Biblica® Open Sorani Kurdish Book of Life
یەکەم پەترۆس 5
شوانی مێگه‌لی خودا
داوا له‌و پیرانه ده‌كه‌م كه له‌گه‌ڵتانن، من وه‌ك پیرێكی هاوڕێیانمو شایه‌تی ئازاره‌كانی مهسیحو به‌شداربووی ئه‌و شكۆمه‌ندیه‌م كه‌وا ڕاده‌گه‌ێنرێ، مێگه‌لی خودا بله‌وه‌ڕێنن كه له‌نێوانتاندایه‌و چاودێریو خزمه‌تیان بكه‌ن، ئه‌و كاره‌ش به‌زۆر نییه، به‌ڵكو با به‌ویستی خۆتان بێ هه‌روه‌ك خودا ده‌یه‌وێ، هه‌روه‌ها بۆ ده‌سكه‌وتی شه‌رمه‌زار نه‌بێ به‌ڵكو به‌چالاكییه‌وه بێ، هه‌روه‌ها خۆتان مه‌سه‌پێنن به‌سه‌ر ئه‌وانه‌ی میراتی خودان، به‌ڵكو خۆتان بكه‌ن به نموونه بۆ مێگه‌ل. كاتێكیش سه‌رۆكی شوانه‌كان ده‌رده‌كه‌وێ ئێوه تاجی نه‌مری شكۆمه‌ندیتان دهستدهكهوێ.
ئێوه‌ش ئه‌ی لاوه‌كان ملكه‌چی پیره‌كان بن، هه‌روه‌ها هه‌مووتان ڕۆحسووكی له‌به‌ر خۆتان بكه‌ن سه‌باره‌ت به‌یه‌كتری، چونكه [[خودا بــه‌ربه‌ره‌كانی له‌خۆباییان ده‌كات، به‌ڵام به‌ره‌كه‌تی ده‌به‌خشێ بهڕۆحسووكهكان.]] بۆیه ڕۆحسووك بن له‌ژێر ده‌ستی به‌توانای خودا، تا له‌كاتی خۆی به‌رزتان بكاته‌وه. هه‌موو گیروگرفته‌كانتان بخه‌نه سه‌ر ئه‌و، چونكه ئه‌و بایه‌ختان پێدهدات.
چاوكراوه بنو ئێشكبگرن، چونكه شه‌یتانی دوژمنتان وه‌ك شێرێكی به نه‌ڕه‌نه‌ڕ له‌ده‌وروپشتتان ده‌سوڕێته‌وه، ده‌گه‌ڕێ به‌دوای یه‌كێك تا بیخوات. به‌ربه‌ره‌كانی بكهنو چه‌سپاوبن له‌باوه‌ڕ، بزانن خوشكو براكانیشتان هه‌مان ئازار ده‌چێژن ئه‌وانه‌ی وا له‌جیهانن. هه‌روه‌ها خودای هه‌موو به‌ره‌كه‌تێك، ئه‌وه‌ی بانگیكردووین بۆ شكۆمه‌ندییه نه‌مره‌كه‌ی له‌عیسای مه‌سیحدا، دوای ئه‌وه‌ی تۆزێك ئازارتان چێژت، هه‌ر خۆی نوێ‌كه‌ره‌وه‌و چه‌سپێنه‌رو به‌هێزكه‌رو بناغه‌دانه‌ری ئێوه‌یه. بۆ ئه‌وه ده‌سه‌ڵات تاهه‌تایه. ئامین.
به‌ره‌كه‌تی ڕاستی خودا
به‌هۆی سلفانۆس، كه به‌برای سه‌رڕاستی خۆمی ده‌زانم، به‌كورتی ئه‌م نامه‌یه‌تان بۆ ده‌نووسم، تیایدا هانتاندهدهمو شایه‌تیده‌ده‌م ئه‌مه به‌ره‌كه‌ته ڕاسته‌كه‌ی خودایه. تیایدا بچه‌سپێن. ئه‌وه‌ی له‌بابل وه‌ك ئێوه هه‌ڵبژێرراوه، سڵاوتان لێ‌ده‌كات، هه‌روه‌ها مه‌رقۆسی كوڕم سڵاوتان لێ‌ده‌كات. سڵاو له‌یه‌كتری بكه‌ن به‌ماچی خۆشه‌ویستی. داوای ئاشتی بۆ هه‌موو لایه‌كتان ده‌كه‌م، ئێوه كه لهمهسیحدان.
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.