه.
كوڕه‌كانی سكاوا
هه‌ندێ له‌و جووله‌كه گه‌ڕۆكانه‌ی ئیشیان ده‌ركردنی ڕۆحی پیس بوو هه‌وڵیاندا ناوی عیسای خوداوه‌ند بۆ به‌رژه‌وه‌ندی خۆیان به‌كار بهێننو ده‌یانووت: (ده‌رتده‌كـه‌ین به‌ناوی عیسا، ئه‌وه‌ی پۆڵس ڕایده‌گه‌ێنێ.) له‌ناو ئه‌وانه‌ی ئه‌مـه‌یان ده‌كـرد حـه‌وت كوڕی یه‌كێك لهسهرۆك كـاهینه‌كان كه ناوی سكاوا بوو، جا ڕۆحه پیسه‌كه وه‌ڵامیدانه‌وه: (من عیسا دهناسمو پۆلسیش ده‌ناسم، به‌ڵام ئێوه كێن؟)
ئینجا ئه‌و پیاوه‌ی ڕۆحه پیسه‌كه‌ی تێدابوو په‌لامــاری دانو زاڵبوو به‌سه‌ریان، به‌شێوه‌یه‌ك لـه‌و ماڵه‌ی تیایدا بوون به‌ڕووتیو برینداری ڕایان كرد. ئیتر ئه‌م هه‌واڵه بڵاوبووه‌وه له‌ناو ئه‌و جووله‌كه‌و یۆنانیانـه‌ی لـهئهفهسـۆس ده‌ژیـان، ئه‌وسـا هه‌موو ترس دایگرتن. به‌مه‌ش ناوی عیسای خوداوه‌ند به‌رزبووه‌وه. هه‌روه‌ها زۆر لـه‌وانه‌ی باوه‌ڕیان هێنابوو هــاتن، به‌ئاشـكرا دانیاننا بـه‌كـرده‌وه خـراپه‌كـانیان. زۆر له‌وانه‌ی خه‌ریكی جادوگه‌رێتی بوون ده‌ستیان كرد به كۆكردنه‌وه‌ی پهرتووكهكانیانو له‌به‌رده‌م هه‌مووان سووتاندیانن، سه‌رجه‌می نرخه‌كانیان په‌نجا هه‌زار پارچه زیو بوو. به‌م شێوه‌یه ووشه‌ی خوداوه‌ند گه‌شه‌ی ده‌كردو به‌هێز ده‌بوو.
شڵه‌ژانێكی ترسناك له‌ئه‌فه‌سۆس
دوای ئه‌وه‌ی ئه‌م شتانه ڕوویدا، پۆڵس بڕیاریدا بچێ بۆ ناوچه‌ی مه‌كدۆنیاو ئه‌خائیه، كاتێ به‌ڕێگاوه بوو بۆ قودس، ووتی: (پاش ئه‌وه‌ی له‌وێ مامه‌وه پێویسته بچم سه‌رێك له ڕۆماش بده‌م.) جا پۆڵس دووان له یاریده‌ده‌ره‌كـانی نارد بۆ مه‌كدۆنیا كه تیمۆساوسو ئه‌رسـتوس بوون، خۆشی ماوه‌یه‌ك لهناوچهی ئاسیا مایه‌وه. له‌و كاته‌دا شـڵه‌ژانێكی ترسناك له‌ئه‌فه‌سۆس په‌یدا بوو به‌هۆی ڕێگای خوداوه. له‌وێ زێڕنگه‌رێك هه‌بوو ناوی دیمتریوس بوو، په‌یكه‌ری زیوی دروست ده‌كرد بۆ بتی ئه‌رتامیس، به‌هۆی ئه‌مه‌وه خۆیو كرێكاره‌كانی پاره‌یه‌كی چاكیان دهستدهكهوت، كابرا كرێكارهكانیو زێڕینگه‌ره‌كانی تری بانگ كردو پێی ووتن: (ده‌زانن داهاتمان به‌سـتراوه به‌م پیشه‌یه‌مــانه‌وه، ئێوه دیوتانه‌و بیستوتانه ئه‌م پۆڵسه ڕێگای لهخهڵكێكێ زۆر تێك داوه، ته‌نها له‌ئه‌فه‌سۆس نا به‌ڵكو نزیكه‌ی لهههموو ناوچه‌ی ئاسیا، ڕازی كردوون به‌وه‌ی ئه‌و بتانه‌ی ده‌ست دروستی كردووه خودانین. ئه‌مه‌ش ته‌نها زیانی بۆ ئیشه‌كه‌مان نییه، به‌ڵكو ده‌بێته هۆی ئه‌وه‌ی په‌رستگای ئه‌رتامیسی بتی گه‌وره‌مان گه‌وره‌یه‌تی نه‌مێنێ. جا ده‌ترسین نرخو مه‌زنی نه‌مێنێ، ئه‌وه‌ی هه‌موو دانیشتوانی ئاسیا، به‌ڵكو هه‌موو جیهان ده‌یپه‌رستێ.) كاتێ گوێیان له‌م قسانه بوو تووڕه بوونو دهستیانكرد به‌هاوار كردن: (گه‌وره‌یی بۆ ئه‌رتامیس بتی دانیشتوانی ئه‌فه‌سۆس!) ئه‌م شڵه‌ژانه هه‌موو شاره‌كه‌ی گرته‌وه خه‌ڵكێكێ زۆر په‌لاماری غایوسو ئه‌رسترخۆسی مهكدۆنییاندا كه هه‌ردووكیان هاوڕێی پۆڵس بوون لهگهشتدا، ڕایانكێشان بۆ ناو گۆڕه‌پانی شانۆی شاره‌كه.
پۆڵس ویستی خۆی قسه له‌گه‌ڵ خه‌ڵكه‌كه بكات، به‌ڵام قوتابیه‌كان ڕێگای ئه‌مه‌یان لێگرت، هه‌روه‌ها هه‌ندێ له‌گه‌وره پیاوانی ئاسیا كههاوڕێی بوون ناردیانه لای تا داوای لێ‌بكه‌ن خۆی نزیك نه‌كاته‌وه له‌گۆڕه‌پانه‌كه. ئیتر شته‌كه له خه‌ڵكه‌كه تێكچوو بوو، هه‌ندێكیان هاواری شتێكیان ده‌كرد، هه‌ندێكی كه‌شیان هاواری شتێكی تر، ته‌نانه‌ت زۆربه‌یان هۆی كۆبوونه‌وه‌كه‌یان نه‌ده‌زانی. له‌ناو خه‌ڵكه‌كه‌دا جووله‌كه‌یه‌ك هه‌بوو ناوی ئه‌سكه‌نده‌ر بوو، جووله‌كه‌كان پاڵیان پێوه‌نا بۆ پێشه‌وه، هه‌ندێكیان بانگیان كرد بۆ قسه‌كردن. به‌ده‌ست ئیشاره‌تی بۆ كردن كه ده‌یه‌وێ قسه بۆ خه‌ڵكه‌كه بكات. به‌ڵام ئه‌وانه‌ی له‌وێدا كۆبووبوونه‌وه زانییان ئه‌و جووله‌كه‌یه، هه‌موویان به‌یه‌كه‌وه هاواریان ده‌كردو دهیانووتهوه بۆ ماوه‌ی دوو كاژێر: (گه‌وره‌و مه‌زنه ئه‌رتامیس بتی ئه‌فه‌سۆسیه‌كان!)
له دواییدا فه‌رمانڕه‌وای شاره‌كه توانی خه‌ڵكه‌كه هێمن بكاته‌وه، ووتی: (ئه‌ی دانیشتوانی ئه‌فه‌سۆس، كێ هه‌یه دان نه‌نێ به‌وه‌ی ئه‌فه‌سۆس شاری پاسه‌وانی په‌رستگای ئه‌رتامیسی بتی گه‌وره نییه له‌گه‌ڵ ئه‌و بتانه‌ی له ئاسمان هاتۆته خواره‌وه؟ له‌به‌رئه‌وه‌ی بیروڕای جیاواز نییه له‌م شته‌دا، پێویسته هێمن بنه‌وه‌و به‌خێرایی هیچ شتێك نه‌كه‌ن. ئیتر ئێوه بۆچی ئه‌م دوو پیاوه‌تان هێناوه له‌گه‌ڵ ئه‌وه‌ی په‌رستگایان ڕووتنهكردۆتهوهو كفریان سه‌باره‌ت به بته‌كانمان نه‌كردووه. به‌ڵام ئه‌گه‌ر دیمتریوسو هاوڕێیانی ناڕه‌زاییه‌كیان هه‌یه، ئه‌وا دادگاو دادپرسمان هه‌یه با ناڕه‌زایینامه پێشكه‌ش به‌دادپرس بكه‌ن. گه‌ر هاتوو ناڕه‌زاییه‌كی كه‌تان هه‌بوو، له‌دانیشتنێكی یاساییدا سه‌یر ده‌كرێ. چونكه هه‌موومان له‌مه‌ترسی داین، له‌سه‌ر دروستكردنی ئه‌م شڵه‌ژانه‌و ئه‌وه‌ی ئه‌مڕۆ ڕوویدا، ئێمه هیچ به‌هانه‌یه‌كمان نییه بۆ ڕوونكردنه‌وه‌ی ئه‌م كۆبوونه‌وه‌یه.) ئیتر به‌م قسانه خه‌ڵكه‌كه‌ی ڕه‌وانه‌كرد.
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.