Biblica® Open Sorani Kurdish Book of Life
کردار 1
پێشه‌كی
به‌ڕێز ساوفیلۆس، لهپهرتووكی یه‌كه‌ممدا هه‌موو كردارهكانو فێركردنه‌كانی عیسام بۆ گێڕایته‌وه، له‌سه‌ره‌تای په‌یامه‌كه‌یه‌وه، تا ئه‌و ڕۆژه‌ی به‌رزكرایه‌وه بۆ ئاسمان، دوای ئه‌وه‌ی ڕاسپارده‌كانی پێشكهشكرد به‌هۆی ڕۆحی پیرۆزه‌وه به‌و نێرراوانه‌ی هه‌ڵیبژاردن. هه‌روه‌ها دوای ئازاركێشانی، له‌ماوه‌ی چل ڕۆژ خۆی بۆ ده‌رخستن به‌زیندوویی به‌چه‌نده‌ها به‌ڵگه‌ی چه‌سپاو و سه‌باره‌ت پادشاهێتی خودا بۆیان دوا. كاتێ له‌گه‌ڵیان كۆبووه‌وه، ووتی: (قودس به‌جێ‌مه‌هێڵن، به‌ڵكو تیایدا چاوه‌ڕێی به‌ڵێنی باوكم بكه‌ن، وه‌ك لهپێشا له‌منتان گوێ لێ‌بوو. یه‌حیا خه‌ڵكی له‌ئاو هه‌ڵده‌كێشا، به‌ڵام ئێوه پاش چه‌ند ڕۆژێكی كه‌م له‌ڕۆحی پیرۆز هه‌ڵده‌كێشرێن.)
به‌رزبوونه‌وه‌ی عیسا بۆ ئاسمان
ئه‌وانه‌ی له‌وێدا كۆببوونه‌وه لێیان پرسی: (ئه‌ی خوداوه‌ند، له‌م كاته‌دا حوكمرانی ده‌گه‌ڕێنیته‌وه بۆ ئیسرائیل؟) ئه‌ویش وه‌ڵامیدانه‌وه: (ئێوه مافی ئه‌وه‌تان نییه ئه‌و ڕۆژو كاته بزانن كه خودا به‌ده‌سه‌ڵاتی خۆی دهستنیشانی كردووه. به‌ڵام كاتێ ڕۆحی پیرۆزتان به‌سه‌ردا ده‌ڕژێ هێز بهدهستدههێنن، ده‌بن به‌شایه‌ت بۆ من لهقودسو هه‌موو ناوچه‌ی یه‌هودیه‌و سامیره‌و تا ئه‌وپه‌ڕی جیهان.
ئه‌مه‌ی ووتو له‌به‌رچاویان به‌رزبووه‌و بۆ ئاسمان، ئینجا هه‌ورێك شاردیه‌وه له‌به‌رچاویان. جارێ ئه‌وان به سه‌رسامیه‌وه سه‌یری ئاسمانیان ده‌كرد، دو پیاو خۆیان نیشاندان به‌جلی سپییه‌وه، پێیان ووتن: (ئه‌ی جه‌لیلیه‌كان، بۆچی وه‌ستاون سه‌یری ئاسمان ده‌كه‌ن؟ ئه‌و عیسایه‌ی لهنێوانتان به‌رزكرایه‌وه بۆ ئاسمان، ڕۆژێ دێ به‌هه‌مان شێوه بگه‌ڕێته‌وه بۆ لاتان.)
هه‌ڵبژاردنی یه‌كێك له‌جێی یه‌هوزا
ئینجا نێرراوان له‌و شاخه‌ی به شاخی زه‌یتون به‌ناوبانگه ده‌گه‌ڕێنه‌وه بۆ قودس، كه به‌قه‌د مه‌سافه‌ی ڕۆژی شه‌ممه1 دوور بوو له‌قودسه‌وه. كاتێ گه‌یشتن چوونه ژوورێك لهنهۆمی سه‌ره‌وه مانه‌وه، ئه‌وانیش ئه‌مانه بوون: پهترۆسو یۆحه‌نناو یاقوبو ئهندهراوسو فیلیپۆسو تۆماو بهرتۆلماوسو مه‌تتاو یاقوبی كوڕی حهلفیو شه‌معونی بهجهرگو یه‌هوزای برای یاقوب. هه‌موویان به‌یه‌ك دڵ به‌رده‌وام بوون له‌سه‌ر نوێژكردن، هه‌ندێ ژنیشیان له‌گه‌ڵ بوو، هه‌روه‌ها مریه‌می دایكی عیساو براكانیشی.
ڕۆژێكیان نزیكه‌ی سه‌دوبیست له‌برایانی باوه‌ڕدار كۆببوونه‌وه په‌ترۆس لهنێوانیان وه‌ستا، بۆیان دواو ووتی: (ئه‌ی برایان، ده‌بووایه نووسراوی كتێب ئه‌وه‌ی ڕۆحی پیرۆز به زمانی داود پێغه‌مبه‌ره‌وه ووتویه‌تی ده‌رباره‌ی یه‌هوزا بێته‌دی، ئه‌وه‌ی بوو به ڕێنیشاندهر بۆ ئه‌وانه‌ی عیسایان گرت. یه‌هوزا یه‌كێ بوو له ئێمه، له‌گه‌ڵ ئێمه ئیشی ده‌كرد. ئینجا ئه‌و كێڵگه‌یه‌كی كڕی به پاره‌یه‌ك كه نرخی ناپاكی بوو، به‌ڵام تیایدا كه‌وت به‌ده‌مدا، لهناوهڕاستدا بوو به دووكه‌رته‌وه‌و هه‌موو ڕیخۆڵه‌كانی هاته‌ده‌ره‌وه. هه‌موو دانیشتوانی قودس به‌م كاره‌ساته‌یان زانی، كێڵگه‌كه‌یان ناونا به كێڵگه‌ی ده‌مخ، به‌زمانی خۆیان به‌واتای كێڵگه‌ی خوێن. ئیتر ئه‌وه‌ی لهزهبوور باسكراوه هاته‌دی: [[ماڵه‌كه‌ی ده‌بێ به وێرانهو هیچ كه‌س تیایدا ناژی.]] دیسان ده‌ڵێ: [[با یه‌كێكی تر جێی بگرێ له ڕابه‌رایه‌تیكردن.]] كه‌واته له‌سه‌رمانه یه‌كێ له‌و پیاوانه هه‌ڵبژێرین كه له‌سه‌رده‌می خوداوه‌ند عیسا بهدرێژایی كاته‌كه له‌گه‌ڵمان بووه، له‌و كاته‌ی یه‌حیا لهئاوی هه‌ڵكێشا تا ئه‌و ڕۆژه‌ی لێمان به‌رزكرایه‌وه بۆ ئاسمان، له‌گه‌ڵمان شایه‌تی هه‌ستانه‌وه‌ی عیسا بووه.)
ئاماده‌بووان دوو پیاویان هه‌ڵبژارد یه‌كێكیان یوسف كه ناوده‌برا به بارساباو نازناوی یوستوس بوو، ئه‌ویكه‌شیان ناوی مهتیاسبوو. ئینجا نوێژیان كردو ووتیان: (ئه‌ی ئه‌و خوداوه‌نده‌ی به‌دڵی هه‌مووان ده‌زانی، بۆمان ده‌رخه له‌م دوو پیاوه كامیان هه‌ڵبژێرین، تا به‌شداریمان بكات لهخزمهتو نێرراویه‌تی لهجیاتی یه‌هوزا، ئه‌وه‌ی هه‌ڵگه‌ڕاوه‌و بۆ شوێنی خۆی ڕۆیشت.) ئینجا شێروخه‌تیان بۆ كرد، مه‌تیاس شێروخه‌تی برده‌وه، ئه‌وسا خستیانه سه‌ر یانزه نێرراوه‌كه.
Source notes (1)
- Footnote مه‌سافه‌ی ڕۆژی شه‌ممه: ئه‌و مه‌سافه‌یه كه یه‌كێكی جووله‌كه بۆی هه‌یه بیبڕێ له‌ڕۆژی شه‌ممه‌دا. ئه‌ویش ته‌نها (1100مه‌تره). چونكه ڕۆژی شه‌ممه ڕۆژی پشوودانه، ئه‌مه‌ش ته‌نها نه‌ریتێكی ئایینیبوو.
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.