Biblica® Open Sorani Kurdish Book of Life
یەکەم سالۆنیکی 2
خزمه‌ت كردنی پۆڵس
بۆیه ئه‌ی برایان، خۆتان ده‌زانن هاتنمان بۆ لاتان بێ‌سوود نه‌بوو. هه‌رچه‌نده ئازارمان چێژتو به‌سووكی هه‌ڵسوكه‌وتیان له‌گه‌ڵمان كرد لهشاری فیلیپی هه‌روه‌ك ده‌زانن، له‌گه‌ڵ ئه‌وه‌ش خودا یارمه‌تی داین به‌چاونه‌ترسی مزگێنیتان پێبدهینو ڕووبه‌ڕووی ئه‌وانه بینه‌وه كه به‌رهه‌ڵستیمان ده‌كه‌ن. ئه‌وه‌ی ده‌مانه‌وێ به‌ئێوه‌ی بڵێین به‌مه‌به‌ستی خراپه‌و گڵاویو خه‌ڵه‌تاندن نییه، به‌ڵكو هه‌روه‌ك ئێمه ڕه‌زامه‌ندی خودامان به‌ده‌ست هێناوه بۆ ئه‌وه‌ی مزگێنیمان بدرێته ده‌ست، به‌م شێوه‌یه ده‌دوێین، ئه‌مه‌ش نه‌ك له‌به‌ر ڕه‌زامه‌ندی خه‌ڵكی، به‌ڵكو بۆ ڕه‌زامه‌ندی ئه‌و خودایه‌ی دڵمان تاقی ده‌كاته‌وه. خودا شایه‌ته نه قسه‌ی پێ‌هه‌ڵدانتان بۆ دهكهینو نه‌بیانوو دێنینه‌وه بۆ چاوچنۆكی، هه‌وڵی بهدهستهێنانی ستایشی خه‌ڵكمان نه‌داوه، نه‌له‌لایه‌ن ئێوه نه‌له‌لایه‌ن خه‌ڵكیتر، هه‌رچه‌نده مافی زۆرمان به‌سه‌رتان بوو، چونكه نێرراوی مه‌سیحین، به‌ڵام كاتێ هاتین بۆ لاتان به خۆشهویستیو به‌زه‌یی ڕه‌فتارمان كرد له‌گه‌ڵتان وه‌ك دایه‌نێك منداڵه‌كانی به‌خێو بكات. ته‌نانه‌ت ئێمه به شێوه‌یه‌ك ئێوه‌مان خۆشویست، ئاماده‌بووین نه‌ك ته‌نها مزگێنی خوداتان پێشكه‌ش بكه‌ین، به‌ڵكو ژیانی خۆشمان، چونكه ئێوه بوون به خۆشه‌ویستمان. ئه‌ی برایان له‌یادتانه، چۆن ههوڵمانداوهو ماندووبووین، ده‌زانن كاتێ له‌ناوتان مزگێنی خودامان ده‌دا له‌هه‌مان كات شه‌و و ڕۆژ كارمان ده‌كرد تا نه‌بین به بار به‌سه‌ر كه‌ستان.
ئێوه شایهتنو خوداش شایه‌ته، چۆن ڕه‌فتارمان كردووه له‌نێو ئێوه‌ی باوه‌ڕدار، بهپاكیو ڕاستودروستیو بێ كهموكوڕی، هه‌روه‌ك ده‌زانن ئێمه بۆ ئێوه وه‌ك باوك وابووین بۆ منداڵه‌كانی، ووره‌مان به‌رز كردنه‌وه‌و دڵنه‌واییمان كردنو داوامان لـێكردوون تا به شێوه‌یه‌ك بژین جێی ڕه‌زامه‌ندی خودا بێت، ئه‌وه‌ی بانگتان ده‌كات بۆ پادشاهێتیو شكۆمه‌ندی خۆی.
شتێكی دیكه‌ش هه‌یه به‌رده‌وام له‌پێناوی سوپاسی خودا ده‌كه‌ین، چونكه كاتێ ووشه‌ی خوداتان لهئێمه بیست ئه‌وه‌ی پێمان ڕاگه‌یاندن، وهرتانگرت لێمان نه‌ك وه‌ك ووشه‌یه‌ك لهمرۆڤ بێت، به‌ڵكو چۆن لــهڕاسـتی ووشه‌ی خودا بێتو كار له‌ناو ئێوه‌ی باوه‌ڕدار ده‌كات. ئه‌ی برایان ئێوه وه‌ك كۆمه‌ڵه‌كانی خوداتان لـێ‌هات له ناوچـه‌ی یه‌هودیه، واته ئه‌وانه‌ی له عیسای مه‌سیح بوون. ئێوه‌ش به‌ده‌ستی هاوڕه‌گه‌زه‌كانی خۆتان ئازاردران، وه‌ك ئه‌وان به‌ده‌ستی جووله‌كه‌كان ئازاردران، ئه‌وانه‌ی عیسای خوداوه‌ندو پێغه‌مـبه‌رانیان كوشــتو ئێمه‌یان چه‌وسانده‌وه، ئه‌وانه شتێك ناكه‌ن خودا ڕازی بكات، دوژمنی هه‌موو خه‌ڵكن، چونكه ده‌یانه‌وێ به هه‌موو شێوه‌یه‌ك ڕێگا لهئێمهش بگرن بۆ گه‌لانی تر بدوێین تا ڕزگاریان نه‌بێ، ئه‌وانه پێوانه‌ی گوناهیان پڕ بووه، به‌مه‌ش له‌كۆتاییدا تووڕه‌یی خودا به‌ته‌واوی هاته خواره‌وه به‌سه‌ریان.
كاتێ له‌ئێوه جیابووینه‌وه، دوای ئه‌وه بهماوهیهكی كورت بیرمان ده‌كردن، حه‌زمان ده‌كرد جارێكی تر ڕووبه‌ڕوو بتانبینینه‌وه ئه‌ی خۆشه‌ویستانمان، ئێوه له‌به‌ر چاومان دووربوون، به‌ڵام له‌دڵمان بوون. له‌به‌ر ئه‌وه ویستمان دیده‌نیتان بكه‌ینه‌وه، به‌تایبه‌تی خۆم كه پۆڵسم چه‌ند جارێك ویستم بۆ لاتان بێم، به‌ڵام شه‌یتان ڕێگای لـێ‌ده‌گرتین. جا چییه هیواو خۆشیو تاجی شانازیمان له‌به‌رده‌م عیسای خوداوه‌ندمان لهكاتی گه‌ڕانه‌وه‌ی؟ ئایا ئێوه نین؟ به‌ڵێ، چونكه ئێوه شكۆمه‌ندیو خۆشی ئێمه‌ن.
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.