Biblica® Open Sorani Kurdish Book of Life
کردار 12
كوشتنی یاقوب
له‌وكاته‌دا هێرۆدسی پادشا ده‌ستیكرد به چه‌وساندنه‌وه‌ی چه‌ند كه‌سێ له كۆمه‌ڵی باوه‌ڕداران، یاقوبی برای یۆحه‌ننای به‌شمشێر كوشت. هه‌ركه بینی ئه‌مه جێگه‌ی ڕه‌زامه‌ندی جووله‌كه‌كانه، ئه‌وسا بڕیاریدا په‌ترۆسیش بگرێ، ئه‌مه‌ش له ڕۆژانی جه‌ژنی فه‌تیره‌دا بوو. كاتێ هێرۆدس ئه‌وی گرت، خستیه به‌ندیخانه‌وه له‌ژێر چاودێری چوار كۆمه‌ڵ پاسه‌وان داینا، هه‌ر كۆمه‌ڵه‌ش له‌چوار سه‌رباز پێكهاتبوو، چونكه ده‌یویست بیداته ده‌ستی جووله‌كه‌كان دوای جه‌ژنی تێپه‌ڕبوون، له‌به‌رئه‌وه له‌به‌ندیخانه‌دا هێشتیه‌وه، به‌ڵام ئه‌ندامانی كۆمه‌ڵی باوه‌ڕداران به به‌رده‌وامی بۆ ئه‌و له‌خودا ده‌پاڕانه‌وه‌و نوێژیان بۆ ده‌كرد.
ڕزگاربوونی په‌ترۆس
له‌و شه‌وه‌دا هێرۆدس نیازی وابوو په‌ترۆس بداته ده‌ستی جووله‌كه‌كان، په‌ترۆس لهنێوان دوو سه‌رباز خه‌وتبوو، به دوو كۆتو زنجیر به‌سترابووه‌وه، هه‌روه‌ها سه‌ربازیش پاسه‌وانی به‌رده‌می ده‌رگای به‌ندیخانه‌كه‌ی ده‌كرد. له‌پڕ فریشته‌یه‌كی خوداوه‌ند په‌یدابوو، ژووری به‌ندیخانه‌كه به‌ته‌واوی ڕووناك بووه‌وه، فریشته‌كه به‌توندی په‌ترۆسی جوڵاندو خه‌به‌ری كردهوهو پێیووت: (خێرا هه‌سته!) ئیتر هه‌ردوو كۆتو زنجیره‌كه له ده‌ستی كه‌وته خواره‌وه. فریشته‌كه پێیووت: (پشتوێنه‌كه‌ت ببه‌سته، پێڵاوه‌كانت له‌پێ بكه!) ئه‌ویش كردی. ئینجا فریشته‌كه پێیووت: (قاپووته‌كه‌ت لهبهركهو دوامكهوه.) په‌ترۆس چووه ده‌ره‌وه‌و شوێنی فریشته‌كه كه‌وت وایده‌زانی خه‌و ده‌بینێ، چونكه نه‌یده‌زانی ئه‌وه‌ی له‌سه‌ر ده‌ستی فریشته‌كه ڕووده‌دا شتێكی ڕاستیه. یه‌كه‌م بنكه‌ی پاسه‌وانیان بڕیو ئینجا دووه‌م. كاتێ گه‌یشتنه ده‌رگای ئاسنینی به‌ندیخانه‌كه كه ڕووه‌و شار بوو له‌خۆیه‌وه بۆیانكرایهوه، هه‌ردووكیان چوونهدهرهوه. دوای ئه‌وه شه‌قامێكیان بڕی، ئیتر یه‌كسه‌ر فریشته‌كه به‌جێیهێشت. جا ئه‌وكاته په‌ترۆس هۆشی به‌خۆی هاته‌وه‌و ووتی: (به‌ڕاستی ئێستا بۆم ده‌ركه‌وت كه‌وا خوداوه‌ند فریشته‌كه‌ی نارد، ڕزگاری كردم له‌ده‌ستی هێرۆدسو هه‌موو ئه‌وه‌ی جووله‌كه‌كان چاوه‌ڕێیان ده‌كرد.)
تۆزێ بیریكرده‌وه، ئیتر ڕۆیشت به‌ره‌و ماڵی مریه‌می دایكی یۆحه‌ننا كه نازناوی مه‌رقۆس بوو، له‌وێ ژماره‌یه‌كی زۆر كۆبووبوونه‌وه نوێژیان ده‌كرد. كاتێ گه‌یشت له‌ده‌رگای ده‌ره‌وه‌ی ماڵه‌كه‌یدا، كاره‌كه‌رێك كه ناوی ڕودا بوو هاته‌لای ده‌رگاكه تا بزانێ كێیه. هه‌ر كه ده‌نگی په‌ترۆسی ناسیه‌وه له خۆشیا ده‌رگاكه‌ی نه‌كرده‌وه، به‌ڵكو خێرا چووه ژووره‌وه‌و مزگێنیدا به‌وانه‌ی له‌وێ بوون كه‌وا په‌ترۆس له‌به‌ر ده‌رگایه. ئه‌وانیش پێیانووت: (تۆ وڕێنه ده‌كه‌یت.) به‌ڵام ئه‌و سووربوو له‌سه‌ر قسه‌كه‌ی، ئه‌وسا پێیانووت: (ئه‌وه فریشته‌كه‌یه‌تی!) به‌ڵام په‌ترۆس به‌رده‌وام بوو له ده‌رگا لـێدانه‌كه هه‌تا لێیان كرده‌وه. كاتێ بینییان زۆر سهرسامبوون. به‌ده‌ست ئیشاره‌تی بۆ كردن تا بێ‌ده‌نگ بن، ئینجا بۆی گێڕانه‌وه چۆن خوداوه‌ند لهبهندیخانه ده‌ریهێنا، پێیووتن: (ئه‌م هه‌واڵه بهیاقوبو برایانی دیكه بده‌ن.) ئیتر چووه ده‌ره‌وه‌و ڕۆیشت بۆ شوێنێكی دیكه.
كــاتێ ڕۆژبووه‌وه ئاژاوه‌یه‌كی گــه‌وره دروست بوو له‌نێـو سه‌ربازه‌كان، دهستیانكــرد به پرسیاركردن، په‌ترۆس چی به‌سه‌رهاتووه. كاتێ هێرۆدس داوایكردو نه‌یدۆزیه‌وه، ده‌ستیكرد بهلـێكۆڵینهوه له‌گه‌ڵ سهربازهكانو فه‌رمانیدا لــهسێداره بدرێن. ئینجا هێرۆدس له‌ناوچــه‌ی یه‌هـودیه‌وه بۆ ناوچهی قه‌یسه‌ریه ڕۆیشتو لــه‌وێ مایه‌وه.
مردنی هێرۆدس
چونكه هێرۆدس ڕقی له دانیشتوانی سورو سه‌یدا هه‌ڵگرتبوو، له‌به‌رئه‌وه ئه‌وانیش له‌نێو خۆیان ڕێكهوتنو چه‌ند نوێنه‌رێكیان نارده لای بلاستوسی ڕاوێژكه‌ری پادشا تا به‌زه‌یی پیایان بێته‌وه‌و داوای ئاشتبوونهوهیان بۆ بكات، چونكه ناوچه‌كه‌یان له‌و به‌شه‌ی سه‌ر به هێرۆدس بوو خواردنی بۆ ده‌هات. هێرۆدس لهڕۆژی دیاریكراو، جلی پاشایه‌تی له‌به‌ركرد، له‌سه‌ر ته‌ختی شاهانه دانیشتو قسه‌ی بۆ كردن. جا خه‌ڵكه‌كه هاواریانكرد: (ئه‌مه ده‌نگی خودایه نه‌ك ده‌نگی مرۆڤ!) یه‌كسه‌ر فریشته‌یه‌كی خوداوه‌ند له پادشایدا، چونكه شكۆ و مه‌زنی نه‌دا به خودا، ئیتر كرم خواردیو مرد. به‌ڵام ووشه‌ی خودا گه‌شه‌ی ده‌كردو زیاتر بڵاوده‌بووه‌وه.
دوای ئه‌وه‌ی به‌رناباو شاول ئه‌و كاره‌ی پێیان درابوو لهقودس جێبهجێیانكرد، گه‌ڕانه‌وه بۆ ئه‌نتاكیا یۆحه‌نناش كه نازناوی مه‌رقۆس بوو له‌گه‌ڵیان بوو.
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.