دووەم کۆرنسۆس 10

به‌رگری پۆڵس له‌خزمه‌ته‌كه‌ی

1من پۆڵسم، به‌ڕۆح سووكیو نیانی مه‌سیح داواتان لێ‏ده‌كه‌م، من ساكارم كاتێ‌ ڕووبه‌ڕووم له‌گه‌ڵ ئێوه‌، به‌ڵام زۆر چــاونه‌ترسم سه‌باره‌ت به‌ ئێوه‌ كاتێ‌ لێتان دوورم. 2ناچارم مه‌كه‌ن به‌ڕاستی ڕه‌ق‎بم له‌گه‌ڵتان كاتێ‌ دێم بۆ لاتان، به‌تایبه‌تی لــه‌گه‌ڵ ئه‌وانه‌ی وا بیرده‌كه‌نه‌وه‌ به‌پێی خواستی له‌ش هه‌ڵسوكه‌وت ده‌كه‌م. 3ڕاسته‌ ئێمه‌ مـرۆڤین‏و له‌م جیهانه‌دا ده‌ژین به‌ڵام ئێمه‌ وه‌ك خـه‌ڵكی ئه‌م جیهانه‌ شه‌ڕ ناكه‌ین. 4چونكه‌ ئه‌و چه‌كه‌ی شه‌ڕی پێ‌ ده‌كه‌ین جـیهانی نییه‌، به‌ڵكو چه‌كی خودایه‌، توانای له‌ناوبردنی هه‌موو قه‌ڵایه‌كی پته‌وی هه‌یه‌. 5‏هه‌موو شه‌ڕه‌قسه‌یه‌ك‏و هه‌موو شتێك له‌ناوده‌بین كه‌ خۆی ده‌رده‌خات بۆ به‌رهه‌ڵستی زانیاری خودا، هه‌روه‌ها هه‌موو بیرێكی مرۆڤانه‌ به‌دیـل ده‌گـرین بۆ ملكه‌چی مه‌سیح. 6ئاماده‌ین سزای هـه‌مـوو كارێكی یاخی‏بووانه‌ بده‌ین‏، گه‌ر ئێوه‌ به‌ته‌واوی گوێڕایه‌ڵی خودا ‎بن.

7ڕاستییه‌ك هه‌یه‌ پێویسته‌ چاوی لێ‌نه‌پۆشرێ‌و ڕووبه‌ڕووی بنه‌وه‌. كاتێ‌ یه‌كێك له‌و باوه‌ڕه‌دابێ‌ سه‌ر به‌مه‌سیحه‌، با بێته‌وه‌ یادی ئه‌و چه‌ند سه‌ر به‌‏مه‌سیحه‌، ئێمه‌ش هه‌روه‌ها. 8من شه‌رم ناكه‌م، گه‌ر بێتو تۆزێ‌ زیاتر له‌وه‌ی پێویسته‌ شانازیم به‌و ده‌سه‌ڵاته‌ كردبێ‌ كه‌ خودا داویه‌تی پێمان، ئه‌مه‌ش بۆ بنیادنانتانه‌ نه‌ك بۆ ڕووخاندنتان. 9نامه‌وێ‌ وا ده‌ركه‌وم كه‌ هه‌وڵ ده‌ده‌م به‌ نامه‌كانم بتان‎ترسێنم. 10چونكه‌ هه‌ندێك ده‌ڵێن: (نامه‌‏كانی توندو‏تیژو به‌هێزه‌، به‌ڵام ئاماده‌بوونی خۆی كاریگه‌ر نییه‌و قسه‌كانی به‌تاڵه‌.) 11با ئه‌و كه‌سه‌ی ئه‌مه‌ ده‌ڵێ‌ بزانێ‌، ئه‌و شتانه‌ی له‌‏نامه‌كانم ده‌ینووسم‏و له‌وێ‌ نیم، هه‌مان شت ده‌كه‌م كاتێ‌ خۆم هاتم بۆ ئه‌وێ‌.

12ئێمه‌ ناوێرین خۆمان له‌گه‌ڵ ئه‌وانه‌ به‌راورد بكه‌ین یاخود خۆمان بخه‌ینه‌ ڕیزی ئه‌وانه‌ی شانازی به‌خۆیان ده‌كه‌ن‏. كاتێ‌ خۆیان به‌ خۆیان به‌راورد ده‌كه‌ن‏و ده‌پێون، ئیتر هیچ تێناگه‌ن! 13به‌ڵام ئێمه‌ زیاد له‌ئاستی پێویست شانازی به‌خۆمان ناكه‌ین. به‌ڵكو به‌و شێوه‌یه‌ی بگونجێ‌ له‌گه‌ڵ ئه‌و سنووره‌ی خودا بۆی داناوین تا ئه‌و ئاسته‌ی بتوانین بگه‌ینه‌ لاتان. 14ئێمه‌ سنووری خۆمان نابڕین‏و واش داینانێین پێتان نه‌گه‌یشتووین، چونكه‌ ئێمه‌ یه‌كه‌م كه‌س بووین هاتین‏و مزگێنی مه‌سیحمان پێ‌ڕاگه‌یاندن. 15شانازی ناكه‌ین زیاتر له‌‏پێویست به‌ ماندووبوونی خه‌ڵكی، به‌ڵكو هیوادارین باوه‌ڕتان به‌هیز بێ‌و ماوه‌ی كاركردنمان له‌نێوانتان فراوان بێ‌، 16تا مزگێنی بۆ دوورتر له‌ووڵاتانی ئێوه‌ ببه‌ین، نابێ‌ شانازی بكه‌ین به‌و كاره‌ی یه‌كێكی‏تر كردوویه‌تی. 17[[ئه‌وه‌ی ده‌یه‌وێ‌ شانازی بكات، با شانازی به‌‏خوداوه‌ند بكات.]] 18چونكه‌ ئه‌وه‌ی خوداوه‌ند ستایشی بكات په‌سه‌ند كراوه‌‏، نه‌ك ئه‌وه‌ی ستایشی خۆی بكات.