Biblica® Open Sorani Kurdish Book of Life
کردار 13
هه‌ڵبژاردنی به‌ڕناباو شاول
له‌كۆمه‌ڵی باوه‌ڕدارانی ئه‌نتاكیا هه‌ندێ كه‌س به‌ووشه‌ی خودا دهدوانو هه‌ندێكیش فێركه‌ربوون، له‌وانه: به‌رنابا، شه‌معونی ناسراو بهڕهش، لوكیوسی قه‌یره‌وانی، مه‌ناین كه له منداڵیه‌وه له‌گه‌ڵ هێرۆدس به‌خێوكرابوو فه‌رمانڕه‌وای چواریه‌كی ناوچه‌كه بوو، هه‌روه‌ها شاولیان له‌گه‌ڵ بوو. ڕۆژێكیان، كاتێ به ڕۆژوو بوونو خوداوه‌ندیان ده‌په‌رست، ڕۆحی پیرۆز پێیووتن: (به‌رناباو شاولـم بۆ تهرخانكهن بۆ ئه‌و ئیشه‌ی كه بانگم كردون بۆی.) دوای ئـه‌وه‌ی به‌رۆژوو بـوونو نوێژیانكرد ده‌ستیان خسته سهریانو ڕه‌وانه‌یان كردن.
شاولو به‌رنابا لهقوبرس
كاتێ ڕۆحی پیرۆز به‌رناباو شاولـی نارد، به‌ره‌و دورگه‌ی سولوكیه ڕۆیشتن، له‌وێشه‌وه به‌ڕێگای ده‌ریا به‌ره‌و قوبرس كه‌وتنه‌ڕێ. كاتێ گه‌یشتنه شاری سه‌لامیس دابه‌زین، دهستیانكرد به‌بڵاوكــردنه‌وه‌ی ووشه‌ی خودا له‌كه‌نیشتی جووله‌كه‌كان، یۆحه‌نناشیان له‌گه‌ڵ بوو بۆ یارمه‌تی. به‌هه‌موو دورگه‌كه گه‌ڕان هه‌تا گه‌یشتنه شاری پافوس. له‌وێ تووشی جادوگه‌رێكی جووله‌كه بوون به‌درۆ خۆیكرد بوو به پێغه‌مبه‌ر، ناوی باریشوع بوو، له‌گه‌ڵ سه‌رجیوس پۆڵسی فه‌رمانڕه‌وای قوبرس بوو. فه‌رمانڕه‌وایه‌كه زیره‌ك بوو، به‌رناباو شاولی بانگ كرد، داوای لـێ‌كردن باسی ووشه‌ی خودای بۆ بكه‌ن. به‌ڵام ئیلیمی جادوگه‌ر، ئه‌مه ناوه یۆنانییه‌كه‌ی بوو، به‌ربه‌ره‌كانی كردنو هه‌وڵیدا به‌هه‌ر شێوهیهكبێ ڕێگای باوه‌ڕ له فه‌رمانڕه‌وا بگرێ.
ئینجا شاول، كه ناوی پۆڵسیش بوو، له‌شی پڕبوو له ڕۆحی پیرۆز، سه‌یری جادوگه‌ره‌كه‌ی كردو ووتی: (ئه‌ی ڕۆڵه‌ی شه‌یتان، ئه‌ی ئه‌وه‌ی پڕی لـهچــهوتــیو خراپه، ئه‌ی دوژمـنی هه‌موو چاكه‌یه‌ك! بۆ وازناهێنی لهچهوتكردنی ڕێگای ڕاسته‌قینه‌ی خوداوه‌ند؟ ئێستا ده‌ستی خوداوه‌ندت دێته سه‌ر، كوێر دهبیتو بۆ ماوه‌یه‌ك ڕۆژ نابینی.) ده‌ستبه‌جێ ته‌مێكی تاریك كه‌وته سه‌رچاوی، ده‌ستیكرد به‌گه‌ڕان به‌دوای یه‌كێك تا ده‌ستیبگرێ. كاتێ فه‌رمانڕه‌وا ئه‌وه‌ی بینی ڕوویدا باوه‌ڕی هێنا، چونكه سه‌رسام بوو له‌فێركردنی خوداوه‌ند.
لهئهنتاكیای بیسیدیه
پۆڵسو هاوڕێكانی به‌ناو ده‌ریادا له پافوسه‌وه چوون بۆ پرجه له په‌مفیلیه. له‌وێ یۆحه‌ننا لهپۆڵسو به‌رنابا جیابووه‌وه‌و گه‌ڕایه‌وه بۆ قودس. به‌ڵام ئه‌وان له‌پرجه‌وه بۆ ئه‌نتاكیای سه‌ر به ناوچه‌ی پیسیدیه ڕۆیشتن. ڕۆژی شه‌ممه چوونه كهنیشتو دانیشتن. پاش خوێندنه‌وه لهشهریعهتو په‌رتووكی پێغه‌مبه‌ران، پێشه‌وایانی كه‌نیشته‌كه به‌شوێنیان ناردنو پێیان ووتن: (ئه‌ی برایان، گه‌ر شتێكتان هه‌یه دانیشتوانی پێهانبدهن بیڵێن.) پۆڵس هه‌ستاو به‌ده‌ست ئیشاره‌تی كردو ووتی: (ئه‌ی نه‌وه‌ی ئیسرائیل، ئه‌ی ئه‌وانه‌ی له‌خودا ده‌ترسن، گوێ بگرن: خودای ئه‌م گه‌له، گه‌لـی ئیسرائیل، باوباپیرانمانی هه‌ڵبژارد، كردنی به‌گه‌لێكی مه‌زن لهمیسر، ئینجا له‌وێ ده‌ریهێنان به‌هێزو توانای بازووی. هه‌روه‌ها نزیكه‌ی چل ساڵ لهبیابان به‌خێویكردن، ئه‌وسا حه‌وت گه‌لـی لهووڵاتی كه‌نعان له‌ناوبرد، ئه‌وانی كرد به میراتگری زه‌ویه‌كه‌یان. ئه‌مه هه‌مووی نزیكه‌ی چوارسه‌دو په‌نجا ساڵی خایاند، پاش ئه‌مه خودا دادوه‌ری بۆ دانان هه‌تا سه‌رده‌می سامۆئیل پێغه‌مبه‌ر. ئینجا نه‌وه‌ی ئیسرائیل داوای پادشایان كرد، خوداش شاولـی كوڕی قه‌یسی بۆ دانان، له تیره‌ی بنیامین، بۆ ماوه‌ی چل ساڵ. ئینجا خودا لایبرد، داودی بۆیان دانا وه‌ك پادشا، ئه‌وه‌ی شایه‌تی بۆ ده‌داو ده‌ڵێ: [[من داودی كوڕی یه‌سام دۆزیه‌وه، ئه‌و پیاوه‌ی له‌گه‌ڵ دڵم ده‌گونجێ، به‌خواستی من ده‌كات.]] خودا بۆ نه‌وه‌ی ئیسرائیل له‌نه‌وه‌ی داود ڕزگاركه‌رێكی نارد كه عیسایه بۆ هێنانه‌دی به‌ڵێنه‌كه‌ی. پێش هاتنی عیسا، یه‌حیا له‌ئاوهه‌ڵكێشانی تۆبه‌ی بۆ هه‌موو گه‌لـی ئیسرائیل ڕاگه‌یاند. یه‌حیا به‌كاری خۆی هه‌ستابوو كاتێ ووتی: بیرده‌كه‌نه‌وه من كێم؟ من ئه‌و نیم، به‌ڵكو ئه‌وه‌ی دوای من دێت، من شایانی ئه‌وه‌نیم قه‌یتانی پێڵاوه‌كانی بكه‌مه‌وه.
(ئه‌ی برایان، ئه‌ی نه‌وه‌ی ئیبراهیم، هه‌روه‌ها ئه‌ی هه‌موو ئه‌وانه‌ی لێره ئامادهنو ترسی خوداتان له‌دڵدایه، بۆ ئێمه مزگێنی ئه‌م ڕزگاریه نێرراوه. چونكه دانیشتوانی قودسو سه‌رۆكه‌كانیان مه‌سیحیان نه‌ناسی، هه‌روه‌ها تێ‌نه‌گه‌یشتن لهووتهی پێغه‌مبه‌ران ئه‌وه‌ی هه‌موو ڕۆژێكی شه‌ممه بۆیان ده‌خوێنرایه‌وه، له‌گه‌ڵ ئه‌وه‌شدا به حوكمدانیان به‌سه‌ری ئه‌وه‌یان هێنایه‌دی كه له‌م ووتانه‌ی پێغه‌مبه‌ران دایه. هه‌رچه‌نده ئه‌وان هیچ تاوانێكیان به‌سه‌ری نه‌گرت تاشایانی مردن بێ، له‌گه‌ڵ ئه‌وه‌شدا داوایان لهپیلاتۆس كرد بیكوژێ. دوای ئه‌وه‌ی هه‌موو ئه‌وه‌ی له‌سه‌ری نووسرا بوو هێنایانه‌دی، له‌سه‌ر خاچه‌كه هێنایانه خواره‌وه‌و لهگۆڕ ناشتیان. به‌ڵام خودا له‌نێو مردووان هه‌ڵیسانده‌وه، ئینجا بۆ ڕۆژانێكی زۆر خۆی نیشانی ئه‌وانه‌دا كه لهناوچهی جه‌لیله‌وه تا قودس له‌گه‌ڵی بوون. ئێستا ئه‌وان شایه‌تی ئه‌مه ده‌ده‌ن له‌به‌رده‌م گه‌ل.
(ئه‌وه‌تا ئێمه‌ش وا مزگێنیتان ده‌ده‌ینێ به‌وه‌ی خودا به‌ڵێنی دابوو به باوباپیرانمان، ئێستا بۆ ئێمه‌ی ڕۆڵه‌ی ئه‌وان هێنایه‌دی، به‌هه‌ستانه‌وه‌ی عیسا له‌نێو مردووان هه‌روه‌ك لهزهبووری دووه‌م نووسراوه: [[تۆ كوڕمی، من ئه‌مڕۆ باوكتم.]] ڕاستی ئه‌وه‌ی خودا عیسای له‌نێو مردووان هه‌ستانده‌وه، هه‌رگیز گه‌نده‌ڵی نابینێ، ئه‌مه‌ش له‌لایه‌ن خوداوه ووتراوه: [[ئه‌و به‌ڵێنه پیرۆزو ڕاسته‌قینه‌یه‌تان ده‌ده‌مێ كه به داودم دابوو.]] هه‌روه‌ها داود له‌به‌شێكیتری زه‌بوور ده‌ڵێ: [[تۆ نایه‌ڵی تاقه پیرۆزه‌كه‌ت گه‌نده‌ڵی ببینێت.]] چونكه داود دوای ئه‌وه‌ی خزمه‌تی نه‌وه‌كه‌ی خۆیكرد به‌ڕێنمایی خودا مرد، ئینجا له‌گه‌ڵ باوباپیرانی نێژراو گه‌نده‌ڵیشی بینی. به‌ڵام ئه‌وه‌ی خودا هه‌ڵیسانده‌وه گه‌نده‌ڵی نه‌بینی. ئه‌ی برایان ئه‌وه‌ش بزانن، به‌هۆی عیساوه‌یه گوناه به‌خشینتان پێ‌ڕاگه‌ێندرا، هه‌ر كه‌سێك باوه‌ڕی پێ‌بهێنی بێ‌تاوان ده‌بێ له‌وه‌ی شه‌ریعه‌تی موسا نه‌یتوانێ بێ‌تاوانی بكات. جا ئاگاتان لهخۆتان بێ با ئه‌وه‌ی له‌سه‌ر زمانی پێغه‌مبه‌ران نووسراوه به‌سه‌رتان نه‌یه‌ت: [[سه‌یر بكه‌ن ئه‌ی گاڵته‌جاڕه‌كان، سه‌رسام بنو بمرن. چونكه من لهڕۆژانی ئێوه‌دا كارێك ده‌كه‌م گه‌ر یه‌كێك بۆتانی بگێڕایه‌وه باوه‌ڕتان پێی نه‌ده‌كرد.]])
كاتێ ئه‌وان ڕۆیشتن، خه‌ڵكه‌كه داوایان له پۆڵسو به‌رناباكرد ڕۆژی شه‌ممه‌ی داهاتوو بێنه‌وه‌و له‌و باره‌یه‌وه قسه‌یان بۆ بكه‌ن. دوای كۆبوونه‌وه‌كه، زۆر لهجوولهكهكانو ئه‌وانه‌ی بوو بوون بهجوولهكهو ترسی خودایان لهدڵ بوو دوایانكهوتن، ئه‌وانیش قسه‌یان له‌گه‌ڵ كردنو هانیاندان تا له‌به‌ره‌كه‌تی خودا به‌رده‌وام بن. لهشهممهی داهاتوو نزیكه‌ی هه‌موو دانیشتوانی شاره‌كه كۆبوونه‌وه تا گوێیان لهووشهی خودا بێ. كاتێ جووله‌كه‌كان خه‌ڵكه‌كه‌یان بینی به‌غیلی دایگرتن، دهستیانكرد به به‌ربه‌ره‌كانی قسه‌كانی پۆڵس به جنێو و كفره‌وه. پۆڵسو به‌رنابا به‌چاونه‌ترسیه‌وه قسه‌یان له‌گه‌ڵ كردنو ووتیان: (پێویست بوو لهپێشا بۆ ئێوه ووشه‌ی خودامان ڕابگه‌یاندایه، به‌ڵام ئێوه نه‌تانویست، واتان ده‌رخست ئێوه شایانی ژیانی هه‌تاهه‌تایی نین. جا ئه‌وه‌تا ئێمه به‌ره‌و لای ئه‌وانه لاده‌ده‌ین كه جووله‌كه‌نین! چونكه به‌م شێوه‌یه خوداوه‌ند ڕایسپاردینو ووتی: (من تۆم كردۆته ڕووناكی میلله‌تان، هه‌تا ڕزگاری بگه‌یه‌نی به‌وپه‌ڕی زه‌وی.) كاتێ ئه‌وانه‌ی جووله‌كه نه‌بوون گوێیان له‌مه‌بوو، زۆر دڵشادبوون، ستایشی ووشه‌ی خوداوهندیانكرد. له‌و كاتهدا هه‌موو ئه‌وانه‌ی خودا ئاماده‌ی كردبوون بۆ ژیانی هه‌تاهه‌تایی باوه‌ڕیان هێنا. جا به‌م شێوه‌یه ووشه‌ی خوداوه‌ند له‌هه‌موو ناوچه‌كه‌دا بڵاوبووه‌وه. به‌ڵام جووله‌كه‌كان ژنه به‌ڕێزه خواناسهكانو گه‌وره پیاوانی شاریان هاندا، بۆ چه‌وساندنه‌وه‌ی پۆڵسو به‌رنابا، تاكو دهریانكردن له‌شاره‌كه‌یان، جا ئه‌وانیش تۆزی پێیان ته‌كاندو به‌ره‌و شاری ئیقونیه ڕۆیشتن. به‌ڵام قوتابیه‌كان، له‌شیان پڕبوو له‌ڕۆحی پیرۆزو لهخۆشی.
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.